“Rampui-lian United States ang chu Mizoram nen khaikhin chi a nilo,” kan tih ka hre fo mai. Ni e, a ram len zawng te, a ram in ropui hleihna kawngah te, pakhat state anih laiin pakhat rampui (country) anih naah te kan khaikhin loh tur thil a awm nual ang. Chutia tih karah chuan khaikhin theih, entawntlakna leh ramdangin an tih, Mizoram a kan tihve theih reng si kan tihloh vanga ram leh mipuiin kan tawrh hi a langin a tam a ni.
Mi thenkhat chuan, “Mizoram pawn atangin ram in rawn vei a, Mizoram vei tak tak ni ula a ram chhungah in awm ang chu,” tite pawh an awm bawk. A nihna takah chuan Mizoram chhung a mite hian tih kan tum siloh chuan, ram pawn atangin a lang lurh mai bawk si a, Mizo tan chuan mahni ram chu vei loh a har ve bawk em a ni.
Mizoram kan hmangaih a nih chuan kan tih theih reng kan tih siloh te kha ti ila, chuti chuan ramdang atang pawhin chhuang takin, vei ngai lovin kan hmangaih zual sauh sauh ngeiin ka ring a ni. Engpawh chu nise, angaite bawkin rualawhna ka’n sawi leh poh ania’ng chu.
United States hi khawvel chhung a awm, mihring chenna tho anih angin eirukna, hlemhletna nasa takin a awm ve tho mai. Ram hruaitu thenkhat chuan thamna (bribery) an la ve tho mai mahse, dan kengkawhtute (police/court) lamin thlei bik an neih loh thin avangin, chutiang eiru leh thamna dawngtute chu hrem anni fo thin.
Nikum mai pawh khan Maryland state chhunga county pakhat (County ah hian mi 100,000 emaw a aia tam emaw an awm a, local government a ni) Prince George’s County a an Executive pakhat, Jack B. Johnson chuan thamna a lak avangin rorelna (court) chuan kum 7 lungin tang turin a chungthu an rel a. A nupui Leslie Johnson, council member pawh thamna pawisa thukru leh thil thupbo tumna avangin kum 1 leh nikhat tang turin a chungthu an rel thlu a ni.
Chutiang deuh tho chuan, Washington DC council member, Harry Thomas Jr. pawh tax a ziah dikloh vang leh sawrkar pawisa mimal ta anga a hman vangin a hna atangin a bang a, May ni 3 ah an hrem dan tur court in a puang ang.
He mite pahnih hi entirnan ka rawn dah mai a ni a, thildang tam takah pawh dan (law) a lal zia chu keini hmuh leh hriat theihah pawh hian a awm thin. An dan kengkawhtu, police te hi zah tlakin an khawsa a, zah an kai bawk a. An roreltute pawhin thleibik an neilo hle thin. Mizoram angin puten thingtlang lamah an transfer daih ang tih an hlauh vangin an hnathawh tur an thulh phah ngai heklo. Ka sawi awmzia chu, an aia lal (higher rank) chhungte emaw hmelhriatte emaw thiltisual/dan bawhchhia an awmin dan angin an man hmiah hmiah mai thin.
American te hi eng hnathawk pawh nise, a tlangpui thuin mahni hnaah an rinawm tlangpui awm e. Mihring rinawmlo nih chu mahni zelin an tawrh thin vang pawh a ni ngei ang. Sawrkar hna nghet thawk pawh nise, hna nghet tak tak pakhatmah a awmlo ti ila ka sawisual kher lovang. Hnathawk tha peihlo chu an ban pawp zel mai a, hei hian mahni hnaa thahnem ngaihna chang hrelo nih a tihar em em thei bawk ang.
Tin, hnathawhna reng rengah hian tumah, pianhmang emaw, rual ban chiahlo an nih pawhin tumah an rilru nat theihna turin emaw fiam khap tlat a ni a. Mipat hmeichhiatna lam hawizawnga thawhpuite fiam ngat phei chu in ban (fire) nghal tawp theihna a ni.
Ram hmangaihna thu hi an sawi sek lova, an nunah leh an cheziaah a langin a hmuh theih fo. Mi tupawh an thawhchhuah awm an inhriat avangin, a chuangliam nei awm a lang chu sawrkar lamin a chhui vat zel. Eng hna pawh thawk sela sawrkarah tax an pe theuh a, tax pelo chu revenue service lamin an dimlo hle bawk. Tax pek tur zat pelo pawh theih ang angin dan hmang a an chungah rorel a ni thin.
Mizoramah chuan thlakhat a Rs.10,000 vel emaw hlawh pawhin concrete in, motor leh khawvel thil a duh ang chu a man petla vekin a nei thei fo mai. Hetiangte hi sawrkar lam hian chhui ve sela, diklo chu hrem ngam se, an hlawh chhuah chin bak pawisa chu laksakin, an bungruate lilam (auction) mai sela, tun ai hian nasa takin Mizoram tih changkanna tur mipui tan pawisa a awm zawk ngei ang. Mizoram siam changkanna tur pawisa an pumbilh hmak hmak zel a, mipui ten rel rel mah ila, a langa kan auchhuah ngam siloh chuan kan hriat loh hian min nuihzat thin ngawtin ka ring.
Ram hmangaihlotu, ram eichhetu, tawngkam chauh a ram hmangaih ho hi i tlawnlo ngam ang u. Ti ngam hmasa kan awm a ngai. Tunah chuan hlemhletna a thuk tawh lutuk a, tumah inti chhe ngam an awmlo a nih hi. Mi huaisen, hetiang mi bawlhhlawh, ram hmelma te tudai thei tur tunge awm le? Kan dan neihsa ang tehi zawm tha ila system tha kan neih theihna tur chu a ni mai. Chutiang tur chuan mimal tin kan pawimawh.
Chunglam a ka ziah eirute chungchang an rel dan chhiar duh tan:
http://tpmmuckraker.talkingpointsmemo.com/jack_b_johnson/
Hnathawk tute tan a hamthatna leh invenna sawrkar thuchhuak, dan (law) chu (MD state): Hrechiang duh tan, ‘Title’ hnuai ami te hi click hawn theih zel anni e.
http://www.dllr.state.md.us/oeope/poster.shtml
January 13th, 2012 at 11:17 pm
Hemi zawh chiaha en leh turte tana ninawm turin.. phek thar
Report this comment
January 14th, 2012 at 10:34 am
Nia mawle. Kristian duhlo a kan ngaih ramah Missionary kan tirchhuak ur ur thova (Mizoram atang ngat phei chuan an vei em em lehnghala). “Kan ram hi pawn, entirnan Mizoram atang ten, atang khan in rawn vei em em a” ti a an chiar hiar thawm pawh ka la hre lem hleilo a, duh leh Mizo vekin Mizoram an vei te chuan enge lo sawisel vak na tur
Report this comment
January 14th, 2012 at 10:40 am
chhangte_ll #52 i ziak buai nuai nangin, ania sin, Mizo vêk ten kan ram kan vei lovin tunge vei chuang ang tiraw?!
Report this comment
January 14th, 2012 at 10:46 am
Govt. of Synod saw, “Arunachal daih daih in vei” han ti chiah la
Chuvangin mahni duhzawng theuh vei ila, insawisel loh tur…
Report this comment
January 14th, 2012 at 10:49 am
Zoram tan a ka ngaimawh em em pakhat chu sawrkar hnathawk, ram danga awm nghet tawh si ie:nupui/pasal nei a ramdang a kum tam tak awm tawh te.. Mizoram sawrkarah hna chelhlai an la nei tlat fo mai hi a ni.
A khat mawitawkin ‘explanation call’ an nei ve thin niawm tak a ni a. Chutih hunah chuan an rawn haw zeuh a, an awmna lamah an kir leh nal nal mai thin. Lang taka mipui chanai eiru anni ka tilo theilo.
Mizoramah sawrkar hna a vang kan ti fo si a, hetiang ho, thawk hleilo, hlawh nei/neilo te hian midang hna nei thei tur an dal tlat a, hlawh la la rengte phei chuan pawisa nasa takin an eiru a ni. Hetia hna nei anga an la awm hian pension te thlengin an la nei thei ngei dawn a, anni aia ram thanmawh bawk an awm chuang dawn em ni le.
Hetiang mite hi chhui chhuak zelin an chungah action lak ni sela ka ti hle mai… Ka pianna Mizoram tan!
Report this comment
January 14th, 2012 at 10:52 am
H.V: Mizoram lo chauh ah pawh chutiang chu a tam alawm. Kum 5 tlin hma a va ‘Join’ leh keuh ani mai
Report this comment
January 14th, 2012 at 11:15 am
#56 a tenawm, ram thanmawh bawk, ram hmelma
Report this comment
January 14th, 2012 at 11:20 am
Pu Hv, he i thuziak hi tukin Vanglaini-ah ka hmu e. ‘Zoram Tan’
Report this comment
January 14th, 2012 at 11:29 am
TS, hlawh zat awmna lai khi tuaihnum a chakawm khawp mai, chutiang a chhuak tur chuan. A chanchinbu phek copy ka hmu e. Ka hming kha address nen a chiang angreng
Report this comment
January 14th, 2012 at 11:42 am
Nia, address kha a chiang khawp mai!
Report this comment