Mother’s Day Pual

May 13th, 2012 7:00 pm by Puia C

KA NU KHA….

– Lalthansanga Chinjah

CHIN’TAGE

( Kum sawmhnih dawn aliam ta, Ka Nu kha…Ni 27.7.1998 a ka thuziak hi Zirlaite chhiar ve ah ka duh ve tlat, a chhan ka sawi dawn lo…)

Min hmangaih avanga pawisa min pe mai mai ngailo, thiante aia hleiluata inchei phal ngailo, lehkha ka zir laia ka mamawh aia tam pawisa min thawn ngailo, ka mamawh hai ngai reng reng bawk si lo. inkhawm bawhpelh phal ngai reng reng lo, ‘chhuti’ ni a engmah thawk lo va awm nilen phal ngailo, hah lutuka hnathawh lah phal bawk si lo…KA NU KHA.. “ Khawvel ngaih chuan Zo nu mawl ber, kei, ka tan erawh ka engkim ani.,.Chun nem.. ‘dam takin’ tiin ka thlah phal lul lo che, ‘ mangtha’ fo zawk le”

A phak leh a neih ang tawk zelin ei leh in tur min hluih thin a, hmangaihna nen a siam anih vangin, lal in a ruaitheh aiin kan tlai zawk thin ! Hamthatna kan tawnin thinlung takin min lawmpui thin a, kan lungngaihin hmangaihna nen min tuarpui a, vanduaina kan tawhin min lainat a, kan sualna in a tihrehawm thin !… ‘Ka nu kha….’ nute fel kher khawr, taihmak lama duham, rualel lama tuarchhel leh tumruh, fate hmangaih lama mahni hmasial, thi ltha duh vanga mahni hrehawm pawisa ngailo, Chatuan Nunna duh vanga tawngtai leh Bible chhiar thlahthlam ngailo a ni si a ! Mahse, ni sawmhnih leh pariat, July, 1986 khan a tum ram, angel-te lenna ramah a kal ta si ! Khami ni ka ngaihtuah let chang khan ka lung a leng lo, mahse khua a har thin zawng anih hi ! Lehkha ka zir laia lehkha min thawn reng renga ‘Pathian thu’ a sawi tam lutuk ka nin zia min chhanna te kha..”..a pawi ka ti khawp mai, malsawmna kan chhungkua in kan dawn te hi a hlu em a, A petu (Pathian) hi kei zawng a rawng ka bawl lo thei lo a ni”. (6.9.77). A innghahna lungpui kha a nghet asin!

A inngaihtlawm zia te kha….. “ I nu hi nu mawl tak ka ni, nu zawng zawnga tlinglo ber pawl ka ni mai thei, mahse ka mawlna leh tlinlohna te nen, nausen hnute hne lai in nih atangin ka hmangaih thin che u a, ka mawina tur silh leh fen zawng zawng aiin nangni ka fate hi ka hmangaih zawk che u a ni..” (29.7.77.). Nu hmangaihna thuk zia leh nasat zia hi teh theih a va’n chakawm em !! A ‘education system’ mawlh mai kha, tun thleng hian mak ka la ti fo thin !

Zan tin darkar hnih kan lehkha zirna dawhkan hlai pem pum kha, kan unau za in min kil tir a, “chhiar r’u” tih kha thupek, zawm ngei ngei tur a ni. Min hrilh thiam der si lo, mahse, min thut pui-in min veng tlat zel thin. Tlanbo-na reng reng a awmlo!! Mut hun dar thlen hma chuan mut a phal ngailo, dawhkan bawhin kan muthlu lawp lawp thin…a ngai pawimawh duh der si lo !! Thupek ani tlat si. EXAM hma thla khat velah phei chuan zana a hun pangngai a kan zir bakah, zing takah tho in thingpui a lo lum peih vek a, zing dar thum velah min kaitho lui thin ! Muthilh der leh a ang ring ting a ni mai. Chutah min thutchilh leh ta nghal a, ninawm tak ani..ninawm tak !! Kan kum tin dan ani, hrehawm ti em em chungin ngaiah kan neih ve kha ania le ! Chutiang chuan ‘matric’ (HSLC) thleng min enkawl a, exam zawh zan hi kan nghakhlel thin teh ania ! Mahse, a lo hmu lawk thui hle ani tih chu ni 8.4.1976-a lehkha min thawnah hian a chiang hle…”..thil tha duh chuan hrehawm chu tuar loh theih ani lo. Chhel takin tuar phawt mai teh..” A awmzia ka hre dawn ta !

Kum sawmhnih dawn aliam ta. “ A tello hian khawvel hi a ruak lo, mahse, hmangaihtu NU neilo a ka awm erawh hi chu ka in khawngaih fo thin”.

“ Where are you mother ?
I need your affectionate love….
Tender and soft..”