mi(sual).com

Chhang a khat duh hle mai, a hmaa ‘sabereka’ ni thin pawh Samu Vuite ka lo inti ve ngam ta a, kum 3-4 vel liam taa misual.com ah account ka siam lai kha chuan mi thil ziah ho deuh deuha lo comment ve sek bak ka ngaihtuah chiah lo bawk nen, a lo ho thin hle mai.

Hun hma lamah khan kuhva chungchang te, doctor kan rawn dan tur leh medical lama kan thil hriat tur neuh neuh te kan thai lang nuaih tawh a, Everyday medicine I leh II tiin, tawngkam tunlai leh awlsam thei ang bera medical lampang in hrilhfiah kan tum thin a ni tih pawh kan tarlang tawh.

Tun tumah hian hma kan sawn deuh dawrh anga, tunlai natna chungchanga kan hriat tur leh kan hlauh turte, hlauh loh tur te, kan dikna leh dik lohna te kan tarlang ang:

1)      Scrub Typhus ( Tu Hrik Seh) Natna :

Mizo te hi medical finna lamah kan la advance lo tlang hle. Nikum hmasa atang fe tawhin he natna hi Durtlang damdawiinah chuan an hre tawh a, damlo te pawh an lo damin thenkhat vanduaithlak takin an thi tawh bawk. Nikum August thlaa Hriselna magazine ah he natna kan hriat a tulna te ka sawi a, Misual.com ah ngei pawh hian ka tarlang tawh nghe nghe. Mahse, tuman an chu-e-kha-e lem lo a. Mahse LPS-ah an han tarlang dek deka kan sa hlauh ta em em mai a, ‘Rannung Seh’ an han tia, rannung hrim hrim seh chu kan hlau ta hlawm em em mai a, LPS ah an han puan tak avang khan a tam phah chuang lem lova, khang hunlai khan a tlem tawh zawk nghe nghe. A natna hi hriat ve hrim hrim a tha a, a hrechiang duh chuan post hlui lam lo en mai ila.

Amaherawhchu, a test-na Zorama kan neih hi a over sensitive a, tin, malaria ah pawh a positive ve thei a, viral illness kan han tih reng reng ah hian a positive duh em em mai a. Chuvangchuan, ‘eschar’ kan tih belkang ang deuh (cigarette burn like) a awm leh awm loh te, a damlo natchhuah dan atang tea thlirzawm tur a ni.

2)      Viral Encephalitis :

He natna pawh hi thil thar a ni lova, hman ni deuha  ‘Septicemia’ tia natna hriatloh kan han puh ngawt thin ang deuh kha a ni a. Thluaka khawsik lut kan tih ang hi a ni ber a,  naupang lamah a tam tunlai hian. Thenkhat chuan Japanese Encephalitis an tih te pawh a ni mahna an ti. Naupang thaw hah, meng vai deuh, awmna leh khawsik em em sawi tur nei lo ah hian Viral Encephalitis kan puh thin a.  Awmna leh hritlang an nei lem lo bawk thin. Mahse eng natna chiah nge comfirm chu a har rih hle. Hetiang naupang/nausen kan hria a nih chuan damdawiin lam pan vat thin tur a ni. Naupang/nausen tam tak heng vang hian kan chan nual tawh a, a pawi hle a, damdawiin an rawn kal chuan a lo tlai tawh thin.

3)      Peripheral Neuropathy (Tha Na natna) :

Zu in leh kuhva ei nasa ah a tam em em a, Thiamine kan tih (Vitamin B1) te,  Vitamin B12 leh Folic Acid tlachham an ni ber a, mahse tunlaia tam ber nia lang chu Thiamine tlachham an ni awm e.

Zu In mi hian Thiamine an tlachham thin a, eng tinge ? kan sawi leng lovang, hun dangah kan sawi ang. Tin, study pakhatah chuan Kuhva leh Ngha-um/Ngha-thu (fermented fish) ah hian Anti-Thiamine factor (Thiamine thattu) hi an awm an ti a. Chuti anih si chuan, mizo te hian engtin nge Thiamine hi kan taksa ah hian a la awm ve zawk? tih hi kan zawhna tur a ni zawk ang. Mizoram-ah Thiamine test-na a la awm lo thung. Mahse, B12 leh folic kan test teuh tawhah hian a tlachham chu a tlem zawk an ni tlat.

A chhan chu engpawh ni ta sela he natna hian Zeng hial a thlen thei a, tin, kan thawkna Tha lampang a khawih phei chuan thawhah hial pawh a thlen thei a ni. Sawi tur chu a tam mai, duhtawk peh phawt ang.

4)      Conversion disorder/Hysteria :

Hei chu a hunlai chuan thlaphanawm thin khawp mai. Hriatthiam lah a harsa a. Hmanni deuh khan Vanglaini lamah chuan damdawiin pakhata thawhah vanga an kal thu leh psychiatrist rawn rawh u an lo tih daih thu te an rawn tarlan ka chhiar a. Lungawi loh deuh pawh kha a awm viau e, hriatthiam pawh a harsa a ni.

Vawi khat chu kan zir laiin kan mizo hmeichhe pakhat hi thawhah leh awmbawr na (chest pain) nasa lutuk min rawn hrilh a, zing dar 3:00 velah, km 8 vela hla a ni a, kan va phei chu!! Casualty ah kan tlan lut vut vut a, ECG leh X-Ray an han ti a, tha vek bawk si, thisen-ah that lohna nei bawk si lo. A tukah a zia deuh hnua kan han hriat chuan Hnam dang ngaihzawng a lo nei thin kha a lo ni a, an inthen rilru na vel kha a lo ni reng a. Heta tang hian a awmzia chu in hrethiam mai awm e.

Mahse, kan hriattur chu anmahni hi kan dem thei hauh lo. Psychosomatic disorder kan tih ang kha a ni a, an rilru natna/hahna an taksaa lo langchhuak han ti ila a chiang mai awm e. Duat tak leh hrethiam taka counseling an ngai a, an chhungte pawhin kan hriatthiam a ngai a, nuihzat leh sawihnawmsak chi a ni hauh lo. Tleirawl hmeichhia leh mipa ah a tam em em a, nu valai takah pawh a tam a,tin, mipa puitling ah pawh a awm zeuh zeuh bawk. A chang chuan distilled water ten kan han chiu a, an dam ve hmak thin.

5)      Metabolic Acidosis :

Thisen Thur natna tiin Mizo chuan kan hria, mahse a lar lo hle. Hmanni pawh mizo tawnga dah dan thlawt kan hre silo kha Thisen Acid tam te kan ti ta ngawt a, mahse, Thawhah ti te pawhin a hnu kha chuan kan hrilhfiah ta zeuh zeuh.  Zu in nasa (a bikin Binge Drinking) –ah hian a awm hma em em bik mai a. Acidosis sang tak an han neih tawh phei chuan Unconscious-in an awm a, an thaw a hah vak vak a, oxygen te pe in an thawk te pawh khawla tanpui a ngai tawh thin. ABG (Arterial Blood Gas) an tih hmang hian kan en thin a. Buaithlak hle thin a, damchhhuak chu an awm laiin, unconscious-a lut chho tawh hi chu kan chan tlangpui thin a, a pawi hle a, a bul ber chu Zu bawk a ni e.

6)      Hepatitis C :

Hei hi chu kan hre nual awm e. Mahse hemi chungchang ah hian tarlan duh eng engemaw ka nei a. A hmasa ber ah chuan a inkaichhawn dan hi a ni. Inkai awlsam tak nia hriat nisi hi Nupa inkaichhawng lo te an awm ve mial zel a, tin, ‘Hri’ ang hian a leng emaw tih mai turin  Ruihtheih thil ti miah lo te hian an vei leh lawi si a. A tlangpuiin Zu in nasa Thin (liver) tha tawhlo ah hian a awm duh em em bik, damdawia inchiu thin (intravenous drug abusers) ho ah chuan sawi loah lum ah ngai ila.

Tuna tan chuan kan duhtawk leh phawt anga, ka ziah dik loh lai te han correct ula, mahse a language lamah ni lovin (mizo tawng chu a har kan tih kha). Tin, zawhna hrang hrang te pawh chhan kan tum dawn nia. A sei lutuk chuan kan chhiar peihlo thin.

Similar Posts:

• Everyday Medicine III
• Thlahpawlh pawi theih zia
• Mizo vrs Vai
• I him em?
• Daktor dawt sawi hrat? (Thu dik nge i duh dawt?)

Recent Posts:

• JUSTICE for Sarah
• Mampui
• TUKTIN PAR
• Zabula Champhai Ramhuai hmuh dan
• Thianpa Sawmtea Hriatrengnan

This entry was posted on Wednesday, March 14th, 2012 at 1:00 pm and is filed under Education, Health. You can follow any responses to this entry through the RSS 2.0 feed. You can leave a response, or trackback from your own site.