Lui kal thu.
Kum 199?, ka chiang ta chiah lo, keini thianza ho panga, nitin-zantin inkawm hoin lui kal kan rel tum kha. A pangngaite bawkin ka nu chuan, ‘Mama, a tul lo..tuiah in tla ang..’ ti chungin, buhfai a tul aia tam, engkim ramhnuai a ka mamawh tur ang nia a rin kha bag ah a rem mawlh mawlh a. Ka pa zin thosilen nen, bawr luah in thianpa te inah ka chhuk a, kan innghah khawmna hmun tur a kan ruat ah.
Kan lui kalna tur hi Changte lui, Aizawl atanga 50 km zen zawn vel ani ang chu. Ka nu hlauhthlawn ang aiin tun thlengin he luiah hian ‘tla hlum ’ an la awm lo a, a thuk lai ber pawh thlasik lai chuan pil erh awrh chauh ani. Lui tereuhte mahse khawkrawk phian si niin Ngahlim an tam hle a, Lengphar leh Nghahrah te pawh an awm ve a. Tui a len lai tak tak chuan thaichhawni-nu sum thum zen zawn an man tawh tih te pawh kan hria. Changte lui chhak deuhah hian kan thianpa ten lo hmun nghet an nei a, fu leh buh an ching a, an thlam, kawngpui kam a mi-ah innghah kan tum a, fu her lai anih avangin anmahni pawh an awm nghe nghe a. Kan thianpa te hi Thiak khaw chhuak an ni a, Thiak khua hian Changte lui hi an inti tatu viau nghe nghe a.
Zirtawpni ani a, Sialsuk bus nang turin bus stationah kan phei a, kan ri phei chel chul a. Kal hmain Sikulpuikawn a Pu Zamkunga dawrah dal, tel, mawmbati, sangha tin te kan lei lawk sa a. Mutbu nen, kan in ak puar ve pangngai khawp mai. Kuhva pawh: chinai, a rah, panhnah nen thlap kan keng. Tluangtakin Kulikawn atanga Aizawl chhuahsan in Aibawk kan thleng phei a, chhun chaw kan ei a. Sateek tlan pelin, Khawhminglokawn ah zunram kan thiar a. Tun thlenga he khua a ka hriat reng chu in pakhat a Michael L Engthawla tih in tar kha ani. Khawhminglokawn atang hian Darlung/Thiak khaw panna a peng a, kawng hnuai lam chuan Sialsuk a pan a. Hlim takin thianpa te thlam kan thleng a, bus atanga kan chhuk dawn a pa pakhatin ‘ hlo thlo a inhlawh tur anni ang’ a tih kha chu ngaihthlak nuam lo ve tak ani.
Thlam kan thleng chu kan kuk ruih ruih a, fu herin lo mawng lamah an lo awm vek a. Thlam chu hmanlai thlam ang kha ani lo a, in ang deuh hi ani mai a. Thlam kawtah tui a awm a, mau phel an zawm khawm a, pipe angin, luite atangin an la kual mai a, minor irrigation kan tih ang deuh hian. Kei pek kha, thlam chhunga an thawmhnaw ban khawm nghuk mai kha ka keu dun dun kher pek a. AWKE! ka darah a rawn bei chawt mai, ka te tengtung mai a, ka thingthla nawk a, thianpa in a rawn sat hman a, a hring, eng leh dum in chawhpawlh deuh, rapawm tak ani. A thih hnuah pawh chempui ah khan a ke pakhatin a la in hambet vu vu thei. Ei en ah pawh kan en lo!
Fu herna la hmu lo thiau kan ni a, kan zuk pawh thla a, a herna khawl chu fu herna, kawtlai a kan hmuh ang hi ani mai a, a lian deuh a. Bawngte pawh an chhawr thin a. Fu tui kha thlengdar lianpui, feet li bial velah hian an dah a, an chhuang khal ta ani. Chhuan fuh tumin kurtai tui deuh, chhuan fuh loh tumin kawi zek zuk a chhuak a. A fu tui kha a tui berin ka hria. Keini tleirawl phelhphawlh in ti chak deuh thiau in kan han her pui tak tak mai a, huan neitupa pawh a khi vur mai!
Thim chhelh chhawlhah thlamah kan chho a, chaw kan ei nghek a, ruah a tla siap siap a, rallehlama a riak, Thiak nula te kan va rim a, teak hnah kan khum phei a. Rak mai mai pah in card trick te kan va show kual vel a, Thingpui sen leh kurtai nen. Riah ve mai kha a chakawm rum rum a, a vawh bakah ruah do kha a peihawm lo deuh a. Thlam ah ‘trinity leh oneness’ chungchangah mu chungin kan inhnial chiam a, Lo neitu pa ber pawh a rawn in beng kang uaih uaih a, UPC ruhkawl ani ve a. Tumah hnehtu awm lo in kan in hnar san ta hlawm a.
A tuk zingah thlam neitute an kurtai nen Aizawlah an haw phei a, keini muangmar in lui lamah kan chhuk thla ta a. Thlam atang hian 1 km vel ani a, chhuk hlir ani a, lui atanga thlam a han riah kha a tih chi loh avangin mutbu nen, engkim kan in keng chhuk vek a.
Lui kan thleng thla chu a hlimawm dangdai ve khawp mai. A li lo lai chu ngal chen lek leka thuk ani a, tui a fim em em a, nghate tereuh te te an tleh del del a, luiah patek a awm lo a, lungte pawh an fai thiau a, an dum hilhel a, ‘sangha liah fai anih hi’ tiin sangha tam tur zia kan sawi phur vel a, boruak a nuam khawp mai. Buk sak ngai loin thlam ram ah kan in nghat a. Kan in dah fel hnuah kan sangha manna tur len leh lenkhangte kan siam fel a. A rem lai laia lenkhang zar turin kan chhuak ta a. Lenkhang hi a lui tan zawngin kan zar ngai lo a, li daidul laiah emaw, lui luan dan ang aia tlem a he deuh hlekin kan zar thin a, len kua pawh sinte te ani a, kut zungte pawh a leng mang lo. Len sawmhnih vel kan zar a, tui chen zawhah zan len denna tur khawnvartui bati kan siam a, mau hring chang khat leh tlem in kan tan a, a chang kan verh a, khawnvartui kan thun a, buara them in kan hnawphui a, a awlsam khawp. Torch light eng hi sangha in an hlau an ti a, a tha ber chu meichher pangngai, mau ro phelsawm a siam hi ani e an ti.
Thianpa in tumbu a lo khawrh a, inbual paha kan chakai man nen, sawhthing leh hmarcha nen vaipaden a siam a, mau bur lian tawkah a sawh suah suah mai a. Vaihlo zial kan pet far a, a hma zana kan inhnialna kha kan sawi a, kan nui tlawrh tlawrh a. Kan tleirawl zual lai deuh a kan u rual nula rim kan zui duah tum a nula in ‘ pasal ka nei dawn’ a tih khum te kha kan sawi a, lui ruam khawk rum rum khawp in kan nui a. Kuwait kal kan tum lai vel te kan sawi thleng a, kan thianpa pakhatin ‘kei chu ka te si a, min duh ve lo ang a’ a tih mawlh kha kan sawi nasa a. A mah ber ber kha a sawi phurtu ani lehnghal a. Kan va hlim tehreng em!
Changel hnah phah in chaw kan ei a, bawk chungin ka ei pek a, thut tun hi ka ti thei lo a. Dal leh sangha tin kan pawlh leh vaipa den, kan dikdak zo rang ngei mai. Thim nghah pahin tiin lui mawng lamah kan chhuk thla ta a, kan kal peih chen chen atang a len den chhoh kan tum ani. Thlasik lai hian tui a fim a, zan a den loh chuan sangha hi a man hleihtheih thin loh a.
Mi pahnih chiah in len an deng thiam a, a dang pathumin bati leh sangha bawm kan ak a, kaikuang, ulawng, nghalerh nen thlam kan thlen meuh chuan kg thum lai awm tur kan man hman a, a repna kan siam sa ah kan rem tlar thap a, kan rep ta a. A te nawi ho kan chhum thung a, kan chau deuh ani ang, kan muhil rang hlawm khawp mai.
A tuk chu Pathianni ani a, zing dar ruk velah kan tho a, kan lenkhang en tur in vawt ti a si hlawk hlawk chungin lui kan pan leh a, lenkhang a sangha awkte chu an lo var phauh phauh a, a then te phei chu an la nung a, vawt e sawi loin kan dai bawrh bawrh a. Lenkhanga sangha man hi chu an hraw deuh a, a nuam dangdai bik riau thin. Rinaiin kan man tlem a, a vaiin kg hnih pawh ani awm lo e. Sahram in a lo ei te pawh a awm nual a. Nghalerh man hi a buaithlak thei phian a, an tal chingchivet nasa thei khawp a. Lenkhang te kha kan hlip nghal vek a, lui mawng lehzual pan kan rilruk vangin. Khur hlauh hlauh chungin thlam ah kan let leh a, mei kan tuah hluah a, sangha te chu kan rep a, muang mar a lui mawng lam kal turin kan in siam pah bawk a. Sangha kan hmeh ve ta, tui ti vak lo khan ‘a va tui em’ kan han ti vel a. Sangha tin kha a tui ka ti zawk fe mai.
Kan sangha rep te chu aiawt bawm hlui kan chharah kan dah a, thlamah kan hnutchhiah a, muangchangin lui mawng lam kan pan thla ta a. Changte lui hi kal a nuam em em a, luite e ti lo in lengkir te a awmlo a. ‘Chinai emaw te chu lo keng ila chuan vuak tur hlir mai anih hi, tui lah a tlem si. Kal leh vat ila, chinai nen’ kan ti a, kan rawt phur khawp mai.
Kan chhuk zel a, lui kuang chu a lo dar ta huau mai a, mihringte kan hmu ta a, Aibawk khaw hoin sangha an lo vua niin. Ruthei hi bawmrang phui taka tahah an lo dah teuh mai a, suk ang deuh hian an lo deng suah suah mai a. (Ruthei hi a kung awm dan ka hre lo a, a rah ani a, a hring ani a, a pian hmang chu ‘discus throw’ ang chi hi ani a, ka pa kawrchung kawrkilh aia lian deuh hlek vel ani a, a mu tak chu a var ani a, ei pawh a ei theih. A rah kawr kha a ‘ru’ tak chu ani). A ru tui chu a sen deuh nghuih a, kan kal pel chuh!..sangha rui kha vaukam lamah an rawn chhuak tup tup mai a. Man ve mai kha a chakawm tak ani. Mahse a mawi chiah lo deuh a. A le!! Ngaihdan ka nei ta phut a, lui mawng lamah kan tlan thla ta chiam a. An ngha-khar (?) siamna thlang fe ah khan lui tan zawng in hmun thum velah kan lenkhang kha kan zar ta a, kan zar lai te khan an rawn awk nawk nawk mai! A va nuam em!
Ngha-khar thlanglam kha chu ‘common zone ani mai’ kan ti a, mahni inthiam chawpin kan inti thu nasa, mak takin anni pawh kha kan awmna chin kha an rawn thleng miah lo. Nuam tak ani, sangha lian chu a awm lo, mahse a tam ani. Nileng a chhar tur a awm a, an ru lah khan a hneh thui em em mai lehnghal a, buk kan sa chawp nawk nawk a, a awlsam ber chiin, thing ro kan fawmkhawm a, sangha chhun khawm pawh a vum hnur mai. Chuan kan rep ta mep mep mai a, ‘nghadah’ kan zawng pah zel a. Khua a thiang nuam bawk si. A tenawi ho kha bel pahnihah kan dah khawm a, tui tlem kan lei a (tui a kha a leng tam tawh lo), kan chhum ta a.
Sangha rep hi rinaiin a hahthlak a, a tenawi deuh phei chu buaithlak tak ani. A repna mau nen a inchar chuan a bung zel a, a sawm nuaih thin a, a inchar hma hian leh zung zung angai thin a. Uluk tak a mei alh nasa vak lo nen a vil reng angai thin. Zankhua deuh thawin kan rep a ni.
Chaw kan ei chu, sangha kha a barin kan bar a, a tui te pawh kha a tle nuar nuar thei a, bawngsa thau tak chhum tui ang mai hi ani thei roh a, mahse ka duhaiin a kha a. Thiante erawh chuan tun thleng hian a tui an tih zia an la sawi thin.
A tuk zingah Sialsuk bus man hman tum in kan chho leh ta a, kan sangha rep dah that kan la chho a, thianpa te thlam pawh hma takah kan thleng chho a, mahse bus chu sawi loh motor reng reng awm thei ta lo. Kan nghak nileng thak a, kan beidawng a, zan riah leh angai ta a, buhfaiin min daih ta mang lo a, a fu tui lam chu kan hnianghnar viau. A tuk zingah phei chuan thianpate thlama an ei duh loh buhfai leh sazu ek chawhpawlh kan chhum ta vel a. ‘Ti ringawt chuan’ tiin ke in Khawhminglokawn kan pan ta a, 10 km vel ani mai thei. Khawhminglokawnah chuan ‘Aizawlah curfew a lawm’ an lo ti a, vanneihthlak takin Aibawk thleng jeepah kan inhnawh a. Kephah hnuai durh pawp khawp a Aibawk-Aizawl paidalin Aizawl zanlai pelhah kan lut ta ani. Kawngpui pangngaiah pawh kal ngam loin Patan road – Model veng ah kal zelin kan veng zan dar hnih velah kan thleng hram ani. Sangha kha a rep ro tha theh thawh in 5 kg ang vel theuh chuan kan in sem hlawm awm e.
Note: Spanish-nu in kilometer khat dawn ke a min rawn umzui a “Engatinge goodbye ti lo a kal i tum ngawt!” a rawn tih a, tap per pur chung a kan inkuah chuk chuk chungchangte kha sawi duh ila chu hei ai hian a ngaihnawm mai thei e. 
Similar Posts:
- Ngawi dawhnaah ka tel ve a !
- Zabula Champhai Ramhuai hmuh dan
- Misual Mi Taima Ka hmu
- Mei alh en
- YMA hnathawh that!
December 4th, 2011 at 2:40 pm
Bonus khi ka tan lutuk (Y) Post lo siam ngei rawh.
December 4th, 2011 at 3:01 pm
Lui kal hi chu nuam i ti ve a ni, nghakuai chiah tur ringawta kan luikal lai te kha a rei ta hle mai.
December 4th, 2011 at 3:01 pm
Maaduh, min first khalh le, thanks (Y)
‘Adventure-Spain’ tih ka la rawn ziak ang e! (H)
December 4th, 2011 at 3:06 pm
Caribou, ni e mawle! Hman lai tak tak khan lo piang niila chu pasaltha tur chi mawle ka nih le 🙂 ..kan nghakuai chiahna te kha bang an hung a, a nuam tawh miah lo. Zawh thlak zel khan li lianpui a lo awm a, 2005 khan naga student a rawn tla hlum lehnghal a.
December 4th, 2011 at 3:12 pm
chil i ti put dawn alawm mawle 🙂
a ngaihnawm e, hlawhtlin vak loh paw’n luikal hi chu nuam ka ti ve khawp mai. (Y)
December 4th, 2011 at 3:26 pm
A ngaihnawm hle mai…thu i thluai thlum vak lo a..ka duh zawng tak a ni (Y) Lui kal hi chu a nuam ve alawm.. Tiau ah lenkhang zar tura kan kal Burma sipai ho in min rawn ral sai mai te kha aw…mi ngaihtuah chhuah tir e. Kut beng mai nilo,a khamphei zawnga kan haw teuh zia te kha :-S ngaihtuah a ti thui khawp mai.
December 4th, 2011 at 3:26 pm
A va chakawm kher ve le! Kan tlangval zuallai min ti ngai kai rawk. Kan hrat ve thin khawp mai. Lunglei ka awm hnuah Inrinni tin deuh thaw hi kan kal ve thin. Hmawngva, Saipui lui, Sailungrek, De, Kau, Ruangte, etc kan va suartluan nasa thin tak. Tunah erawh ka sim ta hmak mai. Sim vek ila, Mualcheng khua ang khan awm vek thei ila ka ti ta.
December 4th, 2011 at 3:31 pm
Changte luiah sawn nghakuai chiah in ka kal ve tawh zan. Pakhatmah ka awk lo..a department ang zawng khan ania. A boruak kha a nuam ve hrim hrim a.
Luikal tak tak hi chu mipa chan deuh ani. A tough emai. Lui sangha te reuh te te, a tui pawh kha fak mai hi a tui ka ti em em..
December 4th, 2011 at 3:31 pm
A ngaihnawm phian mai. Spanish nu chungchang chu han post lehnghal law law la maw le
December 4th, 2011 at 3:44 pm
Changte luiah hi chuan ka kal ve tawh mid 90s khan, thlamah kan riak a, nuam ve reuh lutuk.
December 4th, 2011 at 3:49 pm
Ziak lungleng thiam khawp mai.
Lui kal hi chu a nuam ve hrim hrim a ni. Chaw ei te a tui duh bawk. Vawikhat chu tuihleuh ka thiam hmain, luiah ka thianpa nen kan kal ve a. Tuihleuh thiam bik miah si lo kha, a thuk thukah Len zuk deng pek thin a. Len a tang ta hlauh mai, a pawh dawn chuan, a tet vek dawn si.
Ka ke-ah hruiin a hling a, ka lut hmasa ta a nih kha (ngam hek lo le), ka lut rei lo teh asin. Ka siam zo tep, zuk lut ve tawh khai ka ti sam et a.
A ke-ah ka hling a, a lut ve ta. Ka chiah deuh vang vang a, ka’n pawt chhuak mai chu(h); a irhfiak pawp pawp mai maw le. Tlem chu kan man ve hram kha..
December 4th, 2011 at 3:50 pm
ngaih nawm hle mai. Sangha man tur hian Lui ah ka la kal ngai miah lo a, I post ka chhiar hnu hi chuan kal ve ka chak ta hle mai. Lets see. 🙂
December 4th, 2011 at 3:58 pm
Changte lui hi Aizawl lam hian kan suasam nasa khawp mai, mahse tlawng lui a fin avangin sangha hi a da tak tak thei lo. Hmani ka haw tum khan vawinga emaw vel chu kan va kal hman a, mahse ka u leh a thiante zinga tel ve mai ka nih thin avangin a nawm dan a dang deuh! Thianpa te thlam pawh a awm tawh lo a, hei lai ah hian ani ang tiin ka risk kual vel mai mai. An enkawl zui lo ani.
December 4th, 2011 at 4:28 pm
wow..! In hlawhtlinga a lawmawm e. Changte luia nghakuai in chiahsiak forest dept. in an buatsaih kha i hre ve emaw… ka thianpa in a man sa 4 min pe a, pahnihna ka’n nih ve kha..haha..
December 4th, 2011 at 4:45 pm
A nuam ngawt ang chu le. Nikuma kan lui kal ve chu kan han hlawhchham chiang khawp a, a bul a khuaah motor kan tir kir a, sangha tin kan lei a, lui kamah chuan chaw kan ei ve hang hang tho 😛
December 4th, 2011 at 4:52 pm
Chhiar a va nuam em! paws tha ltk. (Y) adventure-spain a nghahhlel awm.
Ni e, lui kal chu nuam tak a ni, lungleng ram tlawng kan suartluan lai kha min ti hrechhuak..lung a leng tlat. Zirtawpni chawhnu lama chhuaka, inrin tlaia haw leh mai turin buhfai no 5 ve ve a kan thian duna kan pai te pawh kha, midang chuan mak min ti, mahse a mak lo, kham loh chang kan ngah mai.
December 4th, 2011 at 5:09 pm
@lrp : Kan lui kal chuan vur tlang hi Chhinga Veng atangin phek 4/5 kan lei a, saw dust-in buara-ah kan pack a. Sangha kan man (ei bang) kha vur bawm (Syntax dawrah a awm) ah vur kan vuak nawi nen kan khung a,fresh deuhin kan hawn thin. Mahse, luite-ah chuan a practical lo mai thei. Kan lui kalna thin chu Tlawng leh Tuiruang an ni ber.
Tlawng kama kan riah thin lai min ti ngai hle mai !
December 4th, 2011 at 5:13 pm
lung a ti leng tlats
December 4th, 2011 at 5:26 pm
Tui lam hi chu i lo tui ve reng reng anih hi. Spain lam pawh chu han ziak ngei teh. Nghakhlel takin kan lo chang ang.
December 4th, 2011 at 5:27 pm
Comment zawng zawng hi ka (Y) vek. A postupa ber hian ka thil post hi chhiar nawn ngun ber awm e 🙂
Mumang a ka man ngun ber chu sangha man lam hi ni teh tlat a!
December 4th, 2011 at 5:29 pm
lrpa hi Spanish pawn i tawng thei zawt zawt tawh anga?
December 4th, 2011 at 5:31 pm
ngaihnawm hle mai a . (Y)
December 4th, 2011 at 5:32 pm
Aduh, a teuh lo rapthlak lutuk! Saptawng hi an thim lo hlawm em em mai a, thil ka sawi dawn hian ‘hindi’ te ka telh vel thin mawle, hindi pawh ka thiam miah si lo a..a buaithlak duh khawp mai 😀
December 4th, 2011 at 5:35 pm
“hablas espanol nahi hai dont speak” te i ti nuaih a ni maw hahahah
December 4th, 2011 at 5:53 pm
A van thui!! Nuam a niang.. Mahse kei chu hah chiah ka hlep thin a,ka sim koh tawh
December 4th, 2011 at 6:00 pm
Ru leh lawmnu te nena luia kal hi a nuam ber tih dawn ila a kal velo te chu in hre awm si lo va,a nawmdan chu vanram tlafual nen a in ang tih mai ang aw.
December 4th, 2011 at 6:02 pm
Mumanga sangha hmuh chu a tha. Pawisa kan hmu dawn an ti.
Luikal hi chu hahthlak e. Fit deuh nih a ngai. Kei phei chu tui hi kan hlau em em zui. Sangha/Chakai/Chengkawl/Kaikuang, ka duh em em vek. Chengkawl erawh hi chu ka enchiang duhlo, enchian chuan ei a tuilo 😀
December 4th, 2011 at 6:28 pm
A sei na a, ka chhiar zo vek asin le. A hlimom hmel tak hle mai, mahse a hlimomna tih loh ah chuan sangha rep kg 5 hlawh nan chuan a hahthlak mah2 deuh hahaha
December 4th, 2011 at 6:35 pm
kan thian ho lui kal ai ngawt chuan in hlawhtlin hmel anih hi, keini chu sangha te pakhat leh chengkawl pahnih chiah kan man. 😀 Riak meuha kal kan nilo bawka, thiante kha chuan chawhmeh an pai duhlo a chaw chiah an paia, chhun chaw kan han ei chu ka chehmeh pai a luck khawpmai. 🙂
December 4th, 2011 at 7:09 pm
Mizo chuan lui kal tiin thukhuh takin kan sawi thin a, sap ho chuan fishing an ti hmiah mai a 😉
Lui kal, Char luia ka tlak hlum teuh zia te, Tuirial lui lian hlau a rampa lailenga kawngpui pan a kan vah chhuah tum te, Tuirial mawng lam Sakawrdai piah atang a kan kal tum, mawng tawlh chunga lui ka thlen dan te, Tlawng lui a sangha mantu nilo a Uchang kan vai takte leh kan Chite lui kal thu te zawng zawng hi ziak vek ta ila a thui ve khawp ang. Donnybrook lui a camera nen a ka kal thu te sawi phei ila chu! 🙂
Ma ReMpY_ScisSoR te, lui kal hian a tlangpui chuan hmui hmul bak hi kan hawn ngai hlei nem 🙂 Futbol khelte pawn engmah an hawn bik loh hi tiin kan inthiam chawp thin a 😉
December 4th, 2011 at 7:13 pm
Awiiii!!!…in sangha chhum chu ka ei ve chak bawn! a kha lai tak khan a ti tui zual dawn bawk nen…chil a puits!!!
Funny-a leh Lalmisual-a te lui kal ka zui ve dawn a, ka chak tawh!
December 4th, 2011 at 7:47 pm
haha Pi BMW, kan tum na a rei tawh khawpmai, tumna a awm chuan kawng pawh a awm thin, an tia mi kha. 😀
lalmisualpa hi a reh rei ta khawpmai.
December 4th, 2011 at 8:20 pm
Post leh tur khi nghak char2 teh ang 🙂 (H) (Y)
December 4th, 2011 at 8:26 pm
malsta27 😀 😀
December 4th, 2011 at 8:29 pm
Thu thiamlo awm deuhin i awm vel thin a, tet tawt mai. A hmuna awm ve/kal ve ang maiin ka chhiar tui alawm mawle. A ngaihnawm miah muah hle mai.
Spanish pitar chanchin chuan han chhu nawn leh thuai teh khai hairehai (Y) 🙂
I thu a nawi ve niai nuai lo khawp mai… bel phum lovin an chhuang ani ngei ang..hetiang nawilo tak hi chu bel thum chherchhuan anni duh riau ania hairehai 😉
December 4th, 2011 at 8:36 pm
#35 chhu zui*
December 4th, 2011 at 8:36 pm
Pu HV..hehe..thanks..
Nia phur thut chuan nula kum 19 mi chanchin te pawh kan sawi zel ang 😉
December 4th, 2011 at 8:47 pm
hairehai…ziak tha kher mai…bootmline chu fishing is good for the inside of a man..
Spanish nula a ?? i spanish landlady rent pe lo a i chhuah san kha ani zawk lo maw :nui nui:
December 4th, 2011 at 8:47 pm
He post zet chu lung a va ti leng reuh emm..tumkhat kan lui kal ve chu chaw kan lo fun mai silo,sangha man bawk silo,tumbu hel chaw ah kan han hmang mai chu’h’ puar chu hla tak h a ni ringawt..haha
December 4th, 2011 at 8:54 pm
38..zualbonez..lo rak suh! 🙂
39, thingfanghma hring hi kan ei pek a lawm, kan riltam khan.tih chi loh tawp ani..a hnai kha a strong khawp mai, hmui vel a khir so nasa.. 🙂 🙂
December 4th, 2011 at 9:01 pm
39 Stallion, tumbu hel..tumbu sawm vel ei chuan a puar ve theih mai ang a 😉
December 4th, 2011 at 9:02 pm
Lui nghate chhum kha deuh fak….Ka va ei chak tehreng em! (Y)
December 4th, 2011 at 9:40 pm
Hman kuma kan kal ve khan tut khua a mi sangha kan lei hawng teuh 😛 kan hlawhtling tawp 😉
December 4th, 2011 at 9:52 pm
Ka vawkte grill a ut vek mai a!! a rim lah chu ana hrep mai..misual vang! :-[
December 4th, 2011 at 9:55 pm
Pakak, Tut lui kha mamit kawng ami kha ti raw? lawnglwngin kan chhuk hrep tawh, Tuikuk khuaah kan riak a..engmah kan man lo..mahse a nuam tho tho mai.. (Y)
December 4th, 2011 at 10:04 pm
lrpa @45 aw ni e
lui kal hi chu a nuam ve hrim2, haw lam hi a peih awm loh thei mai pawh a 😛
Aizawl atang chuan lui kal na a ngai hla thei tawh lutuk a, dil vela kal in hlawh chham a har tawh zawk 😉
December 4th, 2011 at 11:10 pm
A va nagihnawm ve aw… 1987 kuma Saiha khawpuia ka cham hrep trumin sangha man chuan ka thawk chhhuak ve, kan man treuh, mahse a hahthlak a ni. Tlai office ban hnua chanmari bazar a len den zeuh hi nuam ka ti ta ber mai.
December 5th, 2011 at 12:30 am
A rei tawh tehreng nen i la report chipchiar á¹ha hle mai. Hei aia kimchang lehzualin han ti leh la, a ngaihnawm mai piah lamah a bengvarthlak hrim hrim bawk.
December 5th, 2011 at 8:07 am
lrp, Sangha rep hahthlak i ti a, kei nuam ka ti viau asin. Mau thing emaw thing duap deuh emaw rep nan hman chuan a alh puat thin avang hian a kang hmaa vil pawh a ninawm duh khawp mai. Chuvangin thing chhia hman chuan mei alh ka ti nep mai thin. Tha ber a ka hriat chu thingchang tha hman hi a ni. Chu pawh chu tam tham tak tak anih loh chuan a alh mek laiin rep lovin, a mei vam hmanga rep hian a a sen thep duh khawp mai.
Sipenish pitar chanchin chu han ti leh vat la mawle hairehai 😛 Spanish ho hi Burma lam chhuak ho hian “Sahlung” tiin an sawi/ko (address)mai a, an hriat phak pawhin an mahni an sawi tih an hre lova a zia viauin ka hria hairehai 😉
December 5th, 2011 at 8:12 am
edited. [No personal comments please – admin]
December 5th, 2011 at 8:48 am
el-ar #50 miin an mahni mimal chanchin an sawi lovin, midang nunphung an sawi ziah zuah ngailo. Ram hnuk khawih chi, ie: eirute hming emaw ang kan sawi anih loh chuan mimal nun sawi hi a tullo ka ti khawp mai. Amah pawhin a duhlo khawp ang.
December 5th, 2011 at 9:45 am
Pu hv,kei chu ram riak emaw a kan kal chuan kan keng ziah a! Chu vang chu nia! Khua a ti har lo
December 5th, 2011 at 9:54 am
Chuan,u lrpa hi a hming bak ka hre lo. A comment han chhiar hian a hrat ve hmel em a tih thu a ni
December 5th, 2011 at 11:43 am
Ziak thu tha bawk a, chhiar a nuam khawpmai, an zing ah ka telve ni mai in ka in hria lawm mawle. Hawlhrawk hawlh a kan tlaivar thak2 lai te min ti ngai lutuk tlat
December 5th, 2011 at 2:45 pm
A ngaihnawm hle mai. In zinga tel ve a chakawm khups mai,tui cheng bak hian lui a ka kal pawh hi ka la hre lo..
Tuicheng tur chuan ka kal hla peih fu. 
December 5th, 2011 at 3:21 pm
A thui tawh ve aw..Pu HV, thanks
. Ka ngaikawi lui deuh a, I am sorry.
@el-ar, i comment 50 na kha adm. ka delete tir anih kha. Nick rule i bawhchhia a bakah weekend lama ka tlin lohna lam thilah min rawn fiam zauh bawk si a
December 5th, 2011 at 3:30 pm
@lrpa, sincere apology! He site ah hian i hming pum kha a lang tawh tho si a ka ti mai a. I pawi ka lo sawi der anih chu maw le. Sorry lutuk aw. Kan tlinlohna a in ang anih khi!
December 5th, 2011 at 3:41 pm
57
December 5th, 2011 at 4:35 pm
#57
December 5th, 2011 at 4:55 pm
@56 to 57, chhiar a nuam e. In rilru a puitling tih a hriat.
December 5th, 2011 at 5:01 pm
@57, E he, ka lo la hre ve reng reng hlei nem ! min han hrilh ve teh.(:-P)
December 5th, 2011 at 5:21 pm
@61, ka duh tawh lo
Archive kha en la i hre thei mai ang!! Mahse buaithlak fu ang 
December 6th, 2011 at 1:18 pm
ngaithlaknawm hle mai.lui kal hi chu kei pawh nuam ka tih zawng tak ani
August 12th, 2013 at 1:03 pm
a van ngaihnawm em em
June 12th, 2017 at 1:26 pm
He article chu le ava tha ve!