Mizo te hi India mi kan ni reng em ?

July 3rd, 2011 10:00 pm by Fonz

C. Lalengkima, Jawaharlal Nehru University, New Delhi-67

Thla hmasa June Ni 30 khan India leh Mizoram National Front (MNF) te inremna an ziah kum 25 na kan lawm a. India ramah hei leh chen kan awm hnu hian Mizo te hi India mi kan nih leh nih lohah hian kan la buai deuh fo mai. Thil ho tak anga lang ni mah se ngun zawka kan ngaituah a ngaiin ka hria.

Tun hnai lawka Cricket World Cup, 2011 khan, a tuipuitu tlemte zingah India team ka lo tan vena atangin India chungchanga Mizo thalai tam tak rilru ka hriat phah nual a. India team aia ram dang team tan zawk kan la tam khawp mai. Inkhelhna thil mah nise engemaw ti takin kan nunphung chiang taka tarlanna a nihna chen pawh a awm ve tlatin ka hria. India mi kan nihna hi inzawh thar leh a lo ngai ta reng mai. Engvangin nge India leh India loh hi zawh a ngaih tak le ?

Eng vangin nge Mizo te hi kan Indian theih loh : Mizote hi Kumpinu (British) in min awp hma kha chuan tu thuhnuaiah mah awm ngai lo kan ni a. Mahse, Kumpinu ral lo lian khan min rawn awp a. Amaherawhchu, India vai ho awp niin kan inhre thei lova, Sap, kan ngaihsan em em leh tluk loh ena kan en ho awp nia kan inhriat avangin hrehawm kan ti lem lova, kan tha a na hran lo niin a lang.

Kum 1947-a India ramin zalenna a hmuh tak khan Lal ram (princely states) dangte ang bawka India rama suan luh kan ni ta a, kan ngaihsan loh leh hnam verveka kan hriat, India hnuaia luh kha rilruin a pawm dam thei lo. Hun a kal zela mahni ke ngeia din duhna boruak a lo awm leh a, Mizoram-in zalenna a sual ve hnu phei kha chuan kan hmuhsit em em vaiho kut han tuar avang te khan India mi nih zawng thil awlai tak a ni ta lo reng a ni.

Benedict Anderson Imagined Community thu han hawh leh lawk i la. Anderson chuan ram khata hnam (nation) hi mi thenkhat ngaihruatna avanga pakhat nia inngai hovin an siam (imagined community) an ni e a ti a. India rama awm tam zawk hian India mi ni ve hian min chhiar tawk lo mai ni lovin keini ngei pawh hian India ni hian kan in ngai meuh lo a ni. India mi nia kan ngaihte nen hian in an lohna leh danglamna tak kan nei a. Samuel Huntington Clash of Civilization ah pawh kan tih dan in ang lohna heng sakhuana, nunphung leh hnam tih dan te hi kum za tam tak ata tawh kan lo chin than a nih vang hian a ral mai dawn nilovin kan ngaipawimawh tulh tulh zawk a ni a ti. Tin, he danglamna avanga harsatna hi ram in hne reng (hmun khata awm) ah a chhuak thei a tih hi a dikna chen pawh a awm ta ni awm e. Tun dinhmunah phei hi chuan kan nunphung, sakhua leh hnam tih dan mai piah lamah kan rilru thleng hian a in kalh (clash) nasa ta hle a nih ni maw.

Charles Taylor-a The Politics of Recognition ah chuan chuan kan nihna hi, min pawm leh pawm lohna hian a hril thui khawp mai a ti. A ram mi ten min pawm lohna hian harsatna leh intih thiam lohna a thlen thei a tih hi India leh Mizo kan inzawm theih miah lohnaah hian a dik chiang hle mai. Chuvangin, keini Mizo te hnam tih dan phung te nei ve tan chuan india hliah hliah hi thil awlai tak zawng a ni hran lo. Kan state hming sawi ve pawh hian a lehkha thiam sang ho zingah pawh hre lo fe fe an tam mai. A dik tak chuan, mahni-lo-maha Indian nih chak loh nak a laia, min la ngaisang duh lo zui hian rilru hel lo sa pawh a ti hel lo thei lo a ni.

India nih duh lo ve dangte : Mizo te chauh hi India nih duh lo kan ni lova, India ramin mahnia ro inrel tura a insingsak lai khan Lalram 568 zingah khan India-a bet duh nge tam ang a, bet duh lo tih pawh hi chhut tham tak a ni awm e. Kashmir leh Hyderabad te pawhin mahnia din hran an tum hial a, Junagadh Lal pawh khan Muslim a nih avangin Pakistan zawm a duh a, mahse phal sak an ni lo va. 1947 hnuah Punjab lamah Khalistan ram din an tum a, Assam-ah ULFA tih ang reng nen. Naga ho pawh tun thlengin an la buai a. Chitin chitang lenna ramah hian India nia inngai lem lo kan tam viau dawn ni awm tak a ni, lungrual taka India mi nih duh mai hi thil awlai tak zawng alo ni hrep dawn lo a nih hi. Amaherawhchu, India ram zalen hnu atang hian khawi ram mah an la indang lova, chu tih a hnekin Goa leh Sikkim te chu a ram atan a lak belh ta deuh deuh zawk a nih hi.

Tu te hi nge India mi chu ni ta le ? : India tih ringawt pawh hian Mizo rilruah chuan vai rim a nam nghal rum rum a, mitthlain vai ngalria tak tak an lo lang nghal bawk a. Mi thenkhat chuan ‘tun hma atangin India mi kan ni lo hrim hrim’ an ti. A dik, India ram bung tam tak hi tun hmain India ram an ni bik chuang lo. Tun hma chuan India kan ni lo, mahse tunah hian kan ni ta a, kan ni lo leh ngawt thei chuang si lo a nih hi. Kan history nen sawi pawlh chiam dawn ila kan buai a thui ting mai dawn a nih hmel.

A nih leh, India ram map hi en vang vang ila khawi lai ber hi nge India chu ni ta ang le ? Tu te nge Indian chu ni ta le? He ram ropui takah hian mi hang deuh leh ngo deuh, hnar bawng, chawn ping leh ruakhau tha deuh thleng hian kan leng vek a. India ram vek leh Indian vek kan ni si a. Khawi lai bik mah hi India bik leh India lo bik a awm lo a sin. India ram tawng 1652 awm leh mi chitin chitang, sakhuana hrang hrang vuan awmkhawmnaah hian Indiana hi pakhat chauh in a sawifiah vek thei lova, tawng, hnam hrang leh tihdan phung, sakhuana in an lohna avanga India leh India loh theih a ni hek lo.

A nih leh India ramah hian kan leng ve reng em ? : India ramah hian mi chitin chi tang len theihna turin dan leh dun zam a ni a. Hnam lian leh te deuhte enkawlna tur leh hnam tenau zual phei chu enkawlna tur dan danglam leh khauh bik India dan pui (constitution) pawhin a tih luih theih hauh loh tur a awm a. Sakhua lamah nise eng sakhua mah duhsak bik lo turin sakhua bik a nei lo va. A ram mi ten an biak ang ang hi India sakhua a ni a, a ram mite tih, hnam tih dan leh nunphung hi India hnam dan leh tih dan phung a ni zel mai a ni. Dan pui leh leh dan te sep a hmanga hnam hnuaihnung zawk kan nihna min humhimna leh vohbikna tam tak min pe a, sawi vek dawn ila sawi tur atam em em a ni. Chu mai piah lamah Mizo te phei chu dan pui pawhin kan hamthatna tur dan Article 371G te hial min siam sak a ni. Mizo kan nih vang hian kan len lohna tur a awm hran lo.

Enga ti nge kan la Indian loh reng le ? : India rama cheng reng si hian vawiin ni thleng kan Indian theih lohna hi ngun taka chhut tham a tling. He ram danglam taka kan danglam bikna hian duhsak loh bikna te, en hniam leh inthliarna tuartu kan ni fo thin a. Tin, rethei harsa, pamham tak tak te, kutdawh koham tak tak an tam avang leh an khawsak a hniam em avang hian India chu ram retheia hmuh a ni . Heng te hian India chhuanawmna a hliahkhuh a, India nih hi kawng tam takin a ti chakawm lo ve bawk a ni. Mi tam tak chuan an vai huat chhan te hi han zawt ila, sawi tur ber kan hre der lova. Ka haw ve hrim hrim kan han ti ngawt a. Vai kut tuar ve reng reng lo, vai rama pawh kal lo leh an bum tuar ve miah lo hlei hlei hian vai kan hua emaw tih theih a ni.

Tin, Mizo te hian India ram tan hian tangkai kan tum teh vak lo, zirna sang zawka zirbingna (research) lamah pawh hian a huang zau zawk lama hawi a, India ram tana thawh leh tan lak aiin keimahni rambil (Mizoram leh North East) bawk hi kan zirbing leh nge nge thin. India ram ang a, tangkai tumna leh tha thawh tumna hi kan nei lo khawp mai. Keimahni ngei pawh hian inhnim hnaih tir ai hian kan hlat zawk zel zawng anih hi maw.

Eng tin nge kan tih tak ang le ? : Mizote hi eng ang pawhin hmelthain, lo hausain, eng ang pawhin inti sap tingtangin, inla changkang teh mah ila, kan hmuhsit thin India rama piang leh seilian kan nih avangin India mi kan ni tho tho. Chu ai mah chuan hnam hnufual, vohbik ngai kan la ni zui. Chutih rual chuan engemaw zawng taka intih Indian viau hi a tul hran lova, intih Indian loh viau pawhin sawng-saw-hlawt teh vak chuang lo. Eng pawh nise la, India a ni emaw, Burma ramah pawh awm ila, Bangladeshi pawh lo ni ila kan ram hi a chhia emaw a tha emaw kan zahpui loh a, khua leh tui tha nih hi kan tum hi a pawimawh ber a ni. A reng thuah hei aia ram tha leh duhawm, India kalsan meuha zawm tur kan thenawm ramah hian kan hmu ngut em ni le?

Heti zawng hian ka ngaihtuah ve mai mai thin. He ramah hian zalenna, duhsakna tam tak dawnga, tanpuina, venhimna, thiamna, finna leh kan mamawh tam tak min phuhruk sak lai a, India mi ka ni lo tih fo hi mi fing ber leh changkang ber hna a niin ka hre lem lo. Hei lo ram dang kan neih miau loh avang hian he ram hi kan hmangaih a, a thatna tura kan thawh ve a, tha leh zung kan thawh ve hi a tul ta zawk a ni. He ram mak takin hlawkna min pek theih te nasa lehzuala dawng ve a, chen a, pek let ve hi kan tum ber lo ni fo se. Chu ti lova, mahni ram leh hnam kan hmuhsit vak hian kan mawng kan hlim lek fang niin ka hre thin. Chuvangin kan awmna tur khuanu ruat ram ropui takah hian lungawi takin a ram mi ni ila, a hahdamthlak mai.

96 Responses to “Mizo te hi India mi kan ni reng em ?”

1
Whatever Says:
July 3rd, 2011 at 10:02 pm
Duhthlanna chu ni se “KAN NI LO NASA MAI” mahse choice awm loh vangin Ni tih mai a ngai ta si. Post sei thei em a…ka chhang dik em ang chu maw..I title chauh ka chhiar hman…First comment hi ka nuam tih zawng tak.
2
ArnieB Says:
July 3rd, 2011 at 10:05 pm
(Y) good idea.
3
Malawma Says:
July 3rd, 2011 at 10:07 pm
Sap ho hnuaiah khan lo awm te reng ila, ngo deuh deuh, buang theng thung, basket ball player leh volleyball player atana tha tak tak tur kan tam thei ang a… 😀 😀
4
hiho Says:
July 3rd, 2011 at 10:12 pm
Mizo – Indian ka ni e.
India ram cheng zing ah mizo an rinawm/huaisen/hmeltha/taima..etc ber te tih thei se.
5
nastycool Says:
July 3rd, 2011 at 10:15 pm
malawma @ 3, mingo sawn 😛 (bastard) an tam ngawt nag.
6
Chhuanawma Royte Says:
July 3rd, 2011 at 10:15 pm
India ram a cheng, citizenship nei kan nih a hnu…post ho e mai..
7
H.Vangchhia Says:
July 3rd, 2011 at 10:28 pm
Zohnahthlak te hi India khua leh tui ni kan awm laiin India khua leh tui nilo, Burma leh Bangladesh a la awm te an tam mai. Mizoram pawnah hian Zohnahthlak an tam zawk viau nghe nghe awm e.

Chuti anih chuan India map chhunga awm chin hi India khua leh tui nihna nei kan ni mai a, a awm velo te chu India khua leh tui ani lo thung. A awmzia chu Mizo te hi India khua leh tui (Indian ka ti ngai lovang) nihna kan neih vang ngawt hian India mi pangai, Vai angin India mihlun kan ni ngailo. Tun hnu kum 100 emaw atanga India ram awpna hnuaia kan awm vangin a khua leh tui nihna nei kan awm ve mai a ni e.

“Indian first” ti a thlangkawrvai hoin an inchhal thin ang hi kan ni velo, Mizo/Zohnahthlak 1st kan ni tlat. Mak tak tak, thuthlung dik hmel deuh deuh hian tawngkam thiam avang hian thu lawilo hi in ziak inziak hlawm mai , atha ka tilo tawp a ni.

Mizoram hian independece kan hmu tawh ngaiin ka ring lemlo. Khawchhak leh khawthlang (Bangladesh etc.) ami te nen pawh ram khat angin kan awm leh ngai pawh ka ring tawh chuanglo. Mahse, Indian citizen kan nih avang ngawtin “Indian first” ang rilru hi put tur ani ngai love. Mahni nihna hai lui talh tluka mihring nep hi an awm leh ngai dawn em ni!

Helam census ah pawh Mizo (India) ti ngatin ka ziak a, a awmzia ka hrilh a, an “Aw” ve hmak. Indian hi ka ti tawl ngai lovang…ka thlahte pawh hian an tih loh hram ka beisei. (Y)

Indian Chinese pawh an awm a, China ramah Tibetan an awm bawk a… enge chutiang kan nih loh bik. Kan danglam reng renglo. Tibet ram nen ngat phei chuan case khat kan niin ka hria.

Thu Lawilo Tak A Ni E (N)
8
gikoumene Says:
July 3rd, 2011 at 10:29 pm
niah,khatih laia kan ram hruaitu te khan an lo dawn thui ber anih hi ti mai ila,tha ber ang.K hriat ve dan ah chuan India ram a beh kha an duh jok tlat ani.hehe:p(ka hresual pwh ni thei.Chiang bik m2 lo ania)
9
saumbura Says:
July 3rd, 2011 at 10:36 pm
Tun thlengin mi thenkhat chuan India mi kan ni ngai lo an la ti fan. Mahse, India indan dawna ram ri an siam khan British-in India a awp chin (Excluded area a ni emaw ni lo emaw) sawi awm lovin India ram a ni ang tih a ni mai a.

Then khat chuan, excluded area kan ni a, min huam lo, tih an tan chhan a. Mahse, hei hi tan chhan tak tak tlak a ni em aw, ka ti. British ram awp chhungah kan awm ngei si a. Kan ram awptute pawh kha Sap ngei an ni bawk si. Buaina tur a awmin ka hre lo. Kan duhthlanna renga India kan ni lova, India mi ngei erawh kan ni. (Y)
10
H.Vangchhia Says:
July 3rd, 2011 at 10:42 pm
saum #7 khi chhiar teh 😛
11
Pangpuielhtliaka Says:
July 3rd, 2011 at 10:57 pm
Indian chu kan ni meuh mai e. A chhan chu India ram chhungah kan awm tlat alawm. kan awmna chhan chu enga pawh chu nise, a pawm thiam te an hahdam, apawm thiam lote an buai. Mahse hahdam duh ringawt hi a ni ber bik lo mai thei. Kan history leh kan pi leh pu, nu leh pa te tawrh na atanga chhut chuan India khua leh tui kan nih dan hi chu a lawmawm lutuk loh. Mahse tih theih dang kan nei tawh lo, chuvang chuan kan India chu a ngai ta anih hi le.
Thil pakhat leh chu India tiha vai ho kan rilrua a lo lan chhan hi dem tur kan awm love, Mizoram buai laia a hel ho te leh nunau pawisawi lote thliar hrang chuang lova min nghaisa a nunrawng taka kan chunga thil ti te ho kha vai ho hi an ni miau si a le, Mizo hmeichhe tam tak pawngsuala, mipa tam tak that a, khua te hala, hrehawm taka min siamtu (achhan engvang pawh nise mi pawisawi lo te chuan engtikah mah kan hrethiam lovang) te kha vai ho an ni si a. Tin, tunlaia an chin tawh miah loh hel te beih nana khati tak maia in suat ral vek pawh pawisa lova hma la tu ngei pawh kha kan Indira-i ngei anih kha. Chuvang chuan kan rilru put hmang hi a pawng apuiin in dem thei hran pawh kan ni love.
Keihi Indian ka nihna ah hian ka chiang thawkhat khawp mai, mahse ka nu leh ka pa te, ka pi leh pute tawrhna te kha chu ka theihnghilh kumkhua lovang.
12
bucko Says:
July 3rd, 2011 at 11:04 pm
Mizo indian kan ni ka ti ve tlat. Eng dilna emaw form fill up ngai ah hian Nationality :_______ tih a lo awm hian INDIAN kan ti kulh thin a ni lawm ni??? Niamhsela kan rilru erawh a indian thei tak tak lo chu anih hi maw…….. Infiamna lam ah India aia ramdang tan thin khan Mizo tlangval India team a an han tel meuh chuan India kan tan hluah hluah a ni lawm ni, (Hmanni lawk a Qatar leh India inkhel(Football) ah pawh khan Je je-a leh Dika te tan in kan au a, India kan tan a ni…… Post tupa… India Cricket team ah khan mizo tel se chuan ramdang tan an awm ka ring lo.
Indian kan ni a, kan rilru erawh a Indian thei tak tak rih lo a ni bere tiin ka’n tawp phawt teh ang…
13
TuaiSialA Says:
July 3rd, 2011 at 11:07 pm
Fonz-a, C. Lalengkima hi i thianpa misualdotcommer kha a ni lo’m ni?
14
Sony Says:
July 3rd, 2011 at 11:40 pm
Zawhna athlak ber of 2011 atan ka nominate e. Lushai Hills leh Assam district dang zawng zawng kha British (Indian) empire chhung zinga mi vek kanni a. India independence khan a tel hmasa berte kan nih chu. History dik tak ani. A ziaktu (post tu nilo) hi eng university ami nge? Mao Zedong University chu ani lo phawt mai a. A thawhna hming atang reng reng hian a chiang vek alawm.

ICC Wolrd Cup laia team dang lo tan fun fun kei chuan ka tawng lo phawt mai. Eng ang mi tehreng nge a lo enpui dawn ni?
15
pa-para Says:
July 3rd, 2011 at 11:48 pm
He thu-ah hian ka veng hawk na tur ngaihdan fel tak zam chhuak thei awm se ka va ti em. Indian nih na a ka hmin thlap theihna tur emaw, against Indianism ti chunga ka tan ral raihna tur khawp thudik (truth)/ideology zawm tur ka duh khawp mai. Lungawi si lo lungawi anga awm hi a hahthlak em mai a.

Nehru-an “Indian culture hian culture tenau tam tak a lem ral tawh a ni” tih a sawi khan dawn a ti thui khawp mai. He rilru hi mainstream Indian te hian an la pu reng a ni tih hriat a tha. India rama chhunga Mizo te hi kan Indian tawlh tawlh dawn a, kan Mizo culture hi an la chiahzawp vek dawn a ni.

Politics hi a danglam reng a, khawvel politics ah hian engmah nghet tlut a awm lo. India ram pawh hi hnam hrang hrang in pawlh kan ni a, India ram hi a la disintegrate ve lo ang tih tu nge sawi thei.

Indian National movement a kal vung lai a Muslim hoin M.A. Jinnah an lo nei bik kha an vannei bik mang e..
16
true ^mizo^Boy Says:
July 3rd, 2011 at 11:48 pm
#7 Pu Hv hi ka thlawp hmak e (Y) (Y)
17
khirha Says:
July 3rd, 2011 at 11:51 pm
India rama awm kan nih avanga ‘Indian’ kan nihna chauh hi kan inanna awm chhun niin ka hria. Unau ni lo pui chu unau ang taka khawsak a har a nih hi!
Kan chhehvela hnam tenau zawkte an chimral zel lehnghal a, keini pawh hi min chim mek a, kan la ral lo deuh chauh chu a nih hi. A post-tupa pawh hi a ngaihtuah awm khawp mai!!! hehe…
Zoram, tang fan fan……
18
bucko Says:
July 3rd, 2011 at 11:55 pm
Hmm.. Eng ang pawhin Indian ka ni lo ti mah ula in ni tho tho. Dan ang chuan. In rilru erawh a Indian lo a ni thei e. Keipawh hi ka rilru hi chu a Indian thei ngai lovang……. Ka duh tawk e… mangtha u le.
19
khirha Says:
July 4th, 2011 at 12:00 am
sorry, a post-tupa ka tih khi a ziaktu tih zawk tur.
20
bucko Says:
July 4th, 2011 at 12:05 am
Uh Oh… #12 a post tupa tih khi ziaktu pa tih zawk tur…
21
pa-para Says:
July 4th, 2011 at 12:06 am
sawi duh sawi zoa mut daih te chu a, a Indian thlak em mai @bucko
22
loneeagle26016 Says:
July 4th, 2011 at 12:07 am
Vai kan nih loh chhung hi chuan Indian tak tak anih theih lovang….anni pawhin min pawm that duh miah loh hi…Post tupa sawi ang khian, lo in tih Indian vak hian awmzia a nei lova, Indian loh vakin awmzia a awm hlei lova… chuvangin Mizo tak hian awm ila a tawk ani mai lom ni….. (Y)
23
Mx Says:
July 4th, 2011 at 12:11 am
Indian kan niiiiii…abak sawi vak2 angai lo! Buai lohna tura buai vak hi ho ka ti tlatt.. Indian kan nilo ti ti mah ila engmah a pawchhuak chuang lovang. Ram dangah kal ila “eng mi nge inih” tiin min zawt ta se ‘INDIAN’ tih bak sawi tur kan nei chuang hleinem le..
24
megapixel Says:
July 4th, 2011 at 12:13 am
#14, a ziaktu hian political history zawngin a thupui hi a chhui lova, Mizote (a bikin Mizoram) zingah RILRU taka India khua leh tui nih hreh tlat kan la tam zia leh a chhan leh vang a rawn sawi mai alawm. India Constitution hian a phalrai bawka keini ho hi kan vannei zawk ngawtin ka hria.

Marawhchu, tih tak emah chuan central sorkar hian sum leh paiin min chawm hneh lo sela chuan eng emaw hleka rammut duh kan tam ngawtin ka la ring tho.
25
pa-para Says:
July 4th, 2011 at 12:16 am
Assimilation tih hian ‘Mizo’ ka awm tawh dawn lo tihna lam a ni lova. Mizo fir hi kan la awm zel dawn. Mahse kan rilru hi a ni an lem pil tur chu…Jana Gana Mana hla hi ka sa tui thei der lo, ka ngawi hmiah zel. Tu te emaw anga hnukulh teuh a sak theih ve a chakawm rum rum thin, heti kan nih takah chuan..
26
Saitawk Says:
July 4th, 2011 at 12:16 am
A thu chhiar hma in a thupui khi ka’n chhang lawk teh ang. India ram-a kan awm chhung chuan Indian kan ni. India ram chhunga awm rau rau ah chuan Mizo-te hian Indian nih kan hreh ber awm e. Mahse Indian kan ni tho tho hrih si.
Indian ho hi chu Vai ni tura ngaihna lian tak hi kan pianpui reng tawh.
27
hlatekhua Says:
July 4th, 2011 at 12:18 am
H.Vangchhia @7 sawi ang khian India ram chhunga cheng, India khua-leh-tui nihna nei Mizo-te hi Indian (k)an ni a. India khua-leh-tui ni lo Mizo te chu Indian nih thu a awm lo.

A awlsam zawnga sawi chuan “Mizo hi Indian ni leh Indian ni lo kan awm a ni.”
28
chhingdailova Says:
July 4th, 2011 at 12:44 am
Thiante u, India mi kan ni reng a ni ti rawh u. Mizo zawng zawng India a sawi thu a cheng love, he thu ziak lai hian Mizoram mitthla chunga ziak a nih vang hian Mizo tih hian Mizoram lam chauh ngaihntuahna in a thleng pha a, in lo hrethiam mai dawn nia. Mizo te hi kan Indian loh zia hi misual.com atang hian a lang chiang ber in ka hria, Cricket World Cup laia post kan en let ngat chuan kan lo la Indian tawk lo zia chiang takin a a lang thei a ni. Political history a tangin thlir ila Naga ang lek hian kan danglamna bawk hi kan tuipui ber tur a ni lo thei lo ang. Tin, Kan rilru a awm reng tur chu Mizoram a chhuah tur thuziak reng reng hi nitin inhlawhfa, lehkha zir sang lem lo, zirlai, zirtirtu, mi thiam leh sorkar mi pawimawh zawk te mitthla chunga ziah a ngaih avang hian a theory leh a nek a nawk a chhui vak a rem lohna te a awm ve thin. A khai rual thei ang turin mi thiam te thu ziak la tel tho si mi tin mi tang in kan hriat thiam theih tur a ziak a ni e. A ziaktu pa hi University a thawk lai a ni lova, India ram left belt, a bu pui awmkhawmna a zirlai pakhat ve mai chauh a ni bawk e…. A ziaktu pa hian khua leh tui tha nih theihnghilh thaka kan in ti Indian lo hi a fuh lo e, kan ram hi chhe hle mahse la kan chhuan ve angai a ni tih rilru nen a ziak a ni e.
29
anihtakchu Says:
July 4th, 2011 at 12:56 am
A post tupa, i ziak tha ka ti hle mai. Indian nih hi duh lo viau mah ila kan ni miau si a.

Mizoram chhung a mizo te inpumkhatna kan sawi zing viau tawha a, mizo hnahthlakte nen a inpumkhatna nen chuan tehkhin a rem chiah lo nagnin, mi tam tak comment atang khi chuan, zo hnahthlak inpumkhatna duh tu hlei hlei khian indian nih harsa kan tiin kan chenna ‘India’ mite nunphnug leh culture a inhnimphum ka hlau leh em em lawi si. Indianess a inchiahral kan hlauh ang bawk hian, zo hnahthlak tamtak hian mahni hnam bil zia leh culture hloh thak khawp a “Mizo” an hlau a ni ve mai lo maw?
30
H.Vangchhia Says:
July 4th, 2011 at 12:58 am
anihtakchu #7 na khi chhiar ve hram teh, neutral rilru pu ngeiin. (Y) 🙂
31
anihtakchu Says:
July 4th, 2011 at 1:05 am
@H. Vangchhia, ka comment hma hian ka chhiar dap tawh a sin.
32
chhingdailova Says:
July 4th, 2011 at 1:07 am
India khua leh tui nihna lo liama Indian na a awm dawn em ni le. India thlah nina thluka India na a awm thei bawk lo ang. Mizo first kan tih hi thil tha tak zawnga ni e, Mahse India second ti duh miah lo kan awm erawha buaithlak thin a nih hi.India nihna hi zohnahthlak in zawm khawmna nen hian a dal hran lo. Kan nih ang hian India kan ni mai a, India avanga an culture zuk tawm pawh hi a tul na hek lo, chu erawh kan pawm angai a ni……
33
anihtakchu Says:
July 4th, 2011 at 1:19 am
@ chhingdailova, a dik viau mai. Mizo kan nihna ‘identity’ bo miah lo hian a Indian theih tih hi ka pawm dan a ni. Amaherawhchu kan nunphung leh zia rang a in an loh em avnag hian anmahni zing a incchiar tel hi a harsa kan tih chang a awm fo, a awmlo hran lo in ka hria. He rilru tho hi zo hnahthlak kan unau te pawh hian an nei veah ka ngai, mahni hnam bil hamthatna tur ngaihtuah avang a an hma lak na hrang hrang te(eg. hnam pual zirlai pawl, etc)avang leh mizo tawng an lo pai deuh avang mai a Mizo lo ta riau a kan ngai te, (sawi tur tam tak a awm ang)hi chu a felhlel deuh thin in ka hria.
34
H.Vangchhia Says:
July 4th, 2011 at 1:20 am
#31 e 🙂

#32 (Y) Mizo first, Indian second. Chinese te Tibetan te hi kan entawn a tha. MI thenkhat inti indian ta lutuk ho hi a tullo lutuk. India rama in pian chuan Indian citizen inni tho tho, intih indian vak a tullo. India hian min awp reng tlat tawh dawn anih hmel.

Tunah erawh mi tlawmngai thenkhat en UN an la dawr reng a eng tak nge kan la an ang erawh a la sawi theih lova!
35
Astericâ„¢ Says:
July 4th, 2011 at 1:26 am
Pu Hv-a hi hnial rawh u, ka lo pui ang che u…. 😀 😛
36
anihtakchu Says:
July 4th, 2011 at 1:33 am
@ awpbeh nia inngaih te hnuai chhiah ni tlat a inngaih te hi a hahthlak, rilru a dam theih lo a phunnawina leh sawisel tur zawn reng a awl. Min tuamhlawmtu ‘India’ ramah hian handam takin awm ila, central sawrkar a hna sang sang thawk te hian awm teuh i la tha mai lo maw.
37
chhingdailova Says:
July 4th, 2011 at 1:34 am
#35, PU Hv khi apawngapuiin hnial mai lo e, a sawi Mizo first tih khi a dik a lawm. Vai ho ang hian kan Indian thei hauh lo ang, vai ho ang hian indian tur pawh ka ti hran lo. Mahse Tibet nen chuan ka intehkhin lem lo.India hian independent sem se la tlar hnungah, a hmu har pawlah kan awm ka ring tlat….
38
H.Vangchhia Says:
July 4th, 2011 at 1:41 am
chhingdailova #37 Tibet nen kan tehkhin ve fo mai. An mahni pawh hi zawt ila, mihrang/ram hrang annih zia leh China hian a hneh chhuh anih zia an hrilh thei zel ang che u.

An in leh restarant bangah te hian, “Kan ram China in nei tawh mahse, kan thinlung an nei ngai lovang,” tih ang zawng a intar deuh ngei ngei tih in hmu thei ang.

Midang tan han sawizau leh ila:
Mizo te hi chu tawngkam thiam lam lam awn a pan riak ruak mi kan nihna hian thu dik pawh hi kan interpret diklo zeuh zeuh a, a hnu chuan diklo takah kan chhuah fo niin a lang.

Zohnahthlak India rama awm te hi chu Indian citizen (Mizo Indian) kan ni chiang alawm, phat rual a nilo. Mahse, tunge/enge kan nih theihnghilh dawn dawn a, Indian first ang rilru put hi a tul hlawllo a ni. India ram pawnah India ram chhunga kan awm hma atang tawh a kan khaw hlui a tam em asin.! Kan chawr chhuahna leh kan hnam bul kan chhui theih (evidence awm) chin hi India ram ani ngailo hrim hrim.

Inhnialna chi pawh a nilo, dik hi “E” ti ve mai thin sela a ni mai. “In ka hria” emaw, “A dik tho alawm,” tih ang chi hi a dikhlel leh fo duh ania.

India rama piang te khan, “Indian citizen ka nih angin Indian chu ka ni alawm,” ti ula, Indian first ang rilru erawh pu tawh ngai suh u
39
anihtakchu Says:
July 4th, 2011 at 1:44 am
inhnial vak vak hi a hlawk ber lem lo, ‘inhnial’ a nih tawh chuan mahni tanna dik ber a ngai a sawhsawn duh bur loh, tan laklawk a awm thin. Mahni ngaihpawimawh zawng leh vei zawng hi sawi i la, mi ngaihdan chhiar bawk ila, kan tanna a dik ber tawh lo a kan ngai a nih chuan ngaihdan thlak mai ila a hahdamthlak. Ka ngaihdan tih avanga, dik lo deuh ni a kan hriat tawh hnu pawh a la sahuai thing vawn tlat te pawh hi tha ber lem lo.
40
anihtakchu Says:
July 4th, 2011 at 1:51 am
#38, Hetiang ang thilah hi chuan 2+2=4 tih ang hi a awm theih chiah lo a nia, ngaihdan ‘idea’ a nihna hi hriatthiam a ngai viau a sin. Dik ber hi a awm thei lo chawk a sin. Pawm tlan te hi chu a awm thei teh meuh mai, kan pawmtlang thei a nih chuan a tha. A dik ber tia han sawi ngam tur erawh a nih ka ring lem lo. mi ngaihdan inzahsak tawn thiam hi a fin thlak ka ti mai mai.
41
Atom c Says:
July 4th, 2011 at 2:07 am
Bak(bat) angin awm vel mai mai teh ang u,. 😉

#7
42
Ignatia (33-115 AD) Says:
July 4th, 2011 at 2:12 am
‘Mizo first’ han tih tawp mai chu a tha ang em aw ka ti deuh. Hei hian a hrin chhuah chu induhsak bikna uchuak tak ni maiin ka hre thin. Mizo first ti duh kan nihna hian ‘Kan colony first’ ‘Ka vua leh vangte first’ ‘Ka chhungte first’ tih vel hi a hring a, a tawpah ‘Keimah first’ chuan hengte hian a hrin chhuah chu Hlemhletna a ni mai.

Kan rilru putdan hi a pawimawh. Thlirna tlangdang atanga thlir chuan ka ngaihdan hi a IDEAL viau mai thei a mahse hetiang avang hian kan buai reng si a ni. Compare theih loh ang pawn a lang mai thei mahse kan rilru put hmang a tarlang miau sia. Khua leh tui tha tak nih hi tum theuh ila a thain ka hria. Khua leh tui tha nih dan chu kan hriat theuh kha….
43
H.Vangchhia Says:
July 4th, 2011 at 2:15 am
Hnam leh nihnaah hian YES leh NO chiah a awm thei. A laihawl a awm theih loh.

Mizo first, Indian second. Mizo te Indian first kan nih chuan India/Mizoram a pianglo te tan a ngaihna a awmlo hrim2. Mizo kan nihna hi khawiah pawh a hmasa a ni. EG: African American, Irish American, Indian American, Chinese Indian, American Mizo, Burmese Mizo, Australian Mizo, Indian Mizo, Indian Tibetan etc etc.

Sawrkar hna in thawh naah pawh in nihna in chian hlawm viau ka ring a ni. I hnathawh aimah khan tunge i nih/eng mi nge i nih chiang ang che. Hna leh ram citizenship chu thlak a awl lutuk, kan nihna erawh chantuanin a ni zawk e. (Y)

Hnial hrat leh luhlul tukhum pawng tan lo chuan ka sawi awmzia hi hriat thiam loh tur a awm ka hrelo hrim2. A diklo ti thei in awm bawk hek lovang.
44
Sangpuiipa Says:
July 4th, 2011 at 2:43 am
Kei chu ka INDIAN rem rem khawp mai. Ram dang pem na tur ka hriat hma chu ka indian reng ang.
45
Sangpuiipa Says:
July 4th, 2011 at 2:49 am
Mizo te hi engtik atang khan nge Mizo kan nih? British min awp hma khan hnam pumpui khaikhawm nan Mizo tih hi an lo hmang tawh reng em? An lo hmang tawh anih chuan Mizo kan ni mai. An hmanglo anih erawh chuan Indian kan ni mai.
46
anihtakchu Says:
July 4th, 2011 at 2:59 am
#43, Ralte Mizo, Pawi Mizo, Hmar Mizo etc a va ni nuai mai awm ve.!
47
Sangpuiipa Says:
July 4th, 2011 at 3:07 am
Mizo te hi sap in min awp hma kha chuan a hlawm a sawikhawm na awmlo in hnam bil hrang hrang hming kha an pu mai thin. Chumi bak hnam dang awm ho reng reng chu vai tiin an sawi mai thin. Sap ho khan kan hnam hming hi Lushai(lusei)/Mizo ti in min khaikhawm sak a, chuta tang chiah chuan Mizo tih hming kan pu ta ani.
48
zoho Says:
July 4th, 2011 at 3:22 am
‘Kei chu Pathian pawl’ kan tet lai a kan han tih a, tifuh
kan intihtheih zia kha. John lennon – Imagine there’s no
country tih te pawh ka ngaihtuah chhuak uar uar mai.

HV khi ka support e.

Sap ho divide & rule hi thinlung taka pawm mai chu a har
ka ti.Mainland India in Indian ah min ngai chiahlo
lehnghal.Politics nilo, society ang zawng in.

Indian unity hi a kehchhe lovang tih hi a sawi theih lo
ve. Gandhi family kut ah thui tak a awm e.

Chutih laiin, kan awmna hi a mak ka ti, Pathian in plan a
nei em ni aw te ka ti thin. Khawvel a sakhaw diklo lian
zet zet 3 in min hual a, keini hnungkhirh sak a kan awm
tlat lawi si te hi a mak lehzel( spiritual bondage a nia
ka sawi)

India a awmzel hi a prospect chu a thaber hrih ah ka ngai
lawi si.

à¤•à¥‹à¤ˆ à¤®à¥‡à¤°à¥€ à¤®à¤¦à¤¦ à¤•à¤°à¥‹, à¤®à¥ˆà¤‚ à¤µà¤¾à¤¸à¥à¤¤à¤µ à¤®à¥‡à¤‚ à¤‰à¤²à¤à¤¨ à¤®à¥‡à¤‚ à¤¹à¥‚à¤ :-O
49
H.Vangchhia Says:
July 4th, 2011 at 3:24 am
Sangpuiipa #47 Entirna in kan chhang ang che:

Red Indian kan tih, Native American ho hi hnam hrang2 in an awm hrang a, ramri nei theuhin an khawsa thin. Anni phei chuan an hnam te te kha “Nation” tiin an sawi hial thin. Entirnan: Sioux nation, Cherokee nation etc. Mingo ho an luh hma kha chuan an mahni leh an mahni hnam hrang2 te kha ram chin leh ramvahna lte inchuhin an indo nasa thin a ni. Chutia hnam hrang leh chi hrang, indo reng ni bawk mah sela, an culture & tradition etc. chikhat an nih tlat avangin an mahni pawh an inhai lova, hnam hrang2 e tilo chuan mingo leh hnamdang lakah chuan pumkhatin an awm a, an tangrual a, pumkhat/unau annih ang chiahin ral an do tlang ta thin a ni. Kohdanah an buai ve hranlo, tunge/enge annih an hre tlat.

Zohnahthlak te pawh tunhma chuan ramri leh thil dang vangin an lo indo ve thin. A hnam ang pawhin an indo thin a, a khua ang pawhin an lo indo tawh thin a, a chhim leh hmar zawng pawhin an lo indo ve tawh thin a ni. I sawi British te khian, “Anni chuan Zhou, Shou, Yo, Jo emaw Yaw tiin an in ko/sawi” tiin an record a ni. Indo indo thin nimah ila, Nation khat= culture, religion, traditon etc. inang kan nih vangin British ho khan chikhat kan nih an hailo reng reng.

Mizo te hian tinge ni kan nihna hi kan hai fo thin mai ni le, a pawi ka ti a, ka tah inti chhuak bawk! :-S
50
H.Vangchhia Says:
July 4th, 2011 at 3:27 am
Mizo first as always (Y)
51
Chhuaklinga Says:
July 4th, 2011 at 7:14 am
E ka hriat loh hlanin in lova sawi nasa hlawm ve, mizo kan ni chiang, 49 sawi chhunzawmin red indian ho khu hnamdang european hoin an zu chim hma khan red indian an ni ngailo mahse tunah chuan khawvelin a hriat dan in red indian an ni mai. Chutiang chiah chuan thlang kawrvaiho lo lan hma khan mizo tih kan ni lo va, awpbeh kan nih hnu chuan khawvelin mizo tiin min hre tawh mai a ni. Red indian ho chanchin han hriat nawm takah chuan mizo nihna a kan chian thar a tul zia kan hre vek awm e. Khawi ram a mi pawh mitthi khua a mi te zawng2 nen mizo chu mizo a ni tawp mai..
52
pa-para Says:
July 4th, 2011 at 9:24 am
Keini kan tlawm kum 25-na kan lawm mek lai hian kan thenawm state thenkhat a pawl hrang hrang te chuan “sovereignty” ngiatin an la rammu mek a. Indian ni chunga dam nge an thlan dawn Indian ka ni lo tiin thih thlengin an tang dawn i lo thlir zel phawt mai ang u. Indian Economy a thang uak uak mai si a,development a zuang bawk si, Kan thenawm a ‘insurgents’ te pawh India sorkar nen a inbiak an sawi an sawi ta mai. Kei ni ang bawkin India ram khin a hautak zia an hrechhuak ve dawn a ang. Amarawhchu, an ni chuan ‘Central University’ tih ang mai mai an ngiat ve lo vang. Naga ho buaina chinfel nan chuan “constitution” khawih rap rap a ngai dawn tlat.

Mizo nihna ah hian kan chiang viau tawh emaw ka lo ti a, YMA leh MZP ten Hnam insuihkhawm lehna an tlangau pui rei tawh si a. Mahse la chianglo (or Chiang duhlo) kan la awm tlat hi a mak zawk khawp tawh mai. MIZO + CHIN + KUKI = ZOHNAHTHLAK, ZOHNAHTHLAK zawng zawng POPULATION ( INDIA + BANGLADESH + MYANMAR) = Approx. 20 Lakhs plus
53
sparta Says:
July 4th, 2011 at 10:12 am
Sap, kan ngaihsan em em leh tluk loh ena kan en ho awp nia kan inhriat avangin hrehawm kan ti lem lova, kan tha a na hran lo niin a lang.

Lalnu Ropuiliani kan hriat chhuah zawk chu le.
Sap(mi ngo) an nih a vang in ka ngai sang lo khawp mai, an sual sual nen. mahse mimal a ngaihsan chu ka nei nual.

India hmanni lok a awm ve chauh ah hian ka tui thei thlawt lo, kan tet lai khan History subject te kan nei ve thrin a, Mizo chan chin a awm lo hrim2 kha mak ka ti INDIAN kan nih si chuan. Kha ti ang em em a MIZORAM min soisa bik kha ka theih ngilh dawn lo reng reng.
54
Dr Mahminga Sailo Says:
July 4th, 2011 at 10:32 am
Mifing leh ril tak tak in han titi hi chuan, comment hnuhnung apiang hi “a dik ber awm mang e” ka lo ti duam duam thin

Kei chu, Mizo, India khua leh tui ka ni a, Nationality Indian a nih chu. Chuan, Indian ka nihna ah, Schedule Tribe (tribal kephahhlai dik tak ) ka nih vang a ka duh leh tuina subject zir a, hna chhete (ka phu tawk) ka hmu tak zel vang hian Indian ka ni hi ka lawm ve vur vur khawp mai

Chuan, heti khawp a India sawrkar in Mizoram an duat chung a, central sawrkar a thei fate’n an eilan (ruk nilo in..) luai luai chung pawh a, India sawrkar in min la chawm ta zel hi kan vannei viau in ka hria, kei misual hian
55
Sangpuiipa Says:
July 4th, 2011 at 10:34 am
@sparta, in chhiar zau belh deuh hlek i mamawh a ang khawp mai. India hi hmanni lawk a ding a ni love.
56
Fonz Says:
July 4th, 2011 at 10:39 am
Ka va post tha ve. Fonz, good post . Post of the year.
57
sparta Says:
July 4th, 2011 at 10:48 am
@Sangpuiipa August 1947 ah chauh a lom, chu mi hma chuan INDIA ni ngai hek lo.

An mah ni kan duh hle nem a ram a lom kan duh.
58
Sangpuiipa Says:
July 4th, 2011 at 11:13 am
@sparta, a hming chauh ani i sawi ni. India ram hi hmakhawsang atanga awm tawh a ni asin. British ho lam thiamlo in India tiin a hming an phuah mai zawk chauh a ni. Tuna i kum rawn sawi hi British awpna hnuai atanga a zalen kum a ni a. Hemi hma hian INDIA hi kum tam tak a lo awm tawh asin.
59
sparta Says:
July 4th, 2011 at 11:32 am
@Sangpuiipa Hmakhawsang lai chuan MIZORAM poh INDIA a lo ni toh m? Rajput lalte, Mughal lalte khan MIZORAM an ron luh ngam poh ka ring lo ve. A chhan chu pasal thra te khan, pheikhawk poh bun ngailoh na kephah hlai chang tawk khan an lo chhir hrep dawn a.
60
Pc-a Says:
July 4th, 2011 at 11:39 am
India sawrkar hian minhan ui ve em em a, kanlo induh ve khanglang a. Ka nuih a zaaaa.

MNF rammu ta te kha ka khawngaih talzet a ni, an rammut chhan kha an hre der silo.
61
Sandman Says:
July 4th, 2011 at 12:12 pm
Pu sangpuiipa – A hma te pawh in India chu an ti tho na a (British hma fe pawh khan helai area chu “India” tih a hriat tawh a ni), mahse ram ri leh mi bik a nei ngailo, ka lo hriat ve dan chuan. India an tihna chhan chu Indus river te leh Indus Valley civilization atanga lo piang a nia, mahse Lal leh dynasty hran hran hnuai a heng ram te hi an awm avangin, nationality Indian ang zawng chuan a kal ngailo.

Hmanlai a Persia ram kan tih ang vel hi a ni ang, hmanlai India chu. Chuan kan hriat angin, Persia tih chu a awm tawh lova, Mesopotamia tih ram pawh a awm tawhlo, tunah chuan Iran, Iraq, Syria, Turkey tih te an ni daih tawh.

India/Indians tih term chu 1947 Independence kan neih atang khan a rawm awm, ka lo hriat ve dan chuan. To be more precise, Jan 26, 1950 a Constitution ah first article an pass khan “India/Indians” tih term chu official takin a lo piang e (India, that is Bharat, shall be a union of states). Hetiang lam ka chhiarlohna a rei tawh lutuk a, ka hresual palh hlauh a nih chuan min rawn correct dawn nia.

Hman lai “Indians” te nen compare kan tum chuan, tuna Pakistani, Bangladeshi, Afghani etc te pawh hi Indians vek tur an ni a sin
62
chhingdailova Says:
July 4th, 2011 at 12:19 pm
Kha maw… History lam chhui dawn chuan kan buai a thui ting ang tih a in ziah kuau khi mawle….. History tanga chhui vak vak chuan India pawh a India hunah kan buai nghal pang hi….A thu chhiar mang lo hian kan comment vak a ang thin khawp mai. He post in a tum ber chu kan ram hian hamthatna tam tak min pe ve si a, kan ram a nilo e ti ti lo hian hahdam taka awm in kan ram thatna tur hian i thawk vein khua leh tui tha tak nih i tum ang u tih a ni ber. India leh a tobul atang kan chhui vak vak zawngin kan buaia thui ting mai dawn a ni si a……
63
kawlnicolney Says:
July 4th, 2011 at 12:30 pm
mizo nireng si mizo ka nilo ti ho leh indian ni reng si indian ka nilo ti ho hi an danglam vak pawhin ka hrelo.mahni nihna a chian hi alo har ani ange.Im indian,am very..chhuang.India=unity in diversity
64
Sandman Says:
July 4th, 2011 at 12:34 pm
“Mizo First, Indian second” tih chungchang hi chu… Mizo te chauh hi kan ni hleinem “Mizo first” in ti hi. North East tribe hran hrante mai pawh an nilo. Helam Maharashtra ah teh pawh “Marathi First, Indian second” ti an tam. South lamah te pawh “Tamil First, Indian second” ti an tam bawk hle. Kan ram indo lai emaw sports team in kan ram an represent lai te hian a ni mai kan in lak Indian first chu. India ramah hian Nationalism aiin Regionalism hi a sang fe zawk. Chuvang tak renga India hi “Unity in Diversity” kan tihna chhan.

Vai te hi in ang vek tur hian kan ngai thina. State hran hrana hun in hmang tawh chuan, Vai te zingah pawh regionalism vanga in ti buai hi an tam hle a ni. Hindi hua ve em em pawh an tam. Kan dang ang em em hian dang ve lo mahse, an ni pawh an inanglo ve vek tho.

Article ah pawh hian a rawn ziak chiang hle a, 1947 khan Independence nei mah i la, hmun hran hran (Goa, State of Hyderabad, Damn & Diu etc) te kha chu India an join duhlova, Indians pawh an la nilo angin a sawi theih ang – Chumi awmzia chu, keini Mizo 1947 a India ram hnuai a kan lo awm tan lai a Indians kan nih lai khan, Vai tam tak chu Indians an la nilo.

Document a inziak leh mahni feeling tak tak hi chu a dang thei. Pu HV a pawh a in ti Mizo hle a, a nihna reng a nia, Mizo/Zohnahthlak article a post/comment te pawh a ngiahnawm thei hle a ni… mahse US citizenship a neih dawn chuan Oath of Allegiance lak a ngai a ni lawmni kha?

I hereby declare, on oath, that I absolutely and entirely renounce and abjure all allegiance and fidelity to any foreign prince, potentate, state, or sovereignty of whom or which I have heretofore been a subject or citizen…. etc etc … so help me God.

Hemi awmzia chu “Mizo first” nilovin, “American First, Mizo second” a tih a ngaih hmel… NOI Pathian hminga promise a la ni zui… mahse ka hriatsual chuan min lo ngaidam la, pu HV. Engpawh nise, ka sawi tum chu, chhungrilah chuan a Mizo nihna ah a chiang em em a, chuvangin mahni ngaihdan leh Constitution a inziak hi chu a in kalh ve fo thei in ka hria…

Article ziaktupa in a sawi: “Chutih rual chuan engemaw zawng taka intih Indian viau hi a tul hran lova, intih Indian loh viau pawhin sawng-saw-hlawt teh vak chuang lo.”

A sawi hi ka thlawp hle.

Chuan “Indian ka nilo” ti a intihtheihpui a “Indian in ti ho chu hnam ah an chianglo” ti ho hi chu ka support lo bur e. NOI again…
65
Dr Mahminga Sailo Says:
July 4th, 2011 at 12:45 pm
@ 64…
66
Fonz Says:
July 4th, 2011 at 12:52 pm
He post hi chhiar satliah ringawt ani lo, a thu in ziak essence man tur hian len den that viau a ngai :D. Once again, ka va post tha em. Fonz, good post. chuan Tv. TS, a ziaktupa hi ka thianpa ani in ka hria, kan in hmuh ve thin tawh kha mawle.
67
VaiVa Says:
July 4th, 2011 at 1:08 pm
Ka lo OT lawk… Fonz, a ziaktu par hi Dexter-a a ni em aw?

Kei chu India mi pawh ka ni ve lo. India sipai ka nia. Isarel sipai te, Kumpinu sipaite pawh Mizo an intih ve tho avangin Mizo mi ka ni bawk
68
Fonz Says:
July 4th, 2011 at 1:15 pm
Vaiva, Dexter-a ni lo e.
69
dalbat Says:
July 4th, 2011 at 1:50 pm
Ethnic group anga Mizo kan inchhal dan leh Indian kan nihna hi a inang hlei nem le. Assamese ho pawh anni, Marathi te, Tamil te hlei hlei hi. Chuvang reng chuan National Integration pawh hi kal mek anih mai.
70
no_nick Says:
July 4th, 2011 at 2:21 pm
@64 Sandman : Ka thlawp che..!!
71
Sangpuiipa Says:
July 4th, 2011 at 2:29 pm
India mi ka ni lo ti in iak iak mah ila, india mi kan ni tho tho. @pu sandman, solomona hunlai khan India tih a ni daih tawh e. Bible ah pawh kan hmuh kha. Khatih hunlai a India kha zau zel in tuna Keini Mizo te chenna pawh india rama rin luh a ni ta a. Chumi lai tak chu ani sparta ka chhan na hi. India hi hman ni lawk a awm a ni lova, kum tam tak kalta atanga awm tawh ani e tiin sparta hi ka chhang zawk a ni e.
72
pa-para Says:
July 4th, 2011 at 2:40 pm
India is still in the making (@)…

But politics is dynamic (Y)…

USSR disintegrates, Will India follows…

Where will India be, in the next 100 years…
73
faith Says:
July 4th, 2011 at 2:55 pm
Mizo nula, India khua leh tui nih tak nih hi a va zahpui awm loh em, Indian Cricket team kha ka tan teh mai nia, an team spirit kha entawntlak khawp mai, a tha lai zir i la, a tha lo lai paih ngam i la, hma i sawn zel ang u..Pu Chhingdailova nge nge, thu leh hla tha tak tak ram leh hnam tan i rawn thawh thin a, i taimakna a fakawm thin hle mai
74
faith Says:
July 4th, 2011 at 3:05 pm
A bik takin a comment tir lam khian a thu an chhiar chiang hmasa lo a nih hmel khawp mai, belchiang hmasa lova ngaihdan huaisen taka sawi thin ho hi an hlauawm a nia, a awmzia hre hmasa lovin i comment ngawt lo vang u..midangin taima tak leh ngunthluk taka an ziahchhuah thatchhe taka lo comment pawr ve viau hi i sim daih ang u, a changkang lo em mai.
75
jesuslovesme Says:
July 4th, 2011 at 3:58 pm
Sandman @ 64. 6th Para LOL

Mizo te hi hnam(te) kan ni a. Independence kan sual chhuak zo ta lova, chuvangin Nationality ah chuan INDIAN kan nih mai hi a tul ani. Vai hovin an ti chamchi a, in la hrang tur chuan tumah inti Indian thei bik kan awm chuang hlei nem ‘State hrang hrang te tawng hran hrang hmang, ze hrang hrang nei kan ni a, Indian ni bik leh ni lo bik kan awm lo’ an ti. A dik ve hle a, keini tan erawh a dik famkim lo.

Indian subcontinent tih leh Indian culture(i ti mai teh ang) chiah piah loh hrim hrim kan ni a (kan history ah).British ho khan min rawn awp tel ve kher lo phei sela chuan India ramah rin tel kan ni ngai dawn lo ani. Vai state dang danga cheng ten in anglo an intihna te chu, Mizovin anmahni kan an lohna ai chuan a tenau zawk em em ani.

Race khat deuhthaw a chhiar theih anni a [Aryans (North India),&; Dravidians (South India)], Sanskrit leh Tamil kaihhnawih tawng hmang vek an ni a, Hindu sakhaw be tute an ni, Muslim invaders te lo thlen hnu ah Hyderabad ah te, Delhi ah te etc. ah Muslim rulers ho an lo awm tak avangin Muslim nen Hindu ho chu pawlhin an lo awm ta a, tawng hrang hmang ni mahse, Mughal hovin hmun an rawn khuar atang phei kha chuan Indian subcontinent hi khawvel khat a ni chiang leh zual ani, Lal hrang hrang awp in awm mahse.
Chuvangin MIZO ten kan anlohna leh culture, tradition kan hranna hi sawi mam hram tum aiin celebrate zawk tur ani.

Good Post. India hi (with all its imperfections) democracy ram ani a, kan chheh vel South Asia ah hi chuan zawm tur ram thlan ral ah pawh thlannahawm ber ani tih hi i hai lovang u. ” Mizote hi eng ang pawhin hmelthain, lo hausain, eng ang pawhin inti sap tingtangin, inla changkang teh mah ila, kan hmuhsit thin India rama piang leh seilian kan nih avangin India mi kan ni tho tho. Chu ai mah chuan hnam hnufual, vohbik ngai kan la ni zui.”
76
H.Vangchhia Says:
July 4th, 2011 at 4:12 pm
Sandy #65 Zohnahthlak ah hian Mizo Union hruaitu te lo khan ‘Oath of Allegiance’ ang tur chi hi Hindustan hnenah intiam/ inpelut an awm ka ringlo hrim hrim.

Mizo first, Indian second
77
muansakhi Says:
July 4th, 2011 at 4:17 pm
India ram chu thil 3 ah chiah kan inlungrual thei…Cricket match, Bollywood movie leh Kargil war an ti a, ahmasa 2 khi ka la en peih lo lehnghal a nia le(h). Indian-na thlarau hi chu chang pawn ve lauh lauh tak ka ni.
78
chhangteval Says:
July 4th, 2011 at 4:18 pm
Tihluihna a Indian ni ta kan nih hi, chutih rualin Indian nih vangin hamthatna tam tak kan dawng ve bawk
79
H.Vangchhia Says:
July 4th, 2011 at 4:21 pm
Min hnial dan tur emaw, Indian forst ang zawnga rawn sawi tum ten ngaihtuah hrep hnua in rawn sawi hnu pawh hian in buchip tho tho
80
H.Vangchhia Says:
July 4th, 2011 at 4:37 pm
Mi chuan hetiang te hian an ti:

https://www.youtube.com/watch?v.....r_embedded
81
chhingdailova Says:
July 4th, 2011 at 4:42 pm
Faith chu leh……Tribal nula chawnping,Indian nula nih zah pui miah lo tu hi i chhuanawm a hle mai…..Burma ramah rin luh kan li ni a nih pawhn Burma khua leh tui tha tak i nih ka beisei tlat. I sipirit hi a ropui e………..Mizo nih te hi kan zah pui lo telh telh ka beisei. Pu HV a te reng mai sap ram tang in an Mizo hi maw………
82
funny Says:
July 4th, 2011 at 4:50 pm
A lo nih tak chu mawle.
Mizo kan nih chuan keimahni tawng tal hi chu ziak uluk ve deuh thin bawk ila.
83
H.Vangchhia Says:
July 4th, 2011 at 4:53 pm
#76 ami khi #64 tih tur
84
Ignatia (33-115 AD) Says:
July 4th, 2011 at 5:01 pm
John Adams thusawi ka’n ngaihthlak leh tak keuh chu le. ‘Mizo first’ ti thei tura inzirtirna hi a uchuak lutuk thei a nia. India inrelbawldan hi Federal system ni chung hian Decentralisation lam hi kan in nghahna a ni tlat bawk tih hriat khiau a ngai. A nih loh chuan 1966 ang kha kan ngai leh viau mai ang. India khua leh tui tha tak nih hi a tha ber e. A kal peng ang zawnga han tih luai luai erawh a tha lo ang. Article ziak tuin a tum ber pawh niin ka hria.

America-in John Adams thusawi hi an chhuang thin niin an sawi a. Keini pawhin Pu Nehru thusawi hi kan ngaihlu asin. En ve zeuh zeuh thin rawh u. A link ka lo paste e..

https://www.youtube.com/watch?v=1wUcw8Ufx_Y

Tin, American Mizo, Australia Mizo,ldt. ang hian Indian Mizo tih theih kan ni lem lo bawkin ka hria. Keimahni hi Indian dik tak kan ni e. Zalenna pawh kan mamawh rih chuang lem lo. Pu Nehru thusawi hi kan zallenna dar khawngritu ni zawk thin rawh se.
85
Zephyruss Says:
July 4th, 2011 at 5:15 pm
Mizo Kan ni, mahse India ramah kan awm– Hahha — Buaithlak thei khawp mai, ramdang a chhuah dawn hian Indian Passport holder nih hi chu a ninawm thawkhat tawh– thil hi a harsa vek! Kan vanduai eeee
86
sparta Says:
July 4th, 2011 at 6:30 pm
Indian kan ni tia a thren kan Indian em2 lai in Indian zing ah Mizo hre lo te an la om a, Chinese emo min ti tlat te an om zui…. Chingky chingky chingky
87
kawlhawk Says:
July 4th, 2011 at 6:41 pm
duh vang reng ni lovin india khua & tui kan ni. Kan thisen erawh mizo a ni. “Tui aiin Thisen a tak zawk” Chuvangin, ka thisen 1st, khua&tui 2nd ka ti lo thei lo.

Khawvelin indian a hmuhdan leh a ngaihdan han hriatchian tak2 chuan e, lo inlak indian viau hi a thring tops! Ram dang fan chang ni a indian hmel ang ka lo pu lo hlauh te, ralkhat atanga indian anga min ngai lo hlauh te, indian ini thei lo, ka awi lo…tia min ngainaa min nel mm thin te hi vannei ka inti a, nihlawh ka inti hle bawk.

Miin, Indian ka ni hi ka inchhuang a, ka zak miah lo…an ti thei hi mak ka ti a, fak an phu ka ti. Mizo ka ni hi ka inchhuang hran lo, pawi ka ti lem lo bawk. Indian intih a tul leh thin erawh zahthlak ka ti a, pawi ka ti vawng2. India ram chu eng ang pawhin lo thang chak se, lo hausa thur2 mah se, khawvela ram chak ber meuh pawh lo nise, khawvelin indian/india mi a hmuh dan leh ngaihdan avang zawkin… HVa a tawp thlengin ka thlawp bawk
88
H.Vangchhia Says:
July 4th, 2011 at 6:58 pm
In chiang lo niai nuai hlawm mange. Kan la ral thuai ang hetiang chuan. Tripura khu nakin Mizoram awm dan tur niin ka hmu lawk.
89
chhangteval Says:
July 4th, 2011 at 7:08 pm
Mizo ami kan nih
90
vivia Says:
July 4th, 2011 at 7:29 pm
Ka ngaihtuah ka ngaihtuah hian…. lo intih Indian viau nachhan tur hi ka hre lo hrim hrim.
Inti Indian viau lo tur hi kan ni zawkin ka hria.
91
zualbonez Says:
July 4th, 2011 at 7:35 pm
Mizo kan ni , Indians chu politically chiahin kan ni…Mizo nihna ah chiang viau tur chuan phakar ngeng viau tur mainland Indians nena in relationship naah chuan
92
zualbonez Says:
July 4th, 2011 at 7:37 pm
Mizo kan ni , Indians chu politically chiahin kan ni…Mizo nihna ah chiang viau tur chuan phakar ngeng viau tur mainland Indians nena in relationship naah chuan ..that is all…over and out …entikah mah Indians ah min ngai dawn chuanglo an rilruah mental block nawhreh theihloh a awm tlat…
93
chhangteval Says:
July 4th, 2011 at 7:46 pm
Vai ai chuan naga ka hua
94
muahmuah Says:
July 4th, 2011 at 9:02 pm
First e bal e…. I am an Indian as well as a Mizo. thats it….

Mizo first, Indian second ti-a trang kawh tlat ho hi India khua leh tui nihna nei Mizo ni lovin Balma Mizo an ni lo maw
95
xx12 Says:
July 5th, 2011 at 4:33 pm
Delhi hmasawnna leh Aizawl hmasawnna hi ka tan chuan ang khat a ni.Terrorist ten india an beih hian mizoram an beih a ni.mizoram hmasawnna chu India hmasawnna a ka ngaih.keima bikah chuan MIZO FIRST=INDIAN FIRST
96
xx12 Says:
July 5th, 2011 at 4:37 pm
INDIA is my father.mizoram is my mother.i love my mom and Dad..kikiki