mi(sual).com

Chhiar tham deuh lawih-in aw……..a va sei ve ti tawk pawh kan awm mai thei, mahse, fim kan en a, advertisement zing lu tuk avanga film chhum-bung zing lutukte pawh kan nin thin kha maw…

Kan hma lawk a, check-gate chu kan thleng phei ta thuai a. Chuta lo duty te chu, an vun a ngo danah leh, ka chuanpui te an inralrin danah Chinese Army area hmun tak tak ka lut dawn nih ka ring a, truck pakhat hi an lo check mek a. Ka veilam a mi chu, motor atang chuan a chhuk a, a silai (sten-gun) chu a ak bawk a. A ipte atang chuan, lehkha pawimawh hi a phawrh a. Check-gate ah chuan a va hmuh tir a. Reilo teah chuan, motorah chuan a lo chuangkai leh a, an tlan zui leh ta a.

Rei fe kan tlan leh hnu chuan khaw pakhat hi kan thleng leh ta a. Khawpui lian ve tak a ni tih ka hre thiam mai a. An khawpui ber Lhasa a ni tawh em aw tiin ka han hawi kual a. Mahse, Potala Palace (Hmanlaia an lal In lianpui – room sangkhat nei – khawpui laili lai, tlang- pawng-a sak a ni a. Hmun dang hi, phaizawl (plateau) hmun rualrem a nih kual vek a vangin, hmun tin atang in Potala hi langsar hle a ni) ka hmuh loh avang chuan, Lhasa khawpui chu a ni lo tih ka hre mai a.

Police hmun, thing an phun tlar thelh sungna hmun leh Police ho family quarter ni awm tak tak, in chhawng sei lian pui pui, in ang a an sak tlar thluah na hmun ah chuan kan ding ta a. Office chawlhni a nih vang nge – a tlai deuh tawh avangin office anlo bang zo tawh zawk? Mi an reh hle mai a. Ni tla tur chuan, khaw chhung hmun thenkhat chu ala rawn chhun suar suar a.

Motor atang chuan kan chhuk a, kei pawh chu chhuk ve turin min hrilh a. Putar pakhat retheih ve hmel tak hi kan bulah alo kal hnai a, mi a rawn thlek ha ha a, min hmu duh hle mai. Naupang pahnih bal ve tak tak hi an lo kal hnai bawk a. Rambuai, China sorkarin run leh a awpbeh luih an nih avang in, mihring nun reng reng chu a ralmuang fahran lo tih hi a hriat ngawih ngawih a. Chung lokal hnaia min rawn en tute chu, Police te pawh chuan an khap bik chuang lo va. Ka veilam a thu zawk kha khawi khawi ah emaw chuan a va kal kual zung zung a. Nakin deuhah chuan a piah deuh atang chuan a rawn au ta a. Tichuan, chu lam a phei tur chuan min hrilh a, silai nen chuan min chhawm phei ta a. Putar min rawn thlek he he tu pawh khan, thil kal hmang hriat tum in, beng chhi ha ha chung chuan, kan sirah a lo phei ve zel a. Chu ringawt pawh chuan tlemin, mi ati thlamuang ve deuh hlek in ka hria.

Khawnge min hruai dawn min hrilh duh bawk si lo, engkhua nge an sawi duh bawk si lo, a khaw hmun vel a thianghlim ve deuh avang leh, chei ve deuh (developed) a nih avang chuan, khawpui pakhat chu a ni ve ngei mai.  Chulai hmun paltlangna atan a an hman thin kawng-tum sirah chuan, in pakhat, hlui rip rep a lo awm a. Kawtzawl te reuh te, a nei bawk a. Kawngka chu rangva (plane-sheet) a siam ani a, a bang leh in-chung chu concrete-a sak vek chu a ni ve a.

Kawngka chu a hawng a, “Lut rawh ” min ti a. Driver chuan, ‘hetah hian I riak dawn‘ ti ni awm tak chuan, a kut pahnih chu dah kawpin, a bek veilamah chuan a dah phek a, a lu chu, a kut dinglamah chuan, a han ti thle zauh a. Tichuan, kawngka -ah chuan ka pen lut ta a, pawnlam atang chuan, kawngka chu an kalh zui a, pen thawm chu a zawi riai riai a, a reh ta tlawk tlawk mai a.

Kawngka atang chuan, inchhung chhuat zawl, kawngka aia ft nga (5) vel lai a hniam pan thlakna step chhawng nga vel hi a chhuk thla a, chhuat lah chu a hnawk hneh hle mai. Step ah chuan ka thu hnawk a, ka bei a dawng chiang kher ta mai.….ka maimitchhing a..ka hmai ka hup a..

“Aw Lalpa, kan Pathian, I thuthianghlim ah, ‘Kei khawvel tawp thlengpawhin, in hnenah ka awm zel ang’ i ti a. Tin hengho Tibetan hnam te hnen a chanchin Tha hril turin min ko ve a. Chanchin Tha chu ka hril ta a. Mahse, hei vawiin thlengin, ka tawngtaina pawh min la chhang lova. Hmanlaiin, Petera te, Paula te, Sadhu Sunder Singha te pawh mak tak takin, i chhan chhuak a. Kei ve hi engati nge helai Tibet hmunril lama minla hruai deuh deuh va. Thian leh hmelhriat pawh an awm lova. Mahse, I thu zawm chauh lo chu tih theih ka nei si lo, ka awm dan tur pawh I thu thu ni teh se. Keima duhdan pawh, ka dil tawh lovang che, I duh dan dan a awm turin, I kutah ka inkawl tir e, I fapa Isua hmingin” ti tau deuh ti tih in ka ti ta a.

Ka mit ka la men hma chuan, ka dinglam, ban phak mai turah chuan, mi pakhat sang tak puanvar bat hi, a lo ding tlat in ka hre (feel) ta a. Mit chu ka la meng lo na a, chu pa sang tak lo ding chu, thlarauvin ka hmu ta tlat mai a ni. Chutah, (second chanve pawh a tling hman lovang) ka thinlungah thu a rawn sawi ta a, “Ka fapa, thlamuang takin awm rawh, a hun takah ka hruai chhuak dawn che a lawm, tunah chuan, thil entir duh che ka nei a ni ” tiin. Ka mit ngei a hmuh tum in, ka han meng thuai a, mahse ka hring mit  chuan engmah ka hmulo na a, mahse, Lalpa’n min awmpui a ni tih erawh chu ka hre chiang ta hle a ni.

Tichuan, ka han dak chhuak a, in chhung chu ka han thlir vang vang a. Ka rawngbawlna hmasa ber tur chu, ka hre ta mai a. Chhuat chu a hnawk bal hle mai a. Mahse a chhuat tak chu cement plaster that a nih avang in, phiahfai a harsa lo vang, mahse a phiahna tur le? Yak mei kilkhat a mi chu ka va hmu a.

Room chhung chu, Ft 12×15 vel a zau ni in a lang a. a kilah chuan, ek-na nge? Zun-na nge? Tui chhe paihna tih pawh hriat hranloh hi, khuar an siam ve a.  A ko tlang zawng zawng nen chuan a huh kawi zuih mai a ni. Chhuat ah chuan, misual an man te, ke thir khaidiat (chain) a, an thlun behna hi, thir a in phum thluah mai a. Lehkha khawng (parcel chhia) leh cement bag ruak(nylon chi) pali vel a awm bawk a. Tin, Tibetan carpet 2×4 a hlai pakhat bal tawk tak a awm bawk a, a laiah chuan a phel tlang teuh tawh hle a, a bak chu hnawm-hnawk hlir a ni. Bang, skirting chinah chuan, chhuar (thil dahna) tur a awm ve a. Flask pakhat leh thlengkum (bowl), mom bati bung tlem, leh sikret bung tlem a awm bawk a. Ventilation pakhat hi sang takah pahnih a awm ve a. Ni a tlak tawh avangin, a vawt hle.

“Heng ho zingah hian, Kristian nun a tak (practical) a lantir a tul hle a nih hi” tiin ka tho va, Yak mei chu ka la a, in chhung chu ka phiat ta a. Cement chhuat mam tha tak a nih avang in, phiah a nuam hle a. Bawlhhlawh chu, cement bag ruakah chuan, ka hnawh khat zel a. Chhuar a, chhangphut baw niaih nuaih chu ka rut a, tuichhe paihna a, huh kawih zuih mai ah chuan, ka va phul zel a. Tui chhe paih huh nuaih pawh chu alo hul ta a, a phiahfai pawh a awl ta deuh.

Mut bu awm chhun Carpet chu ka han thing a, bawlh hlawh chu, a tla hlawm hluk hluk thei a, ka han khawng a, bawlh hlawh chu a tla ur ur mai a, ka han rut fai a, ka han khawng leh a, a la khu luih luih mai a. Rei vak lo hnuah chuan, a lo zia awm ve ta deuh a. Chhuat chu vawi li lai ka phiah chhuah nawn hnu ah chuan, alo fai ta vuk mai a. Bawlh hlawh chu cement bag ruak pali khat – a tling hial a. Room sir kilah chuan ka tung khawm ta a. Chutia ka han chet deuh avang chuan, ka taksa pawh chu alo lum chhuak ve deuh a. Khua pawh chu a thim hnai ta. Putar ni-chin a, kan ruala ke a lokal ve khan, ventilation atang chuan, mi a rawn bih leh dak dak thin a.

Room chhuat chu, kawng atang a, ft 5 vel lai a hniam anih bakah, kawnghrul mai a awm a ni a, pawnlam atang chuan, ventilation a han bih chu a harsa lo. Ventilation chu mihring awm-bawr vel chauh a sang a ni a.

Mutna tur chu ka han buatsaih a, cement chhuat chu a hik em avang chuan, lehkha khawng kha, ka han la khawm a, chhuatah chuan ka han phah a, a chungah chuan carpet chu ka han phah a, chu chiah chu mutbu awm chhun a ni si a, a chung a mut chuan mattress a ni mai a, a hnuai a mut chuan, rizai (blanket) a ni mai dawn a. Pakhat chauh a ni si – a chunga mut tur nge ?- a hnuai ah? Tih chu ka han ngaituah vang vang a. Cement chhuat lah chu a vawt hle mai si a. (Tui hi zing ah chuan a lo vur (frost) tawh thin. Lui luanglai pawh a chawl thuap..kan tih tawh kha).

Khua lah chu a thim ruai ruai tawh mai si a, tih tur dang a awm der silo va, mut zai rel mai chu tihtur awm chhun a ni a. “Carpet chungah hian, ka mu phawt ang a, a vawh deuh tak leh a hnuaiah ka mu ang” ka ti rilru a.  Ka kut chu a jacketah chuan ka ti tawm lut a, Jacket nghawng chuan, ka lu chu ka han khuh leh a, ka mu ta a. Lock-up awmna chu, kawngbul mai a nih avang chuan, kawnga mihring kal thawm chu a lo ri leh tak tak a, a reh leh riai riai thin a

Zan dang a, rilru hah avang leh thlamuanglo reng renga mutmu ka tuah loh thin tehlul nen, zan in chu, ka rilru hahna a bo vek a, thlamuang takin tuitak in ka mu ta siai siai a. Ka chau ve deuh pawh a niang -vawikhat mah ka thangharh ta lo a ni.

Ka han thangharh chuan, khua a lo var tawh a. A vawt hle a, carpet pawh chu ka lo sin hlan tawh a, a rim tuiloh em avang chuan, rang deuh in ka tlawh hlim nghal a. Nimin tlai khan, ka vaw fai thawkhat khan ka hre si a, han sin takah chuan, ka jacket haklai chu a jul chi a ni leh nghal bawk nen, a lo la ti bal hle tho mai a. Ka han in beng fai thuak thuak a, bal thenkhat phei chu a lo bek hman deuh a, a fai tha duhlo hle leh nghal a.

Flask a tui chu a la lum em tiin ka han hawng a, a lo la lum thar thar a, tui chhe paihna/ zun in ah chuan ka khai phei a. Tui, nimin tlaia bua, la cham bangte chu, a lo vur (frost) vek tawh a.  Tuilum chu, hmai phihnan chuan ka hmang ta a.  Ka harh ve deuh sawng sawng a, tihtur hranpa a awm loh avang chuan, Carpet chungah chuan ka thu a. Lawmthu sawiin ka tawngtai ta a, “Aw Lalpa, kan Pathian duhtak, nang ka hnenah ilo awm reng avangin ka lawm a,  nizanah tui tak a min mut tir avang leh ka rilru hah min chhawk zangkhai sak avangin ka lawm e.Kan awm zel dan tur pawh I thu thu nise, kan nu te pawh i kutah ka dah e – Isua hmingin.”

Engtin tak ka awm zel dawn ni maw? Mahse, a hma ang kha chuan ka lungkham hran tawh lo. Lalpa ngeiin, “A hun takah ka hruai chhuak dawn che a lawm” a tih kha a tawk ka ti hle. Lungkham viau mah ila, chunglam thu lo chuan, tih theih ka nei chuang lo a ni. Pheikhawk hrui min laksak avang chuan, ka pheikhawk lei chu, hmalamah chuan a lo eu chhuak a, chaw ka eiloh rei tawh avang leh, ka kekawr (track) kawnga hruihrual kawnghren an lak bawk avangin, ka kekawr kawng chu a thawl ta hle bawk a.

Nakin deuhah chuan, ke pen thawm a lo awm ta a, chu thawm chu kawngka bulah chuan a tawp a, kawngka hawng ri chuan a zui a, kawngka chu alo in hawng ta a. Pawn a chhuak turin pakhat chuan mi rawn hui a. Mipa pahnih leh nula sang thlerhtlawh, la upa lo tih hriat tak chu, kawngka chhunglamah chuan an lo ding lut a. An han hawi kual a, chutiang tak a fai in, chu lock-up chu anla hmu ngailo a ni ngei ang, an in en ha hlawm a.

Tichuan, office hmunpui lam chu min pan phei pui ta a. Office hnunglam kawngka pui atang chuan, in chhung chu kan lut phei a. In chhung chu, a fai in, a tle tha hlawm hle, in chhung corridor a kal in, room tamtak kan kal pel phei a. A tawpah chuan, room hnunglam kawngka atang chuan in chhung chu kan lut a, inchhung chu office alo ni a. Police ho reng reng chuan, uniform hring (army green) suit an ha vek a, lukhum uilei nei an khum vek bawk a, thli thawt avang leh a vawh avangin, kutkawr var leh tarmit dum an bun deuh vek bawk a. An vun a ngo a, an smart in an nalh hlawm kher mai.

Shigatse khua hi, altitute mtrs 3900 a ni a, (Mizoram tlangsang ber ft 7100 kha mtrs in han chhut ta ila??) heti chung hian phaizawl zau tak a ni tho a.

Office chhungah chuan kan lut phei leh a, room a zau in, a lian hle thung. Kawngka lam rawn hawi zawng chuan, round table leh chair alo inhung a. Chutah chuan, Director of Police chu alo thu a. A hmel leh pumrua ah chuan Mizopa a ang hle mai, danglamna a awm lo.

Room chhung zau takah chuan, Sofa set li (4) vel lai hi a in hung kual pup mai a, Sofa hma ah chuan, dawhkan sei feet khat vel a sang, feet thum 3 vel a sei hi a inhung kual thliah bawk a.(Tibetan ho chuan, hetiang dawhkan te hi khawihmunah pawh tihdan phung a an neih a ni).

Director chuan, Tibetan tawng chuan mi han bia a, Hlakpa Tsering chuan Saptawngin  mi alo letlin sak zel a..

“Kathmandu atangin engtin nge in lo kal?” tiin mi a zawt leh a. kei chuan, “Kathmandu atangin Bus in Barobise thleng kan lo kal a, Barobise atangin Kodari thleng, mini bus in kan lo kal leh” ka ti a.

“Chuan man pakhat tan engzatnge?”

“Pakhat tan Kathmandu atanga, Barobise Rs40/- (N.C), Barobise atanga Kodari Rs. 30/-”

Chutia kan lo inbiak lai chuan, officer pahnih anlo lut a, an piah ah chuan, an thu a. A hnu lawkah chuan a dang Pali anlo luh belh leh a, ngawi reng in, thut hmun an rem zel a. A hnu lawkah a dang pathum anlo lut leh a, Sofa set hun kual ah chuan an thu zel a. An lo luh belh zel a, thutna awlah chuan an thu khat zel a.

Chu tah, kawngka chu a rawn inhawng leh a, pa pakhat upa tawh lam, palian ang reng tak hi a lo lut a, pa pakhat hian a rawn zui lut bawk a. A lo luh rual rual chuan, Director leh officer inchhunga lo thu zawng zawng chu an ding ta vek a. Hlakpa chuan, “Hei hi kan hotu ber Police Chief a nih hi” a ti a. Kei pawh, zah derna entirnan ka ding ve a. Lo ding ho zawng zawng chu “thu rawh u” tihnan a kut in a zap a.

Chutia kut a zah pah chuan, ka lam hawi zawng chuan, min en chuang si lovin, kutzungchal mi a lek khum a, a rawn ang lut nghal bawrh bawrh mai a. A sawi chu hre thiam ve lo mah ila, a lawmlo tih chu, hrilh ka ngai bik lo. Director in, a thutna a lo ken ah pawh thu ta lo chuan, a sir a chair pakhat chu a pawt hnai a, Director dawhkan sirah chuan, mi dangte ep zawngin a thu ta vung mai a.  A la tawng chhunzawm zuah zuah mai a, lawmlo tih hriat tak hian mi chu a kawk leh zauh zauh thin a.

Director chuan engemaw han sawi a tum a, mahse an hotu pa chuan, a ngaithlak sak lo reng reng mai a, midang tawngna hun pe miah lovin, a ang chhunzawm bawrh bawrh mai a. Director leh Hlakpa chuan, thilawmzia hrilhfiah an han tum a, mahse, a hau ta zawk ni ngei tur a ni. A tawng chhunzawm zel a, Director leh Hlakpa-te chu a kutzungchal te a hmuh ta vel bawk nen, boruak a rit ta hle mai. Pa tha tak, mahse, pa an cheh ve tak hi a nih duh hmel hle.

Director leh Hlakpa chuan an hmui an pet a, an ngawi dun ta hmak mai a. “I duh tawkin han ang bawrh bawrh phawt mai teh le” ti ni awm takin an ngawi dun ta vang vang mai a. A boruak chu a inthlak danglam chiang in, a rit ta ngei mai. Ka rilru in kalo tawngtai ve char char bawk a. Reivaklo hnuah chuan, a duhtawk a sawi zo ta a ni ang, a ngawi ta.

Chutah Hlakpa chuan Police Chief chu a han thut hnaih deuh a. thil awmzia chu a hrilhfiah tan ta a, India map ka ziah sak kha, entir pahin, Mizoram awmna te Delhi leh Dharamsala te, Mizoram inkar hlat lam te kawk kualin, Mizoram history ka sawi te kha a sawi chhawng ta a. Police Chief chu a bu ta nghut nghut mai a, Mi chu a rawn melh leh zoh zoh thin a, a hmel awmdan pawh chu a inthlak tan ta hret hret a, a nelawm tan ta a. Director pawh chuan, Hlakpa chu alo pui zauh zauh a, engemaw hi alo belh zauh zauh bawk a. An police chief pawh chuan ngun taka ngaithla-in, a bu nghut nghut zel a, a hmel pawh a hlim hmel ve ta deuh a.

Chutia ngun taka ngaithla zel chung chuan, sikret bawm sen, rangkachak rawng a chei, mawi tak, manto hmel tak hi a ipte atang chuan a han phawrh a. Tlawn khat chu tan pahin, ka lam chu a lo hawi a, pakhat chu a phawi a, mi a rawn mitmei a,“I duh em”? tiin, Hlakpa chuan, “La rawh, kan Police Chief hian mi tumah hi a theh zen zen lova nia, a haw lo che tih entirna a nih hi” a lo ti a. Zu duhlo mah ila, lakloh chu thil mawilo a ni tih ka hria a, ka haw biklo tih entirnan ka la ve mai a, “Eng thil tak thleng zel ang maw” ti a ngaituah rauh rauh chung chuan sikret chu ka ipte ah ka ak tha a.

Chutihlai tak chuan, Khasa atanga Shigatse thleng a, min vengtu, ka veilam a thu ngei mai khan, uniform ha in ka ipte kha a rawn khai lut a. Ka ipte chhung atang chuan, ka tracts sem mipuite hnen atang a an man let zawng zawng zing a a chanve pawh tling tawh lo chu engemaw sawi mawlh mawlh pah chuan a rawn phawrh a. Ka lo en ve kiau a, Khasa ah khan ka semchhuah zawng zawng, hmunthum a then hmunkhat vel, an rawn man let a. Chu an man zawng zawng  chanve pawh tlinglo chu Shigatse a lo thleng ve a. A man chanve ai a tam mah kha khawiah nge a ri ral tak ang le? Police ho chhiar ve chakin anlo la darh zo ta em ni le? Chuti a nih chuan, chanchin Tha chu Police ho zingah a darh ve dawn ava ni awm ve (Phil 1: 12 – 13) ???

An hotupa ber chuan, a hma ai a nem deuhvin engemaw hi a han sawi a. Hlakpa chuan, “Heng i thil rawn ken hi, enge ni? Hetiang Sakhaw thil thehdarh hi China sorkar dan kalh a ni a.” tiin min lehlin sak a, ka chhanna pawh chu a letling ve leh zel a. Bible chang “ ….mite hma a mi tan apiang, ka Pa vana mi hmaah ka tan ve ang….” tih kha ka thinlungah alo lang leh ta…

Ka ding a “A pawi ka ti khawp mai, hetiang in inlo ngai hua ang tih ngaihna ka hrelo a ni. Lal Isua chanchin hi la hrelo te hnenah in hrilh chhawng zel tur in, a mah Lal Isuan min duh a. Khawvel tan a a hna thawh – chhandamna, mi zawng zawng tan a ni a. Politics a ni lova, mizawng zawng tana chhandamna hna a ni.”

Min thlahtu mihring hmasa ber A dama’n siamtu Pathian dan bawhchhia-in sualah alo tlu ta a, Pathian leh mihring chu sual in min lo daidang ta a. Chuta tang chuan Pathianin kawng a hawn loh chuan mihring tan Pathian hnen thlen leh ngaihna a awm tawh lo. Mahse, Pathian chuan a ma thilsiam mihring chu a hmangaih em avangin, amah Pathian hnen kan thlen leh theihnan kum 2000 liam taah khan Pathian, fapa, Isua Krista chu khawvelah a lo kal ta a ni.

Pathianin a dan bawhchhetu mihring laka a thin-ur na vanga, mihring hremna tur a a ruat ‘Kross’ ah kan tuar ai tuarin, Pathian Fapa Lal Isua chuan a  nun a hlan ta a ni. Kan tuar ai tuara, kan ai awh tu Lal Isua ‘…ringa baptisma chang chu thiamchangin an awm ang a…a ringlo chu thiamloh changin an awm ang’..tih chu Pathian thu tlukna alo ni ta a.

Pathian thu-in, “ An rin lohva chu engtin nge an lam ang, an hriat lohva chu engtin nge an rin ang, thuhriltu awm lovin engtin nge an hriat ang..” a tih ang in  Lal Isua chhandam na chanchin tha chu mite’n anlo hriat theihnan, a mah Lal Isua ngei in “..Ram tinah kal ula thil siam zawng zawng hnenah chanchin tha hi hril rawh u…” alo ti a, Chu Chanchin Tha chu Khawvel hmuntinah hril mek a ni a, a ringtu chu chhandamin an awm, a ringlo chu thiamloh changin an awm a, Europe, America, Asia, India Nepal, tunah hei chu Chanchin Tha chu ka rawn pu lut a, khata dawhkan a lehkhabu (tracts)ah khan a inziak  a, chhiar ula in hre mai ang. Nangni Tibetante leh Tibetan tawngthiam ten Chhandam tu Lal Isua, Pathian nung Fapa inlo hriat ve theihnan ka rawn ken a ni. Politics a ni lova a, Chandamna Chanchin Tha mi zawng zawng tan a ni.” ka ti ta khawl mai a. An ngawi thuap a, an ngaithla ngun hle mai.

An hotupa ber Chief chuan, Chinese tawngin engemaw hi a han sawi a, officer pakhat, Police Chief rawn zuilut tu kha a ding a, tracts zing a, a hlai ber leh chhah deuh ber bu khat “Way of the Salvation” (Tibetan) tawng chu, an vai a hma-ah chuan, a bul atang a a tawp rat thleng chuan a chhiar chhuak ta parh mai a. An vai chuan, ngun takin an ngaithla thap a.

Tun hma Sadhu Sundar Singha te’n lu-chhum, ban-chhum pawh huam a, an lo hril tawh thin na ram, Krista avanga hreawm tamtak an tuar tawhna ramah ngei, Tibet khawpui ber dawt tu-ah chuan Police hotu (officers) rual chuan an hotu lu ber thu pek leh a ma ho ngeiin, Lal Isua Chanchin Tha chu an ngaithla ta thap mai a. (Phil 1: 12 – 13)

Officer dang reilote lolut zawk, thu ve hman lo te chuan, dawhkan a tracts dang awm chu anla zeuh zeuh a, mahni In ah, an hman hun a chhiar atan anla ni ngei mai. Civilian (Sipai nilo) hnam mawl te te  te chauh ka sem dawn emaw tih nak alaiin, Police hotu luber thleng mai chuan – chanchin Tha chu an bengah alut chu – a ni ta reng mai a ni. An awih duh leh duh loh lam chu thu hran nise……….

Police Officer in atawp rat thleng a a han chhiar hnu chuan, in chhung chu a reh thiap mai a, hriau pawh tla se, a ri bal ta ve ang tih tur khawp a ni. Minute hnih vel hnu-ah chuan, Police Chief chu a thutna atang chuan alo ding chhuak a, Director hnenah chuan engmaw hi a han sawi a – ka lam alo hawi a,  lu han buk zauh pah chuan pawnah a chhuak ta a. A thui hruai te leh officer dangte chuan dawhkan a tracts chu lak zeuh zeuh pah chuan an zui chhuak ta bawk a. A tawp-ah chuan kei leh Director leh Lhapa Tsering te chauh chu room chhungah chuan kan awm leh ta a.

Director chuan engemaw hi a han sawi a – chutah Lhakpa Tsering chuan sap tawngin, “ A pawi kan ti khawp mai, mahse ‘thu-pek’ a ni miau si a. Theihtawp kan chhuah na in, thlakhat chhung Jail a i awm a ngai dawn a ni. Thlakhat chhung tang turin kan ti phawt dawn che a, mahse ni 15 chhung chuan i chhuak hman tho mai thei…mai thei a nih chu…..” a ti ta a…

Awm zel tur…….

Similar Posts:

• Mizo Missionary chanchin
• Mizo Missionary chanchin – Part 2
• Mizo Missionary – Part V
• Mizo Missionary Part – IV
• No Teaching Day Hmang Dawn

Recent Posts:

• Mizo Missionary – Part V
• Juai!
• Tlawng luia Blanket sûk
• Mizorama kohhran hrang hrangte
• “A tirah thil kan tisual tawh a tihsual nawn chi a ni lo “

This entry was posted on Tuesday, March 15th, 2011 at 12:19 am and is filed under Information. You can follow any responses to this entry through the RSS 2.0 feed. You can leave a response, or trackback from your own site.