mi(sual).com

Mizo te hi hmun hrang hrangah kan in zarpharh ve ta zel a, kan awmna hmuna thilthlengte hi Zoram leh hmun hrang a awm Mizo unaute cho chhuahnan han phawrh ve leh zauh thin ila, in finchhuahna leh entawn turte alo awm a nih pawhin Zofate hmasawn nan nise la. Thuthar phei chu a ni tawh lova, June 25, 2008 a thil thleng kha a ni.

Ringtu nun kal mekah hian, Pathian malsawmna dawng tur chuan, tuar hmasak ngamna te, inpek ngamna piah lamah Pathian thu tiam alo thleng dik chauh thin, chu chu ‘fiahna pal tlang hnu-ah’ ti pawhin kan sawi thin awm e.

Khawvel thilah pawh leh kha zir taima chuan result tha a nei a. Mi taima hna thawk nasa chuan a thawh rah a seng nge nge thin. Mi huaisen chuan hming thatna leh malsawmna an dawng bawk a….

Pokhara mipa naupang kum 12 mi Michael Kamal Nepali in, hmeiche naupang kum 2 leh a chanve, Aradhana Pradhan, lei-kak thuk tak Meters 30 (Feet 60 an ti bawk) a tla – darkar 22 hnu-a, a zu chhar chanchin chuan Nepal chhung a deng chhuak hneh hle. Nepal pawn Australia, USA, England chanchin bu then khat ah tarlan a ni hial a.

Aradhana Pradhan

June 25, 2008  (Nepal calendar a – Asar 11, 2065) khan Shillong (Meghalaya, India) atanga lo kal, Missionary Pastor la naupang tak, Shillong Nepali, John Pradhana a enkawl ‘Anugraha (Grace) Church’ member Priscal Poudel fapa naupang berin chatuan hmun a pan tak avanga – Pokhara Kristiante thlan mual neih hmasak ber Kharabari hmun, Naya Gaon, Seti lui thuk tak kam ah an vui mek a.

Lui a thuk avang leh a kuang a zim avang-in, lui luang ri a nasa hum hum thin hle. Kristiante kan invui lai hi, ringlo mi thenkhat ten luiral lehlam atang te, leh mi thenkhat thlan hungna bangah lawn-in an rawn thlir ve thup thin.

He thlanmual hi, tun hma INF (International Nepal Fellowship) ho hun laia an lei a ni a. INF in Ramghat Kohhran hnenah an hlan a, tichuan Kristian thi apiang te phum nan an hmang ta zel a. Tunah chuan, thlan mual zau zawk leh tha tak – Kohhran tangrual-in an lei tawh a.

Mahse, a hlat deuh avang leh hemi hmunah, hmun awl ala awm nual avang-in, he thlan mual hi hman ber ala ni rih a. Pokhara khawpui lai-li lai a, lui kuang zimtak leh thuktak si a luang tlang – Seti luikam mai a nih avangin, lei a min thin mai bakah, eng ngemaw hunlai atang khan min chiah si lovin hmun then khatah thuk tak-in a pawp nual a.

Tun ah phei chuan a pawp mai ni tawh lovin, a khi kak phei ruah tawh a. A khi kak kar feet 10 vel thleng chu puitling tan pawh a zu luh theih nghe nghe a. Chumi bak, puitling luh theih tawh lohna khawp a zim, feet 60 a thuk in, thenkhat laiah, pawp tlang thla ala awm leh a.

Feet 60 chin ah puk ang deuh hniam chit chet in L ang deuh in a kawi phei leh a. Chumi piah hret atang a pawp-thla leh chu engtiang chiah a thuk nge hriattheih a ni ta lo. Thir khen an ti tla palh a– ri thla ral ral a – a ri a zawi ral raih thei a ni.

Mithi an vui lai mek-in, naupang duhawm tak leh inhlei tak – awm hle hle thei lo, Aradhana pawh a nu Estheri nen anlo in fiam a. Reilote ah a nu hnen ata kal hrang-in naupang pakhat a zui a. An in vui zawh mek lai chhun dar 1 leh a chanve velah chuan, luiral atanga rawn thlir tu te an rawn au ta chul a, lei kakah naupang tla an awm tih an hre thiam zui ta nghal mai a – tu nge ni ta ang le ???

“..hmangaihna chuan min tir lui a ni…” tih a nih kha, Pastor John Pradhan pawh hlauhna hre lek lovin, a fanu neih chhun a hmangaih em em, lei kak kara tla chhanchhuak turin a lutthla ve nghal a – mahse, puitling luh thlak ve theih lohna chin, hmun chep tak karah a fanu duhtak chu a tla lut tlang ta si a.

A nawlpui luh thlak in huam tak tak te chu beidawngin anlo chhuak leh ta hlawm a. A lo chhuak a piang chu a berh tha hlawm hle. Mipui mi mir te tih theih bak a nih tak si avang-in, Police lam an pun ta a.

Esther, Aradhana & John Pradhan

Pokhara Police ho anlo thleng a, theih tawp an han chhuah ve ngial pawh in, naupang kum 2 leh a chanve tlak luhna, lung chep tak kara inzep lut thei an awm ta bik silo va, a bei dawn thlak ta phian mai. Mipui pawh anlo pung khawm nasa ta hle a.

A ko tlang atanga, leikak chhung zuk bih tum an zi nuk mai a, thenkhat-in lung anlo ti tla lut palh leh ta nghal a, chu chuan Police pakhat, a chhung a lut mek lu ah, a zuk deng a, a hliam nat deuh avangin damdawiin ah kalpui a ni ta hial a. Police nawlpui lo thlengin, mipui an hnawt kiang a, a lutthei te bakah, a lut te a ko tlang atanga lo tanpuitu te chauh, a ko bul hnai ah awm an phal ta a. Thlanmual gateah pawh, a mi na zawng luh an phal ta lo hial a.

Police tlawm ngai, a chhunga lut te anlo chhuak a, an zing a pakhat hah leh beidawng hmel tak chuan, “..a tlak luhna kua a zim avangin puitling tan luh theih a nilo…” a ti a, a han hawi kual a, naupang kum 13/14 awm vel ria sa pan deuh, a bul hnai a awm chu a han kawk a, “ hetiang rual sa pan deuh chu an lut thei ang maw le….” a ti a.

A bul hnaia ka lo din ve lai ani a, chu naupang chu – “..zuk lut ta che ” ka ti a. Chu naupang chu a han hawi kual a, a thian, a bul a dingte an tawlh hlat tak hret hret avang chuan, “..A ka lut duh lo ” a ti a” “..zu lut la i rawn lak chhuah theih chuan, malsawmna tamtak i dawng ngei ngei ang..” ka han ti leh hram a.

Mahse chu naupang chuan, a duh loh tlat avang chuan tih ngaihna a avang ta hle. Chu tih lai mek chuan, Pa cher sa pan tak, a hmel atang pawh a zu duh ve tak tih hriat ngawih ngawih, “Ju-thre” ti a an koh hi a rawn in volunteer ta a. Zu no hnih vel anlo pe zauh nge? a tlawm ngai viau mai a.

A chhung luh a – tih dan tur te Police hovin an han zirtir fe hnu chuan “Aradhana” ti thla lauh lauh chung chuan, hrui-in an khailut thla ta a. Alo chhuah leh theihnan a khai chhuak tu tur te chu- hrui hmawr vuan-in, an intlar puut mai a. A zuk bei ngial a, a kotlang atang leh hung pawn atangin mipuiin beiseina nei takin anlo nghak thup mai a. Kristian ho pawhin compound pawn-ah tawngtai rualna nen tan anlo la reng bawk a.

Reife hnu-ah, amah chauhvin alo chhuak leh ta a. A thu rawn hawn chu, “.. naupang chu a la dam a, ‘uncle…uncle.’ alo ti lawm lawm a. A aw chu ka hre thei a, mahse a awmna lut thla tur chuan lung chep tak kara in zeh luh a ngai a, ka leng si lo…” a ti.

A kua han ker zau turin, lung themin a zu per/delh ang tih a hlauh awm bawk si, tih ngaihna avang ta hle mai. Juthre-a chu, Police ho chuan, no hnih vel an han tulh leh zauh a, a zuk bei leh a, eng a ang thei ta bik lo. Khua a thim tan ta ruai ruai bawk nen, nu leh pa rilru….nat dan tur chuh….

Katmandu lam atang-in, Kathmandu Canon Team anlo kal mek tih chuan beiseina ala ti awm deuh a. Mi ram chu nise, helicopter in anlo kal ngei ang. Nepal a ni miau mai si a le…Micro bus in anlo kal………….

Mi tlawm ngai thenkhatin, Generator an rawn la a, lei kak karah chuan light bulb an uai luh tir a, a chhung pawh a en thla thui ta phian a.

Puitling an luhlen miau si loh avang leh, naupang lut ngam, in volunteer an awm miau si loh avangin, Pokhara Police leh army ten, a luhthlakna kaw dang a awm mial dah lo maw…tiin lei kak hmun hrang hrang atang-in kawng an dap a. A chhung lutthla te  hmanraw neih a nep deuh avangin, pakhat chu, ka Head lamp (torch light- chal hren chi) ka hman tir ta nghe nghe a.

Mahse, a tlakna kua bak kaw dang an hmuh belh ta lo. “..Aradhana..” ti a an au an au pawhin, chhang let tu aw pawh an hre ta lo…a muhil nge?…A chat thla ta..? Zan dar 1:30 a.m alo rik tak avang leh han tih theih a awm rih loh avangin inlam ah kan haw san ta rih a.

Zing dar 8 leh a chanve a kan va thlen leh chuan, a hma ni aiin mipui anlo tam fe tawh zawk a. Gate chhunga lut thei si lo, chanchin ngai chang leh thuthar hriat tumin, thlan mual gateah anlo ding cham put mai a, anlo thu hmur bawk a. Van neih thlak takin Gate duty army chuan, gate minlo hawnsak hlauh a, kan lut ve leh ta a. A ko tlangah chuan, Police-ho an duty nasa tawh hle a.

A ko sir deuhah chuan Police hotu IGP, SP te leh chanchinbu mite, Politician te leh Kristian tlem Puan In (tent) kaihah anlo awm a, Kristian nu hovin mi tlawmngai leh hahzualte tan – ei leh in anlo buatsaih a. Canon Team te pawh zing dar 4 ah lo thleng-in, an thiam leh theihna thawh-in, anlo tal bal tawh hlawm hle. Mahse, naupang te reuhte tlak luhna a lut leng an awm bik tlat loh avang-in eng an ang ta bik lo.

Dar 11 a ri dawn ta, ni lah chu a sa vawl vawl hle (ruah a sur lo pawh, Pathian hna-thawh ropui tak a ni). Chutih lai chuan, naupang hang leh bal tawp ve tak, kum 12 mi a hming “Michael Kamal Nepali” an rawn hruai a. “Hei hi Naya Gaon Kohhran Sunday School naupang, naupan tet lai pawh a hlauh hrelo ani ” tih chu a rawn hruaitute sawi ber chu a ni mai a.

A la tet bakah amah a buh deuh bawk si nen – eng tak ang ang maw le… Chhang thawp leh Fanta (cold drink)te an han intir a.. an bawr tuau mai a. Police IGP chuan, “An mahni an in volunteer a nih chuan a tha a.. mahse zu lut rawh ti a han in tirh nan chuan a risky deuh…” a ti a.

Kamal chu puk chhung lut mite hmanrua-in an han thuam dawn a, a khawr ta riau mai a. Goliatha bei tura Davida an han thuam tur kha a ang khawp. A tawpah, ama style te khan an han inthuam tir leh ta ngawt a, tih dan turte an han hrilhkim hnu chuan, puan In ah an rawn hruai phei a, Kristian awm awm chuan, tawngtai rualna nei-in, Pathian hnenah kan hlan ta a. Tichuan, Canon Team te tawi-awm (escort) na hnuaiah, puk chhungril lamah an han khai lut thla ta a.

A luh thlak atang a reilo te-ah, chhungril lam thu ngai chang a, a ko tlang atanga leikak chhunglam lo bih mek te zinga pakhat Deepak Shah “Sisua Church Pastor” chuan, “..juice.. juice.. ka tui a hal a ti…juice juice..” tiin puan In lam ah a rawn tlan phei a.

Nu ho chuan, Fanta chu tlem anlo thlit chhuah sak a, chhang thawp nen a tlan phei pui leh ta a. Reilo te hnuah chuan, naupang kum 2 leh a chanve mi Aradhana chu, lei khi kak kar puk chhung thim hnuai a, darkar 22 a awm hnu-in, chaw-hma dar 11 leh a chan ve – ah hrui hmawr lo vuan tute chuan puk ko tlangah an khai chhuak ta a ni.

A mah Kamal Nepali-in a sawi dan in, “ …a kaw zim chin mawngah L angina a kawi phei a, a chung a hniam em avangin, Aradhana pawh a kut lu chhunga dah in, alo thu tung (dingchar theilo) a, chumi L phei chin tawpah khur thuk tak, a tawp chin pawh hriat theih tawh loh khawp a thuk a la awm leh a.

Chutah tang chuan tla thla leh ta se, a thih mai bakah – a ruang pawh chhar ngaihna a awm tawh loving. (Thir khen an tih tlak palh pawh a ri zawi ral raih kan tih tawh kha) Ka zuk thlen dawn chuan .. ‘ko ho’ (tu nge ni?) minlo ti a, ‘Da da’ ka ti a. Han pawm kan ka tum a, a duh lo a, vawi 3 pawm kan ka tum hnu-ah a duh ve ta a. ‘Ka tui a hal’ a ti a. Tichuan chunglamah thu ka thawn chho a, Juice an rawn pek thlak a in a, chhang a ei hnu-ah” bag ah ka thun a – min khai chhuak ta a ni” ati.

A ko tlang anlo chuang chhuak chiah chu – mipui an au dur dur mai a, Naute pa John-a nen Kamala chu kan va chibai ve a, naute pa lawm lutuk chuan Kamala chu a pawm vawng vawng a………….

Aradhana hi a biang dinglam leh a chal dinglam 5 cm a sei in a kak ve ve a, first treatment an pek hnu-in Manipal Hopital ah an phur phei ta thuai a.

Kamala chu le, Gate pawnah an zawn chhuak a, thlamual chheh velah an zawnkual a, mipuiin an um dul dul a …malsawmna tamtak a vurin a awm ta. Prime Ministerin huaisen (pasaltha) certificate a pek bakah sum tamtak a pe bawk a, a dawn neuh neuh te nen Rs 30,00,000 (Nuaih sawm thum ) chuang lawman leh thilpek a dawng ta hial a ni… thlawhna-in Kathmandu leh Nepal hmun hrang hrang an fanpui a, Hospitalin engtik hunah pawh a free a enkawl an tum bakah, education department lamin, a School luhna duhna apiangah, a free a, BA pass thlengan zirtir tur thu an puang bawk a……….Mizoram hian hetiang em hian mi kan chawmawi ngai em le?

A tawp ta..

Kamal Nepali

Nepal Prime Minister leh Kamal

Similar Posts:

• Zan vak
• Hmuaka awle-in a seh
• Mustang Trail
• Highest Cyber Cafe In The World
• Mizo Missionary chanchin

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, August 8th, 2011 at 10:30 am and is filed under Information, Religion. You can follow any responses to this entry through the RSS 2.0 feed. You can leave a response, or trackback from your own site.