mi(sual).com

Adi (Abhor) ho khawpui Pasighat a i kal chuan, Pasighat Town Baptist church ep(opposite) lamah mimal building nalh tak leh Compound nawm hmel tak i hmu ang a; Chu Compound chu chik lehzual a i en thlithlai chuan, kawng atang a metre 15 velah Thlan nalh tak i hmu ang. Chu thlan a marble hmang a thuziak i en chuan, mi pakhat Bakin Pertin-a thlan a ni tih i hre thei ang.  Hepa hi tunge maw ni le?

Bakin Pertin hi Arunachal paah chuan Lehkhathiam hmasa leh Politician hmasa a ni a. Arunachal People’s Party (APP) dintu a ni. Term khat Member of Parliament a ni tawh a, Term khat dang leh chu Member of Legislative Assembly niin Opposition Leader a ni.

Adi ve tho Gegong Apang khan Congress Party atangin Sawrkarna a rawn chang ta tlat a, Hinduism note Donyipoloism rawn la vungin che hlei thei lovin a siam ta tlat a, a pawi hle.

Gegong Apang khan a Lal chhung zawng khan a hlauh ber leh a er ber a ni. A chhan pawh Arunachal a Regional Party lian ber dintu a ni a, a ideology a tha bawk si a, a hlau ru hle a ni. Gegong Apang-a sawrkar chung chang a sawina lar tak chu, “Arunachal is a Land of Khusing khusing” tih hi a ni.

Kum 1996 khan a lo boral ta a. A han thih chuan, Arunachala milian zawng zawng an kim ta vek amaw tih tur khawp hian mi pawimawh an rawn fuankhawm a. Mahse thil buaithlak tak a awm ta! Eng ti angin nge an vui tak ang?.

Donyi Polo founder Talom Rukbo lah chuan, inti neitu takin a ruang bulah a thu tlat a, zankhua maiin an thiamhla a chham a (Mi ropui leh hlawhtling ho te hi chuan an tih tawh lam hi chu an lo ti tak tak thin a lo ni), Mi pawimawhin an hual khup mai bawk si a. Donyi Polo dan ngei a vui a tum ruh hle a ni.

A chhungte tam zawk pawh Sawrkar milian leh Donyi Polo mi annih avang leh, Gegong Apanga hlauh vang pawhin Donyi Polo invui dan anga vui an duh deuh vek zawk a. Thu an pawt chat dawn tep tihah a nupui a lo tawngchhuak ve ta a. “Kan Pa hi Kristian dik tak, Baptisma pawh chang thlap a ni a, a hnukchah dawn tepah khan thuro min chhiah a, chu chu, ‘Hei ka peih loh san dawn ta ngei che u niin a lang a, I hriat angin Kristian dik tak ka ni a, Ka thih hunah pawh Kristian hovin Kristian invui dan dik takin min lo vui se la, Kan in bulah hian min phum ula, ka thlanah pawh Kraws nalh tak in lo siam dawn nia’ a ti.” A ti ta a.

Thudang a awm leh thei tawh lo. Talom Rukbo-a te. Chief Minister Gegong Apang-a te, Arunachal sawrkar milian tha zawng zawng leh Hindu ho te, an hnam sakhua Donyi poloism zuitute chu zahawm viau mahse, a thu rochhiah, a thu hnuhnung ber chu tumahin an palzam ngam ta lo a ni.

Chutia Kristian ho vui tur a lo nih takah chuan, Pasighat a Kristian zawng zawng kan in ko khawm vek a, Rev.V.Laldingliana Missionary-in a vui anga, Arunachali zing a Reverend hmasa ber Rev.Oshik Pertin MA,BD in Bible chhiarna leh tawngtaina hun a hmang ang a, Adi Baptist Choir in Vuina hla an rem tur a lo ni ta a.

Talom Rukbo-a pawh zai tlaivar e ti lo chuan, a inthiar fihlim ta a. Arunachal a mitthi vuinaa mipui punkhawm tam ber tum a ni an ti.(Dorjee Khandu khan a rawn khum chauh ang). Chungho hmaah chuan Kristian thurin, he leiah hian inthen rih mah ila, Kan Lalpa Isua Krista thisen zarah, Amah ngei he leiah hian min hruai tura a lokal leh hunah hlim takin kan la intawk khawm leh vek ang a, Hlim tawp hlau lovin Vanah kan la intawk khawm leh dawn a ni tih thu puan chhuahin a awm ta a.

Adi Baptist Choir pawh thahnemngaih a nat em avangin Arshang zirtirtu(Missionary) hovin kan pui bawk a, thahnemngaih a na duhin, Arunachal ho zing a Pathian thu puan chhuahna hun tha lutuk a lo ni ta daih a ni. “A mithianghlimte thihna chu Lalpa ngaihin hlu tak a ni”

Tichuan, a thurochhiah hnuhnungber ang ngei chuan, a in bulah phum a ni ta a, a thlan pawh uluk leh mawi tak a siam ani a, marble plate phah vek a ni a. Tin Marble plate a siam Kraws mawi tak a ding ta vah mai bawk a ni.

Mihringte hian kan thu rochhiah hnuhnung hi kan in ngaih pawimawh sak tak meuh thin a, Lal putar a thih dawnin, a fapa a ai awh tur hnenah thuro a chhiah thin a, Lal thar chuan a pa thurochhiah hnuhnung chu a ngaih pawimawh berah a neih thin.

Lal Davida pawhin Solomona thuro a chhiah a, Phuba la tura a tih zawng zawng a ti hlawhtling a. Macedonia Lal Phillip pawhin a fapa naupang te Alexander-a chu thuro a chhiah a, a ngai pawimawh hle a ni. Chtiang zelin, mizo Lal te pawhin chhak te an lo nawr phah a, India ram leh khawvel a Thlan mawi ber mai Taj Mahal lo dinchhuah chhan pawh hi Lalnu hmeltha Mumtaj Mahal-i thu rochhiah hnuhnung vang asin.

Kan Lal Isua khan he khawvela a thil tih tur zawng zawng a tih zawh hnu a, Vana a lawn leh dawn chiah a, a thu rochhiah hnuhnung ber kha enge ni kha le?, “Jerusalem khuaah te, Judai leh Samari ram khaw tinah te, kawlkil thleng pawhin ka thuhretute in ni ang” a ti a nih kha. Heta ‘Thuhretu’ a tih hi Saptawng chuan ‘WITNESS’ a ni a, Court a inkhinna hmunah mi thusawi(an argument) a dik ngei a ni tih ‘HRIATPUITU’ ang hi anni a, a pawimawh em em a ni.

Kan tunlai hunah hian ava pawimawh zual ta em. Pathian awm rin lohna te, Isua hi Pathian anih rin lohna te, Sakhaw dang pathiante aia danglam bik chuang lo leh intluk tlang reng anga sawina te, kan hnam ti changkangtu ni lova, tichhetu zawk ang hiala sawina te, ava tam ta em. Kan Lal Isua hian ‘WITNESS’ a mamawh ta takzet a ni lo maw?

A Greek tawng chuan(han ti ve ngial ila) ‘Marturia’ a ni a, chu chu keiniin kan ngaihsan em em. ‘MARTAR’ kan tih hi a ni. Kan Lal Isua hian a hming tan ngamtu Nungchunga Martar ngam hi a va mamawh ta em. Adi Kristian te hian thil engpawh an eia an in dawnin, ri lovin an tawngtai hmasa ziah thin a.

Khawi hmunah pawh awm se hei hi an tilang ngam tlat thin. Tumkhat pawh Adi Tlangval pahnih hi Mizo Pastor pakhat Khawmpui speaker tur Dibrugarh-a an zu hmuak pawh; Hotel-ah inhre miah lovin zan an riak tlang a, zing breakfast ei naah Mizo Missionary(Pastor) chuan Tribal tlangval 2 an thil ei dawn a tawngtai hmasa a hmuhin amah hmuaktute annih ngei a ring ta a, an inhriat chhuah theih phah ta a ni.

Kan thutawp nan chuan; Communist ho hran zual lai khan, Rev.Richard Wumbrand te nupa kha an man a. Court hmaah an dintir a. Communist ho chuan Lal Isua kha an han sawichhe ta tak tak mai a. Chutah Sabina Wumbrand thinin a tuar ta lova. A pasal ava bekbawr a, “Richard I Lalpa hian i witness a mamawh ta e.

A thlavang i hauh dawn lawm ni?” ava ti a. Richard chuan, “Sabina, tun ang dinhmunah hian Lal Isua hi ka witness chuan Pasal i nei lovang le” tiin a chhang let a. Chutah Sabina chuan “Richard, Pasal dawihzep neih ai chuan, Pasal neih loh ka thlang zawk e” a ti ta mauh mai si a, Richard chuan, Lal Isua an sawichhiatna zawng zawng chu, Rinthu Phuahchawp, dawt muhlum anih thu a sawi ta piap piap mai a, Paula ang maiin huai takin Roreltu hmaah Lal Isua chanchin a sawi (Witness) ta a ni.

Ka mi(sual) pui duh tak te u, Kan Lal Isua, i sualna leh bawhchhiatna te avanga a van ropui kalsan a, keimahni anga lo chang a, i tuar ai leh ka tuar ai zawng zawng thuawih taka lo tuar zo tu khan, he lei mihringte zingah hian, a aiawha dinga a hming tan tur Martar mihuaisen a va mamawh ta em.

I aiawha Pilata hmaa ding a, Sanhedrin leh Puithiam Lal ho ten dawta an hekna leh an cheksawlhna zawng zawng lo tuarchhuaktu kha, a hming tanin i ding ve ngam dawn lawm ni le. Chu chu a thu min chah hnuhnung ber a ni si a.

Similar Posts:

• Lazydog’s “KRISTIAN RAM ANI SI A”
• Hun hnuhnung;
• Sunday thuchah
• Happy Birthday Vaiva (28th December)
• Beiseina siamtu thawhlehna

Recent Posts:

• Hlim lote tihlimtu Comedian Search
• Free roaming, high broadband speeds in new telecom policy
• Better late than never
• Musicale
• Hairehai

This entry was posted on Sunday, October 9th, 2011 at 9:30 am and is filed under Event, Religion. You can follow any responses to this entry through the RSS 2.0 feed. You can leave a response, or trackback from your own site.