Solution to ‘Chu story chu II’

December 3rd, 2011 9:00 am by upsilon

(‘Chu story chu II’ tih i chhiar hmasak duh takin hetah hian a chhiar theih e)

“Engtiangin nge, khawi atangin nge Bena’n ro chu a hmuhchhuah ang le?”

Ka pindan tukverh bula ni tla tur thlira ka thut reng lai chuan ka rilru-ah naupan lai nun a rawn lang a. Lung a ti leng kher mai. Thil hrang hrang ngaihtuahin vei tawp hleih theih loh ka nei ta tlat mai a. Ka lukham bula ka phone dah lain ka nu number ka dial chhunzawm nghal a.

Ka Nu: Hello

upsilon: Hello. Ka nu, kan tet laia thawnthu ngaihnawm deuh, apa lehkhathawn atanga ro dahna chhuichhuah tih vel min hrilh kha i la hria em?

Ka Nu: Ka va hre tawh lo ve aw! Enga tan nge i tih a?

upsilon: A chhuichhuah dan kha ka hre duh a, mutnaa min hrilh khan ka lo mutsan daih bik a, ka hre ve lo alawm. Han ngaihtuah teh, apa ro tam tak hnutchhiah a chhuichhuak vel a nih kha.

Ka Nu: A va mak ve aw.. E…ka hre chhuak leh si. A nuin a hmuh loh nana lehkhathawn, chhiarkawpbu leh sava thla pathum hmanga ro awmna a pain a fapa a hrilh kha a nih dawn chu. A bu pawh kan la kawlin ka hria ka’n dap vel ang nge. Lo nghak rawh.

upsilon: (nu rilru chak neih hi chu nuam deuh a sin) Awle, a bu hming pawh ka hre duh a nia.

Ka Nu: Ka hmu e. Mahse, a kawm a tla tawh. A bu hming a hriat theih tawh lo a.

upsilon: E, a pawi lo e, ka duh lai a awm chuan a tawk lutuk. Lehkhathawna thil inziak atang khan min lo chhiar chhuahsak lok mai, ka hre chak lutuk a.

Ka Nu: A va han buaithlak thin tak em aw! Ka hmu e, lo ngaithla rawh.

“Lehkhaah chuan…..

Bena,

Hei hi ka dam chhung chuan ka theihnghilh ngai tawh lo ang a

I nu a chauh chuan khum nuam takah mutin duat takin enkawl la

Ni sa-ah ka vak chhuak a, thing buk hnuai ka hmu lo a

Hreawm, mangan, lungngaih ram leh tah tawp lohna hmun chu he lei hi

I lai a nih paw’n tumruh leh thahnemngai takin bei zel ang che

I tlukin tho leh rawh, I tan khua a la tlai chhe hleinem

Heng hi vawng reng la, I tan ro hlu tak a ni ang

Lungngaihna, tahna leh mittui nen he hringnun chau tak hi ka hmang a

Phum ni mah se, thu dik chu hai lan a ni dawn si

I pa

Chu thu ziak a chhiar chuan a hrethiam lovin a ngaihna reng a hre lo. Mahse, a pa a ngaih leh a thlakhlelh em emina a thu rochhiah a nih avangin a en ning thei lo. A lehkhabu hmuh thar chu a hriat thiam ngai loh ni mah se, a keu ning thei lo bawk a. ‘A thil hmuhte chuan zirtir leh kawhhmuh a nei reng ang a’ tia ngaihtuahin zir chian a chak ta tlat a, a zir ta reng a ni.

School a kal si lo, zirtirtu pawh nei lem lo-a zir a nih avangin a tan zir chak a harin, thil tlemte zir nan pawh hun tam tak a hmang a. Mahse, chhung lam atanga nawrtu a nasat avang leh a pa thil pathum hnutchhiah -‘chhiarkawpbu, lehkhathawn leh sava thla pathum’ te hian a rukin, a nu hriat theih loh turin, kawhhmuh tum a nei ni-a a rin tlat avangin chawlh mai mai a tum lo, nasa takin a bei zel a ni.

A tumruh em avangin, a tam lo bawk a, chhiarkawpbu chu midang puihna tel lovin Bena chuan a thiam chhuak ta vek a. Thil pathum zinga pakhat chu a tlak ta phawt mai le. A dawt lehah chuan lehkhathawn chu nasa takin a zir chiang a. Thil hmuhchhuah a nei ta.

Lekhathawnah chuan sentence 9 a awm a, sentence tinte’n thumal(words) 13 theuh an lo nei reng mai. A pa lehkhathawn hian awmzia a nei ni-a a rinna chu (ring mai chauh pawh ni lovin) a pawm ta thlap a, a phur zual ta hle mai le.

A dawtlehah chuan chhiarkawp dan leh sava thla 3 te chuan he lehkhathawnah hian tangkaina an neih ngei a ring ta tlat a. Tih dan, chhui dan hrang hrang hmangin rei tawk tak, chu thu ziak chu a bih ta ngar ngar a. A tih chhin, rem khawm chhin dan vel chuan awmzia a la nei thei lo. Mahse, a beidawng duh mai lo, khawdang hawi lovin a chhui ta char char zawk a ni.

Rei tawk tak a zir chian hnuah chuan thil hmuhchhuah a nei ta. E khai! A lo inrem fel thlap mai.

Lehkhathawna sentence 1-na-ah chuan sava thla 3, 3 lai tak leh a chhiarkawp thiam chu a hmang tangkai a. 1×3=3 a thumal 3na.

Hei hi ka dam chhung chuan ka theihnghilh ngai tawh lo ang a

Chutiangin a sentence 2na: 2×3=6

Sentence 3na: 3×3=9

Sentence 4na: 4×3=12

Sentence 5na: 5×3=15. 15 a awm lo a, a thumal 1na atanga chhiar leh tanin 15-13=2na..

Sentence 6na: 6×3=18. 18-13=5

Sentence 7na: 7×3=21. 21-13=8

Sentence 8na: 8×3=24. 24-13=11

Sentence 9na: 9×3=27. 27-13×2=1

I nu a chauh chuan khum nuam takah mutin duat takin enkawl la

Ni sa-ah ka vak chhuak a, thing buk hnuai ka hmu lo a

Hreawm, mangan, lungngaih ram leh tah tawp lohna hmun chu he lei hi

I lai a nih paw’n tumruh leh thahnemngai takin bei zel ang che

I tlukin tho leh rawh, I tan khua a la tlai chhe hleinem

Heng hi vawng reng la, I tan ro hlu tak a ni ang

Lungngaihna, tahna leh mittui nen he hringnun chau tak hi ka hmang a

Phum ni mah se, thu dik chu hai lan a ni dawn si

‘KA KHUM HNUAI LEI LAI RAWH, RO KA PHUM’

Hrilh hranpa ngai tawh lovin a pa library-a a pa mut hahchawlhna khum hnuai chu lei laihna hmanrua nen a pan nghal a. Rei a laih hmain bawm lian tawk tak pakhat hi a hai chhuak ta. Chu bawm a han hawn chuan lunghlu leh lungmawi tam tak a lo awm reng mai a. Tichuan an khuaah Bena aia hausa reng reng tumah an awm lo. Hlim takin a khawsa ta a.”

upsilon: A tihzia e. A bu hming leh ziaktu a phek chung sirah pawh a in ziak lo maw?

Ka Nu: Ziak lo bawiha, enga tan nge i tih teh thut a?

upsilon: A…engmah ni lem lo e, nih phawt.

tiin ka duh lai tak min hrilh tawh tho avangin call chu ka ti tawp a.