Kha ni kha ka la hre reng. Chawei kham pawnah kan thu chhuaka, kan thianho kan titi a, kan nui a, kan hlim hle a. Khatia kan awm tak hnu kha chuan thian dangten min rawn zawm ve vat a hlim takin kan awm ho reng a.
Ni chu a tla tep tawh a. Kan thianpa hawk dak fal chuan kan awmna chhaka lo awm ve tleirawlho chu a hmu fuh ta hlauh mai a. Chung tleirawl ho chu zai zirin kan han chhaih ta a. Kan hlim tlang ngei mai. Khata zinga pakhat kha tun thlenga ka rilru luahtu, ngaihzawng dang pawh nei mah ila ka lam a lo hawi leh dawn a nih phawt chuan ka ngaihzawng chu then nghal duh khawpin kha nu kha ka hmangaih tur a nih ka ring lo.
Khang tleirawlte kha kan chhaih a, flying kiss te kan han pe vel a. A changin an lo man a, an paih der vel a. A changleh an lo bum vel thul. Kan infiam nasa hle a, kan vawikhat inhmuhna nimah se kan infiam tawn nasa khawp mai. Hlim taka kan infiam vel lai chuan ni a tla a. Lehkha zir a ngaih avangin kan han in bye bye a, kan inkalsan ta a.
A tuk khua a lo var a, thawhhma phei chuan zingkar a rei duh khawp mai. Tukthuan ei a hun meuh chu thil tam tak kan ti hman daih tawh a. Chaw kan eikhama, class kal turin kan insiam a. Ka insiam zo pawna ka awm mai mai chu ka duhthusam thil ka tawng ta.
Khatia keimah chauha ka ding kha a hma tlaia kan hmeichhe chhaih zinga pakhat kha pawnah a lo dak zuai a, a lut leh a. Tun thlenga ka vei em em chu a va ko a. Min rawn fiam ve ta thung a.
Ni e, kha tleirawl kha a hming leh veng pawh ka hre lo. Ka hriat chhun chu kan chhaih tawh tihzawng a ni mai. Tunah chuan min rawn chhaih ve thung. Kan inchhaih tawn leh a, kan nui leh bawk bawk a. Nakinah chuan ka hming min zawt ta tlat mai! Ngatinge ni ta ang le??
Chawlhni a ni a, kan inkhawmlo tihtur hre lo ka awm mai mai chu ka hming min zawttu kha lehkhathawn chhin ang tiin ka thianpa ka hrilh a. Kan thiandunin kan ziaka, kan thian pakhat hostela awm ve lo kan pe a, ka han thawn ve ta rawih a.
Ka thianpa bulah chuan fiamthuin,”min duh tak leh vannei, duhloh leh ngaiawh” tiin ka sawi a. Kan nui dun nasa khawp mai. Nia, a hming pawh hre lovin lehkha ka thawn a nia..chhan a rinawm vaklo reng a ni.
Tlai a ni a. Tuaithar lengi te pawh an lo dak leh a. Ka lehkhathawn tleitir hmelthai pawh a lo dak leh a. Theihtawpin zaizirin lehkha thawntu kha keimah ka ni tih ka han hrilh a. A hrethiam lo. A ngaihtuah vung vunga, a hrethiam ta aniang. Aman zaizirin min rawn zawt let a. Ka lo bu nghauh a. A nui var var a. ‘ a tha e’ tih entirnan a bu nghauh a. Engtin tak min ti ang maw? Min pawm ang nge min hnawl ang? Chuta chiang ber chu engmah a chianglo tih chauh a ni.
Thawhlehni a ni a. School kal tur ka insiam chu pawnah min au tu an awm avangin ka chhuak a. Ka lehkhatur a lo keng chu niin- chhiar a chakawm tawh em! Ka ak thaa, ka insiam sawk sawk a, ka zo chiah tihin hmanhmawh takin hmun fianrial ka pan a. Lehkha ka han en a, a tawpa hming awm ka en a. Ka lehkhathawn chhanletna a ni tih ka hre nghal a. Uluk takin ka chhiara. Ka fiamthu mai mai kha awihin min lo chhanglet! Min lo duh a nih chu.
Tunah chuan kum tam a liam tawh. Ni leh thla te pawh vawitam an herliam tawh a. Ngaihzawng dang kan nei ve ve tawh. Mahse, ka nuna thil mak deuh awm chu kha tleitirin a thil min lo thawn- card te, lehkhathawn te, hriatrengna tur thil tam tak te kha ka tan chuan a la hlu em em a, amah lah ka rilruah a la awm reng bawk si. Hei hi em ni an sawi hmangaihna chu??
