Zan dar 9 a ri tep tawh a, van lam ka han hawi chho chu thla chu a lo bial kulh mai a. A hma lawka supermoon ang em em kha chuan lian tawhlo mahse a la fiah kher tho mai. A bul velah chuan chhum var tlem te te an awm a, amah chu a eng (yellow) bial pup mai a, current hi awm lo ta se, khawvel hi thim vek ta se, thla eng khi a mawi dawn mange, tih ka ngaihtuah mai mai a.
Thla chu a eng a ni tih pawh hre lo in mahni buai buai in kan buai hlawm a. Zan mah ni se kan in leh a chhehvel chu a eng pup a, thla eng chu an hliahkhuh hneh ngei mai. Khawi khawiah emaw chuan thla eng lawma lo zai tawk an awm anga, thla eng hnuaia hmangaihna thu lo inhlan tawk an awm ngei awm si a tih chu ka rilru ah a lo lang leh a.
Mahse chu thla eng chuan min tihlim hauh lo. Ka thiannu, zanina amah chauha thlan khawhar taka awm tur chu ka ngaihtuahin ka tah a chhuak em em thung. A chhungte leh thiante’n ui taka an thlahliam hnuah amah chauhin lei hnuaiah, tuma hmuh phak tawh lohnaah a mu chu a ni ta mai sia leh! Ruah te a lo sur anga, thli te a lo thaw anga, vawt a ti angem le? A hlau angem le?
Thihna hi hriatthiam a va han lo har em! Ka thiannu Babie, naupang kum 8 mi kan nih lai atanga ka kawm tawh kha vawikhatmah a hmel ka hmu leh tawh dawn lo. A ruang ka hmu lo a, a vuinaah lah ka kal thei hek lo. A nui ri ka hre tawh dawn lo a, vawikhatmah kan inbe tawh dawn lo. An inah han kal ila a lo ruak huai anga, a nu leh pa leh unaute nena kan inhmuh lahin lungchhiatna mai a ni dawn tawh si. Thlalakah bak a hmel hmuh tur a awm tawh dawn si lo, thlalak te pawh a lo hlui thuai anga, Pathian in min venga kan la dam zel te anih chuan kan upat a kan tar hunah pawh Babie chu nula kum 30 mi kha a ni kumkhua tawh dawn a ni.
April 17 2011, Palm Sunday kha kei leh ka thiante tan chuan ni theihnghilh theih tawh ngailoh tur a lo ni ta. Zing ka tho fel deuh chiah tihah ka chhungten min rawn phone a, Babie boral thu min rawn hrilh a. A ngaihna ka hrelo ngei mai. Thla hmasa lawk khan Aizawl ah kan inhmu a, kan inah a lo leng a, chu chu ka hmuh hnuhnun ber chu a lo ni ta der anih chu. A va han mak thei ngai em. Ka thian dangte nen kan in phone kual nghal zung zung a, hriatthiam har kan ti in kan lung a chhe tlang hle mai a. Melody phei chuan “Naupan lai thiante hi chu rilru ah hian an tla na bik. Rei tak pawh inhmu lo mah ila kan inpawh dan hi a ril bik” a ti a, a dik ka ti lutuk. Hmun hrang hrangah te kan awm tawh hlawm a, mahse kan inkawmngeih dan kha chu a lo la ngai reng mai a lo ni.
Mihring hi thi tur kan ni tih chu kan inhre theuh a, mahse that lai huna thi tur hian tumah hi kan indah ngai lo. Kan thiante leh chhungte’n min han kalsan chiah hian thihna awmzia hi a takin kan hre ve chiah niin ka hria. Thenawm khawvengah mitthi an awm a, kan kal a, kan tlaivar a, khawhar chhungte kan hnem a. Mahse kan chunga a lo thlen loh chuan an tawrhna, an lunglenna, an khawharna kha kan hriatthiampui tak tak lo.
Nilengin ka rilru ah a awm, tunah hian enge an tih mek ang le, a chhungte’n an tuar na awm, tih ringawt ka ngaihtuah a. A u Marami, ka thian kawmngeih em em ni bawk nen kan inbia a, tap lo tur hian kan insum hi a ni ber. Ka thian dang te nen phone ah kan inbia in chanchin min rawn hrilh reng bawk a, ka mitthla in an vui dan tur te ka lo suangtuah mai mai a, tah chhuak deuh tah rem si lo hian ka awm nileng a, a hrehawm duh ngei mai.
Aizawl ka haw chhoh hunah chuan a thlan te kan tlawh ngei a, a thlalak te kan en ngei awm sia, a hrehawm dawn mange! Hmanlai chanchin te kan sawi anga, a lunglenthlak dawn mange. Thiante chan tawh in ni nual hlawmin ka ring a, engtin nge in tawrh dan te han share ve ula ka lawm ngawt ang.
April 19th, 2011 at 1:00 am
chhiar ila…
Report this comment
April 19th, 2011 at 1:28 am
ka hnuk a ulh dawn alawm le aduh.keipoh 2006 khan ka thiantha ber ka chan tawha,a hrehawmzia chu ka hriatthiam pui khawp mai che.
Tum khat pawh 4:00 am ah ka harh hlawl mai a,ka lungleng lutuk chu thlanmualah chuan ka va kal ringawt a,a thlanah chuan ka va tah kerh2 kha maw….
Nang ang chiah hian kolkata a ka awm laia boral a ni a,a chhungte nen han inhmuhhmasak ber ni chu a hrehawm duh ngei mai.
Report this comment
April 19th, 2011 at 1:49 am
@Aduh, Thakthing nula, Delhi a thi, vawiin a an vuiliam kha em ni i sawi hi?
Report this comment
April 19th, 2011 at 2:12 am
Miin thu tak, lusun a thu lungchhiat thlak tak an rawn ziah chhuah lai a first loh hlau va ” chhiar i la..” tih mai mai a lo comment reng hi a thing lutuk
Ka khawngaih hle mai che Aduh! Pathian zarah laina hnai tak tak ka la sun ve lo va, mahse ka suangtuah ringawt pawh in ka tah a chhuak
Report this comment
April 19th, 2011 at 3:04 am
i ziak thiam hle mai!!
very touching!!
zan mut dawna phone atanga post chhiar hi a nuam bik
Report this comment
April 19th, 2011 at 3:10 am
ka hnuk a tiulh, he post chuan.
Report this comment
April 19th, 2011 at 3:17 am
Hmeichhia chu in la vannei a lawm, a hun laiin in tap a, in sawichhuak bawrh bawrh a, engtiklaipawhin in thianten tawngkam talin anlo tawrhpui ve leh thei reng bawk che’u a, in vannei thlawt a ni . Ip pik leh tawt reng reng a awm a, midang bula sawichhuah hmasak hreh ve deuh bawk si, theihnghilh thei chuang bawk silo, ri lova ring tawka trah a ngai a, midang lahin kan trap tih an hre silo, min hriatpuitu awmchhun Pathian lah chu a reh vawng vawng bawk si…….huiham.. Mihring nun vek a ni e, a vai mai hian…….
Report this comment
April 19th, 2011 at 3:45 am
…thla eng chu an hliahkhuh hneh ngei mai…tih aiah a lan hneh hle mai… Nia tak2 a han share ve teh u aduhi khawhar hnemah. Tiang thilah hi chuan a hlimchhawnah chuan mipa aiin hmeichhia hi an ngaihtuahawm zok zel si.
Mahse, @aduh ka hnem thiam ve dan ce cu- A la dam a te hian i thiannu chan hi awt ngawih2 zok tur kan ni maithei asin trw…
Report this comment
April 19th, 2011 at 6:53 am
@lushai_er aw kha ngei kha a ni e
Report this comment
April 19th, 2011 at 7:10 am
@aduhi ka tawrhpui khawp mai che, thiante an han boral hi chuan tawrh dan thiam a har thin khawp mai. Keipawh ka thiante pahnih 1998 ka chan tawh..tuitla ve ve in, rilru a na duh in tawrh thiam a har khawp mai..sarthi ngat phei chu!!
Report this comment
April 19th, 2011 at 7:18 am
Atomic c sawi ang deuh hi a ni e, mipa tan chuan….. Ka vannei nge ni ka hre lova, ka thian kawmngeih tak te min boral san an la awm meuh lo a ni ang (thian ka ngah lo pawh a nimai thei ). Aduh, ka tawrhpui rual che in, khuanu awmpuina ka dil sak a che…
Report this comment
April 19th, 2011 at 7:22 am
U aduhi chu kum 30 maw i nih tawh a? Kei pawh ka thianpa in 2005 khan min boral san a, kumin March thla khan ka thiannu pakhat in min boral san bawk. Thalai an han thih chiah hi chuan kan hringnun derdep zia min ti hrechhuak thin. Ka tawrhpui che in ka hriatthiam pui khawp mai che.
Report this comment
April 19th, 2011 at 7:23 am
@aduhi, Ka hriatthiam pui che. Ka thian kawmngeih tak chuan 2003 khan min boralsan a, tun thleng hian ka la ngai thin. Mipa chu han tah hum hum a rem ve si lo va, insum tak chung hian ngawi rengin kan vei ngawih ngawih mai thin a nih hi.
Engpawhnise, nakinah kan la inhmu khawm leh ang tih beiseina hian inhnem fo thin ila, a ziaawm a nia.
Report this comment
April 19th, 2011 at 7:42 am
Han comment emaw han hnem vak dan tur hi ka hre thlawt lo ani, thihna hi chu atawp chiang em ani ti raw. A dam ve leh mai ang tih chi ani der silo a
Report this comment
April 19th, 2011 at 7:50 am
Hringnun ho zia hi chu aw.. Khawvelah hian thahnem ngaiin in la muk vak vak tur kan nih loh zia min hriatchian tir leh zual, i post hian.
Ka lainat khawp mai chu @aduh
Report this comment
April 19th, 2011 at 8:11 am
A va zialo ve le. Engtia boral nge ni le?
Keipawh kumin march thla tawp khan ka Pi in min boral san a, ka haw thei silo, ka phone a, an zai te, an thusawi te ka hria a, khawharthlak duhin hreawm tak a ni
Report this comment
April 19th, 2011 at 8:57 am
Ni e,hringnun hi a kim lo huih thin.Ka thian kawmngeih takin fam a chan ni khan kei pawh ka tap lo vang ti mah i la thlahna pangpar a thu telh tur ka phuah lai chuan mahni chauhin luaithli chu kan hnam tir ve tawh kha maw!
Report this comment
April 19th, 2011 at 9:40 am
@aduh boih- Zan thla eng hnuaia i ngaihtuahna vak vel dan tur i sawi atang khian ka lo mitthla pui che a, zing nisa hnuaiah min ti lungleng ve dawn alawm le hehe…..
Middle leh High School bawr vel ka kal lai hian thian ruihtheihthil a fihlim lo tak tak te(keipawh ka bang lo), zirna lam chawlhsan hma tak te ka nei a, mahse thian ngaina mi tak ka ni a ka sikul kal ban veleh hian an kalna awm hria te hnenah ka zawt a, lui mawngah pawh nise an awmna lai ber hre lo mah ila ka zawng ngat ngat thin. Ka chungah an fel in kawm nuam ka ti em em a, tun hnuah hian ka zawng ruai thin te kha ka ngaihtuaha ka lung an ti leng hle mai, mual min liamsan tawh te an awm nuala.
A bik takin chung zinga zirna lama ka thurualpui, min duata min kawm ngaih em em bawk tu Lalthaa boral phei chu vawiin ni thleng hian ka thinlungah hian a cham a, a boral dan ka ngaihtuaha Pathian hnenah hian ka vui pui lek lek thin. Kha tih hunlai khan ka chungah a tha em em a, zirnaah min tuipui a, ka ngaihzawng nise ka hriattir hmasak ber leh ka Love letter dawn pawh phal taka ka chhiar tir thin, letter chhan let dan tur thlenga ka rawn kha a ni a. Pathian hrelo mi te angmaia OD a a boral ka hriat hian ngaihtuah nuam a nilo a, keimah lam ka in dem a, “Lalpa kei min hmangaiha vawiinni thlenga hmasawnna rahbi min zawh tir lai hian min hmangaih ve tu ka thianpa Lalthaa hetia OD a a thih i phal mai bik hi hriatthiam ava har em!” tiin ka ngaihtuah fo thin. Thih dan mawi zawk ten han thi sela ka rilru hi a dam deuh tur mahse Pathian remruat chu keia ngaihtuahna ai chuan a fing zawka, kei aia fel zawk Lalthaa aia kei nungdama min la zuah hi ava zahawm em.
“In kawng te chu chhut ngun rawh u…” tih kha a rawn lang thar uar uar mai.
Good post
Report this comment
April 19th, 2011 at 9:50 am
Ava lungrun thlak ve le. Thenna ram khawvel a cheng kanni si a le.
Lusun khawhar hriatpui/tuarpui ni ngei tur a ni, nizan chu champhai leilet kam a Mualbuhvum, phul tlang bawkah thlaeng thlirin, naupang leh thian thenkhat te nen kan zu kal a, khawhlir a nuam in a lunglen thlak kher mai.
Report this comment
April 19th, 2011 at 9:50 am
@ aduhi..I ziak thiamin i rilru i phawrh thiam a, ka khawngaih reuh che.
Ka fapa, ka neih chhun, ka la duh ngawih ngawih..Min ngai em em tu, a thaw tawp lai ka thlir Ni a ka mangan zia te, Engkim ti theitu ka auh nasat zia te, ka duhdan chhan a ka awmloh zia te,Kuang chhunga mu a Lei dai a Phum bo tura a taksa an thlak thla riai riai lai te, Ka damchhunga min ko ri ka hre leh ngai tawhlo turin ka Nun a tihnat zia hi..Mihring tawng hian a sawifiah zo lo..Ka mizia zawng zawng a danglam a, Hmangaihtu ka mamawh ngawih ngawih a..Ka hlutna min phumbo sak a..Chakna reng reng neilo ang maiin, rilru mumal Pu theilo a Ni ka hman liam tak dan te hi…Ummm..
Eichak leh Riltam te nei ve thin kha a ni si a.Ruahsur phei hi chuan ka mangang thin a..Mahse ka la Nung ve zel chu a ni si a.
Engmah hi ka ngaihtuah tha ngam lo a ni ber e..
Report this comment
April 19th, 2011 at 10:10 am
” Aw Lalpa, He khawvel hi ka ‘Khualzinna ram’ ani tih min hriat nawn tir fo la, hawng leh tur ka nih avangin, awmdan tawk min zirtir ang che. Ka cham chhungin mikhual duhawm tak ka nih theihnan, Duhamna lakah min ti fihlim la, midangte tan malsawmna ni turin thilphal min zirtir ang che. Damchhung mi hmauk apiang i tirh nise, Natna leh lungngaihna hian i hmel min hmuh tirin, damna leh hriselna hi i Thilthlawn pek ani tih min hriat nawn fo tir ang che. Thihna hi nun nei tura kailawn anih avangin Nung tur a ka thih theih nan inbuatsaihna hun ka neih chhung hian ka duhthlanna te nei la, hlim taka ka lo haw theih nan, sual kawng kawnga pen bona lakah min chelh tlat ang che”…@mate ainawn hi i thu ziak chhanna hi Lalisua ah chauh i hmu thei ang..
Report this comment
April 19th, 2011 at 10:18 am
Zan hmasa kha chuan thla bial ka hmu, niminah Aizawl chung zawn chhumin a khuh phui a, thla bial a lang lo. Pesach intan zan a ni.
Report this comment
April 19th, 2011 at 10:22 am
Min lo tuarpui zawng zawng tu te chungah ka lawm em em e. In comment te chhiar a nuam kher mai.
Hriatthiam a har in awih har ka la ti reng mai. Khuarei chuan min hnem ve mai anga, mahse kumkhuaa han inthen hi chu…
Report this comment
April 19th, 2011 at 10:52 am
A va pawi em..thihna hi chu a tawp chiang em a,mahse mihring tan vawikhat thih ruat a ni tih a nih kha, Aduh ka khawngaih hle mai che.
Report this comment
April 19th, 2011 at 11:15 am
Aduhi, a nat tur zia chu ka hriatpui che a, ka tawrhpui khawp mai che. I thuziakin min hneh khawp mai. Thinlung khatliam luangchhuak tih a hriat khawp mai. Ka thiante pathumin min boralsan tawh. Pakhat thisen cancer, pakhat electric man, pakhat tuitla. Kan thian hovin kan tap nasa asin aw..
Report this comment
April 19th, 2011 at 11:58 am
Thu 1 chuan “thihna hi nunnei tura kailawn pawimawh tak a ni, nung tur a ka thih theih nan awmdan min zirtir ang che” an lo tih kha maw, i thiannu chu nung tura a thin ngei ka besei…Ziakthiam khawp mai.
Report this comment
April 19th, 2011 at 2:30 pm
time doesn’t heal the wound,it will, though, in its most merciful way, blunt the edge off of it
Report this comment
April 19th, 2011 at 2:46 pm
@aduhi ka tuarpui chein ka van khogai tak che em. Tuna i sawi hi delhi mi nih chuan ka first cousin a nia, keipoh a vuina vela ka kal thei lo tur hi hrehawm kati. Kan naupan laia min hmangaihtu leh min lainattu ka u ka hmu twh lo tur hi hriatthiam harsa kati. Pathian remruat dan hi mihring te tan chuan hriatthiam a harsa zawng anih hi.
Report this comment
April 19th, 2011 at 2:58 pm
#9, @ Aduh, i thiannu a lo nih avang chuan a niang Fonz nen pangpar kan lei a, ava dah ngei kha…..Kan lo khawngaih ve lutuk a. Aizawl haw chhoh a tum lai takin a haw dan erawh a khamphei zawng a ni ta mai si a. Puan paw’n kan va tuam ve asin. Chemtatrawta ang deuh pawh kan hmu a, Kotlaman leh zaivahaikundurha pawh kan hmu.
Ka thian bul tak tak ka then nual tawh…….Hmeichhiate hi chu in tap bawrh bawrh thei a in lawmpui awm, kei chu ka awmah hian min hnawh tlat a, ka tawt up up thin. Pu Rochhingbengchhenga College (Tinsmithy) a ka thian te/kan u te phei chu an boral zo tawh…..kei chiah ka la bang a nih hi !!!! Only the good die young !
Report this comment
April 19th, 2011 at 4:09 pm
Ziak tawi fel kimin lung a ti kuai hle mai. Khuarei in la hnem ve mai ang tih bak tih theih kan nei si lo va. 2003 tawp lamah khan Dubai a ka awm laiin ka tetlai thian zinga boral la awm chhun chuan chatuan ram min pansan ta a. An picnic Buichali lei ah bike in a tlan liam ni awm tak a ni. Rilru a vak thui duh kher mai. Krismas a ka rawn hawng an in keimahin ka kal ngam lo va, ka thiante nen kan lut chiah a nu an tap tak tak mai chu hrehawm duh tak a ni!
Report this comment
April 19th, 2011 at 9:00 pm
lushai_er, Fonz, kotlaman leh Delhi a Mizo awm lo buaipui tu leh lo tlaivarpui a lo thlahtu zawng zawng te chungah ka lawm e.
Report this comment
April 19th, 2011 at 9:04 pm
Ka thian kawmlai ngei mai vuina video kan edit mai chuh… Edit chak a har khawp mai.
Report this comment