mi(sual).com

1st. Tuesday: Zonet cable TV chuan kum sarih a lo tling taa; hemi denchhen hian a programme channel pui ber, Zonet Zawlbuk chu satellite hmangin a pe chhuak ṭan. Zonet hian sorkar laipuia Information & Broadcasting Ministry aṭanga licence a lâk hnuah, Zawlbuk channel chu satellite kaltlanga pek chhuah turin hma a la a; ṭumhnih an enchhin hnuah satellite hmangin Zawlbuk channel chu an pe chhuak ta a ni.

2nd. Wednesday: Indian Council for Child Welfare bultuma Mizoram State Council for Child Welfare-in National Learn to Live Together Camp, 2011 a buatsaih chu Chief Minister Lal Thanhawla’n Tribal Art Centre, Tanhrilah a hawng. National Learn To Live Together Camp hi state hrang hrangah a inchhâwka nghah ṭhin a ni a, tun ṭum hi Mizorama nghah vawi khatna niin, November 6th (Sunday) thleng a awh ang.

3rd. Thursday: Tuirial Hydro Electric Power project leh Tuirini Hydro Electric Power project dinna turah Mizoram sorkar leh SPML Energy Ltd., Kolkata-te chuan CS Conference Hall-ah Memorandum of Understanding (MoU) an ziak.Tuirial HEP hi kawlphetha megawatt 42 pe chhuak thei tur a ni a, Tuirini HEP hi megawatt 38 siam chhuak thei tur a ni.

4th. Friday: India Today-in ramchhung State tenau zinga hriselna lama hmasawn chak ber lawmman a siam chu Mizoramin a dawng a, he lawmman hi New Delhi-ah Mizoram Health Minister, Lalrinliana Sailo chuan Union Finance Minister, Pranab Mukherjee hnen aṭangin a dawng a ni. India Today hian kum tin state hmasawn dan tehna (states of the states) an buatsaih ṭhin a. Tehfung hrang hrang, economic lama hmasawnna, zirna lama hmasawnna, hriselna lama hmasawnna, law & order kenkawh dan, lo neih (agriculture) lama hmasawnna, hmasawnna lian (infrastructure) leh consumer market te hmangin state hrang hrangte chu teh ṭhin an ni.

5th. Saturday: Sialsukah Bike MZ-01/F-0067 leh Maxi Cab MZ-01/C-1399 te na takin an insua; Bike khalhtu B.Lalhmingmawia (30) s/o B Nghakliana, Aizawl Electric (Hebron) Veng chu a ban ruh a tliaka; bike hnunga chuang Lalmuanawmi Kawlni (22) d/o Vanlallawma Kawlni, Aizawl Electric (Hebron) veng tho pawh a malpui ruh a tliakin a lu hmun hnihah thisen a tling bawk. Anni pahnih hi Electric Veng KTP hminga Hmuifanga retreat nei tura kal an ni. An insut rual hian Maxi Cab hi kawngthlang metres 40 vela sangah a tlathla zui a ni.

6th. Sunday: Territorial Salvation Army Youth Congress vawi 13-na Zirtawpni aṭanga neih chu a ṭiak ta. He khawmpuiah hian palai inziak lut 3755 bakah inziak lut lo palai engemaw zat an tel a ni. Khawmpui thupui atan hian ‘Ruai chu peih a ni ta,’ tih hman a ni a, he thupui hmang hian Commissioner Lalkiamlova, International Secretary US aṭanga lo kal, Major Thomas Lyle leh Territorial Commander Col. Lalngaihawmi ten thu an sawi ṭhin a ni.

7th. Monday: Jet Airways Thlawhnaa Lengpui atanga Kolkata pan, Lucy Lalhmingpuii chuan a bungrua (luggage)-a pawisa a dah, cheng nuai 7/- chu a awm lo tih Kolkata a thlen hnuin a hria a, Sairang Police Station-ah ah FIR thehlut. Sairang police te chuan Jet Airways hnathawktu mi 8, X-Ray endiktu leh loader mi 7 thu zawhfiah atan an hreng.

8th. Tuesday: Silchar lam pana tlan truck (MZ 03/1334, Sagarika Mitra, Saiha Bazar veng ami ta) chu Sairang leh Kawnpui inkar phulraw lui bulah tlanliam a; a hmunah motor khalhtu Devi Lal (29) Jharkhand a thi. Midang chuang Jharkhand lam mi vekte chuan hliam tenau an tuar bawk.

9th. Wednesday: Association for Environmental Preservation (ASEP) chuan kum tina a hman ṭhin angin General Assembly vawi 7-na ‘Nungcha Hmangaihtute Inkhawmpui’ tia vuah chu Agriculture Conference Hall-ah a hmang. Inkhawmpui hman apiang hian ramngaw leh nungcha humhalhna kawnga thawk thate hnenah ‘ASEP Nopui’ hlan ṭhin a ni a. Kum 2011 atan chuan Chanmari West YMA Branch te hnenah ASEP chawimawina sang ber chu hlan a ni. Chanmari West YMA Branch te hian an ram chhunga nungcha leh ramngaw awm ang angte ṭha taka humhalhin, Mizoram nungcha hmuh tur vang tawh tak tak te pawh an ram chhungah hmuh tur an la awm a ni. ASEP hi kum 2003 atanga din ṭan a ni a, ramngaw leh nungcha humhalhna kawngah hian hmalakna tam tak a nei tawh bawk.

10th. Thursday: Sihphir playground-ah ‘Sikni eng kut’ hlimawm takin Zo thuam chikim nen an hmanga; bialtu MLA Pu R.Lalrinawma chu ‘Kut Pa’ a niin an nupain nilengin an hmanpui.

11th. Friday: ‘Lai Lalte chanchin’ tih Pu Lalchhuanmawia Sailo ziak chu Pu C.Ngunlianchunga CEM.LADC chuan a Office ah a release. He Lehkhabu ah hian Lai Lalho bakah ‘Lai hnam ṭobul leh an thawnthu’ tihte pawh tarlan tel ani a. Lal ho zingah,Lawngtlai Lal,Thingkah Lal,Chawnhu Lal bakah District chhunga khaw hrang hrang Lalte chanchin ngaihnawm takin tarlan ani. He lehkhabu hi phek 206 a chhah niin,Rs 100/- in dawr hrang hrangah lei theihin a awm a ni.

12th. Saturday: Mizoram Presbyterian Kohhran Hmeichhiate chuan Taiwan kal turin Aizawl an chhuahsan. Mizoram Presbyterian Kohhran Hmeichhia leh Presbyterian Church of Taiwan hmeichhia te hian Council for World Mission sponsor-in intlawhtawn programme an ruahman a, nikum 2010-ah khan Taiwan atangin mi pariat Mizoramah an lo kal tawh a, Mizoram Presbytrerian Kohhran Hmeichhia te pawh Taiwan-a kal tur hian an inbuatsaih ta a ni. Ruahman ang chuan November 25-ah Aizawl lo thleng leh ang. Taiwan-a an cham chhung hian Kohhran hrang hrang an tlawh anga, seminar te neiin cultural programme te an hmang bawk ang.

13th. Sunday: Missionary Pu R. Laltholiana (49), s/o Lalbawia (L), Chawlhhmun, Aizawl chu Cancer natnain a thi. Pu R. Laltholiana hian a nupui P.C. Lalmalsawmi leh a fate pali a kalsan.

14th. Monday: Chief Minister Pu Lal Thanhawla hovin Chief Secretary leh Secretary ten New Secretariat Complex-a Chief Secretary Conference Room-ah meeting an nei. Chief Minister chuan ‘sorkarin kum 3 chhung dawn hmel alo hmu ta a ; hemi chhung hian sorkar hna kalphungah te, hun vawn dik thu ah te leh mahni inthununa kawngah nasa taka hmasawnna hmuh tur a awm chu thil lawmawm tak a ni’ a ti. Meeting-ah hian Secretary 2 remchang lo tih loh chu an kal kim hle.

15th. Tuesday: Ni thum chhung awh tur hranghlui Mizo nunphung ziarang hrang hrang a taka mipui hma a pholanna ‘Exhibition cum Live Show on Material Culture’ chu DIET Auditorium-ah MLA Pu T. T Zothansanga’n a hawng. He Exhibition hi North East Zone Cultural Centre (NEZCC) Dimapur leh Art & Culture Department ṭangkawpin DIET Complex chhungah an buatsaih a ni.

16th. Wednesday: Family Guidance & Counselling Centre (FG & CC) -in Pastor-te puala Intensive Residential Pastoral Care & Counselling Training vawi 21-na, Synod Conference Centre, Mission Venga an buatsaih chu Synod Moderator Rev. C. Lalsanglianan a hawng a, training hian November 30 (Nilaini) thleng a awh ang.FG & CC hian kumin January – 15 November chhungin pantu (client) 1000 an nei tawh a, Main Centre-ah 716 leh Branch Centre, Chanmari-ah 284 an ni. Kawng hrang hranga harsatna neite tan pan theih reng an ni.

17th. Thursday: Mizoram Excise and Narcotics department-a Anti-Narcotic Squad enforcement staff te chuan Tuirial-ah ganja kg 11 an man a. A neitu nia rinhlelh Ramfangzauva kum 48, Pehlawn Vengchhaka cheng nia insawi chu a hmunah an man nghal a. ND and PS Act hmanga thubuai siam sak a ni. Excise thuneitute sawi danin an ruihhlo man hi tualchhunga an hralhna chu cheng 27,500/- man hu a ni.

18th. Friday: Aizawl Theological College Day, College Building Quadrangle-ah hman a ni a, thupuiah ‘Impact of the Christian Faith on the Socio-Political Context of Mizoram’ tih an hmang a, Rev. Dr. H. Vanlalauva, Dean, Dept. of Research/SATHRI, Senate of Sermapore College chu Speaker a ni. Aizawl Theological College hi Rev. D.E. Jones (Pu Zosaphluia) a’n a chenna Bangla puiah Tirhkoh hna zir mi pangate class neihpuiin kum 1907 khan a bul a lo ṭan a. A tirah chuan ‘Theological School’ tih a ni a; he hming hi hun engemaw chen a put hnuah ‘Aijal Theological School’ tih a ni leh a. Kum 1965-a L.Th zirna College a nih aṭang khan ‘Aizawl Theological College’ tih hming hi a lo pu ta a ni. ‘Aizawl Theological College’ tih a nih hnua Principal hmasa ber chu Rev.J.M.Lloyd-a kha a ni a, Mizo Principal hmasa ber chu Rev. C. Pazawna a ni.

19th. Saturday: Transport Minister Pu PC Zoramsangliana chuan taxi hmang duh ten khawi hmunah pawh an awmna aṭanga mobile phone hmanga taxi an hmuh zung zung theihna tur leh taxi driver-te pawn an phurh tur (passenger) te an hmuh zung zung theihna tur teletaxi chu a hawng.

20th. Sunday: Kolasib District huamchhunga Saiphai Hmar veng nu pakhat Pi Lalramzauvi chuan a nau pai chu a pum chhunga a awm laia vawi hnih a ṭah hnu ah Kolasib damdawi inah harsatna hranpa awm lovin a hringa; naute hi mipa, kgs 2.700 a rit a ni. Naute nu Pi Lalramzauvi chuan a nau pai lai chu ṭum hnih a ṭap tawh tih a sawia; ṭumkhat chu aw thian angin thawm a nei tawha; hetianga pum chhunga mi nau a ṭah hian a ṭap ring ve hlea; inchhunga midang awm vete pawn an hre phak hial a ni. He thil chungchangah hian doctor-te chuan thil danglam lutuk a ni lo tih an sawia; naute nu Pi Ramzauvi hian tun hi a insiam hnua naute a hrin leh ṭum lina a ni.

21st. Monday: Kumin hi Mizo-in kohhran upa a neih hmasak ber aṭanga kum 100-na a ni a, Mission Veng Presbyterian Kohhran biak-ina KṬP inkhawmah Mizo kohhran upa kum 100-na lawmna neih a ni. Mizo kohhran upa kum 100 tlin lawmnaah hian, Mizo zinga kohhran upa hmasa ber zinga mi – Upa R Dala leh Upa Rosema chhungte hnenah Mission Veng branch KṬP chuan ngaihhlutna thilpek an hlan a; Upa Centenary souvenir an tlangzarh bawk.

22nd. Tuesday: Pu Lalvula, Mizo zinga IRS (Customs & ; Excise) hmasa ber, 1962 batch chu a chenna in Shillong-ah kum 77 mi niin Cancer natna in a thi. A nupui Esther Joan d/o Rev.Welbone Baner leh a fate a kalsan a ni. Pu Lalvula hi India ram hmun hrang hrangah Custom & ; Excise lama hnathawkin a awm kual ṭhina; Shillong, Meghalaya-ah North East a bial laiin 1995 khan a pension a ni.

23rd. Wednesday: Kolasib leh Thingdawl inkar Hmawngkhawthlir an tih mai ṭhinah motor chetsualna thlengin mi pakhatin nunna a chan. Thingdawl bul National Highway “Hmawngkhawthlir” ah hian motor pakhat 407 Truck MZ 01 D 5822 Lalruaia (37) s/o Zaliana [L] Kolasib Vengthar ami khalh chu a chhiat avangin nawr a ngai a, Kolasib Town Bus lo tlan remchang chu pui turin an ding a, bus a passenger chuangte zinga ṭhenkhatten motor chhia hi a hma lam aṭangin a hnung lam zawngin nawr nun an tum a, LPK Truck MZ o5 6676 Kolasib lam aṭanga lo tlan chuan a brake fail nia sawiin an motor nam lai chu a hnung lam atangin a su a, motor hma lama nawrtu pathum zinga a laita Samuel Lalmalsawma (Sama tia koh, kum 25 mi) chu motor hnuaia tlulutin motor chuan a delh a.

Sama hi a tukhum lam a sawh chhiat vek bakah hliam dang a neih avangin chetsualna thlenna hmunah hian ka pawh chhawn lovin a boral nghal a ni. Samuel Lalmalsawma (Sama) hi 5th. Assam Regiment niin December 6 hian nupui nei tura chawlh hmanga Mizorama lo haw mek a ni.

24th. Thursday: Pu H.Liansailova, Agriculture Minister chuan IPR auditorium ah Pu P Lalnithanga,IAS (Rtd) lehkhabu ziah ‘Vawmphunga Kamchhuak’ a tlangzarh. Pu Vawmphunga (1895-1969) hi Chawnga Vangchhia leh Thangi fapa niin Bawlte khuaah a pianga, Bilkhawthlira Chemphai leilet ‘Hmuchhuaktu’ ti a chhal ngam a nih rualin a khaw chhehvel- Phaisen, Saiphai, Buhchangphai leilette pawh hi a hmuchhuaktu ti a sawi a ni ṭhin bawk.

25th. Friday: Mizoram Wrestling Association buatsaih Mizo pa lian inchai champion zawnna AR Ground-a neihah champion lai F Lalhmingmawia (Amawitea) Kolasib chu amah chotu Lalnunfela (Mama) Salem veng Aizawl chuan hnehin Mizo palian inchai chak berah puan a ni. Champion lai hian lawmmanah tangkafai, Rs.50,000/- a la a, champion thar ni ta, Lalnunfela hian Rs 25,000/- a dawng a ni. Lalnunfela, kum 20 mi hian kum 25 mi, Amawitea hi vawi 6 nawr chhuakin point 6 a hmu a, Amawitea hian point a hmu ve ta lo a ni.

26th. Saturday: Lunglei Tlabung pengah sa talh pahnih te chu sa sahna dawhkan inchuh avangin an inhnial buaia Vanlalpawlliana College Veng chuan chuan a hnialpui pa Lalrotluanga (Puia) chu a sa sah chem hriam tak mai chuan a nghawngah a sat ta mai a ni. Lalpawlliana’n Puia a sah lai hian a nupui in a kutin a lo dang a, Puia nupui kut pawh a hlawi telin a tha leh vunpui a chat bawk. Lalrotluanga nghawng hi nasa takin a hliam a, a nupui nen hian Lunglei Civil Hospital-ah enkawl an ni.Hliam te hi nunna chan hlauhawm lo ah chuan Doctor te chuan an ngai. Hetih lai hian pawi khawihtu pawh hi police-ten an la nghal a ni.

27th. Sunday: Lalfakzula (Faktea) Traffic Police lema ṭang ṭhin chu motor accident avangin Aizawl Civil Hospitalah a boral. Lalfakzuala (Faktea) hi Traffic Police form hain Aizawl khawpui hmun hrang hrangah Traffic Police te puiin a duty nileng ve ṭhin a, Bawngkawn Police Stationah te a riak fo ṭhin. A ril ṭam changin Police Officer ho hmingin thingpui dawrah te a in hnawhpuarin chaw te pawh a ei ve mai ṭhin a, an nin hrethiam takin an lo aw e ve mai ṭhin. Amah hi Khawhai khawchhuak a ni a, a ruang hi Bawngkawn Police Station-ah lak phei niin thlahna hunserh te an hman zawh hnuah Khawhai lamah phurh chhoh a ni.

28th. Monday: Department of Economics, Mizoram University leh National Human Rights Commission (NHRC), New Delhi ṭangkawp buatsaihin Human Rights chungchang zirhona (Workshop) I & PR Auditorium-ah neih a ni. Dr. S.K. Jain, National Human Rights Commission chu khuallian niin NHRC chuan India ram hmun hrang hrangah Human Rights chungchang zirhona chi hrang hrang leh training course an buatsaih ṭhin thu te, Human Rights hriat chian a ṭul thu te leh NHRC kalhmang leh hnathawh dan te a sawi. A ni bakah hian Paper dang pathum zirhona neih ani bawk. He Workshop-ah hian Mizoram University leh College hrang hranga zirtirtute leh zirlaite an tel a ni.

29th. Tuesday: Aizawl Civil Hospital Eye Ward ah Tele-Opthalmic Vision Center chu Health Secretary, Pi M.Zohmingthangi’n a hawng. He Tele-Opthalmic Vision Center thar hi Society for Administration of Tele-medicine and Health care Infomatics (SATHI) pawl, Delhi-a awmte rawn bun a ni a, anni hian kum 3 chhungin Aizawl Civil Hospital-a hnathawktute an enkawlpui dawn a ni. Tunah chuan Aizawl, Lunglei leh Champhai-ah dah phawt a ni a, District dangah pawh dah leh thuai tura ruahman a ni. Tele-opthalmic Vision khawl hmang hian thingtlang leh District dang atang te-in hmunpui pan kher ngai lovin mit enkawlna thil tam tak a tih theih dawn a ni.

30th. Wednwsday: Keifang Police veng-a Ramfangzauva In-ah unau pahnih a rualin an inawkhlum. Inawkhlumte hi Lalchhandama (32) s/o Ramfangzauva, Keifang Police veng leh Lalawmpuia (31) S/o Vanlalnghaka Zotlang, Aizawl te an nia; Lalchhandama pa Ramfangzauva leh Lalawmpuia nu Lalrinkimi te hi unau an ni. Ruihhlo hman sual vanga hetianga ti ta mai hi an nih rin a ni.

Krismass thla kan hmang ṭan leh ta der mai. Ka lung ti leng em em tu he hla hi kan thlang nghal teh ang.

[youtube]http://www.youtube.com/watch?v=KiAb120yjwg[/youtube]

This entry was posted on Sunday, December 4th, 2011 at 9:30 am and is filed under Information. Both comments and pings are currently closed.