‘Lucifer’ tih hi Bible-ah vawikhat chauh a lang nain kan buaipui hle a ni awm e. NIV ( Nearly Inspirational Version ??) – ah phei chuan i zawng hmu zo kher lovang. Isaia 14:12 ah khan kan hmu a, “Aw ‘Varparh’, zing lam fapa engtizia nge van ata i tlak tak chu le…..” tiha a ‘varparh’ lai kha a ‘Lucifer’ lai chu a ni.
He lai thu hi Babulon lal tlawm tur thu sawina anih rualin Setana sawinaah ngaih a ni a, Ezek 28 chhova Tura lal sunna hla ‘Pathian huan Eden-ah i cheng, vengtu cherub hriak thih i ni…..” tih velte pawh Setana nihnaah hmehbel a ni bawk. “Tichuan, ‘Lucifera’ tia kan hriat tak Setana (Setana tiin sawi zel mai ang) chu a mawina avanga lo chapovin Pathian tluk a tum ta a, van indona a lo awm a, leiah hian paihthlakin a awm ta’ tiin kan in zirtir thin a ni.
‘Varparh’ tih hi Setana sawina anih si chuan Isuan, “ Davida bulpui leh a thlah, arsi eng tak, Varparh chu ka ni,” (Thup 22:16)-ah a lo ti bawk si nen, Varparh (Lucifer) chu tunge ni ta ang le ? Isua nge Setana tih hi zawhna a awm ta a ni. An intawm tih ngawt chi chu a ni si lovang.
Pathian thu thiam leh kohhran puipa hmasate’n an lo khel fe tawh tih hre chungin thu mum fel deuh kan neih theih nan ngaihtuahna i han seng ve ang u hmiang. Lucifer (varparh) tih hi tawng hrang hranga dah kual anih dan tlangpui chu :
- Hebrai : Halal / Heylal / Helil / Heeyleel
- Latin : Lucifer ( Planet Venus ) / Luciferos
- Greek : Foosforos / Phosphoros / asteer / astera
- English : Morning star / Day star / Shining One
- Mizo : Chawngmawii / Varparh / Arsi
A awmzia chu ‘ Eng tak / Enna petu / Ti engtu’ tihna a ni. Mizo rilruah leh khawvel kristian tam takte ngaihtuahnaah chuan Lucifera tih chu Setana sawina bulpuiah kan dah hmiah a, Diabola / Setana han tihte ai chuan a ril hmelin a sual hmel phian bawk a! Chuvangin Bible-a Lucifer tih a lanna awmchhun hi kan phak tawka chhui chian deuh chu a sual lovang.
Kan hriat chian hle tur chu ‘Lucifer’ tih lo lang hi hming (proper noun) a ni lo tih hi a ni phawt a. Tertullian leh Gregory te chuan a chunga kan tarlan tak Isaia 14:12 thu hi Babulon lal sawina anih rualin a phena thuril awm chu Setana Pathianin a paih thlakna thu niin an pawm nghet tlat a. ‘Setana dinhmun chu sang tak, mawinaa famkim, lunghlu tinreng inbel anih avangin a tunhma dinhmun (original state)ah chuan van angel rual, arsite zinga eng ber, zing lam fapa, varparh a ni e, chuvangin Setana hming pakhat (hming hmasa) chu Lucifera a ni’ an ti.
Dr. Henderson-a te ve thung chuan ‘Babulon lal tlawmna thu a ni a, a thuken (plain text) ang hian pawm tur a ni. Entirna dang neih tir tum tur a ni lo, Pathian thu chang dang nen a inmil thei lova, Canaanite Myth angin Babulon lal tlawm tur hi lal ropui tak lo chuai ta anih avangin Venus/ Lucifer/ morning star nen tehkhinin he thu hi Isaia hian a sawi mai a ni’ tiin mei kawhin an tang thung a, Lucifer tih hming ropui tak chu Hmelmapa hming atan an phal thei lo a ni.
Adam Clarke phei chuan ‘Heeyleel’ (Lucifer tia dah) hi Yaalal, Yell, howl, shriek tih atanga lo kal a ni a, “O’ Lucifer, son of the morning” ti lovin “ Howl, son of the morning” tia lehlin tur a ni,’ a ti mauh mai.
Khua a var dawn hian arsi eng tak a lang thin a. ‘Jakoba atangin Arsi a lo chhuak ang a’ (Num 24:17) Chu Arsi chuan khawvel thimah enna a rawn thlen a, eng tak mitin ti engtu tur a ni. “Tin, hrilhlawkna thu nghet leh zual kan nei a ni, khua a lo var a, Varparh arsi (foosforos / Day Star) chu in thinlunga a lo chhuah hma loh zawng chu chu thima khawnvar an ngaihsak anga in ngaihsak chuan in titha ang.” (2 Pet 1:19).
Setana ngaihsaktu chuan an tifuh a rinawm lova, Isua ngaihsaktute erawh chuan an tifuhin an titha ngei tur a ni.. “Kei Isua hian kohhran ho pawlte tan heng thu hi in hnena hriattir turin, ka vantirhkoh ka rawn tir a ni, Davida bulpui, arsi eng tak, Varparh (astera / Morning Star) chu ka ni” ( Thup 22.16). Fiah kek kawk tur chuan ziah chipchiar deuh fe a ngai dawn si a, tawi fel fai deuh kan duh hlawm thin si:
Tichuan, ka unau, Lucifer tih chu ____tu title (proper noun ni lovin) nge ni ta ang le________??
Similar Posts:
- “Leilung pian hmaa talh tawh Beramno” tih hi enge a awmzia??
- Zodiac sign thar!
- Pathian hian mihringte hi a hmangaih tak tak em? PART-I
- MISUAL Physicist & Astronomer chhan(Answer) atan…
- Christmas hlathu diklo ka tih thenkhat
June 22nd, 2011 at 1:23 am
Venus(evening/morning star) an tih thin hi varparh arsi kan tih a hi a ni chiah a maw ni le? ka hre thiam map lo. Arsi soi dawn chuan venus chauh lo poh hi a tam mai ah.
Mahse venus an tih a thin erawh hi chu lucifer a nen a teh khin chu a ni thin fo, Vedas/greek ho hun lai a an ngaihdan ah chuan Pathian chi hrang2 an neih te siamtu leh lo chhuah na hi venus hi ni in an ring. An pathian a te kha kan Bible atanga teh chuan lucifera thlahte an ni daih.
Mahse varparh leh venus a hi a inlaichinna lai awm chiang tak a sawi fiah theih chu ni se hriat a chakom khop mai…….Varparh kan tih a hi venus kher hi a ni em? Lal Isua leh Venus hi chu soi zom na lai awm hi mythology ah ka la hre miah lo…..translation fuh loh vang chauh a ni thei a ngem?
Report this comment
June 22nd, 2011 at 7:05 am
Ka thil sawi hi, ‘Missiological approach’ a nia. Missionary leh Pastor te tan a pawi mawh em em a ni. Missionary patuai pakhat pawhin thahnem ngai takin Juda Iskriot an, a master Isua tangka 30 a a hralh thu kha a sawi ve a. An ri ta mam mam mai a. A thusawiin a hneh hle amaw a ti a. Engvanga ri mam mam nge an nih a han zawh nak chuan, “Ka pu, Isua ai chuan Juda Iskariota chu a ngaihsan awmin a ropui kan ti hle zawk mai a, mahni pu te pawh a hralh thei a nia” tiin an chhang ta daih mai a ni. Anni hnamah chuan, mi dangte bum thei kha an mi ngaih sante an lo ni a, mahni pute bum mai pawh nilo, hralh thei hial kha chu an lo ngai sang hle mai kha a lo ni awm e. “Tui leh leilung reng an din chhuah hmain, Hriat phak loh Pathian i lo ni: NI leh THLA leh ARSITE(Lucifer telin) zawng khian, I zarah ènna ropui an nei ve. Tih hian Mizoten Pathian kan dah san, ropui leh chung nun zia a hril chiang e.
Report this comment
June 22nd, 2011 at 7:11 am
Sunday School a kan zir thin dan ka la hriat reng chu bible a Lucifer-a chu vantirhkoh. Pathian lakah a hel a van atangin a pawl te nen paih thlak an ni. Vantirhkoh nihna hlih sak a nih hnuah Setana/Diabola tih a lo ni ta. (Abrama chu Abrahama a lo ni ta, Saula thin pawh Paula a lo ni ta tih nen a danglam lem lo a nih chu!)
I bible bung leh chang dah atang pawh khian a chiang thawkhat mai alawm
Report this comment
June 22nd, 2011 at 8:07 am
Babulon sawina an ti deuh tlangpui lo maw? Duh dan a kawhtir chuan thil hi a buar chuar thin!
A ngaihnawm e.
Report this comment
June 22nd, 2011 at 11:21 am
Post ka vil lova, ngaihdam ka dil e. A tui zual leh Post helh zual deuh te’n in rawn keu leh peih tak mialin, kam hnih khat aw….
Ka hawng a, ka nupui a lo la meng a, thingpui min lum a, “Lal Hmeltha nu” ka han ti chiam a. Chuti ang chiah chuan Babulon lal ropuina kha “O’ Lucifer (Venus),son of the morning” tiin an ko (sawi) mai a ni.’A phenah Setana sawina a ni e’ tiho chuan Setana hming pakhatah an ngai zui ta a ni zawk. Chulai debate ngaihnawm chu ka rawn chhawpchhuak ve anih kha (kimlo takin).
Dik tak chuan kei pawh hian ‘Isua kha Lucifer a ni zawk e’ han tih dawt hi chu ka ngam ngang rih lo a ni. Kan rilru, thlarau mai ni lovin thling thleng pawhin Lucifer han tih hian hming (proper noun) ni turah kan dah nghet tawh a, Setana ah kan ruat bur tawh bawk si nen.
Pastor senior pakhat sawi ka hrereng thin. “Kan kohhran hruaitu hmasa te’n a him china ngai a, Pathian thu mipui hriat tawk awm min lo hlui thin kha tun hnuah hian kan tifuh ta lo zawk em aw..” tiin Zoram kristianna in Pathian thutak a kal khum nasatzia a sawinaah a sawichhuak hial a ni. Ka ngaihdan chuan Pathian thu chu a dik anih phawt chuan a him chin a awm thei chuang lova, uar lutuk leh chang lakbing, a phen ami tihte, a entir tih kual velte (entir nei chu a awm tehmeuh va), Pathian min pek hriatna fim hmusita engtin emaw danglam deuhva hriatfiahna hmuh tum hi a hrisel lo ka ti bawk. Thutak hai chhuak turin tan ila ho zawk teh ang u a.
Report this comment
June 22nd, 2011 at 12:22 pm
Hmmm…Mi(sual) ah hian theology zirlai/zir zo tawh an lo tam mai tih hi ka hmu chhuak…1998-99 vel daih tawh khan night bus in Shillong atangin ka haw a,ka hnungah BD nge BTh zirlai chawl hmang tur ni tain ka hria a thu a,a bula thu nen an titi tui khawp mai a,a titi atang chuan a in zir bo thak ni berin ka hria,tirhkoh Paula lehkhathawn mai mai te Pathian Thu ah kan lo ngai thin a,nakinah chuan Billy Grahama thusawi te pawh hi Bible a telh duh pawl te pawh kan la awm ang tih vel a sawi kha ka la hre reng mai
Report this comment
June 22nd, 2011 at 12:35 pm
Zovel, kan mi hmasate khan, Pathian thudik an hriat zirtir ngamloh an neih ka hre lo. Kan tun lai Liberal Theologian hovin, tu tu scholar theory, bible a inziak bak, ‘Mosian tui thisena a chantir kha, lui hnara lei sen a rawn len a niang’, ‘Isuan mi 5000 a hraina kha, chhangper 5 leh sangha 2 mai ani lovang, mitin khan an lo pai ru sa theuh a niang?’ tih vel, thu lawilo leh belhchian dawl lo, kohhran nawlpui zirtir hi a tha ka tìh loh piah lamah ka haw tak zet zet a ni. “Isuan Varparh eng tak ka ni” a tih chuan, ani ani mai a, Setana koh nana kan lo hman kumkhua tawh Lucifera hi Isua alo ni reng a lawm tih thar leh vel hi ala hun rìh love kan ti anìh hi.
Report this comment
June 22nd, 2011 at 1:11 pm
Sawi dawtah chuan keipawh PKfanai sawi ang hian theology, higher critical view anga sawifiah tum hi ka hua. Pathian pawhin a huat ka ring. Mi zahawm leh chhuanawm tak ni mahse Rev Zairema’n Isua’n mipui 5000 a hrai chungchang a hrilhfiah a, ‘an tifin an insem’ ti zawnga a sawi kha chu pai daih hi a har ka ti. Rev Chuauthuama lah hian a idol em em a, a hniakhnung a rawn zui chho ve zel te hi a pawi ka ti takzet a ni. Thu leh hla hi a ngah ve phian bawk si a.
Report this comment
June 22nd, 2011 at 2:39 pm
In thlirna hi ka hrethiam khawp mai. Mahse…(ti talh teh ang)Aids(HIV) awareness campaign kan neih hian thudik kan sawi ngai lem lo. (sex atanga inkai chhawn dan bikah hian)A hlauhawm thei ang bera sawi kha mipui tan a him tih a ni thin. Khawvel thilah chuan a dik pawh a ni mahna, Pathian thu-ah chuan paih then deuh emaw belh deuh emaw a thiang lova, a him lo bawk.
Evangelist pakhat pawhin “Mihring fapa a lo kal a, a eiin a in a, chaw heh mi, uain heh mi ….” tih lai a chhiar khan ‘uain heh mi’ tih lai kha a chhiar kan daih mawle. A hma lama a thu kalpui dan nen a inmil tawh si lova.
Hmanni lawk pawh khan a thlarau vanram kaitir tum Kohhran rawngbawltu pakhat chu Bible keu meuhin Isua tholeh taksa chanchin Luka ziak kha ka chhiar khum pek alawm! “Min en rawh u, thlarau ka ni love…” tih vel kha. Chuvang chuan Zoram Kristiante hi kan ‘rau’(nia kan hriat) lutuk ta deuhva, taksa te pawh kan ngainep tan ta a, chung ho lakah chuan fimkhur a ngai a nia, Lu, Krista chu an vuan tawh lo, Paula’n a ti. Mitthi thawhlehna thu pawh kan sawi ta mang lo,mi azawnga mi khawngaihthlak ber kan ni tep tawh. Ka phak tawkah ka vei a ni, hei hi.
Engpawhnise, han keu let ula, ‘Nunna thing vs a chhia leh a tha hriatna thing’tih ka post ve kha han chhiar chiang leh deuh teh u a, pliz
Report this comment
June 22nd, 2011 at 2:48 pm
Bible-a hming lang ve tingah chuan kan inputtir loh pawl tak a ni.
Kan nau Peter-a kan tih chu kan ko duat khawp a, “Terte” kan ti a, a eih lauh lauh mai.
Johny-a ka hriat Champhai-a mi pawh, an ko duat lutuk a, “Anite (aNYte)” an ti daih. Ka bangbo khawp mai lehnghal!
Cathy pawh, Serkhan-a mi a ni a. A chhungten a leng an ko va, “Kethi…” an ti a. Pitar pakhat chuan, “Pu Ngura reng reng pawh hi, a fanu hming atana KE THI a ti hi mak ka ti,” a ti.
Sawi zel lo mai ang.
Report this comment
June 22nd, 2011 at 3:25 pm
Saula chu a pianthar hnuah Paula a nia. Lucifera chu a bawhchhiat hnuah Setana.
zovel leh zoho danglamna hria kan awm
Report this comment
June 22nd, 2011 at 4:13 pm
zoho hi science background nei tha tak anih hmel a, Zovel hi Literature lam a tui hmel in tihna emaw ni le
Report this comment
June 22nd, 2011 at 4:30 pm
Report this comment
June 22nd, 2011 at 4:36 pm
Ka rin danin mi pakhat account 2 nei anih ka ring deuh.
Chutiang anih loh chuan zoho hian french a thiam nual anga, zovela’n a thiam velo ang.
muahaha
Report this comment