Aizawl tuallaiah riahrun an rem a maw..!

January 8th, 2012 6:01 pm by TuaiSialA

Facebook-a mi status lo post chu ka inthlahrung lutuk! Mahse, Vanneihthanga Vanchhawng (Pu Vana of LPS)-a’n inrinni-a a thil post hian ka rilru a khawih em a, ka rawn dah lo thei lo a ni. Min hrethiam mai teh u!

NIZAN KA THIL TAWN..

Nizan chu Zarkawt traffic point bul, Dawrpui Vengthar panna kawng phei tawntirh kawngsir mi bathlarah patling kum 45 mi vel tur hi a bedding pawt pharhin a mu hmiah mai a. Rizai sinin a inlukhup a, a mutna bulah chuan a thawmhnaw dahna suitcase leh mistiri thawmhnaw – ara leh tuboh dahna iptepui te chu a dah bawk a.

Chutia tualchara patling mu tlat mai chu thenkhatin an hlau deuh va, thenkhatin an khawngaih a, mak ti taka thlir liam tawk an awm bawk a. Chutia tualchara patling mu ta ngawt mai chu eng nge thil awmzia tiin a rizai inlukhupna chu ka keu a, “Thianpa, engtiziaa he laia mu mai nge i nih le? Khawi lam mi nge i niha, nupui fanaute i nei em? Thlenin tur i hmu zo lovem ni? He lai hmunah hian nizan lamah pawh i riak tawh niin an sawi a…” tiin thil awmdan ka zawtfiah a.

Ani chuan nupui fanau nei a nih thute sawiin an nu nen an inthen a, a ngai thei em em a, amah hmuh tumin Suangpuilawn atangin Aizawl-ah a rawn kal a, mahse, hmuh a châk em em an nu chu a hmu zo lo. He lai kawngah hian a kal thin niin an sawi a, an intawn fuh mial beiseiin tualcharah patlingin riahrun a rem ta mai hi a lo ni a…

Chutianga kan han ngaihven takah chuan midang pawh an rawn bawrkhawm nghal tak tak a, thianpa Lalvenhima hmar chuan a puanthuahte chu têlsakin a hotel lama riak turin a hruai phei ta a ni.

Chupa chu kan buaipui zo deuh chiah tihin hnamdang tlangval pakhat hian, “Ka pu, saw laiah saw’n riahna tur nei lo pitar leh hmeichhe naupang an awm a, an tawngtai char char ka hmu a…” a rawn ti a. Suangpuilawn pa riah tumna piah lawk, Zarkawt traffiic point bul Dawrpui Vengthar panna kawng peng tawntirh, chhun lamah chuan pitar leh putar nupain serthlum leh balhla an thutpui thinna bulah chuan pitar sa pan lam, kum 50 chung lam tawh hmel pu leh hmeichhe naupang kum 10 mi vel chu mi dawr bang nghengin an lo thu dun a, zan khua a vawt em em a, thawmhnaw lum tha inbel tur an nei zo lo tih an hmelah chuan a lang reng mai.

Zan khaw vawt hnuaiah eng vanga chu lai hmuna thu reng mai nge maw an nih le.. Khawi lam mi nge an nih, thlenin te an nei lo em ni, ti-a ka zawh chuan, Mamit lama chhuk tur an nih thu leh he lai hmun atanga zing sumo chhuak tur tlaivara nghah mai an tum thu min hrilh a ni.

Dinhmun inthlauh luat avang hian hnam khat kan nihnaa kan inpawh tawnna leh innel tawnna te khan mual an liam zo ta em ni le! An khuaah kal ila, an neih ang ang phal takin min lo hlui ang a; he laiah an lo kal a, inthlahrunnain an khat a, zan khaw vawt hnuaiah thut tlaivar mai pawh an thlang zawk chu a ni si a…tiin ka ngaihtuah chhunzawm a..

101 Responses to “Aizawl tuallaiah riahrun an rem a maw..!”

1
Kawnga Says:
January 8th, 2012 at 6:03 pm
Nizanah ka chhiar a, rilru a khawih khawp mai..
2
lr hlonchhing Says:
January 8th, 2012 at 6:08 pm
An va khawngaihthlak ve. Tun ang khawvawtah leh nghal…
3
Tete-i Says:
January 8th, 2012 at 6:11 pm
nizanah khan ka chhiar a,ka rilru a khawih khawp mai… a nupui thren tak chu a hmuh leh ngei ka beisei
4
LaMea CâcTùs FLh Says:
January 8th, 2012 at 6:17 pm
Ka rilru a khawih khawp mai.
Mahse a nupui awmna veng a hrelo mawni le
5
Sadbutt Says:
January 8th, 2012 at 6:23 pm
Thawnthu te pawh a ang zawk hle mai..kan la tawn chhoh zel tur te poh a nih hmel…Mizo tlawmngaihna, Kristian ram kan ni,etc…. kan insawi ang hi chu kan ni lo deuh thin a ni lo mo? :-S
6
PKfanai Says:
January 8th, 2012 at 6:25 pm
Vairam ava ang sawt ve. Kawng lehlamah chuan, mirethei lutuk tan chuan zing kara hmun hla lutuk atanga Zarkawt pan ai chuan, Khawilai emaw a, thut-mut tlaivar mai duh zawk pawh a awm theih ang.
Chu Pa chu Media lam mi kherin ava tawng fuh chu Pathian ruat pawh ania nge. An zawn hmuh sak thei maithei asin. Khawnge Vanglaini,etc,.etc…
7
Tete-i Says:
January 8th, 2012 at 6:27 pm
thil pakhat ah chuan Khawpuiah hian misual leh rukru an tam tawh em a, hmelhriatloh kan ina hruai luh mai mai a hlauhawm em bawk a ni…
8
PKfanai Says:
January 8th, 2012 at 6:27 pm
E taka, Lalvenhima Hmar chu a fak tlak hle mai.
9
kawlhawk Says:
January 8th, 2012 at 6:29 pm
Nupui zawngpa khi pa ka ti tiah2! 😮
10
TuaiSialA Says:
January 8th, 2012 at 6:36 pm
Nia, nupui zawng pa khian a nupui a hmangaih awm hi ka tia. Hetiang hmangaihna ropui! Tin, Lalvenhima Hmar pawh Suangpuilawn khawchhuak tho a ni tih hria ila.
11
century child Says:
January 8th, 2012 at 6:38 pm
keipawh hizan-ah ka chhiar, tak2 ani angem aw ka ti rilru zui neuh2 a… :-S
12
DrAngel Says:
January 8th, 2012 at 6:46 pm
Tete-i ziah chu nise ngaihdan tawk ka thiam ang mawle, mahse a tak2 ani awm si a, ava rapthlak em.
13
Tete-i Says:
January 8th, 2012 at 6:49 pm
#12, lalmarvenic.. i van sual reuh e.. Engtik lai pawn dreamer ka ni reng bik lo a nia.hehe
14
TuaiSialA Says:
January 8th, 2012 at 6:51 pm
A hmangaihna khi a ropui em a ni! Dawt a nih lo tawp ang. Hetiang dawt sawina chi a ni hleinem.
15
mpa F Says:
January 8th, 2012 at 7:00 pm
Aw hmangaihna
16
sheldon Says:
January 8th, 2012 at 7:21 pm
Khitiang khi kan ram dinhmun ani tan tawh chu ania…hriat a nuamlo ngei mai. An lainatawm ka ti ;-(
17
chhangteval Says:
January 8th, 2012 at 7:21 pm
An khuaah kal ila, an neih ang ang phal takin min lo hlui ang a; he laiah an lo kal a, inthlahrunnain an khat a

A lungchhiat thlak reuh ;-(
18
Soberboy Says:
January 8th, 2012 at 7:21 pm
hei hi ka lo chhiar a Pu Vana update kha! ka lainat ania o !! hetiang chi hi an awm nual ka ring tlat ani!
19
Sangpuiipa Says:
January 8th, 2012 at 7:27 pm
An khawngaihthlak awm tak hle mai. Kumin chu misual charity kan siam leh anih chuan heng ho hi rilru ah hria ila a that dawn hi.
Kei pawh Zodin Bridge hnuaiah sawn ka riak ve kar tawh.. 😛
20
ReMpYâ„ Says:
January 8th, 2012 at 7:30 pm
Nupui zawng khi chu han lainat dan vak pawh ka hrelo e a. A hmuh theih dan ber tur nia a hriat ah thra a tih dan berin a nghak a ni mai a.. Sap hla pawhin ”you know i’ll walk a 1000 miles, if i could just see you tonight” atih kha..aw hmangaihna!
Pitar leh naupang te khi ka lainat khawp mai..
21
kawlhawk Says:
January 8th, 2012 at 7:35 pm
Rempingi chu sawi tha ve leh tlt ka ti… (Y)
22
filliz Says:
January 8th, 2012 at 7:36 pm
Suangpuilawn pa khi a ngaihsanawm ka ti tlat. A nupui a hmangaih hmel tek tek khawp mai!.
23
Sangpuiipa Says:
January 8th, 2012 at 7:41 pm
Suangpuilawn ah sawn bialnu deuh roh ka nei tawh tak asim mawle. 😛
Suangpuilawn pa hi award pek tlak hial anih hi. Lps velah te bo zawnna ang deuhin chhuah sak sela.
24
3d Says:
January 8th, 2012 at 7:42 pm
Pitar leh naupang chu engtinge an tih tak???
25
Pc-a Says:
January 8th, 2012 at 7:42 pm
Khawi laiah emaw chuan riah lumna tur chu an nei ve tho turah ngai ang. An laklawh ve deuh a nih hmel kha a.

Pitar pakhat Aizawlah 1998 khan a chhungte kan zawnpui mai chu buaithlak ve tak a ni. Buai hmaa ka kal tawh kha a nia, a ti heu mai si. Mi antamnen hmelhriat an va vang ve ti niah niah chungin, Sikulpuikawn atangin khatla, Tuikual A B C kan fang chhuak dap.
26
filliz Says:
January 8th, 2012 at 7:45 pm
Mi hausa leh rethei inkar a hla tawlh tawlh a. Nakin lawkah chuan vairam ang hi kan la ni ve mai ang tih a hlauhawm khawp mai. Mizo nunze mawi kan kalsan hret hret a, in tanpui tawn ai chuan mahni hma kan sial telh telh bawk. Khawvel changkang chho zelin hmanlai ang a inpawh tel tel a khawsak a harsa tawh a ni maithei, mahse a tam thei ang ber a kan zonunmawi chhawm nun zel hi chu tum hram teh ang u….
27
Ignatia (33-115 AD) Says:
January 8th, 2012 at 7:46 pm
Mathai 25:45 ah chuan heti hian a inziak- ‘Tih tak meuhvin ka hrilh a che u. Heng mi te berte zinga mi pakhat chunga in ti lo chu ka chunga ti lo in ni,’.

Pathian hi a hring a hranin a lo inlar dawn lo, Amah hi puih ngaiin a awm dawn lo. Mathaia 25:41- 46ah hian chiang takin a sawi a ni. Lalvenhima Hmar hian kohhrana rawngbawltute tih awm ngawih ngawih a ti a ni. Fakawm hle mai. Kan rawngbawlna hi a MASS EVANGELISM lutuk leh PULPIT ORIENTED lutuk hi pawi ka thin mange.

Pitar leh naupang khi an lainatawm hle mai. Hlim takin a damchhung hun leh nite chhiar rawh se!
28
James Bond Says:
January 8th, 2012 at 7:47 pm
An sawi ang in ring tawp mai hi a dik ber em aw? Mi chi hrang hrang hi kan awm a, a thlawna chaw, pawisa leh midang hkawngaihna beisei a, hmuh tum dan chi hrang hmang hi an kat nuk tawh. Suangpawilawn khua tak tak ami ni em tih te in inzawt ngai em? A nupui hmuh tum si phone a biak phawt a, a awmna address, veng tal rawn hriat lawk maw? A nupui nia a sawi chu KS te a lo ni der tawh em, tih te inzawh a, a chhe ber dawn phawt chi ani lawng maw?
29
aduhi Says:
January 8th, 2012 at 7:48 pm
Vairamah hian zan reh deuhah hi chuan kawngsirah hian an lo mu fur zel. Thlasik lai hi chuan an khawngaihthlak thei khawp mai. Flyover hnuai te hi a rush thei lutuk.
30
filliz Says:
January 8th, 2012 at 7:49 pm
#25, Pc-a chu a va buaithlak hmel tak ve aw! 😆 , buai hma nen chuan a danglam dawn nasa tawh mai sia le!
31
Atom c Says:
January 8th, 2012 at 7:52 pm
Hmangaihna chuan tuar pawh a huam tur a nia, a huam reng bawk a nih khi. :-O
Kawnglaia mu nazawng hi an inang vek chuanglo , duh vang reng nilova mu an awm a, duh vang hrim hrima mu an awm bawk a,chhan leh vang awm miahlova mu pawh an awm tho maithei. A ni khi chu mut chhan felfai tak a nei a, kan hriatpui ta bawk a, a dem-awm lemloh e. Hlawhtling se kan duhpui hle mai… ;-(
32
Pc-a Says:
January 8th, 2012 at 7:53 pm
Thingtlang tlangval 2 pawh an rui tawh si, an tlen Ina haw peih tawhlo kha zarkawta motor dinglai hnungah an riak a. An harh chuan luangmual lamah an lo tlan thla vau vau tawh mai maw le.
33
hmingtea Says:
January 8th, 2012 at 8:06 pm
Thgil awm ve fo thin a nih ngei ang le!!!

Nia thingtlang lam ah Aizawl chhung te leh thian hlui etc te an rawn kal kan neih bakin kan thuam a kan thlai ei phal loh hralh ai te kan hawn tir thin a .Aizawl kan han kal ve ta chek a thingtlang mikhual mawl chaw heh tuh kan hlawlh tawk thin poh hiu hreawm ve deuh a sin hahahah lolz
34
Sangpuiipa Says:
January 8th, 2012 at 8:07 pm
#32 😀
35
TuaiSialA Says:
January 8th, 2012 at 8:29 pm
Dawt a nih ka ring lo. LPS Reporter-in dawt a post mai mai lo tawp ang.

Inbumna a ni thei ang em? Misual a ni thei ang em?

Misual khawlaia riak mai mai chu tu’n kan hai nang! Thingtlangpa pawh a hmel atangin tu’n an hai nang!

Comment thenkhat atanga thil lo lang ta chu – Awihawm loh khawpin mi rethei an rethei tawh, tih hi a ni.

A hmasa zawk, nupui then khi a hmangaihna a ropui thlawt. A hnuhnung zawkte khi an lainatawm thlawt.
36
Chemtatrawta Says:
January 8th, 2012 at 8:52 pm
Rilru a va na ve.!!! Ramsa thi buaipui luih luih ho te khan hengte hi lo chhiar tak maw???? Zoram hi kan thanharh a va hun ta em.!!! Thingtlang mite thlen ngam loh khawpin kan lo changkangin kan lo changkang ta em ni le; nge an biak phak kan ni lo zawk???
37
Chhuaklinga Says:
January 8th, 2012 at 8:55 pm
Kan chanchin hi a va mak sawt em, i dinthar leh ang u.

tren tren.
38
Soledad Says:
January 8th, 2012 at 8:59 pm
An khawngaih thlak khawp mai, a bik takin naupang leh pitar khi. ka ngaihtuah mai mai kan sawrkar hian bus station leh sumo stand changtlung tak siam se kan va chhawr tangkai dawn m. Bual in leh inthiarna, lockerte, thutna nuam tak te awm se. Pawisa neilo tan phei chuan hla tak atanga zing karah emaw tlai emaw pawh ni se pan nan taxi man pawh a uihawm si a.Tichuan loh theihloh leh sum indaih loh vanga tlaivar ngai tan pawh a nuam deuh ang. Vai ramah pawh bus terminal, train station leh airport ah te pawh tlaivar mai chu kan awm nual ka ring.
Duh thu kan sam a lawk a ni e 🙂
39
Rascal Crowe Says:
January 8th, 2012 at 9:00 pm
Going Back to the corner where I first saw you
Gonna camp in my sleeping bag I’m not gonna move
Got some words on cardboard, got your picture in my hand
Saying, “if you see this girl ,can you tell her where I am”

Some try to hand me money, they don’t understand
I’m not broke, I’m just a broken hearted man

He hla hi min ti hre chhuak.
40
paeia Says:
January 8th, 2012 at 9:07 pm
Ngaihtuah a ngai e
41
caribou Says:
January 8th, 2012 at 9:13 pm
A nupui hmuh beiseia zawng tawp khi, a pa rem rem hle mai.
42
Sangpuiipa Says:
January 8th, 2012 at 9:19 pm
Hetiang dinhmun a kan awm veloh avang te hian Pathian hnenah lawmthu sawi kan ba ani.
43
Maisek Says:
January 8th, 2012 at 9:37 pm
An va lainatawm dun ve awww…
44
TuaiSialA Says:
January 8th, 2012 at 9:40 pm
#42 Sangpuiipa, LIKE! 🙂

A lungchhiatthlak khawp mai. Kawtlai, Aizawl khawpui kawng lûn lai bera kan Mizopuite mu thu han hriat chu rilru a khawih a ni. 🙁
45
H.Vangchhia Says:
January 8th, 2012 at 9:47 pm
Pu Vanneihthanga leh Lalvenhima Hmar te khi an che tha khawp mai. Mizo zawng zawng hian hemi te pahnih anga midang ngaihvenna chang kan hriat fo a tha ang. (Y)

Intih vai tingtang ngawt pawh hi a nilo.
46
Sangpuiipa Says:
January 8th, 2012 at 9:48 pm
Kum tir ah hian charity kan siam leh mai dawn ami ni ang? Ngaihtuahna a va ti vak kual nasa ve.
47
sheldon Says:
January 8th, 2012 at 9:50 pm
Nupui zawng khi, khitiang a ‘raw’ lo deuh khian zawn dan a awmlo emawn le? Vairam te chu ni se ka hrethiam, Mizoramah khitiang teh ngawta han tih khi a timak ve ngawt mai.
48
Rimenhawii Says:
January 8th, 2012 at 9:54 pm
#38 I duh thu sam khi ka thlawp e..:)..
Kei pawh train station lady’s waiting roomah hian ka riak ve tawh,trhu tlai var a nih mah zawk,kum 7 kal ta ah khan.
49
littlerascal Says:
January 8th, 2012 at 9:55 pm
Man ve aw!!
Pitarte khi an va khawngaihthlak ve le
50
ChhanaPa Says:
January 8th, 2012 at 9:55 pm
Common lo ve aw!!

51
littlerascal Says:
January 8th, 2012 at 9:56 pm
Phek thar hawng ang
52
TuaiSialA Says:
January 8th, 2012 at 9:59 pm
@sheldon: Tu’n lo haw lo se. Thingtlanga awm, Aizawla a ngaihna hre lo tak tak hi an tam asin. Khi pa khi ka dem hauh lo. Theih ni se, a nachang hria sela khitiang em em lo deuhvin a zawng ngei ang. Kawng lehlamah chuan, a nupui a ngaihna, a hmangaihnain a urthlu ve ngang a ni ngei ang.

#38 khi kei pawh ka thlawp. Sorkar lamah chuan UD & PA lam chan a ni ngei ang.
53
sheldon Says:
January 8th, 2012 at 10:05 pm
Tuaite, khipa khi ka dem pawh a ni lo. Mahse Mizoram a nia, chhungte or hmelhriat han pan tur te a nei lo emawn le ka ti rilru mai mai ania. Chulovah riah kher pawh kha – zan reiah a nupui chu a rawn kal awm tawp silo te ka ti bawk a. A…a engapawhnise, a khawngaihthlak khawp mai. Puih dan awm se tiraw?
54
Maya Says:
January 8th, 2012 at 10:07 pm
an va lainatawm em . .pitar leh naupang chu aw . .
55
TuaiSialA Says:
January 8th, 2012 at 10:12 pm
@sheldon, ni khawp mai. A hmutu leh hruaitute’n an pui ngei ang. Thil pakhat, Aizawl vawikhatmah a la kal lo pawh a ni maithei asin. Heti em ema a nupui ngai ta chu, chhungte a nei tawh lo pawh a ni maithei asin. Thingtlanga awm, Aizawla chhungte leh hmelhriat nei lo an tam ania aw..! Chutiang chu lo ni ta se, in ropui tak taka riah dil chu huphurhawm deuh mai a nia! Thil pakhat leh, zanah a lo kal awm tawp si lo, mahse, a riak tho si. A beiseina sân zia hi!!
56
sheldon Says:
January 8th, 2012 at 10:15 pm
A dik khawp mai Laltuai, a tumruh khawp mai. Tiangkhawp a hmangaiha zawngtu chu inhmu ta se a nupui chuan engtintak lo dawngsawng ang maw.

A nupui chunga ‘phuba’ la duh lutuk tumruh te hi a lo ni mai ngah (fth)
57
dolly dollz Says:
January 8th, 2012 at 10:17 pm
Mirethei, tanpui ngai tak tak te ka hmuh leh an chanchin ka hriat hian mihausa tawn taw nih hi ka chak thin!
58
TuaiSialA Says:
January 8th, 2012 at 10:32 pm
@sheldon, a lo ni mai ang tih a hlauhawm khawp mai..hahaha.. Mistiri bungrua a keng nual lehnghal!

@dolly, Ignatia’n a lo comment tawh ang khan, mi rethei berte-ah hian Lal Isua hmel a lang thin. ‘He’ng mi tê ber chunga ti chu ka chunga ti in ni’ a lo tih tawh ang khan, i pekchhuah phawt chuan Lal Isua a lawm dawn a ni. ‘Tam tak pe rawh’ a ti lo, ‘ti rawh’ a ti mai a ni.
59
sheldon Says:
January 8th, 2012 at 10:34 pm
@Tuaite, a ‘den’ riau ania..haha
60
lrpa Says:
January 8th, 2012 at 10:35 pm
Nufa khi chu a awm ve tho mai!
Suangpuilawn pa khi chu a ti mah mah anih khi
Ka comment 100-na ani ta. Ka chawl hrih teh ang.
61
TuaiSialA Says:
January 8th, 2012 at 10:47 pm
@lrpa, chawl mai love a. Chawl lovin i kal zel ang. Suangpuilawn pa kha kei chu ka duh tawp! A ropui ka ti thlawt! Hmangaihna a tak rama han daia a vanglai a thlen tak tak chuan mi chak Samson-a te pawh hmeichhe awmnêm hmaah dawih aw chan an chang mai a ni lo’m ni kha..h?!
62
Sãñgpüîípã Says:
January 8th, 2012 at 10:50 pm
Pathian hian Suangpuilawn pa in a nupui a hmangaihna aia nasa hian misual ho hi min hmangaih tih i hre thar ang u.
63
somte Says:
January 8th, 2012 at 10:50 pm
@sheldom i leh tuaitea titi hian thil mi ti hre chhuak,chu ka thil sawi duh chu sawi ve phet ka duh si a,ka chiang teh chiam si lo va..:D
Hman kum 3,4 kal ta khan chhimlam thingtlang khaw pakhatah,nupa in then,hmeichhe lam chhung te bungraw lam tur a va kal chu.A pasal hlui chuan bed room lamah a ko a chhuan lamah an thlalak hlui ho in sem tur in.Chutia a nupui hlui room lut chu chupa chuan kuah betthutin grenate a jacket hnuai a lo pai chu a ti puak a an pahnih in an thi ve ve.
64
TuaiSialA Says:
January 8th, 2012 at 10:58 pm
Sangpuiipa chu vawiin luangliam tlat..haha. A tha thei khawp mai. Pathian hmangaihna hi kan hmuhfiah viau chuan kan ngaihtuahawm loh hle tawh tihna a nia. Kei paw’n ka hmuin ka hrechiang telh telh mai. Kan thian misualdotcommer-te kaltlang paw’n Pathian-in a thiltihtheihzia leh ropuizia a lantir nasa khawp mai.

@somte, khatiang em em kha chu a tha lo thlawt tiraw..? Hmangaihna hi a sual zawnga kalpui tawh laklawh chuan a hlauhawm thlawt a nih kha.
65
ReMpY_ScisSoR Says:
January 8th, 2012 at 11:01 pm
Inthen hnua a tuemaw zawk zawkin a kawppui va um leh tlat, pakhatin lo duh tawh si lo ang hi an awm ve fo hi kan hria ang a, dan ang phei chuan khing theih a ni. A umtu hi mipa zawk an nih phei chuan thui tak ngaihtuah tur a awmin ka hre ve tlat. A threntu hi mipa anni tlangpui a, manang leh si a aum leh anih chuan eng ang mipa nge thui tak a hril a, mizoramah ngei pawh nupui thren tawh, mahni a khawsa leh ngam silo, a nupui zawngchhuak a vithlum ta an awm tawh kha, khawi khua nge ka sawi theilo.
Inkawp leh an duh pawn palai an tir thin ni ngeiin ka hria.
Nupa ni tawh, inthen hnua aizawl khawpui (lian lemlo tak) a awmna awm pawh hriat miahloh theih, chuti chunga a lo kalna thin kawng hre leh tho bawk si, zan reh lai a lo kal thin ang mai a riahchilh a lo nghah…….hmangaihna chiah a ni em aw, nge mission dang a awm?
66
sheldon Says:
January 8th, 2012 at 11:03 pm
@somte, i va hre ‘den’ ve aw! Tuaitea unaupa sawi pawh khi a tumruh lutuk a..fth
67
ReMpY_ScisSoR Says:
January 8th, 2012 at 11:09 pm
#65, mahse mi khawngaihthlak ber ber te pawh hi an nun kal tawh zir chian a bihchian sak vek chuan khawngaih phulo leh anmahni thiamloh a ni fo reng a, mahse chu chu kan mihringpui te kan en a kan judge dan tur a nilo, tih erawh sawi tel ta ila (min lo hmuh sual hmel lutuk palh ang, chiu chiu pichiu! )
68
Sãñgpüîípã Says:
January 8th, 2012 at 11:12 pm
@ts, nizan atang khan tiang lam ringawt hi ka rilru ah a awm pek a. Vawiin sunday a lo ni bawk nen, ka luangliam deuh tlat.
69
TuaiSialA Says:
January 8th, 2012 at 11:15 pm
@ReMpY, Suangpuilawn atangin a kal hmain Zarkawt vela a nupui an hmuh thu an hrilh pawh a ni maithei asin. Chhungte nei lo tan leh hmangchang (nachang) hre lo tan chuan Aizawl khawpui lekah pawh inzawn hmuh a har fu. Khawpui liana awm thang tan chuan hriatthiam a harin awih a harsa ngawt ang. Mahse, thingtlanga awm thinte bawk hian chutiang chu kan hrethiam thin..(ka la ti fan)
70
somte Says:
January 8th, 2012 at 11:15 pm
@sheldom ‘den’ bem bem tak a nia.. ..
Tuaite i unaupa pawh khi bel chiang leh deuh teh u aww, a nupui hlui in zawng hmu anih pawhin,vawi leh khat a chuk tuah tir tum avang a khawngaih dil sak chiam chi pawh ni lo mai thei nia..
71
Soberboy Says:
January 8th, 2012 at 11:19 pm
Somte chu hre den e Ngaihna awm lo
72
darngawn Says:
January 8th, 2012 at 11:19 pm
Hausa leh rethei kan in thlauta hle mai…. he putar leh pitar te tal hian a chhehvelah upa emaw pastor quarter emaw tal belhnachang an hre lo nge an belh enah an en ngamlo niang? Nge YMA te pawh pun nachang an hre lo nge an pun ngamlo zawhna ava tam em????
73
TuaiSialA Says:
January 8th, 2012 at 11:21 pm
@somte, Suangpuilawn-ah thian hmelhriat ka nei nual alawm. A chanchin chu a han thleng chho hman tawh em ang chu maw.. Naktukah ka lo zawt chiang hlawm ngat teh ang.

@Sangpuiipa, a tha. Kei pawh tunlai chu Pathian thu-ah ka luangliam khawp asin, krismas ka hmang tha deuh a.. Rawn post zel rawh.
74
somte Says:
January 8th, 2012 at 11:38 pm
#71 bawn triah triah hi ni tawp mai.. #73 Nia chutia buaipui hman leh thei ten media hmang meuh a,chupa chanchin an chhuah chuai chuai chuan,aizawl mi tlawmngai ho in an zawn pui sap sap anga a nupui then pawh chu an hmu chhuak vat tur ah lo ngai ila.. Chu zawng ai chuan #38 rawt na khi ni.. rual awh a na em mai, mirethei fa tan hian!
75
filliz Says:
January 9th, 2012 at 2:39 am
#65 comment, a then tu mipa an ni tlangpui tih khi ka pawm meuh lo.. Comment ho atang hian Mizote kan khawsak dan a inthlau hle tih pawh a hriat ta e..
76
keimah Says:
January 9th, 2012 at 3:04 am
Khitiang mi tanpui ngaite tanpuitu Mizo pa dik tak Pu Vana te leh Lalvenhima Hmar te ang khi kan la nei hi a lawmawm e. Khitiang mi chanhai leh baihvai khi kan la pung zel dawnin a lang. Mizo mize dik tak tlawmngaihna leh mite tanpui duhna thinlung hi i chawi nung zel ang u.
77
^-||R@lT€||-^ Says:
January 9th, 2012 at 7:06 am
an va khawngaihthlak hlawm ve aw!
78
TuaiSialA Says:
January 9th, 2012 at 8:02 am
@filliz: A dik chiah! Suangpuilawn pa phei khi chu a nupui then a ni hrim hrim ang.

@keimah: Ni e, an fakawm. Fakawm an nihna lai erawh kan hmuh hmaih thin. Hetiang hi hmu ve ila, midangte buaipui atan kan kalpel mai mai lo’ng maw.. Zan reh tawh hnu lam khawlai nutling vak rak rak thin te hi kan kalpel mai mai thin em? KS leh ‘S lo hi chu an hriat ve tho. Kan theihna chin chinah, kan phak tawk tawkin, kan thiltihah Lal Isua hmel i lantir zel ang u hmiang!
79
sheldon Says:
January 9th, 2012 at 8:08 am
Hehe…Tuaite, in la sawi elo. An inthen chhan khi chu inrinsiak fuh ngaihna awmlo khawp ang. Mahse tuallaia a mutna chhan phenah khian thawnthu lungchhiatthlak deuh chu a awm ngei ngei ang, a engapawhnise, khitiang khawpa hniama awmtirtu a nupui nen chuan innei leh thei se ka duhpui e.

Suangpuilawna i contact te’n an update che chuan hetah bawk hian rawn sawi leh la tiraw, hriat a chakawm ta riau mai.
80
TuaiSialA Says:
January 9th, 2012 at 8:57 am
@Sheldon, ni e, ka lo zawt hlawm ang e. A chanchin an lo hre hlawm emaw chu.
81
Dr Mahminga Sailo Says:
January 9th, 2012 at 10:32 am
Lairil a va fan ve, hei zet chuan… An lainatawm tak zet..

Mahse, a mak lem lo; kan khawsak dan, rethei leh hausa dinhmun te en chuan. Media-ho, hetianga an che chhuak thin hi an fakawm. Comment dang ka chhiar hman lo a, ka vei zawng zawng ka ziak ngawt mai..
82
lushai_er Says:
January 9th, 2012 at 10:53 am
He post hi a chanve atang vel khian “Chhiar zawm duh tan” tiin a link pe ta la, Pu Vana tan pawh khian a lawmawm deuh ka ring. Online-a chhiar tur awm hi chu a source kha link hram ila kha kan Admin te khan an ti thin khan ka hria….NOI
83
david Says:
January 9th, 2012 at 11:22 am
Breaking news siam a tum vang mai2te hi lo ni ange,kan Ndtv leh Aj tak tih velh ten hre ve se chu nileng in an live telecast anga alar phah ngawt ang chu
84
TuaiSialA Says:
January 9th, 2012 at 12:14 pm
@lushai_er: Phone atanga ka rawn post chhawn a nia, link dah vel chu a awlai lo khawp mai. A hming ka ziah leh a status a nih thu khi link chu a ni mai lo’m ni? Link awm pawh ni se, a wall bak a lang thei dawn chuang lo va.
85
lushai_er Says:
January 9th, 2012 at 12:29 pm
#84 : A awlai loh pawn try tal teh! Pu Vana wall ami leh comment tam tak kha min an chhiar phah thei dawn a lawm.

Phone atanga online paw’n url chu a ngai reng tho a lawm !A wall a text pawh i copy theih chuan a wall url http://www.facebook.com/profil.....2134610640 hi copy a har em em ka ring hran lo. I tum loh vang zawk a ni lo maw ? NOI
86
TuaiSialA Says:
January 9th, 2012 at 12:53 pm
#85 A thu a copy theih a, a URL erawh a copy theih tlat loh. A URL copy turin a hranpain a lang lo tlat alawm. Computer atanga lut chu ni ila, Vanneihthanga Vanchhawng tih kha ka link ang. Ka rilru a khawih lutuk a, ka hmuh veleh hetah ka rawn dah a nih kha.. Lo hmu tawh an awm nual ang a, mahse, hmu lo an tam zawk ang. A hming ka tarlan khi, an search mai dawn a ni.
87
TuaiSialA Says:
January 9th, 2012 at 12:57 pm
Phone atangin lut la, a wall link chu copy han tum ve chhin la..!
88
Jacka Pi Says:
January 9th, 2012 at 1:13 pm
ka comment ve tawhlo mai teh ang
89
Aryan Says:
January 9th, 2012 at 5:39 pm
Chhangban leh chawhmeh rep (rawtuai/behlawi/baibing etc) leh bekangum an ken loh chuan Aizawl ho hian thingtlanga lama an chhungte hi an mikhual tha peih vak lo. Thingtlang ho erawh chuan hlim tak leh lawm takin kutruak pawn tlawhla an lo mikhual thovang che.
90
рдпģŤіСHAЩЯ Says:
January 9th, 2012 at 5:43 pm
#89,,Aryan sawi hi a dik khawp mai , Thingtlang ah chuan chhungte neih loh pawn mikhualna hi a lungngaihthlak loh
91
TuaiSialA Says:
January 9th, 2012 at 5:51 pm
#89 Aryan: A dik lutuk! Thingtlangmi leh khawpui mite hi inmamawh tawn kan ni a. Khawpui mite hian thingtlangmi hi hmusit thei an ni lo reng reng. Thingtlangmi chuan kawng tam takah kan tunhma nun kan chhawm a, kan khawsakna a la changkang em em lo bawk a. Khawpui mite erawh chu changkannain a chiah hneh ta em a, kan rilru ngaihtuahna thlengin thingtlangmi leh khawpui mite hi kan danglam ta a nih hi.
92
Dr Mahminga Sailo Says:
January 9th, 2012 at 5:53 pm
# 89…

Thingtlang rawlthar, chaw heh rual nih lai a, khawpuia chhungte (in la changkang.. ) in a chaw ei kha a hrehawm thin khawp mai…
93
mamboihi Says:
January 9th, 2012 at 7:39 pm
Aizawl a ka kal hian ka lai deuh tlat zel!! Kei thingtlang mi hi chuan ka kal hian ka buai deuh nuai zel mai.

Chuan Pitar te khi an va khawngaihthlak ve aw.. hetiang hi khawpui a piangah hian an tam zual lehnghal in ka hmu. Rethei leh hausa kar hi a hla vawng vawng…
94
filliz Says:
January 9th, 2012 at 10:51 pm
#Aryan, i sawi dik lutuk, i bungbu thei. :lol: Thingtlang lam kal nikhua a an fel thei lutuk leh an phak tawk a min duhsak thin zia te hi a zahthlak zawk ka ti thin. Aizawl an lokal a, inthlahrung reng reng in hun an hmang leh a, ka khawngaih phak ni miah lo mahse an dinhmun tur ka ngaihtuah hian ka lo zak ru chem chem thin. Kan pi leh pu te nundan mawi kha chhawm nung hram hram teh ang u…
95
lianchhiara Says:
January 10th, 2012 at 12:13 pm
#89, Dr Mahminga Sailo, kei pawh, i sawi ang dinhmunah hian ka ding fo. Aizawl-ah chuan chaw an khawrh te thei si. Mahni chhungte ni lo, thiante chhungte Inah chaw kan han ei ngei a, an chaw a rimtui thei si, an chawhmeh a tui bawk si.. keini thingtlang tleirawl chaw heh tan chuan an khawrh khat kha bar khat lek a ni mai thin si a, puar lo chunga ‘ka puar’ tih ka ngah nasa thin..
96
Asteric Says:
January 10th, 2012 at 1:37 pm
TuaiSialA hi mi khawngaihna ngah tak a ni. Khawngaihna angah avang hian a blind ve lek lek fo bawk
97
Rimenhawii Says:
January 11th, 2012 at 6:53 pm
Tuaite chanchin thar i rawn update kan lo ngaichang reng a,engtin nge ni ta zel kawng sir a mu pa kha..????..:P
98
TuaiSialA Says:
January 11th, 2012 at 7:02 pm
Rimenhawii chu ka hre reng. An khaw mi ho hnenah, ‘Tun hnaiah in khaw mi nupui then, Aizawla zawng an awm em?’ tih lampang hawiin ka zawt hlawm a, ka mi zawhte’n chutiang an hre lo nia. Chutiang baka han tih vak ngaihna ka hre lo va!
99
Rimenhawii Says:
January 11th, 2012 at 8:14 pm
Tuaite nia chu i ti tha khawp lawm.hahahaha nick hi thlak ve zauh zauh ngai..hehehehe sandman zarah nick thar ka nei bikkk..
100
TuaiSialA Says:
January 11th, 2012 at 8:40 pm
@Rimenhawii, chu, Sandman nen in CK thin a ni maw?! Mahse, ‘Rimenhawii’ ti lovin ‘Rimenhawihi’ ti zawk la..
101
bk Says:
January 12th, 2012 at 12:00 pm
Helai chu in va ti laklawh ve…:-)