mi(sual).com

Chetchhiat Part II :

Zirlai pawl magazine editor hruaina hnuai a nula rim kan ni ta bawka ngaih a tha khawp mai. Mahse, Hamleta thawnthu a “vanduaina hi a mal mal in a lo kal lova” an tih ang deuh khan, kan chetchhiatna pawh hi a mal mal hian a lo kal hauh lo. Kan Editorsap-a  hian kan len hma hian kan lo che chhe fe tawh  tih a hre sa teh reng nge ni, kan lenna tur lo zawkah min han luh sual pui ta pang mai le. Keini thian za ho tan chuan leilung pian tira kan vawikhat kalna a nih avangin a sual leh sual loh pawh kan hre tawh lova. An in awm dan kha a in  an em avangin Editorsap-a pawh hian a hre sual ve a ni awm e. Amaherawhchu, kan luhna pawh kha Mizo awmna an lo nih hlauh avangin engmah hre lo chuan kan han zui lut ve ngawt pek a.

Keini chuan lut sual tih in hre hek lo thutna kan han rem fel in, ngaihtha deuh chuan kan lo thu nui ve vir ver hman tawh a. A dik tak chuan ka rim tur te pawh hi tu nge  an nih a, eng ang hmel nge an nih kan hre bik miau lova. Kan luh sualna te pawh hi tute nge kan hre chuang lova. Kan lenna te lah khan lut sual kan ni tih an hre mai lova. A hma lama zirlai pawl ho siam T-shirt man an pek remchan loh thing tur emaw kan nih tiin pawisa  a rawn hum chhuak ta va va mai a. Editorsap-a khan pawisa nawia lo nei lo hlauh a, T-shirt man ba thing kan ni lo tih kan sawi pah khan kan lut sual a ni tih a sawi loh theih ta lova. In hmelhriattirna pawh nei tawh chuang lo chuan minute khat vel kan thut hnu chuan inchung lamah kan lenna tur tak tak zawkah chuan kan in sawn chho leh ta nge nge a.

Inbumna ropui:

Kan lenna tur dik taka kan han luh fel hnu chuan Editorsap-a chuan inhmelhriat tirna te neiin kan hming chu an sawi dan dan a. Kan zirna hmun te pawh an sawi tel bawk a. Kan nula te chuanzirna hmun an han hriat chuan eng zirlai nge kan nih tih te an  min zawt zui ta ngei a. Kan len hma hian kan pawl zat tur hi kan sawi lawk vek a. Kan pawl pangai aiia pawl thum theuh in ka tawlh hniam a. Sahelpet-a leh Daithelh-a hian MA an in tih vangin kei chu M.Phil first year sawiin ka in sawi tur a ni. Kan lenna kawnga kan sawi ang chiah chuan kan pawl chu kan han sawi ta diat diat a. MA, M.Sc leh M.Phil kan  ni ta far mai a. Kan Editorsap-a pawh chuan kan pawl thup chu hrethiamin a lo aw e ve mai mai bawk a.

A huho zinga dawt sawi dawn chuan tangrual ila a him ber. Dawt kan han sawi pawh hian fiahna harsa tak paltlang tura awm na chungin kan tangrualin ka thusawi tur kan chhut lawk deuh zel avangin fiahna har deuh pawh kan pal tlang ve zel a. Fiahna kan dawn hmasa berah chuan kan senior, PhD zo mai tur, kum khat chiah nei tawh, kan thianpa pakhat chu kan nula rim te venga mi a lo ni hlau mai a, a chanchin min zawt a. A tir chuan kan hre lo der phawt a, kan thian kawmngaih leh kan hriat chian em em, a hming pawh kan lam zin ber pawl chu kan hriat loh angai ta tlat mai le. Mahse, an sawi chian hnu chuan kan koh dan a in anglo a ni tiin kei ni ai a senior fe ang  in kan han chhuah a. Champhai lama an chhungkua chanchin te kan han zawt kual ve ngial a. Zep nak emaw, Champhai lama an chhungkua chanchin min hrilh bak pawh kan hre theuh a. A naute hnathawh a sawi bak te, a pa duh zawng leh a nu a ke nat thu te thlengin kan hria a, mahse kan hriat zawng zawng sawi hun a ni lo tih kan hriat avangin ngawih kan chuh ta a.

Zirna in atanga leng kan ni bawka zirlai te min zawt a, kan zirna hmuna luh an duh ve thu te an sawiin entrance exam rawn pe ve turin in kan han sawm zui a. A har leh har lo te min zawh chuan kan vanneih thu leh kan zawhna chhan ber pawh kan hriat loh thu kan sawi hnu chuan eng lam question nge an zawh tih chu min zawt lui bik lova. Kan lenna nula pakhat kha B.A a zawh hnuin kum 2 dawn lai a chawl tawh a. Sahelpet-a pawh hi MA final year anga a in sawi avangin batch khat angin an in sawi a ngai a. Kan han titi zau zel a, kan junior fe, MA rawn ti thar kan nau kha an classmate a nih avangin Sahelpet-a hian kan nau te nen chuan in pawl rual angin a in sawi ta vel a. Mahse, vanneihthlak deuh maiin class hran an nih avangin eng tin tin emaw kan in sawi chhuak leh thei hram a. Editorsap-a hi kan junior fe a ni na chungin kei pawh Editorsap-a hi kan senior sawiin ka sawi vel ta a nih kha. Hui ha… lemchan nun zet hi chu aw.

Inbumah bum luat a awm nem maw :

Zirlai kan sawi pawp lak lawh bawk a, Hyderabad University te kan sawi  kai a, kan ngaihsan thu te kan sawi leh a. A campus chhung vel nuam an ti thutu tee maw sawi  an lo hria a. Lemchan leh angai dawn ta. Hyderabad University hi kan len hma lawk thla sarih vel liam ta mai khan ka lo zuk tlawh chuak dip dep tawh a, a campus pawh uluk takin ka fang chhuak a. Zan thum lai ka zuk riah chilh hnu a ni na chungin la hmu lo anga awm a ngai tlat. A nuam a tih thu leh luh ka chak thu kan sawi leh a, kan tawng tui deuh nge ni entrance exam te hial pe a lut thei lo chhuahin ka in chhuah mauh mai a. A dik tak chuan, Hyderabad University ah hian ka mikhual lem lova, ka hmelhhriat tam mai, lemchan a ngai vangin Hyderabad University mitthla rauh rauh chungin a nawm hmel thu vel kan sawi zauh zauh mai chu a zia lo lam hrat chu a ni.

Kan in sawi nikhua loh laklawh tawh avangin a tun lai a social network ah pawh Orkut lam chauh la hmang thin ang in kan han in chhuah leh a. Orkut hi mi tam zawkin an pemsan tawh a, kei ngei pawhin ka pem san tawh na chung in la tui pui zawk ang leh facebook lam la hmelhriat lo angin kan in sawi a. Tin, in ti fimkhur takin  kan len thu hi Champhai lama mi kan senior hnenah lo sawi lo turin kan chah a, a chhan  chu kan exam a hnai a, len a mawi lo tiin kan tlip ve tlap a. Exam ka han sawi takah chuan Sahelpet-a exam hun tur kan zawt a, zawhna zawh lo tawp tur a nih teh reng nen. November ni 18 a haw tura a nih avangin ni 17 a exam zova, a tuk a haw tur angin an in sawi ngawt a. Tlem in thluak lo hmang lo deuh se chu kan mualpho ngei ang le. Kan zirna hi a exam chi ho hi chu a tlangpuiin December ni 6 hian an khar thin a, tu fa mah hi Nov. ni 17 ah kum tawp exam an zawh kan hre lova. Sahelpet-a hi a hmasa ber tur a ni mahna le.

Kan haw hnu khan kan lenna te khan eng tin tak min sawi ang mawle. Thil fel vak lo a awm tlat lehnghal a. Zirlai pawl magazine lamah khan article ka ziak ve a, ka hming leh ka zirlai an lo ziak kuau mai a. Magazine lah kha an nei ve kiau a, an rawn lek chhuak larh larh lehnghal a. Kan haw hnu khan Zirlai pawl magazine te kha an chhiar a, ka hming zawn a thu in ziak an chhiar vaih chuan kan dawt sawi kha an hre chhuak ngei ngei ang mawle. Enge pawi ? kan tluang lo vei em a nih kha…..

Similar Posts:

• Three Amigos: The flop show (Part I)
• Pawl hniam lam zirlai fail tir thin hi
• Breaking News: VNIT ah buaina chhuak
• Min lo pui ve teh u
• Zirlaibu nuai 8 chuang maw?

Recent Posts:

• Jersey lampang aw.
• Illuminati thil tum te
• HOT dan dangin………….:-)
• Peaceful Protest Against Ethnic Cleansing Policy of Burmese Government
• Ka chantawkah ka lungawi em?

This entry was posted on Thursday, September 15th, 2011 at 6:00 am and is filed under Adventure. You can follow any responses to this entry through the RSS 2.0 feed. You can leave a response, or trackback from your own site.