All Mizoram Middle School Computer Instructor Association te chuan Dt 15th Sept, 2008 atang hian Mizoram pumah No Teaching Day an hmang tan dawn a, hei hian an thil duh ang tih hlawhtlin a nih loh chuan chawlhkar khat chhung a awh phawt dawn a ni.
Computer Instructor te hi Kolkata a company pakhat ACES Infotefch Pvt. Ltd hnuaia hnathawk an ni a, he company hi SSA in Computer Aided Learning (CAL) atanga sum an dawn atanga rawih an ni a. Tunah hian Mizoram pumah centre 140 awmin zirtirtu leh hnathawktu dang te nen mi 150 vel an awm mek a, kum 2004 atanga he hne hi thawh tan a lo ni tawh a ni.
Kum 2008 hma lam zawng kha chuan Computer Aided Learning (CAL) atan hian District pakhat in kum tin Rs Nuai 15 a nei thin a, chung chu District chanvo theuh chu State Project Director (SPD) SSA hnenah thehkhawmin Rs Nuai 120 lo tlingkhawm chuan ACES Infotech Pvt. Ltd te chu hnathawh tir thin a ni ta a ni. Hetih lai chian sum a la tam loh avang leh Computer tam tak lei nan a insen zia hriain zirtirtu te chuan a hlawh pawh a la tam thei lo tih an hrethiam hle thin a, lungawi tak chungin an lo zirtir reng tawh thin a ni.
Kum 2008-2009 project siam a lo hun a, Central in phalna a rawn pek behchhan hin District tina SSA te chuan Proposal an siam leh ta a. CAL tana Central in a phal chin hniam ber Rs Nuai 40 niin a sang lamah Rs Nuai 60 thleng phalna a rawn nei ta a. District tin te chuan Central in phalna a rawn pek hniam ber Rs nuai 40 chuan proposal a siam ta a, hei hi an tih chhan ber ni a lang chu CAL tana sum lo kal hi SPD lamah a tawp zel avang leh District ah a luh ngai loh avangin District a lo lut tlang thin scheme dang tan dah tam zawk an duh vang niin a lang. Mahse hetih lai hian State lam chuan District demand chu Rs Nuai 50 theuh in a lo siam rem sak leh ta a, kum dang ang bawkin CAL tana Central-in District tin te tana sum a rawn theh chhuah chu State lamaha tawp leh ta a. Kum dang zawnga Rs Nuai 120 awm thin kha Kum 2008-09 ah chuan Rs Nuai 400 a lo awm ta a ni. He sum hmang hian hmuhtheih leh khawitheih chinah hna thawk chhunzawm zel turin ACES Infotech Pvt. Ltd chu kum dang zawnga contract a lo ziak fel pui na aia tlem, Rs Nuai 80 in a ruai chhunzawm leh ta a, tin, company pakhat HIWEL chu Rs Nuai 10 in kum khat chhung a tan a ruai tel ta bawk a ni.
Hetiang thil a nih avang hian Computer Instructor te chuan an zirtirna ber Computer maintain hleihtheih loh leh an lawmman tihsan a nih hleihtheih loh lai a company dang a ruai mai chu hriatthiam harsa an ti a. Kum dang zawngah chuan CAL tan sum a tam loh avangin ‘Sem sem dam dam..’ tiin lungawi loh thu an tarlang ngai lova. Kum 2008-09 atana proposal siam theih tam ber pawh an siam lo chung pawh a Rs Nuai 400 lai lo tling khawm chu lawmawm an tih hle rualin heng sum atang hian School danga Computer leh IT Teacher nei ve lo tam takin an lo neih ve phah theih a nih an beiseiin an lo duhsak hle thin a. Mahse chutiang hmel reng a lan tak loh ro ro ah chuan Rs Nuai 300 chuang hmanna mumal tak hmuh tur a awm bawk si loh avangin chung sum hmang chuan CAL sum a nih na ang ngeiin an lawmman pawh zahpuiawm lo deuh tal tura siam sak beiseiin ACES Infotech Pvt. Ltd leh State Project Director, SSA leh Minister hnenah ngenna an lo pe lut tawh a, mahse tun thlenga ngaihsak an hlawh tak chuan loh avangin Mizoram pumah ‘No Teaching Day’ hman an tum ta a ni. Hetiang a nih avang hian zirlai naupang te leh an thawhpuite hnenah hriatthiamna an ngen nghal bawk a ni
Dear arcilin: News i lo submit hi hmun dang (Newspaper, Magazine etc..) a chhuak tur emaw lak chhawn a ni em? A nih chuan comment ah hian i lakna lo sawi la. Thanks
