mi(sual).com

Nikir thla tawp lam a ni a, ruah tla deuh ser ser chuan Aizawl khawpui chu a tihnawng deuh chur mai a. Tlai ni thla tur lah chu chhum kar ah dul raihin alo eng chhuak leh chiai chiai thin a.Zan lam ah lah chu tibawk,thli chu a thaw vuk vuk a,lukhum khum loh phei chuan sam a chhem leng  a.

O..Kei aia lungleng thin chu awm se mita hmuh loh lamah hian hmuh a nei teuh awm si a,hmuh ve ka va chak em tiin intih lunglen ve chiam ka tum thin.Mahse chuti ual chuan alo awl si lo a,ka lungleng ve reng tih erawh ka inhailo,ka lunglen chhan erawh hun liam ta a thil thleng mawlh khan ka lung min len em em ve thung a,a ngai te a he hun alo thlen hian min hrechhuak ve a ngem le ka ti fo thin.

Khami zan tlai kha ka la hre reng thin,tlai nitla turin theileh theiloin Hospital(a hming chu sawilo phawt ang)kan riahna room chhung a lo chhun luh ve dat dat kha.Khua lah chu a vawt em em a,ruah lah chu zan lam ah a tla deuh siar siar a,thli lah a thaw nasa ropui si.

Thla khat dawn chu kan awm ta hospital ah,ka pa kal(kidney) natna a vangin chu mi hmun ah chuan zei turin thla khat dawn chu ka riah pui tawh a.Naupan lai atanga dai ngailoh leh awm chhin ngai pawh inrinlohna damdawiin a ka pa han riah pui chu a hrehawmin a lunglen thlak duh teh a sin aw!

Mahse ka zep tlat a,pa takin ka riahpui zel a.Mahse a chang chuan ngaihzawng hre tan tawh ka nihna avangin ka tleirawl lunglen erawh a reh thei mawlh silo a.Ka phone riang tak mai lungchim taka a ngawi reuh reuh mai chu rilru na ve duh tak maia sin,mipa intichin tan ngat phei chuan!

Hei chauh hi he mi hmun a ka buaina a la ni hlei nem.Thian ngaina tak zawng nilo mah ila ka rilru fimna(chutlo)tawk tur erawh chuan thian ka nei ve fur mai.Nimahse hemi tawngtamlo hi ngainatawm a nilo a niang nge,biak reng reng min tum ngai lo a,ka tum bawk heklo!Hemi hmun ah lah thian siam a har leh talh mai bawk a.

A dam ber pawh a tawng peih tawk tawk a,damlo awmpui tute lam ah tuan ve dawn ila private hospital a nihna angin mipakhat hian an awmpui deuh zel a,chung ho lah chu nutling hlir an la ni zui a,kei erawh thalai tuaitir te mai chauh ka la ni si.Ka kawm tur leh thian tur reng reng an awm si lo,ka pa lah tam thei ang ber mut a mamawh si a,kan titi chhung reilo te tihloh chu keimah te hian ka reh vawng vawng hi a ni ber e.Ka va lungleng teh lul em kha mi zan zet kha chu!

Chutiah ka innaihtuah mek lai chuan hman a ka thianpain number min pek kha ka hrechhuak hlawl mai.Vawi hnih vawi thum vel chu kan intext tawh thin a,hemi zan pawh hian ka phone ah chuan a number chu alo la awm reng chu ni in.T zawn a TEi tih ngei mai chu ka han hmetchhuak ta a,engmah pawh fimtaka ngaihtuah hman loin ka text ta ngal a.Ka zak duh lo,a chhan chu vawikhat mah kan la inhmu lo a.

Awle reile te ah hmun hla tak ami chuan alo hmu ngei ang ka thu thawn chu tiin ka  nui tut tut a,ka phur kher mai.Rin ang ngei chuan reilo te ah chhanna alo kir leh a,chumi thu chuan he tleirawl nun tuihal tak hi ava tihlim teh lul em;tui dang reng rengin ala pawlh loh,anihna ngai ngaia la thianghlim rilru ngei mai chu a tihlim tak zet zet a ni!

He thu hi engvang a thawn ta ngawt nge ka nih tih hi ka ngaihtuah fo thin.Hmangaihna hian min zem a hle a nih hi ka ti a.Nun khawhar leh thian tur duh em em in ni tam tak chu melh taih chu ka lo nei ve tawh a lawm.Mahse thian han tih hian ar sualpui tur thian te chu ka nei mauh mai,a thlum a al ei za tur chuan thian ngamtlak reng ka la nei lo a,ka maltlat hi a ni deuh ber mai thin.

Khawilo kal nikhua a hmel fel leh fai deuh te chu rawp taka bih liam ai chuan  thian a siam mai duhna rilru chuan a buk a rit ta khawp mai!Mahse mite hi inanglo tak tak,hmel en mai pawh a siamtu themthiam zia a hmuh theihna ah hi chuan thian tha siam a har a,kan duh ten min duhlo a,kan hmangaih ten min hmangaihlo ve silo a!Hei vang hi a ni ang e ka thianpa ngei pawh khan he number hi min pek ni!

Kha ni dang dai tak  atang khan a ni he number hian min tihlim em em a,ka tihawmzia chu phone neitu zawk hi a ni.Kan inbiak hmasak ber zana a aw mawi leh danglam tak, a aw dam diai leh a nui ri tui luang ang a ri kerh kerh te kha sawifiah thiam ka va chak teh lul em!Hemi avang pawh hian a ni ang a zun ah ka uai ni ta berin ka inhria a,ani pawh khan a tawngkam hman atang khan min haw lo tih ka chiang bawk a sin.

Dr.Lalchhuanawma tochhawng’n  hmangaihna mitdel ti a alo sawi fo thin te pawh kha ka tui thar ta riau mai.A chhan chu ka la hmu miau lo a ni ka thian nu hi!Zankhat ka tawngtaina chu chhanin a awm ta ni ber hian ka hria a,hriatloh ram atanga khuanu duansa tleirawl aw tliang leh ngaihnobei tak mai han ta neih te chu a ruka hauhsa ta viau ah inngaihte pawh a awl rum rum a lawm le.

Zing nichhuak danglam bik zia te,tlai nitla khawharthlak tawh bik zia te hahip a a hunlai ami kha sawi ka chak thin.Sakeibaknei hma ah chuan ka zam lovang zoram tan ti a vai vin khum ve vak vak thin khan a aw tliang nalh tak avang chuan hmulthi a ding sung sung thin a nih kha.

A sei lutuk dawn e,tawplam hnaih teh ang.Inhmu hauh silo khan ka rilru a luah em em a,keilah chuan ka duh em em a,ka duhna chu hmangaihna a maw tiin ka lo ta neih chawt a.Kan hlim dun em em thin.Heilo liam a hmangaihna mitdel hi tun hnu hian a awm ka hre ta lo.Ka hrechhuak fo thin.

Tunah chuan pasal te pawh a nei ve ngei tawh ang a,keipawh ka zirna ah ka tui a,ngaihzawng dang pawh ka nei tawh,face to face a hmuh theih ngei mai chu.Khatiang inhmangaihna kha dik tak a sawi chuan tunlai thalai inhmangaihna hi a ang ta berin ka hria.Engpawh chu lo nise induhna hi hmangaihna a nilo tih te hian a tawp ka han khar hram teh ang!!

Similar Posts:

• A na a sin…
• Nu hmangaihna. A va mak em!!
• Nghilh loh Hmangaihna
• Mi ramah zawng lunglen a na e
• Mi(sual) hmang tangkai

Recent Posts:

• Krismas Bazar thu
• Lui kal thu
• Sam Hairstyle!
• November 2011, Mizo(ram) Diary
• Laikhum zala ka dawn changin (Sunday Pual)

This entry was posted on Saturday, December 3rd, 2011 at 12:02 am and is filed under Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.