mi(sual).com

Chhun lai tak a ni a, ka ngaihtuahna chu a kal fuh nge ka tih dawn a kal fuh lo, lunglen a tha lo tih hrereng chungin ka lung chu a leng hle mai a. Ka hmangaih ber ka hmangaih thu pawh ka hrilh hman tak loh kha kan nunhlui te nen ka ngaihtuah kir a, ka lehkhabu chhiar pawh chu ngaihtuah thei lovin khumah lukham pahnih ka thuah a, rilru kaipeng tur ri dang awm hek lo ka hmangaih ber mai chu ka ngaihtuah ta veng veng a.

Kum sarih vel lai a lo liam ta reng mai kan nunhlui te khan thinlungah kum a chhiar ve si lo a tun hnai thil thleng  ang maiin ngaihtuah chhuah chang chuan thinlungah an la inthum rawn tlut tlut hlawm a. Ka ngaihtuah leta ka hmangaih ber mai kha engtik atanga hmangaih tan nge ka nih tih ka inzawh pawh hian keimah pawh hi ka inchhang thei si lo, mahse tun thlenga ka rilru leh ngaihtuahna luah zova mi dang ngaihtuah thei lo va ka lo awm takna chhan hian intan ni chu a nei tur a ni si.

Ka bul tukverh atanga lang thei thingkung te chu thli chhem zawng chuan an kur siau siau a. Ka hawina apiang mai chuan ka lunglen tizual tur tawkin zûn an lo nei vek mai a, Ka hmui chuan ka hriat tawk lekin ka hmangaih che sin ka’n ti ringawt a, mahse ka chhehvel rizai te leh bang no lo ve tak te chuan min hriatthiampui hmel pawh an pu si lo. Ngaihtuah loh ka’n tum chhin a, mahse ka thinlung chuan a lo phal lo nge…? ka ngaihtuahna chuan a luhchilh ril ta tawlh tawlh zawk a.

Zanlai thla eng te leh hla thenkhat mawi ka lo tiha ka tan ka lo tih ve fo thinte khan a hun lai kha chuan a zun a rawn keng tel thin a, ka thinlung noteah mihring tawnga sawi thiam lohvin thu a rawn sawi se se a, ka nghilh deuh dup a, ngaihtuahna kawmin zanlai ka thleng leh mai thin. Chutih hunah meuh chuan a tuka ka sawi dan tur duangin rilruin In sang ka sa a, mahniin rizai hnuaiah ka pakhat lo fo thin…

School kan han kal a, thlen veleh rilruin zawn a nei nghal a. Mit chuan hmuh hmaih nei miah lo turin a melh kual nghal a. Ka mit chuan a tum ram a thlen meuh chuan engtik laiin nge hmun dang ka lo en leh si tih ka hre lo, hmuh tuma hawi hawi si khan kan hmu lo der leh rih a, ngaihsak àwm lo deuha awm te a tul leh thin. Hetih hunah meuh hi chuan keimah meuh pawh ka inhrethiam thin lo…zan lama ka In Sáng sak te khan min kiansan zo a, val hi ka zawr leh thin.

Kum hial a vei hnu pawh chuan ka hmangaihna chuan thupa ngawihbopui a la tawk cheu a, ka hmu zing tawlh tawlha ka hmangaihna a zual zela, ka hmuh loh lai pawhin ka ngaihtuah reng tho a. Hmangaihi ka hmangaihna chu lui angin a luang chhunzawm reng a, ka nunphung kal lai chu a tikhawlhkham zo a. Hmangaihna ka hriat loh laia lo intuha kha, chi angin a rawn to a, a thang liana. Mahse enkawl a nih loh avangin a buar zo a, a tlakna leilung hi chi thehna tlak lohin a siam zo ta a nih hi. Ka tisual der a ni tih tun hnu hian ka hre ta….Tunah chuan hmangaihna kulh chhungah ka tang a, a zun leng chu ka thinlungah hian a reh thei lova, thil dang mawina leh thatna hmu turin mawi ka tehna thinlung kha min laksak tawh a, thil mawi mawina hian min khawih che zo ta lo.

Mahniin duhthu ka sam fo thin a, ka duhthusam chu ka beng bulah zawi tein ka hmangaih che sin rawn ti se..tih te mai mai hi a ni tawh a..mahse tunah chuan chu chu rimawi tum thiamin an hla thiam ber mai mawi taka an tum aiin ka beng a fah zawk dawn si a. Kumtluang atan ti phei ila chu, chu aia duhthusam ka tan hian a awm chuang lo.
Hmangaihna hi heti ema nasa hi a ni tih ka lo hre lo kha a ni pawi ka tih chu, tunah chuan min tikeh chhe zo ta si a. Ka hmangaihna chhan keimah leh keimah hi ka inzawt nawn fo thin a, mahse chhang dawn ila engtin nge ka chhàn chuan ang..!!

Khawvel hi ka tan chuan engmah lo a chang zo a…mahse ka lo tawng ta kha inchhirna erawh ka nei si lo. Ka thlan rêng vanga ka neih a ni lova, amaha rawn piang a nih avangin ka tan chuan a hlu bik a, hmangaihna tlángah ka láwn a, a tláng pawh a sánga a chhîp ka thlen hmain ka chawlhsana, keima thiam loh a ni tih ka hria a, a chhip thlengin chuan ilang chuan a màwi dan tur hi tun hnu hian ka hre chauh a ni…

Similar Posts:

• Ka hmangaih che, ka hmangaih fo ang che.
• Hmangaihna Ka Ngen ani
• AW ZORAMMAWI, KA PIAN KA SEILENNA
• Min hmangaihtu vs Kan hmangaih
• Love Theory!

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Tuesday, June 29th, 2010 at 9:31 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.