18th October 2011 (Wednesday) khan ka nau fapa Septoplasty (hnar zai) turin Civil Hospital, Aizawlah kan admit a, kan Doctor kha Dr. Zorengpuii ania, a felin a hna a thiam hle.
Tichuan 19th Oct 2011 chuan inzai turin Civil Hospital OT ah kan lut a, min ngaih em avangin a nu pawh awm tho mahse keimah vekin ka luhpui a, a nu te chu pawn ah an awm a, keiin an phal chin room thleng ka kalpui a. Minor Surgery mai tur anih avang khan chhungte dang pawh kan hrilh em em lova.
OT a an hruailuh atanga minutes 20 vel ralah khan Doctor leh Nurse an lo chhuak a, min rawn ko ta a, kan nau chu a dinhmun a ṭhatloh thu min hrilh ta mai a, kei chuan “ Enge a dinhmun chiah? In zai tawh em? A harh em? etc” kan zawt a, Doctor chuan “Kan la zai hmanlo a, a lung (heart) a ṭhalo niin kan hria.
A lungphu a tawp ringawt. Pathian hnenah lo ṭawngṭai char char rawh u” an ti ta mai a. Min shock in kan mangang phili buai hle mai. A nu nen khan a chhunglamah min luhtir a, Damdawiin hnathawkte an fel takzet mai. Min ṭawngṭaipui bawk a. Recovery Room ah chanchin kan lo ngaichang a, 25minutes hnu velah Sister pakhat in min rawn ko a, a damchhuah ring tawhlo a mangang taka ṭap tawh kan ni a, Sister chuan min kuah a, an ṭawngṭai lai a Pathian chhanna lo thlen thu, kan nau pawh a rawn thawk leh tak thu min hrilh ta a. Pathian hnenah lawmthu kan sawi a, Doctor leh Nurse te, thawktute hmangin Pathianin kan tawngtaina a chhang ani.
Tichuan ICU ah dah phei a ni a, Ventilator nen keini in a kan hriatthiam ve phak bak khawl leh wire chi hrang hrang in an zawm a, a dinhmun engkim min hrilh bawk a. Chumai bakah OT a duty te pawh an hman veleh ICU ah rawn pheiin kan nau chu an rawn en a, tawngtaina hun te pawh min hmansak leh a. Tunhma Civil Hospital a thawk te sawiselna kan hriat thin te ka ngaihtuah a, kan vannei nge tunhma ang ani tawh lo aw ka ti a. Kei chuan sawiselna tur ka hrelo a, an theihtawp takmeuh an chhuahin mihring nunna an ngaihlu takmeuh tih a takin ka hmu ani.
Tin, sawi hmaih hauhloh tur pakhat – 19th Oct 2011 inzaini khan Operation Theatre a kan chhoh hma in Ward ah Sister in Hunserh a hmang a, damlo leh awmpuitute zawng zawng nen tawngtai rualna hun kan hmang a. OT kan han thleng a, Bible chhiar leh Tawngtaina hun kan hmang leh ani. Hei hi a ropuiin a hlu takmeuh meuh a, la hrelo in awm takin kan sawi tel ani e.
Misual ah hian mithiam tak tak in awm teuh a, Medical lam mi te pawh. Ngaihdan han thawhkhawm tur kan nei em? Doctor’s Report ah chuan Cardiac Arrest during operation and anaesthesia tiin a inziak a. Minutes 22 chhung kha lungphu awmlo, pulse awmlo, heart-beat awmlo, oxygen pawh hip theilo in a awm a. Doctor leh thawktu dangte pawhin mak an ti a, khatia a lo thaw leh kha Pathian hnathawh ani tih bak sawitur an hre biklo.
Doctor pakhat chuan ‘Hetiang hi a thleng ve thei a, a chhan kan sawi theilo. Mihring singnga ah pakhat te an awm, thil vang (rare) tak ani. Inzaina dawhkan ah la zai hauh hma a lungphu tawp a thi ta mai a an awm thei. Vanduai vannei in ni e’ a ti. Engvanga khatianga awm nge anih kha a chhan min hrilh fak thei lo. Cardiologist ah in check-up tura tih kan nia. Chumi hunah chuan a chhan kan hre thei mahna.
Misuala ka’n post nachhan pawh Pathian ropuizia leh thiltihtheihzia a taka changtu kan nih thu hi share che u ka duh a. Min lawmpui ve ngei ka ring a, kan hmalam hun zel atan pawh min tawngtaipui turin ka sawm che u a. Tin, kan thil tawn ang hi tawng in awm ve tawh em, hemi chungchangah enge min share tur neite in awm em tih te ani e.
Similar Posts:
- Doctor, Nurse leh a chhehvel
- Pathian Remruat (I duhzawng vana an tih angin leia mi’n ti rawh se- Mt 6:10)
- Mitthi tholeh
- Mobile power very important
- Australia-a thilmak thleng!
October 26th, 2011 at 9:53 pm
Ka mut a chhuak ta, mangtha vek u
Report this comment
November 1st, 2011 at 2:58 pm
he lai chu post leh comment a ngaihnawm hle mai. (Mi pakhat comment tih loh chu) enge in nau chu a an tak zel?
Report this comment
November 1st, 2011 at 5:05 pm
@Rooney Opa, kan tha zel e. A hriatrengna a la neikim chiahlo, mahse nitin hma kan sawn e. Min ngaihtuah a a lawmawm takzet.
Report this comment
November 12th, 2011 at 12:01 pm
[...] te ka hmu bawk a, rilru a cham thenkhat han sawi ka chak a. Kan damlohna chungchang ka post kha hetah hian a chhiar [...]
Report this comment