mi(sual).com

Ka muttui lai taka phone lo ri chuan mi tiharhin meng leh meng loin tukverh lam ka han hawi a, khua ala var chiang loin khawfingchah vel ani tih a rin theih a, ka phone chu thuthlenga ka dah daih avang leh ka ban phak mailoh avangin ka va phei peihlo chuan ka beng hupin a rik zawh hun ka nghak ta a, chutah mut leh ka tumlai tak chuan ka phone bawk chu rawn ri lehin, rei a rik hma chuan room lehlam atanga ka Nu in âw vin taka “Pick up ta che mawle, thil pawimawh pawh ani thei asin” alo tih bawk avang chuan, peih lo takin meng leh menglo chuan thuthleng lam chu ka pana, ka phone ka han en chuan ‘MotherIndia2’ tih alo lan avang chuan a rawn phone tu chu ka rin hriat thei mai a, ka rilru chuan kanau-i rawn haw chu a rawn thleng tawh ani maw ka ti rilru a, mahse ka mut dawn zinglam dar 12.30 vel Kolasib atanga ‘Mu tawh rawh, kan thlen hunah pawh ka rawn be lo ang che, tui deuhin mu la, I harh hunah mi be dawn nia’ a tih avang chuan mak ka ti deuh hlek a.

Phone chu pick up pah chuan “I va thleng hma ve” kan ti thla ngawt a, chutah Nutling âw hian “ Lame, I naute….” a sawi zawm theilo,,,chutah tah âw tiau,insum tumtak hian “ hei I naute an accident a, tunah casualty ah kan awmin, I nau pawh mihring a tling talo” a rawn ti a, chu thu ka hria chu ka thaw lo, phone ka thlauh a, ka bing mup in mumang ani silo, a hma lawka hlim taka inbia a, Shillong atanga an chhuah atanga kolosip an thlen thleng a chanchin min rawn hrilhtu, duat taka a hming pawh a ko phallo a “kanau” ti a ka koh chu mihring a tlin loh thu min rawn hrilh ta mai si..

Rilru a tawi mup a, reilo te chhung mah nise rilru a vak thui hman em em a, Khumtlanga mittui tla zawih zawih a thu chungin pawn lam ka hawi a, ka Nu mi rawn biak pawh chu ka lo hre loin, a ngaihthalo chu ka room ah a rawn lut a, “Mate enge nita” a rawn tih chuan mi tiharh zawkin, “nu an accident’ tih pahin ka bula a rawn thu chiah chu a malpuiah ka bawk a, ka tap zawih zawih a, kum 28 chuang ni tawh mawh ila, ka Nu bulah chuan insum ka tum loin insum pawh ka tum lemlo, Ka nu pawh chuan tihngaihna a hrelo in, ka lu ah a mi chul mi chul ringawt a..Zing khua a rawn var zuiin ar khuang ringawt te chuan tah anti chhuak a, pawn lam ka han hawi chhuak a, Kum tam inzui, hlim taka hmalam hun sawia kan inneihni a ka haktur thlenga hlim taka kalo sawi pui thin, vawi tam hmangaih biahthu kalo hlanpui tawh chuan mual min liamsan ta mai si…Hun tam la liamlo mahse, tun minute 30 vel lek chhunga ka manganna, ka lungngaihna, leh ka nunhlui ka dawnkira a hreawmzia leh a natzia hi he khawvelah hian eng tehfung mahin a teh theih ka ringlo.Tawnmang nise tiin chung Pathian hnenah eng anga rinna chak nen pawhin dil mah ila a sawt dawnlo tih hre mah ila, thinlung hian a tak ni turin a phal mawlh silo..

Ka ngenna ngai pawimawhin ka chhungte pawh chuan min rawn tibuai loin, ka mizia hrechiang tu an nih angin min rawn pawhlo a, ka pindanah tukthuan ei hma zawng ka awm a, a nachang ka hriatloh avanga min pek hmasak teddy bear lianpui chu pawmin ka khumah bianga mittui far chungin nunhlui ka dawn kirin, ka rilru ka kawma..A ruang nghah tur a nihloh avangin a thlahna hun hmang tur chuan ka insiam ta a, fai taka ka inbual zawh chuan ka inthuamin, a rawn haw apiang hian a thlen tuk zinga inbual a, insiam hi chu ka tihdan thin nimahse, nidanga hlim taka hmuh ka tum thin thlahna hnuhnung kal tura insiam erawh a har ani..Duhtaka a kawr mi thlan sak chu hain, mitthla ah kan lei dun lai te a rawn lang a, ka kawr kilh pum tur khan hun leh mittui engzah nge ka sen pawh ka hrelo, ka hriatchhuah leh chuan mami hian alo kilh mawlh mawlh a, chutah min lainat tih hriat taka mi en chung chuan “ Ka U, pachang hram teh, mipui hma ah te khan i mualpho ange, i pangpar ken tur pawh pi.Thani te ta kan chah a, a fresh ania, motor ah ka dah ania” a han tia , zangkhai deuh a nui chunga sawi tum mahse, mi tawrhpui tih ka hria a, chutia an U ber pachang hleithei lova ka nau te hma a kan awm chu a nuam ka tilo in, mahse ka thei nganglo ani..

Ka chhungten min kalpui an tum ka hnial avang cuan mahni in nidanga ka kal thanna lam takah chuan ka in khalh chhuak ta a, ka sana in dar 10.12 a kawh tawh avang chuan ka hmanhmawh rilru hle a, mahse ni danga an veng lam ka pan nen chuan speed ain thlau in, ni danga kawng thui leh traffic jam ka nin thin te kha, kawng a tawi in motor lah chu a jam lo viau mai a, karlo ah ka tum lam veng chu thlengin an in peng bulah chuan motor chu ka hungin a ngainat thin rose par sen buk tak keng chung chuan ka chhuk thla ta a, mipui lah anlo tam tawhin, a tu a te pawh chuan min en hrek hrek mai hian a hriat a..An In ka han thlenga, ni danga nui seng a minlo hmuahna thin an Veranda lah chu a ngai ngai in alo la awm si, hreh tak chung chuan k han lut a, ruang lam ka han pan thla a, chutah ka huphurh ang ngeiin a nu chuan mi hmuh veleh “ Bawihte, i U a rawn leng asin, lo chhawn ta che “ a han ti chu insum a har duh hle a, chutah a Pa in zawi fiah tak si hian “ Tuai-i, i U thil I hawn hi I pe dawnlo em ni “ tih paha Reebok polythene dum mi han pe chu ka zawi nghulh in, ka bianga mittui rawn luang chu dan pawh ka tum peih tawh lo..

Ka han hawi vela kum 5 chuang ka len tawhna In chhung pawh chu a ngai ngai a la awmin, danglamna awmchhun chu he In luahluma hlimna thlen thintu chu khumah nunna nei tawhlo in a zal ta si..ka han en a, a hmel leh sakruang chu ka ngainat thin chu la ngaiin danglamna pakhat pawh a awm silo, mahse a hmel ti mawi zualtu a nui hmel erawh hmuh tur a awm ta silo, ka thlakhleh leh ka hmangaih sakruang bulah awm mah ila, Pathian ina alo duan anih angin he nunna neilo sakruang hian thlakhle;hawm na reng a nei tawh silo, a hmel ka en a, vawi tam mi hlimtu ka hmuh hnuhnun na ber tur ani tih hi ka ring phal silo..Tun hnu a midang hmaizah avanga, ka chhuak vat leh a kuang thla ka lak pui duhlo te kha kumkhua a ka inchhirna a niin, lakpui lo mah ila ka mualpho anilo in, ka zahpui loh zia tilang tu ani tih ka lo hrelo kha pawi ka ti thin..Aw!! Lei chu leiah tih alo nih anga, a zalna tur thlana an thlak thla lai te kha hmuh ava har tak em, ka tan zawng Lei ka tih thinah hian ka hmanngaih sakruang a luangral tawhin, a thlan hnaiha japan-hlo leh tual hnim to te pawh hi ka duhber sakruang zarzo an nih tawh avangin hlutna an neiin, tun thleng hian a thlan ka tihfai pawhin, Kanau-i taksa a tel tawh avangin a zung nen lam uluk deuhin ka phawi chhuak in, tual hnim tangkaina neilo te thleng pawh hian min zah tir tawh si..

Nia, kum liam tawh mahse, nimin ang maiin a la thar a, a nui hmel te kha mitthla ah ala cham si..Thenrual thenkhat chuan tunlai takin “ lame-a over zia hi, nupui pawh ni lo, ngaihzawng te thi heti khawpa sun” anti thin, mahse he hmeichhia, ka aia kum 6 a naupang hi ka nun kaihruai tu pakhat leh kawng tamtak min kawhhmuh a, ka hmangaih na chhang let thintu ani tih min hriatpui thintu ka chhungte leh ka thian tha tlemte tawngka atang chuan demna awka ka tawng ngailo..Nia, ka tan chuan ka ngaihzawng vawi thumna, a tan a vawi khatna niin kan inngaizawng chho a,kan inzui tirha kum 17 kha tuna chuan kum 22 lai, khawtlang mitah chuan nula alo tling tawhin kei pawh kum 28 tlangval senior tih ka lo ni ta mai a..kei aia naupang ni mahse mi tihlim thiamin ka tana a hlut ang ngei chuan a tan pawh hlut tumin tan ka la ve thin, ka chakna a hria in, chu ai mah chuan ka chak lohna a hria a, a tul hunah naupang zawk ni mahse mi fuih a, mi zilh a, a tul hunah mi tiphurin thurawn te mi pe thin. Chutiang bawkin ka fuihna, thurawn, zilhna te a ngaipawimawh in zawm a tum ve thin.. a tul huna a thu ka zawm a, a tul hunah ka thu, zep kan nei loin, kan chungte ve ve te lakah pawh kan zep loin kan inhrechiang a. “ U, keimah tih lohah chuan min hrechiang ber, A Nu leh A Pa bulah chuan zep then ka nei a, I lakah chuan engmah ka zep silo” a tih lai te kha ka ngaihtuah letin dik ka ti hle a, a ni takah engmah kan lakah zep kan nei ngai silo..

Inngaizawng dang te ang bawk a, inhauh leh inthen te pawh kan tawng ve in, vawi 4 lai a tawp nan tiin inthen mah ila, kan inhmangaih tih kan hriat chian dun em avangin kan ni leh nge nge thin.. Thianten, induh ve rawh, ban hlen rawh, I tan a tlawmthlak lutuk tih ka tawn chang te pawh a awm, amahah pawh a awm, mahse kan inkarah midang thurawn a leng loin, kan 2 a tihfel kan tum thinin kan tifel bawk thin..Hei kum a liamin tun thla hi a a cham a ni dawn a, he hun a rawn thlen hian ka lunghlui a leng hle a, thla tawpa inrinni tawp ber anih angin ka tihfo thin angin, a chetsual tuma min hawn, a pa ina min pek tak Reebok Tshirt greychu ha in, a thlan lam ka pan ta a..Theihnghilh a hmalam pan a hun tiin thurawn ka dawng thin , mahse a hun ka tih hunah chuan ka kalsan hun a la rawn thleng mai ang ti a ngaihtuah chung chuan min vel thintu hla, hlim taka inngheng chunga kan ngaihthlak thin, kei nimai ila kan tihfiam thin ngaithla chungin ka kal fona lam pan chuan ka chhuk ta a..

Oh,where oh where can my baby be?
The Lord took her away from me
She’s gone to heaven, so I got to be good
So I can see my baby when I leave this world.

Similar Posts:

• Nokia Care an rinawm tawk em..
• Blue Moon
• Aizawl ah Sify
• I wish I felt nothing (for Sawmtea late)
• BSNL in min pawngsual

Recent Posts:

• RD ah Diklo takah hna lak…
• Mizo Idol show hi a ropui em?
• Ka nun hian a ngai em che – Bethsy Lalrinsangi
• Mizoram ramri kan tlawh a
• Pawngsual (RAPE) rate atangin, “MLTP hian kan khawtlâng hi hmeichhia leh naupang tân a ti him” tih chi a la ni em?

This entry was posted on Tuesday, November 15th, 2011 at 12:30 am and is filed under Fiction, Luangliam. You can follow any responses to this entry through the RSS 2.0 feed. You can leave a response, or trackback from your own site.