mi(sual).com

(Hei le, ka’n ti ve leh a, Kohhrana Report pek ang ni lovin, Arunachal-a thil danglam deuh kan hriat atana tha awma ka rin te ka han thlur deuh ang e-Pkfanai)

Kum 1995 Pawltlak thla Sikul chawlh lai a ni a. Arshang Sikula Evangelist teacher ho chu, Kan Sikul Naupang zinga a hmeltha leh, a fel felte khaw lam (Rotte-Koyu) Lama Gospel Tour nei turin kan inbuatsaih a. Kan Field Director leh Evangelist 2; Rotte khua leh Koyu khua ami ten min Guide thei dawn bawk a, a thlamuan thlak hle. Tin, Thingtlang mipuite hip khawmna tangkai ber tur, Zai leh Lam lam pawh kan intodelh ang reng hle.

Field Director Gypsy khat tanin kan inbeng a, Driver pawh hruai lovin F/D in Motor a khalh nghal a. Keiin Sikul Scooter ka khalh a, Tlangval 1 ka phur bawk a, kan thawk rip hle.

Kan kalna tur lam hi, Adi zinga a peng hrang deuh, an tawng pawh hrang, Gallong ho awmna ani a. East Siang District khawthlang tawp West Siang nena an inrina lai vel, Assam atanga hla vak lo a ni.(Tunah chuan Gallong ho hi Adi atangin an in la hrang tawh a, an tawngah ‘ng’ an neih loh avangin, Gallong tih hi ‘Gallo’ an ti tawh a, an khawpui Aalong pawh, ‘ Aalo’ anti tawh). Arunachal hnam hrang hrang zingah hian hnam fing ber leh Lehkhathiam sang ngah ber anni. Itanagar a Office lian hoah pawh hian Gallo an tam ber. Tin, Tuna an Chief Minister Jarbom Gamlin pawh hi Gallo a ni.

Metalled Road Km 60 vel kan tlan hnuah, kawng alo diak ta hle mai a. Shaktiman ho Thing thiarna kawng anih avangin, Shaktiman daina thlur hnihin a khuar duk mai a. kal a harsa kher mai. Kan thlang lawk, lui lang thei rengah chuan Shaktiman ho chu kawng mumal pawh awma lang lovah hian an tawlh hruah hruah hlawm bawk a. Kawng chu a diak hneh em avang leh Shaktiman kalna hniak hnu zawh zel a ngaih avang chuan, Ka tlangval phurh chu Gypsy hnungah a bei ta ringawt a, kei chu, a chang chang a three wheel, a chang phei chuan Four wheel hialin ka tlan ve zel a. Mahse, Scooter keah chirh nal a lut a niang, a break a awm ta reng reng lo mai a. Shaktiman driver te nen kan han siam ngial a, (a break shoe ah rangva them an zep). Kan han siam zova, ka han test chu kawng kha a chhuk deuh a, a chak tan tihah a break ka han rap a, awmzia a nei ta reng reng si lo, a chak sawt si, a thlang kawng kawi tlan ngil chuan kham sang lutuk ani mai si, Kan Pastor hlau thawng chu kawng laiah dingin min lo tih din a tum, ka su dawn ngeiin a lang ta, ka su na lutuk dawn si, ka Scooter chu ka elh thlu ta tawp mai a, a ri ring kher mai. Nula ho hlauthawng lutuk an lo te thawt bawk. Inring reng leh mahni duhthu ngeia elh thlu kani bawk a, ka insawh na lo a, Scooter pawh chuti lutuk chuan a hmelhem lo hlauh.

Motor kal theih chin tawite ani tawh thova, chutah chuan kan Motor leh Scooter chu kan dah ta a ni. Lui Lian vaklo kan zuk thleng a, Shaktiman kal reng rengna anih avangin, a zawh a nuam phian a. Kan riahna tur Rotte khua kan thlen dawn hnaihah chuan Motor kawng lama min hmuak, an Thalai Tlangval ho kan thuam phurh min chhawk tumte chu, Kawngpui atangin Mau leh thing hmun khamah an rawn tawlh thla ri ta sun sun mai a, an au deuh ruai ruai bawk si a, Kan Pastor pawh a meng phawk nasa hman mai. Mahse, hlim takin kan inhmu a, kan Mutbu kente chu min chhawk ta hlawm a. Tichuan, tlai dar 2 velah hlim takin Rotte khua chu kan thleng ta a. Kan Sikul Naupang an lo awm nual mai a, kan tlangnel phah hle mai a, an nu leh pa te pawhin an thiam ang tawk chuan min duat ve a ni.

Ro kan han rel nak nak a, vawiin hi December ni 30 ani tawh a, a tuk Kumhlui thlah niah chuan Rotte ho chuan a khuaa Picnic an lo tum a, chu chu chhim nghal turin min duh a, an khaw bul lawk KADU khua, Kristian la awm lohna khuaah chuan zan riah hmasak zawk kan ti tlu ta a ni. Tichuan, kein kan kal ta dam dam mai a, a hnaih ang aiin alo chho hrep mai a, a hah thlak ang reng hle mai. An Gaon Bura in lian takah kan innghat ta a ni.

Gallo(ng) ho hi, hnam tangrual tak anni a, Title khat nei ho hi khaw khatah an cheng ho mai thin a, anmahni chipui an innei thiang lova, Khaw dang ami Title dang nei an nei tur ani a, Nupui man hi a sang/tam em em mai a, Chhungkua tan rual fe angai thin. Unaute nupui hi an ngaihsak thei hle mai a, hmanlai phei chuan inneih tawm ang titih te pawh an awm thin ani awm e. Sumhmun kan tih ang hi Leikapui tiat zet annei thin a, Skirting chauh neiin, Bang nei lovin thawveng takin a awm a, Mau leh thingphel hmang te in thutna an siam kual a, Chu chu mikhual chan chin chu a ni. An inchhung ril a Luh an remti vak lo.

Zanah kan han zai a, a khua alian lo bawk a, an lo kal kim deuh vek awm e. Pathian thu kan han sawi ta a, an ngaithla tha hle mai. Inkhawm banah chuan Chu an Sumhmunah chuan kan riak ta a ni.

A tuk, Tukthuan ei khamah Rotte panin kan kir leh a, chhuk zawng ani bawk a, kan thleng hma hle. Kan Zirlai Naupang pakhat Pa kha Pasighatah pawh In nei leh Chulai Bial a, Ruling lam Block President alo ni bawk a, min thleng hneh hle mai. Tichuan an khaw bul mai Luiah chuan Picnic tur chuan kan kal ta a.

Luiah chuan Lung tian khawm hi alo awm thluah mai a, Chhungkaw hrang hrang ta alo ni a. Kan Naupang Pa Evangelist ni bawk leh a fapa Tlangval chuan an Lung tiankhawm pakhat chu Buhzem anga dap tah kual Ft 5 bial vel, ft. 3 vel a sang chuan an han hual khung ta a, leiah an han sawi nghet sawt sawt a, an lung tian khawm chu an paih chhuak ta a ni. Chutah le, Lung kara tawm Sangha chu an phu nuai nuai tan ta mai le. Kei; chutiang lam tuimi ka lo ni si a, nuam ka va han ti em. An chhuak thei si lova, Dapah nem betin kutin kan man ta a lawm le, hlim awm tak a ni. Lung chu an paih chhuak zel a, an paih fai ta vek a. Kan man rem deuh vek hnu, 10 chuang awrh la awmte chu man an har ta a, Evan. Pa chuan a chem Chuan a kik keuh keuh a, kan man fai ta. Chuta lo pungkhawm zawng zawng ei khawp zan zu tling thei a maw le. Sangha hmang chuan Ruai kan theh ta a ni.

Zan Lamah chuan Biakinah Inkhawmna pangai kan nei a, Kan Thusawi leh Zai leh Lam te an hlut ve hle. Kan Sikul Naupangho pawh a fel fel kha anni bawk a, Zai leh Lam an show ve a, an hlut thiam hle. Zan mutna pawh Rotte ah hi chuan a nuam khawp mai.

A tukah chuan kein Koyu lam kan pan leh ta a. Koyu ah hian zing karah chaw vawi 3 kan han ei teh reng mai anih kha. Thingpui inah min sawm a, chaw leh sa an rawn chhawp zel si a, kan hre lawk mang thin si lova, a puar theih ngei mai. Vawiin hi Kum thar (New Year) a lo ni ta a, Inkhawmna kan nei a, Inkhawm banah Lui lamah bawk kan kal leh a, Lei (hanging bridge) chhe tawh tak hi a awm a, Tlangval 2 chu kan han lawn hram a, kan hnuai Li lian vak lo leh thuk vak lo chu kan zuk en nak chuan, Sangha hi a sen dang deuh te, a uk deuh te, a dum deuh te, a tle deuh te hi an lo bawk khat deuh thup mai anih chu. Lung buk bawk kha kan han en leh a, mak takin Sangha alo tam lo hle mai a, enge a chhan niang aw? Kan tih laiin Ngharul lian mang kheng hi alo awm alo ni a. Chu chu kan sathlum a, kan chhum ta alawm le. A va han tui tak em. Mahse, Rul a ang em mai a, kan Nula hovin an ei tui vak lovin ka hria. Zan lamah Community Hallah Kan inkhawm leh a, a khua tak meuhin an rawn pungkhawm a, Inkhawm banah Damlo tawngtaipui ngai an rawn pungkhawm a, Kan han tawngtai leh a, hetiang te te hi Lalpa hian a ram zauh nan a hmang thin a ni.

A tuk zingah Mi inah ka leng mai mai a, Thingpui min hlui a, “A hmeh ka zu la lawk ang e” a ti a, an kawmthlang mai Luiah chuan a zuk kal a, kar lovah Sangha Kutphah chen dawn 3 hi a rawn man mai a, chu chu hmawlhteah a thil a, an mei nung reng maiah chuan a han hem hmin ta a. A va han tui thin tak em. Tukthuan eikhamah RINA khua kan pan leh ta a. He khuaah hian Kristian an la awm lova, amaherawhchu, an Gaonbura Fapa Dr.Rina Child Specialist hian a fapa kan Sikulah a dah avangin kan chungah an lo tha leh hle mai. (Dr.Rina fapa Kennedy Rina hi kan Sikula akal lai khan, Rotte khua ami Gompi Padu nena pakhatna innih chhawk zak zak thin anni a, Cl-XII Science ah khan Calcutta a an Sikulah Topper ani a, Tunah chuan Doctor ani ve leh tawh).

Zanah Community Hall-ah bawk kan zai leh ta a. a khuain an rawn pungkhawm leh ta a, Thu kan sawi zawhah Zawhna leh chhanna hun kan hawng a, Phaia Lehkha zir (Doctor leh Engineer Training ho)thiam tak tak, an chhuti lai an khuaa lo hmang mek an lo awm nual mai a, Zawhna an zawt khirh khan thiam hlawm hle. No-nick a te ho ang maia zawt khirh khan thiam anni. Chutah tak chuan alawm kan Pastor Rev.V.Laldingliana, Mizo tawng ang chiah a Assamese leh English thiam ka chhuan tak em em chu ni. A chhang nalh thei fahran lutuk a, han zawh ki kawi ngaihna vak pawh an hre hlawm lo.

A tukah chuan, Koyu chhun pelhin, Rotte Khuaah kan riak phei leh a, a tukah Tukthuan hma taka eiin kan chhuak leh ta a. Kan Scooter pawh kha alo ro tawh a, Shaktiman Driver ho khan uluk zawkin an lo siam bawk a, Pawisa tlem azawng kan pe a, kan tlan haw ta a ni. Ka Scooter hi Pasighat khawchhung luh hnuah Mission Centre thlen dawn tepah a gear thlak tuma ka han herh chu a tliak ta bup mai a, a uai ta hnawp mai a ni. Ka tluk naah khan ka lo sawh na deuh a niang. Buai lo chiah chiah turin Pathianin min veng a lo ni.

Similar Posts:

• Motor ruih hi…
• Chakma te an vul zel angem?
• Hmuifang lamtluang
• Ke Pahnih Nei
• ‘Kawnkhawpui” leh a chhehvel chhinchhiahtlakte

Recent Posts:

• Zautei
• Mizo Tawng Thenkhat Tobul – II
• What is India : Classification
• 6.8 earthquake in Aizawl han deng ta mai se…
• Ka nu: Phuahtu – Nuchhungi

This entry was posted on Wednesday, August 10th, 2011 at 12:42 am and is filed under Travel. You can follow any responses to this entry through the RSS 2.0 feed. You can leave a response, or trackback from your own site.