mi(sual).com

“Lalpa Pathian thlarau chu ka chungah a awm; a ni chuan thinlung lungchhiate tuam tur te, sal te hnena chhuahna thu leh mi tangte hnena tan in hawnna thu sawi tur te…” (Is 61:1)

“ Nimahsela, a pa chuan a bawihte hnenah, ‘puan tha ber kha han la thuai ula, han sin tir rawh u, a kutah zungbun te, a ke phahah pheikhawk te bunter rawh u; sebawng no thau tak kha han la ula talh rawh u, hlim takin I ei ang u, he ka fapa hi a thi a a lo nung leh ta a nih hi, a bo a kan hmu leh ta a nih hi’, a ti a.” (Lk 15:22-24)

Zorama thalai tamtakte hi, tha leh fel tak tak tam hle mahse, nun beidawng, ruih hlo a tlan, ruk ruk ching te nula leh tlangval an kat nuk vet ho mai a. Thenkhat chu an sual ve hrim hrim vang te pawh a ni ang, mahse, tamtak te hi chuan hmangaihna mit a entu an hmu lo ve bawk ni in a lang. Mahni duh reng vang pawh ni lova, an naupan lai a miin an pawngsual avang te, nu leh pa te thihsan avang emaw/inthen avang emaw a nu hrawn/pa hrawn ‘nun rawng’ an lo hrawn avang te, mahni duhdan leh lo tum ve ran ran ni pha ta lo, eng emawzat an awm tih chu, Ks leh rukru tamtak te testimony leh tunlai kan film siam ah te a lang fiah awm e. Hengbakah hian mihring ‘nun hel’ Pathian chu hlau ve tho mahse, Pathian lam kawng zawh en a en peih tawhlo te pawh an kat nuk ta ve ang. Heng hi chu, keimahni theuh in chhungkhura thleng thei a ni tih ka hre awm e.

Fapa tlanbo khian in a chhuahsan lai khan Pa hmangaihna hre thiam lovin, chapo tak leh in ring tawk takin ‘a ro chan ai’ la in in a chhuahsan a ni tih kan hmu a. A pa pawhin chuti taka in lak hran duh chu, harsatna in a tlak buak dah a nge tiin, a ro chan ai a phurh chhuah tir lawih mai a. Harsatna in a han nuai tak tak hnu chuan, hmangaihtu tak tak a PA kha a hre vawng vawng a, a chhuahsan tak a Pa in kha a ngai vawng vawng ni in a lang.

Hetah hian, kan fate, kan hnen atang chhuak te hian, hlimna leh hmangaihna an hmuh loh avanga min chhuahsan nge? An mahni chapo na lehmahni hmasialna avang a chhuak. In chhungah hlimna leh hmangaihtu an hmulo ni a inhria in, an hmuh chhun chhun mipa anlo um ve ngawt nge? Engpawhnise, harsatna in a han nuai meuh a, humsual dai leh kawngdiklo zawh ni a an inhriat hnu-ah, mahni in lam ngai vawng vawng a haw leh chak turin, kan hmangaihna hmel anlo hmu thin em? Kohhranah te hian thlamuanna an zawng thin em? Pathiana thlamuanna mamawh em em tu te hian Kohhranah te, rawngbawltuah te, kristian chhungkua inti te ah hian an zawn leh mamawhte an hmu em?

Tlangval pakhat pawh in,” Zinga ka han thawh hma ve deuh leh,’ Chhungte’n thawh hma chuhin ruk chhuah tur a melh’ tiin min ringhlel a, ka han thawh tlai deuh lahin, ‘zan lamah ruihtheih thil a ti hnem lutuk a ni ang’ an ti a, chaw ka ei tlem deuh leh ruihtheih thil ka tih nasat vangah min puh a, chaw ka ei tui deuh lahin ‘trip’ (ganja) ruiah min puh leh bawk si…. Inkhawm ka han ngaihsak ve deuh lahin thawmhnaw thar leisak a beisei vang… min ti leh bawk si…buaithlak ta khawp mai..” a ti e an tih ang deuh a nia.

Nun inchhir a, sual sim duh takzet, nun thar beiseia lo lawilut te hi, hmangaihna in kan lo tuam dam em? Nun thar nei tur hian kan lo dawngsawng em? “Kha a rawn haw leh ta chhawr chhawr mai, ka ning a nia, he in chhungah hian i awm thei tawh lovang, min ti mualpho, ruk chhuah tur i rawn zawng em ni? Chhuak leh vat rawh, in chhung pawh hi rawn rap tawh suh….Police ka man tir mai tur che a nia” Kan lo ti nek thin nge? Khawi ah nge an kal tawh chuan ang le? Kristian chhungkaw Nu leh pa tamtak rorel dan hi chu a rapthlak deuh thin.

Fapa, nuamtawl chak, ro sum chan-ai phur chhuak a, Pa in chhuahsan ta chanchin khi tehkhin thu mahnise, a ropui teh e. Fapa lah in mahni thil tih dikloh inhre chhuak in, a Pa lo hmangaih zia hriat chhuah vawng vawng na kaw tawp a thleng a. Ro sum a neih ve tren trawn lai kha chuan hmangaihtu leh duhsaktu pawh a tawng ve fe ta ve ang. Chaw-eia sawmtu pawh an kat ve nuk mai thei. Mahse, a han tlak ran chiah kha chuan hmangaihtu leh lainat tu a nei tlem kher mai. A chhuahsan tak a Pa, a ngaingawih ta mai a ni ber e. Mahse, a pa lak ah chhuan tur a neilo tih a inhre chiang kher mai, a chan ai ro sum lah a la fai ve tawh si, peipun a din chhuah pui chu sawiloh, a tla-ran chiang kher bawk si. Fapa anga chapo tak a let leh thei pawh a ni tawh lo, a Pa hnenah chhiah hlawh hna dil chu, khawngaihna a hmuh phak tawk chauh turah a ngai tawh a, chu pawh hauh leh tim nek a tawk lovang tih hriat a nilo.

Tichuan, a pa in thlen thuai thuai chak tak si, huphurh ang reng si, a pa in engtin tak lo dawnsawng ang maw ti a ngaihtuah rauh rauh chungin, in pawh alo hnaih ta. A seilenna in pawh a lo lang ta ruah mai a…. “Saw alo haw leh tak chhawr saw, tenawm lutuk.. a hmuh pawh ka hmu peih tawh lo…en teh u, a ro sum phurh chhuah zo zai te kha, khawnge a tih ral ni..ruak te chuan alo haw leh ta nghal a, a hmingin rawngbawltu kan ni leh nghal, min ti zak lutuk, Police ka man tir mai dawn emaw ni chu le” tiin, nu leh pa tamtak chuan anlo dawng sawng ngei awm e. Chutiang chu an in chhunga ava tawn ni ta se, a hmabak a va thim dawn tak em ! Khawnge a kal tak chuan ang le ! In awh-hlum mai nge…thihdan kawng dang zawn mai?

Kan Zoram ngei a kan vuiliam tak, thalai tamtak te leh, ruih hlo a tlan ta tamtak te hian, kan Kristian nu leh pa tamtak atang hian ngaihsakna leh hmangaih kan hmu lo nge? “Thinlung lungchhia” thalai, hmangaihna leh lainat na a lo dawngsawng a tuamhlawmtu kan neih ve loh vang em ni le? Biak In bawr vel a thlarau mi tak, rawngbawlna a inti inhmang tak..mahse ‘thinlung lungchhia’ (broken-hearted) tuam dam tum miah lo – ‘Na tak’ a rorelna tiang lek kawhtu kan va tam thei dawn tak em. Nun in chhir ngawih a sim duhna nena kan hnen rawn pan tu, an hmai chhan a, “ Mi hur nu, khawnge i va rawl dawk dawk a, I bialpa chu va nei ta che, Thu tha kan hrilh che pawh awih duhlova, chhuak tau kha i ni lawm ni, eng nge ilo hawng leh dawk dawk..chhuak rawh, kan in chhung hi rawn rap tawh hlek suh…min ti mualpho lutuk, kan zahawmna i tibo vek tawh….chhuak rawh….i duh leh va in-awk hlum la,..i duh duh in awm rawh, ka nu..ka pa pawh min ti tawh suh….”. Tiin kan lo dawngsawng thin nge?

Kan Fapa tlanbo lo haw leh a pa-in alo dawnsawn dan hi, “..a ir a chuktuah a, a fawp ngawi ngawih a”. A fapa lah fapa atanga chhiah-hlawh nihna pawh changpha tawhlo khawpa tlawmna tawpkhawk nen, a Aw pawh a lawi chhe hle tawh ang , “Ka pa vana mi chungah leh nangma mithmuhin thil ka tisual e, i fapaa vuah tlak ka ni ta lo..” a ti hman dek dek a, “ Nimahsela, a pa chuan a bawihte hnenah, ‘puan tha ber kha han la thuai ula, han sin tir rawh u, a kutah zungbun te, a ke phahah pheikhawk te bunter rawh u; sebawng no thau tak kha han la ula talh rawh u, hlim takin i ei ang u, he ka fapa hi a thi a a lo nung leh ta a nih hi, a bo a kan hmu leh ta a nih hi’, a ti a.” a Fapa lo haw leh hi a va han lawm thiam tak em…a fapa tan pawh a Pa hmangaihna hi tlanbo san leh chi a ni tawh lo. Chhandamna, humhimna, tuamhlawmna a va han chang chiang tak em aw !!!

Hetiang hian ngaihdamna famkim, hmangaihna leh khawngaihna in kan fapa/fanu te, kawng diklo zawh palh, nun inchhir a kan tangnem rawn belh beiseia min rawn pantu te hi lo dawngsawng thin ila, kan Zoram thalai “the brokenhearted” tamtak te hi tuam dam an nih ngei ka va han beisei tak em !!

“He has sent me to bind up the brokenhearted, to proclaim freedom for the captives and release from the darkness for the prisoners… ” (Is 61:1)

Similar Posts:

• Hmangaihna hi enge a awm zia aw?
• Hmangaihnain a hnawl sipai huaisen
• There goes my everything..
• Kala hmangaih reng che asin
• Hmangaihna

Recent Posts:

• Diplomatic rank leh a kaihhnawih
• Lenmawite
• Bumtu-a bum dan (Sunday Pual)
• Critique of Anna Hazare and his campaign against corruption
• Tunlai thil awmzia

This entry was posted on Sunday, July 17th, 2011 at 11:00 am and is filed under Advice, More than words, Opinion. You can follow any responses to this entry through the RSS 2.0 feed. You can leave a response, or trackback from your own site.