By Ngurthansangi Pa
Vawiin tlai chu Tui ka Pipe pahin heihi ka ngaihtuah ta mai mai a: Dama awm hlutziate, natuar lo leh rilru hahna reng reng nei lova ka awm theite ka ngaihtuah a. Hriselna thatak min petu Pathian thatzia hi ka hrefiah leh thin. Hetia ka awmlai mek hian ka awm anga awm chak mi sang tamtak indona hmunah; ralti takin an awm mek a, Mizoram chhungah ngei pawh khaw tamtak Hel ho hlauvin an awm, District Capital tina Civil Hospital- ah thi lek lekin mi engemawzat an mu mek a nisi! Lalpa, i malsawmna ka dawnah hian lawmthu ka hrilh a che.
Heng chauh ni lo; ei leh in theia ka awm te, zunram thiar theia ka awm te, hahdam taka ka thaw sak sak thei te, ka mitin a chakzawng a hmu thei te hi a va lawmawm tak em! Thenkhat chu riltam em emin an awm a, ei leh in tur an hmu zo lova! Thenkhat chu thawk pawh thawtha thei lovin thawkna dawt nena thawktir chawp an ngai a; an bula awm a hreawm em em a ni. Mitdelin ka hmuhtheih angte hi hmuhve a chak takzet a; a ni, anni anga ka mit a del lo hi ka vanneihna pakhat chu a lo ni reng zu nia!
Ka lu a thak a, hiat turin kut leh ban ka nei a, ka duh angin ka tiche vel thei bawk a; a va lawmawm tehlul em! Chumai ni lovin tuna i chhiarmek hi i chhiartheihna turin ka kutzungtang kim ka la nei bawk zui! Keimah ang lova kut bul; ban bul; kuttang kim lo hi Mizo zingah pawh an awm teuh tih ka hria. Anmahni ka lainat rualin anni ang ka nih ve loh avangin ka va lawm tehlul em!
Ka duhzawng ka ei thei mai ni lovin; ka lem theite hi Pathian malsawmna a lo ni! A tuina ka la tem thei cheu bawk a! Mi tamtak chu an piantirhin Lei pawh an nei lova, hmai pawh an nei mumal lova; siamchawp sakte an ngai a ni. Mahse, Pathian malsawmna avangin kei chu miang pangngai angin ka lo piangchhuak a, ka duh ang zawngte ei leh in theiin, ha tim theitein ka awm a, a lawmawm ka ti a ni.
Ka aw bawm atangin ri a chhuak thei te hi a lawmawm hlei hlei! Ka hmangaih hming ka koh dawnin leh ka hmangaih thu ka hrilh dawnin a ri lovin hrilhdawn ta ila a buaithlak awm mang e! Tin, a nep viauvin ka ring! Awka ngei; aw ri ngei hmanga hmangaihna inhlan chu tunge duh lo awm ang ni?
Ni e, zanah thinthi diaia ka mu theite, mumang tha leh man nuam deuh ka nei theite hi Pathian malsawmna a ni. Mi tamtakte mutmu pawh tuahtha thei lo leh; mahni chhungkaw chungchanga buaina avangtea mu thei lova an awm reng laiin Pathianin ka tana hahchawlhna hun tha min pekah hahdam taka ka muhil siai siai thei hi a va lawmawm tak em!
Thlamuang taka mahni chauhva ka awm theite hi Pathian hnathawh a ni. Mahni chauhva awm chu misual pawhin min rawn zuam viau a lo nithei! Mahse, Pathianin min awmpui avangin tunthlengin thlamuang takin mahni rekin ka la awm chu a nih hi! Tunlai chhanah chuan mihring leh mihring kan inhlau tawn tawh a, a chang chuan keipawh ka thlaphang ve deuh dawn dawn thin; mahse, Pathian hian min kalsan ngai loh avangin ka vannei hle a ni.
Mi pangngai anga piang, pianphunga tlema danglamna deuh nei tih mai lohvah chuan midangten an duh ang leh ngainat ang; tha leh mawi an tih angte ka duhin ka hre ve vek a. Hei erawh chuan mahni inkhawngaihna min neihtir chang a awm thin. Mahse, Pathian remruata lungawi hi a lo thaber a, a tlo ber zel bawk a lo ni e.
Chutih rualin, ka duh ang ka neihtheih nana ka beihna kawngah mi tamtakten min deuhsawh chang a awm thin. Thenkhat chuan hmusit taka min tawngkhum chang pawh a awm ve fo! Nulat Tlangvalna kawngah pawh vaute hial ka tawk ve tawh! Mahse, Pathian hian ka tan hian thiltha lo lutuk chu a la thlentir lo chu a ni!
Thil pakhat; ka sawitel ngei gei duh chu: MMi tamtakten thlantla zawih zawiha hna an thawh a, an eitur mai bakah; an chhungkaw chawmna tura an thawhlaia min chawm theitu Nu leh Pa thalaitak ka la neite hi ka vannei ka ti thlawt a ni. Anni hian min hmangaih a, ka hmangaihna letlam chu te, ve hman ngeise tih hi ka duhdan a ni.
Engpawhnise, Mihring kan nih chhung hian lungawina tur hi vang hlein lang thin mahse, lungawi thiam hi kan zir a tha a. Khawvel hi kan Zinna ram a nih tlat avangin Mikhualin Khualkhuaah nuam kan ti ngai tak tak lo ang hian; kan In ngei kan thlen theihnan; chu hmunah chuah nuamti taka kan lenvel theihna turin Pathianin titura min tihte hi kan tih , kan zawm a ngai a ni. Pathian chuan amah hnaihtute a kalsan ngai si lo!
Khawvelah hian mi tamtak chu nuamsa takin; kei aia nuamsain an leng a ni thei e; an duhthalin an khawsa a ni thei e; Nula pawh kut zungtang elha chhiar zawh rual loh an lo thei a ni thei e; an duh an eiin an in a ni thei e; an duhna hmunah an awmin an chengin an hirha a ni thei e; Pathian hian an chungah ro a rel dawn tih ka hri a, ka awt hauh lo zu nia! Pathianin ka hmalam hun chu tha a tih angin min hruaizel ang chu!
Tuesday, May 22, 2012
Similar Posts:
- Ka vei zawng thenkhat
- Ka lawm e!
- Krismas engtia hman nge i tum?
- Setana hi a biak tlak tak tak em?
- Belhtlak Pathian
May 22nd, 2012 at 9:35 pm
1ungawi 1em 1o
Report this comment
May 22nd, 2012 at 9:37 pm
Post tha khawp mai..
Chan tawka lungawi hi a har khawp mai a,
he khawvela kan awm chhung hi chuan
lungawi thiam hi kan zir a tul tak meuh meuh reng a ni.
Report this comment
May 22nd, 2012 at 9:42 pm
Chan tawka lungawi thiam chu a that viau lai in hma min sawn tir thei lo tu a ni in ka hre ve deuh tlat. I rawn ziah te erawh khi chu mihring pangngai neih, Pathian khawngaihna avanga mi tam zawk in kan dawn a ni. Chutih laiin zirna kawngah te, eizawnna kawng hrang hrang ah te pawh kan lungawi hma lutuk hian kan thlen tur min thlen tir lo fo niin ka hria. Midang tana hnawksak si lovin keimahni tan duham zel ila a tha te ka lo ti ve mai mai.
Report this comment
May 22nd, 2012 at 10:02 pm
Pathian malsawmna chhiar thiam apiangte hi mi vannei an ni reng a ni. Good Post.
@ Post tupa chu thianpa VLC Vanlalhriatrenga i lo ni mial lo maw aw? In thu kalphung a inang riau.
Report this comment
May 22nd, 2012 at 10:12 pm
Lungawi kim vek reng lo mah ila, lungawi zel hi ka zir ani.
Hmanni chu Setana’n min bei aniang! Ka hnathawhna hi ka ning deuh thut a, lungawi lohna tur ka zawng vel a..
Mahse ka harchhuak leh vat! ka lawm khawp mai.
Report this comment
May 22nd, 2012 at 10:15 pm
A diary ziaktupa chu a bula awm a hahdamthlak ngawt ang. Engkim mai hi lawmna tur hlir alo ni.
Report this comment
May 22nd, 2012 at 11:02 pm
@CFL, a ni lo tlat. Ka hriat sual loh chuan….ka la hrilhru ang che…
Report this comment
May 22nd, 2012 at 11:05 pm
Tha ka ti ngei mai. Mahse, hla ang deuh khan ‘that ka tum ve leh ka sual leh thin’
Report this comment
May 22nd, 2012 at 11:10 pm
@ninja, kan tluang e. I chungah kan lawm khawp mai.
Report this comment
May 22nd, 2012 at 11:18 pm
Edited
Report this comment
May 23rd, 2012 at 12:04 am
mihring nunah hian lungawina hi thil hlu ber a ni hial ang, ropui tak a ni.
complacency chi khat thatchhe lungawi hmasawnna lam aia awm ve ngawr ngawr chi hi an awm bawk a, khaw hlun, veng hlun lamah a zualkai.
Report this comment
May 23rd, 2012 at 1:40 am
Tun ang hunah pawh misual.com a post te chhiar a kan la comment zak zak thei phei hi chu’h… Engtiklai pawh a ‘thren thraw thraw’ a nui pat pat tur kan ni mawle
Report this comment
May 23rd, 2012 at 9:26 am
A va’n ropui tak em! Hetiang mi te hi an ni, mi vannei chu…
Tirhkoh Paul-a tawngkam hi ka’n tarlang leh hram e.‘…Kei zawng eng ang pawhin awm mah ila, lungawi zel ka ching tawh si. Tlawm taka awm dan ka thiam a, hausaa awm dan pawh ka thiam bawk a; thil tinrengah leh thil zawng zawng ah tlai leh riltama awm dan, hausa leh tlachhama awmdan thuruk chu ka hre chhuak tawh. Min tichaktuah chuan engkim ka ti thei’ Philippi 4:11-12
Report this comment
May 23rd, 2012 at 9:51 am
I va ziak tha em! Post of the month ah ka thlang e. Lungawi tum tluka hlu a awmlo. Hmanzan ah damlo Civil Hospital Casualty ah kan hruai a, dam hlutzia hi aw ka ti ta.
‘Ka dil loh zawk malsawmna’ HD Lalthanpari sak kha a link dah thei in awm chuan ka va lawm dawn em!
Report this comment
May 23rd, 2012 at 9:52 am
A tha khawp mai, lungawi zel ching nun hi an awhawm in an en tawn tlak ka ti. Post tu pa chu pa fel tak i ni ngei ang le kohhran upa atan pawh thlan iai awm lo tak i ni ni dawn
.
Report this comment
May 23rd, 2012 at 10:06 am
A HOT lo em mai, Post of the Month-ah chuan ka thlang thei lo.
Report this comment
May 23rd, 2012 at 10:16 am
Post HOT lo of the Month…
Sermon tha tak a ni…
Report this comment
May 23rd, 2012 at 12:20 pm
I lungawina hi ala pawnlawi tlat. Mi dang harsatna nena inteha lungawina hi chu a rilru chhiat thlak han tih em chi chu nilo mahse a ril lo tlat. Kut neilo te i hmu a, kut i neih avangin lungawina rilru i neih phaha, kut neilo ta la i lungawi dawn lo tihna ania. Kut neilo pa tan khian i lungawina thinlung kha ngeiawm tak ani, chutiang zelin a dang pawh. Pathiana lungawina dik tak zawk chu channa ruam ah te hian alo lang zawk ṭhin a ni ngai. Joba’n “Ka nu pum ata saruakin ka lo chhuak a, saruak vekin ka kir leh dawn a nih hi; LALPAN a pe a, LALPAN a la leh ta a; LALPA hming chu fakin awm rawh se,”(1:21) a tih ang te, Paulan “thil tinrengah leh thil zawng zawngah tlai leh riltama awm dan, hausa leh tlachhama awm dan thuruk chu ka hre chhuak tawh. Mi tichaktuah chuan engkim ka ti thei a ni.”(Phil 4:12,13) a tih ang te hi lawmna thinlung dik tak pai tute thinlung chu ni zawk awm tak ani.
I lungawina point hrang hrang ang khian dam chhung hun i hmang reng dawn lova, i lungawi chhan ni a i hmuh te ang khian awm chang ila neih hun a thleng ve ang. Chutih hunah chuan vuivaina in a chimpil leh thuai ang che. Lalpaa lawmna chu kan chakloh lai ber, kan chhiatna lai bera lungawina zawk hi a ni. Kan chakna ah chuan kan lungawi tawh sa reng a ni.
Report this comment
May 23rd, 2012 at 1:00 pm
Aste, ‘Ka dil loh zawk malsawmna’ HD Lalthanpari sak ngei kha a link a awm ngai anih chuan min lo tihsak teh please
Report this comment
May 23rd, 2012 at 1:16 pm
@sheldy….HD Lalthanpari sak chu Youtube ah an upload lo aniang. Hei hi ka hmu a https://www.youtube.com/watch?v=mbsGJfIwtHc misual ah post anih ṭum khan ka lo download a, min awi tu ṭha tak a ni
Report this comment
May 23rd, 2012 at 1:23 pm
#20…
Tukin khan youtube.com-ah ka’n lut vat a, ka hmu zo miah lo a, hei vang hi a lo nih dawn hi…
Asteric™ mark a tha leh ta tlat…
Report this comment
May 23rd, 2012 at 1:31 pm
Aste, thank khiu lutuk. He hla hi a tha hi ka ti khawp a, manganna ka tawh laite, damlohna ka tawh laite hian he hla hi ka hrechhuak thin a, ka nei silo a, tu sak pawh nise, ka lawm em em takzet.
Report this comment
May 23rd, 2012 at 1:38 pm
Kan rilru ah hian Pathiana question tur sang tam tak kan pai reng a ni thei, hei hi Pathian remruat a ni, zawhna kan neih reng hi. Kan vui leh vui loh hi a hre duh a ni. Engpawh tawk ila Pathiana vui loh hi alo ṭha in alo dik ber e.
A fapa in a do ṭuma Davida rilru nat dan tur zia te kha ka ngaihtuah pui mai mai ṭhin. Goliatha awlsam taka a thah laia Pathianin a awmpui ang mai khan a chungah Pathian a che tawh hauh si lo. A fapa in a um tlana, vawi engemaw zah a ṭawngṭaia, a fapa ngei a ni, a thih a duhlo Lalpa chhungkua fel taka din a duh zawk. Betsebi nena an fa piang tur tan a ṭawngṭai hlawhchham ṭhak tawh bawk. Lalpa khandaih chuan a umzui zel a. Pathian ah khan zawhna/hriatthiamloh ava ngah ṭhin dawn em hi ka tia. Vui erawh a hlau hle a ni tih a ṭawngṭaina ah te hian a hriat. A tawpa Solomona a fuihna te khan ka mittui a ti tla thei hial a ni.
Report this comment
May 23rd, 2012 at 1:44 pm
@sheldy….keipawh ṭha ka ti. Hla min ti chak thei, nun chawm thei hi chu a dan a dang a lawm. Mawi satliah hi a awm a, kan nun khawih em em tepawh a awm a, heng te hi chu kan zah ṭhin, kan nun a siam ṭha bawk ṭhin a nih hi
Keipawh hi ka lo vui nasa lutuk ṭhina ka inchhir leh hnuhnawh 
Kan ṭawngṭaina ang hian min chhang lo mahse Lalpa hi a lo dik zawk zel a ni.
Report this comment
May 23rd, 2012 at 1:59 pm
#23
Mihring nih chhung hi chuan Pathian hi question a awl khawp mai a. Chhungkua/hnathawhna/thenawm khawven thilah te engemaw a lo thleng a, Pathian ah vui thin mahila a tawpa ka tluk luhna chu Pathianah tho a ni leh thin. Kan tan hian A va hlu em ka ti.
Report this comment
May 23rd, 2012 at 2:19 pm
Aste, tunlai tak hian sawichhuah chi loh problem rit tak mai ka nei a, ka tawngtai pawhin a tawp chut mai a, ka mang a ang ru deuh a, he hla hi ngaihthlak ka chak em em mai a, he hla hian ka rilru a khawih thin a, nasa takin ka chakloh laiin min pui thin. Pathian lakah ka vui tawh lovang ka ti thin a, tunah hian ka vui lek lek chu a ni e. Min lo tawngtai pui teh u (a personal lutuk lovang chu maw)
Report this comment
May 23rd, 2012 at 3:09 pm
@sheldy….Pastor Charles Stanley chuan “Kan harsatna tawh chhan hriat aiin kan hmachhawn dan hi a pawimawh ber chu a ni” a ti a, a dik khawp mai. Kan harsatna chu engpawh a ni thei e, a ṭhen chu Pathian hian min hriat tum loh te pawh a awm a ni. Josefa khan a harsatna tawrh chhan kha Pathianin hrilh sela chu Josefa tan khan a nuam ngawt ang, mahse Pathianin engmah a hrilh lo. Kan chunga a thil ruahman te a hlawhtlinna turin kan tuarna ah te a ngawi ṭhin a ni. Rev. Zosangliana sermon ka ngaihthlaka ka duh em em chu “Pathianin min laksak hian min pek tum a nei, min tawrh tir hian a chhandamna ropui tak min hriattir a tum, min tihnat hian min tihdam duhna a nei” a tih hi a pawmawm ka ti khawp mai.
Report this comment
May 23rd, 2012 at 4:01 pm
In comment- te khi ka chhiar a, a thupui han vuahdan tur khi ka hrethiam chiah lova, tikhian ka rawn vuah tawp mai a ni.
Report this comment
May 23rd, 2012 at 5:03 pm
Post/thuiziak tha tak anih hi!
Report this comment