Archive for March, 2012

March 2012, Mizo(ram) Diary

Saturday, March 31st, 2012

1st. Thursday: March 4 (Pathianni) zan thleng awh tur KTP General Conference vawi 54-na chu Lothazawl, Thenzawl-ah tan a ni ta a. A á¹­an zan hian Pandal-ah palai lawm inkhawm neih a ni a, Central KTP Leader Rev K Lalpiangthara’n inkhawm a kaihruai a ni. KTP General Conference vawi 54-naah hian thupuiah ‘Isua Krista – Khawvel mamawh chhanna’ tih hman a ni a, speaker atan Rev. C. Lalsangliana an hmang ang.

2nd. Friday: Chapchar Kut ni a ni a; Mizoram district hrang hrangah ropui thei ang bera hman a ni. A hmanna pui ber Aizawl-ah chuan Lammual-ah zing dar 11.30 atang khan nileng awhin ropui taka lawm a ni a; Pu P.C. Zoramsangliana, Art&Culture Minister chu Kut Thlengtu a ni. Chief Minister Pu Lal Thanhawla chu Kut Pa a ni a; Mizoram Larsap Pu Vakkom Purushothaman chu khuallian niin, Pu Som Kamei, NEZCC Director chu khual-zahawm a ni. He hunah hian Chapchar Kut leh Miss Chapchar Kut thlan an ni a. Mister Chapchar Kut-2012 chu Tv. Saihmingthanga Sailo, Bungkawn Branch YMA a ni a, Miss Chapchar Kut chu Nl.Lalbiakzuali, Republic Vengthlang Branch YMA a ni. Pawisa Rs. 10,000/- (singkhat) leh certificate hlan an ni.
(more…)

Chaltlang Kham

Saturday, March 31st, 2012

(He article hi 31st March 2012 a Vanglaini a P.L. Liandinga ziak a ni a, a ziaktu phalna la thlapin ka rawn post a ni e. Copy/Paste ni chiah lo, tlem in ka kaitawi deuh a, chupawh a phalna tho. A link vel ka dah thiamlo :-D )

Tunlaiin Chaltlang kham chungchangin mi rilru a luah hle a. A bikin Aizawl mi hlun leh tunhma atanga Aizawl khawpui lo duhsak thintute phei chuan Chaltlang kham chhova mimal in sak an vei ta hle mai. Hmanni a ka article chhete ka ziah ve pawh mi engemawzatin an lo vei ve thu min hrilh a.

Ka ngaihtuah tak zawk chu hetiang hian mi pangngai tam takin an vei a, mahse kan veina hi engtinnge kan tihlan ang tih a nita. Signature Campaign te hi tih kan duh em? Tunge huaihawt ang? Anih loh leh Open Discussion te hi huaihawttu tur an awm thei ang em? Kan Media te hian chutiang chu an buatsaih thei ang em? Tlangval fel deuh tan chuan eng chen chiah nge kan vei a, kan ngaihtuah tih hriat nan heng thil hi tih a va tha em. Rin anga kan lo vei leh lem lova, kan awmdan pangngai hi tha kan ti anih pawhin kan phak tawkah ngai ila.
(more…)

I thlang sual e

Saturday, March 31st, 2012

Fur lai aniin boruak a hnim ruai a, chhum lah chu a zíng phui mup mai bawk nen boruak pawh a uap hle a. Chu furpui boruak uap chhurh mai chuan Pu Lalnuntluanga te in chhung pik tak chu a belhchhah in chu in ah chuan hlimna in thla a zar lova, an chhungkaw nun a hlim lo ani tih a hriat theih bawk si. An In lian tak ah chuan cheng an tam lova, a ruak huai a, an sofa set mawi tak te, an LCD TV liantak te chuan chu in chu cheimawi mahse chu in ah chuan hlimna a thlen hauh silo. Van lama chhawm theihloh khawvel thil mawi tak tak chu Inah chuan a tam a, mahse chung chuan hlimna a pe silo. Engkim mai, an In atanga a chhunga awmte chu Pu Tluanga leh Pi Remi te thawh hah liau liau rah aniin eirukna leh hlemhletna cheng khat pawh a tel silo. Mahse, hah taka an thawh hram hram rah mah nise, Pu Tluanga te nupa, kum upa lam tawh tan chuan engmahlo mai a ni si.

Pi Remi chu an sitting room thutthleng nuam takah thuin an chhungkaw thlalak a en a, a keu let a let in, a bianga mittui rawn luang chuan a album ken chu a far karh karh a, an nunhlui leh an chhungkaw nun thin te thlir letin an fapa Sangtea naupan lai thlalak, a Pa ina a kokichhuan lai chuan a lung ati chhia a, a vel ani. An Inchhung an thlir vel a, Fanu 2 leh fapa 1 an neih avangin an fapa neihchhun an duat em em tan veka an tih an in leh rosum zawng zawng te, hah taka anlo thawhchhuah sa engmahlo maiah a chang ta si. Nu ber rilru atang chuan a fapa a hmangaih leh a duat em em, naupang fel tak, kehthei ena a en hetianga a awmta mai hi a na a, tawrh thiam a har ani e.Pu Tluanga erawh a tawng lemlo, mahse a hmel ah chuan lungawi lohna, hlim lohna a langin a rilru a hah tih reng a hai theih siloh, sitting room lama an chhungkaw thlalak chu a en a, muang ban charhin
“Mama Nu, keini pawh kan thiamlo ania nge” tiin an Nu lamah chuan a phei ta a.
(more…)

Buannel.com an hack a mi?

Saturday, March 31st, 2012

Kan hnung deuh tawh atang khan Buannel.com hi illegal activist ho in an khawi zeuh zeuh ni in a lang.

Tuh ah tak pawh hian Hack a ni nge, a neitu pa hian a host space atang a file zawng zawng (Word Press) leh eng dang mah bang lo in a paih bo ta vek zawk.

Chanchin han chhiar nana visit kual a nawm tehreng nen!

Index of/

Hei hi a lo lang kuau mai a, directory pakhat te mah, file pakhat te mah a awm lo tlats……..a nei tu pa kha hriattir teh u hria in lo awm mial chuan!!!

Post time: 30th March 2012 – 08:28 PM

Neuva

Friday, March 30th, 2012

Darzaliana fapa Neuva (Tea) hian thiltih sawi tur tehchiam a nei lo va, a tuarchhelzia hi mihring dang pangti pu ve lo niin an ring hlial a, kâ chhawn lohva thihna ngei turah rei fe a dam theih avangin.

Amah hi Lianphunga khua Zawngtah-a an tlangval chhuanvawr pakhat a ni. Unau panga an ni a, an huaisen tlâng hle a. Ralte Kawlni, Chalchung an ni. A pianpuite chu Thangsavunga, Mangzika, Hnehbana leh Vailianthangi te an ni.

Neuva hi Mizo tlangvalah chuan lian tawk tak, chak tak, hmel pawh tha ve tak a ni a, tlangval ngo pawl a ni. A u Thangsavunga nen hian ramchhuah âtin an â a, tûl lai pawh ni se, sa bei tur chuan an kal zel mai a, buh ngah pawlah an tang leh tho si thin. Kum khat chu Tlawng kam an nei a, favang lamah chuan sai kap turin an kal dawn ta a.

An chhungte’n an remti lo va, “Kan lo a zau si, keini hmeichheho maiin kan vêng thei lovang. Buh pawh a tulzum tan tawh si a, Zawng-in a kheh zo vek mai ang,” an ti a. Anni chuan, “Zawng-in an kheh séng hlei lo’ng e,” an ti a, an kalsan ta a. Chumi kum chuan buh ngah pawl ber an la ni ta fo va. Chumi ram chu ‘Zawng kheh sèn loh ram’ an ti hlen ta a ni.

(more…)

Thluak dingkhawr nge veikhawr i nih le?

Friday, March 30th, 2012

Kan hriat angin mihring thluak hi Corpus Callosum-in hmun hnihah a then phawk a- “Thluak dinglam” leh “Thluak veilam” tiin. Mihringte hi kan pianphung leh hmel a inang lo ang bawkin thluak kan hman dan pawh a lo dang hlawm khawp mai.

Mihring chi thumte: Thluak pang veilam hmang nasa leh thiamte hi “Thluak veikhawr” tiin vuah ila. Dinglam hmang thiam zawkte erawh “Thluak dingkhawr” ti leh mai ila. A pahniha hmangkawp thiamte hi “Thluak thawk palai” tiin dah ila a awm ang ve fu lo maw le.

Eng zawk hi nge I nih ve le?

Thluak dingkhawr: Heng mite hian thil suangtuah leh riruang han din vel hi an thiamin an tui em em a. Thil reng reng hi a lan dan pumin an thlir phawt a, chutah a pianzia leh a lenzawngah ngaihtuahna an han sawrbing leh ta thin a ni. Tin, heng mite hi dan naranin lemziah leh zai leh lam, hla phuah lamah te an ril thei hle.
(more…)

Hmangaihna — Naupang ah

Friday, March 30th, 2012

Nu leh pa te hian fate kan hmangaih tih hi thudik awmsa ani. Chutih rualin kan hmangaihna erawh a inchen lo thei ang. Tin, kan enkawl dan, kan hmangaihna kan lantir dan pawh a inchen lo ngei ang. Fa enkawl hi khawvela hna harsa ber a ni hial awm e. Fa enkawl dan chhiar senloh khawvelah hian an lo ziak tawh thin a, a ziaktu te ngei pawh an fate sawiselbo in an awm thei biklo. Chuvangin Pathian kuta dah chunga kan thiam ang tawka enkawl hi kan mawhphurhna a ni. Ka ngaihtuahna tlem kan tarlang ve mai mai –

1. Hmangaihna kan lantir dan hi a pawimawh ber mai in ka hria. Fa te chu hmangaih teh mahila thin an tihrim chang a awm a, nu leh pa thinchhe tak kara naupang seilian chu a nunchhoh dan a buai ngei ngei. Kut thlak leh vin hlawh, rawng taka enkawl naupang chuan nunrawnna a seilenpui ngei ngei. Chuvangin naupang te hi dimdawi te a enkawl hi tharum leh talhfiak nena enkawl aiin a hlawhtling zawk fo.
(more…)

Vangvat

Thursday, March 29th, 2012

Fur a lo nih a, fehkawng leh ramhnuai khawi lai laia han teikual mai pawh hian rin loh laiin vangvat zukna thi hi a lo chhuak leh nguai nguai zel zawng a nih hi. Han en reng reng pawha an tuan a muan hmel tehlul nen hianin, tam tawk tak hi kan lo kai hman tlat thin. Kan tet lai phei kha chuan Phawngpui tlangah chuan Vangvat chik nghur nghur thei a awm teuh tihte pawh kan zir tak kha mawle. Nulain vangvat an kai mawlh hi chu a buaithlak ve duh fu anti. Englekhawle, hlauhzawngte hi inang miau hek lo. Hlauhzawnga huaisen in hre tawh ngai emni? U Aduhi hian kai ta se, mahniin la ngam lo se, a kaina hmun kha lo pilril vak lo bawk si se engtin nge a tih ang le? A bula thingtlawn anga lo ding zum reng kei mi laktir a ngem aw???? :-D

Hetiang teh nuaiha chimawm ni mahse Vangvat hian tangkaina an neih ve chu lo tarlang ila:

A tangkaina: Tunlai Plastic Surgeon te chuan an damlote enkawlna atan an hmang ve tlat nia! Vun velah thisen a kal that theihnan an damlote chu an zuktir thin. Hei aia an hman tangkaina leh chu Vangvat atang hian damdawi tangkai an siam chhuak a, chung zinga lar ber chu ‘Hirudin’ hi a ni. A hming hi chu kan hre theuhvin a rinawm. Vangvatin mi a zuka thisen a khal loh nana a chemical pai Hirudin hi thisen khalin thisen dawt a hnawhte ei ral nan an hmang thin. Tunlaia Hirudin damdawi lei nana khawvelin a sum hman pawh kumtin maktaduai 5 vel a tling zu nia! Hirudin hi Pile ah te leh Phumatism ( I hriat duh chuan Medical Dictionary keu rawh :-P ) ah te an hmang thin.

(more…)

Zirna : Ka Hmuh Dan

Thursday, March 29th, 2012

Thuhmahruai

April ni 15, 2011 khan  mi thusawi  chhim turin ka thianpa (Uttar Pradesh ami) nen kan inzui  hnak hnak  a. Chutia kan kal lai mek chuan Building thar lian tak sakna hmun kan thleng a. Chutah chuan naupang kum sawm hnuai lampang  panga vel  hian  an nu leh pate  hnathawk mek chu an lo pui a.  Ka thianpa hnenah chuan,  “Naupang ho hi  an fel hle mai, an nu leh pate an pui ania, a va lawmawm em!”  ka ti pek a.  Mahse ka thianpa chuan rang lutuk maiin min lo chhang nghal a  “A lawmawm loh, naupangte hian an nu leh pate an puih avangin sikulah lehkha an zir loh phah…” a ti hmiah mai. Ka rilruah ngaihtuahna tam tak a lo lang nghal a. Mizorama kan naute vanneihzia ka ngaihtuah chhuak ta zut zut mai a ni.

Mizoram angah chuan naupang kum 6 tling tawh phawt chuan zirna in an rap ti ila kan sawisual tam pui lo vang. Chhungkaw tam tak sum hmanna tam ber chu Zirna (Education)-ah hian a ni. Rethei tak chung  pawhin kan fate lehkha an zir theihna a nih dawn chuan kan neih zawng zawng pawh kan thâp phal thin. Zirna avanga pawisa lengvel pawh hi tam tak a ni. A sorkar ang zawng pawhin,  Education hian Home Department tih lohvah chuan thawktu a ngah ber. Private sikul zawng zawng kan chhut tel phei chuan,  Education Department hian thawktu an ngah ber awm e. Tun laiin CCE (Continuous and Comprehensive Evaluation) te pawh pawl thenkhatah chuan kan hmang tan ta, a awmzia ril zawk a kan hriat theih nan thlirna  tlang dang atangin ilo thlir dawn teh ang.

(more…)

Kansar

Thursday, March 29th, 2012

Mihring taksa hi timur ‘cell’ tam tak inzawmkhawm ten an siam a ni a, chung timur te chu an than dan leh hnathawh dan tur te bithliah vek a ni. An thangin, an lo inthlah pung ve thin a. An puitlin (adult stage) hunah an than a lo tawp ve thin a. Engemaw avanga timur chhia a lo awm chuan, timur ‘cell’ thar an siam chhuak a, a chhe laiah chuan an thawm tha leh mai thin a ni. Amaherawhchu cancer cell te hi timur pangngai ang lo takin an than a tawp ve thei ta lo thin a, an thang lian zel a, an bula cell dang hnathawh te pawh an ti buai ta thin a ni.

A. Cancer hi chhan tam tak vanga lo awm thin a ni:-

1. Inthlahchhawn thil:- In chhung zingah rilpui , hnute chhûl , thluak, melanoma cancer engemaw ber vei an awm hlauh chuan cancer i vei theihna chance chu a lêt 3 in a sang bik tihna. Cancer 5% vel hi inthlahchhawn a ni.

2. Ram leh chî hran vangin:- Chuap, hnute leh rilpui cancer hi european leh american zingah a hluar hle. Thin cancer hi an nei ve meuh lo. Japanese hmeichhe zingah hnute cancer hi a awm mang loh laiin american hmeichhe zingah erawh chuan a hluar hle thung. Black African zingah chuan vun, zang leh chhul kawngkhar leh thin cancer a tam bik hle. Japan mite hian american mite aiin pumpui cancer a lêt 5 in an nei tam zawk. South East Asia, a bikin Chinese origin zingah hrawk leh hnâr cancer a hluar hle. India mite zingah chuan- kâ leh chaw kawng cancer a tam hle a.Hmeichhe zingah chhul leh hnute cancer a tam hle. India rama thin cancer tam tak hi Viral hepatitis(HBV and HCV) leh a hnua thin a ro vang a ni. Khawthlang ramah erawh zu in nasat vanga thin a ro thin vang a ni thung.

(more…)