mi(sual).com

Part IV – ah a tawp ang ka lo ti tawh si a…Communist Jail chhung hun hman dan ngaihnawm tak tak paih in …kai tawi pawp pawp mai ang aw…….

Chutianga ni 10 lai (Rev.2:10) Jail chhunga Tibetan mi maksak pui pui zinga hun ka hman liam ve hnu chuan.. November ni 20 chu alo inher kai ta a, zing khawvar chian hma a, kawngkhar rawn hawng ri leh, torch-light enkual pawp pawp chuan min ti harh a, Tramdrula chu alo in ha mawlh mawlh tawh a, an hruai chhuak ta a. Tenzin a ang tho khan tlaiah alo haw ve mai ring in, ka mut-hilh san leh mai a.

Tramdrula a awmlo tih mai loh chu tuk-dang ang bawkin, breakfast kan ei zo a. Thianpa ber awmlo chuan khua pawh ati har deuh a. Zunram thiar hun chu an rawn hawng leh a, pawn ni-lum kan mamawh hlawm bawk a, mahni room zawn theuh veranda-ah chuan kan thu thuap mai a, thlasik ni lah chu ai nuam tawkin a rawn chhuak a.

Room No 1 an inthiar mek lai chuan, gatepui chu, a rawn in hawng a, Police pakhat hi alo lut a, Tibetan tawngin a rawn au a, tang thenkhat chu gatepui lampan chuan an chhuak phei a. Police chuan, a kut zung chal-in tu tu emaw a rawn kawhbelh a, an chhuak phei zel a.Li wu a pawh chu an koh chhuah zingah a tel a.

Pawn chhuah harhna remchang a nih ring-in ka ban ka phar ve a, Police pa chuan mi rawn hui ve ta ngei a, ka chhuak phei ve ta a. Gatepui pawn deuh lawk, police office te reuh te kawtah chuan, a chhuak hmasa ho kha an lo ding khawm luih a, India atang a lokal pawh kha alo thu ve a, meizial an lo zu hlat hlat a. Office chhungah chuan pakhat pakhat-in, a hma zawng leh sir zawng-in thla anlo laksak a. An kut zungtang zia (finger print) zawng zawng anla zel a, an tih zawh tawh ho chu an tir lut leh zel bawk a. Ka chhuak ta chu ka inchhir ang reng hle mai, banphar khanglang lo ila, min rawn koh loh hmel hle si a, A ka inti hnuhnawh hle mai.

Pumpelh theih inbeisei deuh hlek-in, luh thuai a, thlakhat chauh tang tur a sorkar order, a copy min pek kha entir  a tha in ka hria a. Min rawn hui ve ta a, ka lehkha chu ka phawrh a, thu ber a lang, dawhkan hma chhawn a thu chu ka han entir a, a ni chuan alo chhiar nuap nuap a, min a pe let leh a. Ka lehkha chuan thu a sawi lemlo hle, mi dang an tih ang tho vin, ka thla la tur chuan an han inbuatsaih a, ka lu-um leh biang ki vel chu an en a, eng emaw an sawi a, an nui ham ham a.

Lehkhabu te pakhat, khawvela hnam hrang hrang zinga, Aryan thlah chi hrang  hrang, Mongolian thlah  chi hrang hrang te lu-um lem awmna, an han keu a, ka lu um ang chi awmna phek an han keu chhuak a, ka lu-um nen chuan an han entawn a, an mahni Tibetan ho hnam thlah lu-um chiah chiah a lo ni si a, min lawm ang reng khawp mai a.  Lu-um atang chuan tu-te thlah nge tih a in chhui theih tlangpui niin a lang, a tha reuh hle.

Ka thla pawh chu sir zawng leh hma zawng chuan an la a, ka fingerprint zawng zawng anla ta a, lunghnur deuh chuan ka tanna run lam pan chuan ka lut phei leh ta a. (Ka finger print zawng zawng chu, Chanchin Tha avang-in, China sorkar office, Tibet ah kawl that a ni ve ta a nih chu).

La inthiar lo tlem pawnah anlo la awm a, abak zawng chu, mahni room room ah an lut fai duak tawh a, Hindi tawng thiam a kha, a lo la inthiar tih ka hmuh chuan, inthiar tur chuan ka va phei ve a, rem chang ka hmuh ve leh, “Engnge a awmzia, enga tan nge fingerprint leh thlalak kha an tih a?” ka ti a, Chupa chuan, “Engmah a nilo, an la ve mai mai a nih kha, engmah a danglam lo” a ti a. Ka hmel chu a en a, hlau thawng deuh in min hre deuh a niang, “Engmah a nilo tak tak, anla tih loh ho an ti mai mai a nih kha” a ti leh a. A mi chhanna chu ka la lungawi pui chiah lo.

Room chhungah chuan, ka lut phei a, Li wu-a chu alo la let velo va, Tramdrula, zinga an hruaichhuah kha alo la let lo bawk a, Tenzina nen chauh chuan kan ni mai a, Tenzin a ber kher lah a thlamuanpui awm chiah lo hle. A mit-in “engtin nge an tih che u” ti ni awm tak hian, ka hmai bulah, mitko a rawn ti sang ak ak a. “thla an la a”, tih pah-in ka kut a, stamped ink la kai chu ka en tir bawk a, Tenzin chuan alo hrethiam a niang a bu nghat nghat a.

“Engtin nge ni ta ang? Engchen nge ka tan ang le?” ka ti a. Tenzin chuan, “Ni sawm pa nga (Nima choe nga)” tih pahin a kutzung tang sawm, min entir a, chutah kut zungtang 5 a belh leh a. Ni 15 hnu-ah I chhuak mai ang tihnan a kutphah chu a han ti thle bak a. A mah inkawk-in “Kei engchen nge ka tan ang” tiin mi chu a zawt let ve a. A tih ang deuhvin, awlsam takin, “Kum sawm pa nga (Lo choe nga) hnuah i chhuak mai ang” tih nan chuan ka kutphah chu ka han ti thle ve bak a, kei-ai a tang reilo zawk tur ang mai chuan, a hlim zawkah a tang a, a kut a beng a, a zuang vel a.

Room lai tak a ding in, “Lalpa, hman ni lawkah ka hnenah thu i sawi a, tang reilo turin ka in ngai a, mahse, tukin khan ka thla leh kutthla (fingerprint) te an la leh si a, a awm zia ka va hrethiam ta lo em? Engpawhnise, keima duhthlan ang in ka awm thei lova, ka tihtheih chhun chu i hnena inkawl tir mai chauh hi a ni, chuvangin i hnenah ka inkawl tir e, Isua hmingin A men” tiin a tawngtai ta a.

Ka tawngtai zo chiah, ka a-men rual deuh thaw chuan, Gatepui chu a rawn inhawng ri ruak a, ke pen ri alo phei thlarh thlarh a, alo phei zel a, room no 6 a, pakhat chu a ko chhuak a, alo phei zel a, kan room tukverh zawn alo thlen chuan, engemaw hi a han sawi a, kawngkhar chu a hawng zui a.

Chu veleh Tenzina chu rang lutukin, ka mutna ah chuan a zuang(dive) phei hi a ni ngawt mai, Police overcoat, Police officer Hlakpa’n min hak hawh tir chu a rawn pawm phei a, khawvela inhmu leh ngai tawh lo tur ni-a ngai in, ka awm ah chuan, “kan van ngai dawn che em” ti ni awm tak hian, minute hnih vel ngawt chu a bei ta vawng vawng a. Police pa thusawi hre thiam velo mah ila, Tenzina chezia atang chuan, ‘ka chhuak dawn a ni’ tih min hrilh tura tawnglettu ka ngai hran biklo. Tenzin a chu, bal tawp hle mahse, chhungrilah ka lo ngaina ve hle tho va, ka kuah let a, kan han inpawm vawng vawng a, Police pa chuan. eng emaw hi a han sawi leh Tenzina chuan a mi kuahna kut chu a thlah a, ka kutah chuan min chibai a, ka kut chu a fawp bawk a.

Ka mittui a parawl teuh mai, ka lawm hle na a, ka lawm a kim tlat lo, ka thian tha ber Tramdrula awmloh hlan a, ka chhuak tur chu pawi ka ti hle, ka chhuak rihlo mai ang tih chi a ni bawk si lo. Zankhat la awm dil theih se chu, awmleh ka dil duh mai awm e, Tramdrula lo haw hun-a, ka lo awmlo tur chu a hrilh a hai ve in ka ring.

Police pa nen chuan Gate lam hawi chuan kan inzui phei ta a. Gate ka thlen dawn hnaih chuan, ni sawm lai ka lo tan ve na chu, ‘ka chhuahsan hlen dawn niin a lang ta si a’ tiin, ka hmuh tawp nan tiin ka han hawi let a. Chuta ka thil va hmuh chuan min ti phuzawk a, ka hnuk a ulh teuh mai.

Jail tang zawng zawng mai chu, an mahni awmna theuh tukverh ah chuan anlo fu thup mai a, ban nei zawng zawng chuan, tukverh atang chuan an rawn phar chhuak vek ti ila kan tisual lovang, an rawn vai a, a then-in rawmawl an rawn vai bawk a, ka ding ta hial a, ka vai let ve a, Police pa pawh chu a ding a, ka rilru hrethiam tih hriat tak chuan min tur pawh a tum lo.

Ka room luahpui (room-mates) te tihloh chu, a mimalin tumah ka va hmelhriat hran lova, chuti tak a, min rawn thlah liam chuan, ka rilru a khawih tak zet a. Tibet Jail tangte dinhmun chu, engtikah mah ka theihnghilh ngai dawn tawh lo a ni. Tichuan a tawpna atan, mittui parawl teuh chungin, ka ban vawikhat ka han vai leh a, Gatepui pawnah chuan kan chhuak ta a.

Fingerprint vel an lakna kawtah chuan, Li wu a kha a mah chauhvin kut hnung suihin alo la ding a, tumah pawhin anlo ngaihsak hranpa lova, Police officer, Jaila min rawn thlahtu pakhat leh Driver pangngai (a hma a mi) leh nula officer pakhat hian minlo nghak a, ka chhuahna tur lehkha vel an lo sign fel vel mek a. Kal lama min thlah tu officer khan, “I tha em” mi lo ti a. “Ka tha e” ka ti ve mai a. Zorama meizial intheh kan uar ang hian meizial hi inkawmnan an hmang ve a ni ber. A sikret chu a han phawrh a, “I  zu duh em” min ti a.

“Duhlo” ka ti dawn zet a, ka rilruah, Li wu a’n mei tui ti tak a zuk thin kha – ka hrechhuak a. Li wu-a tana ka thil tihsak theih hnuhnung ber a ni tih hria-in “Duh e ” ka ti ta a, meizial tan pah chuan lawmthu ka hrilh a, fawh hnih ka fawh hnu chuan, Li wu-a chu pek tum-in ka han mitmei a. Li wu a chuan “Police ho kha zawt phawt rawh” ti ni awm takin, Police ho chu a han mit mei kual a. Chutah, “Hei hi ka pe thei a ngem” ka han ti a. Nula khan “I thian em ni?” min lo ti vat a. “Ni love, ka room-mate(room khat a awm ho) a nia” ka ti a. Nula chuan, “pe rawh.. pe rawh” min ti ta a. Pek pah chuan, uluk takin chibai kan inbuk ta a. Li wu a pawh a lawm hmel hle in ka hria – kan inchibai zawh chuan dam chhung atan kan han in bye bye a, motorah chuan ka lut ta a.

Driver leh nula chu a front seat ah an thu a, Police Officer pakhat nen chuan, a hnung seat ah kan thu dun a, Jail compound reh ruih mai, thing phun chawp, to thelh sung na hmun chu, Shigatse khawpui lampan chuan kan tlan chhuah san ta a…….

……………………………………………………………………………………………………….

Part IV-ah a tawp ang ka ti ngawt a, Bonus siamsak lo che u a tih tawp ngawt chu ka in thiam dawnlo tlat….Bonus – atan Part V…ah tawp mai rawh se.

This entry was posted on Wednesday, March 16th, 2011 at 1:36 am and is filed under Information. Both comments and pings are currently closed.