Sihtlangpuiah Sakei A Hrâng : Tawkthanga seh a tum
Lawngtlai leh Saiha inkar, Sihtlangpui khua (Kawlchaw thlenhma lawk) ah Pu Tawkthanga (44) chu Sakei-in seh tuma a veh reng avangin Khawtlangin an buaipui hle a. Lairam Editor in a sawi danin Pu Tawkthanga hi laihrui chah sa a piang (upa-in Sakeiin a seh duh an tih thin) a ni a. Aug. 15, ‘06 atang khan Sakei hian veh in, an In hnuai-ah te kalin, a ke hniak te pawh hmuh a ni a. Sakei hi vawi 2 an hmuh tawh avangin Pu Tawkthanga chu pawn chhuak ngam lovin Aug 18 atang khan a awm tawh a, YMA leh khawtlang chuan zantin riah puiin, chhun-ah pawh khawtlangin an veng thin.
Sihtlang VCP chuan Forest Dept.-ah kah phalna an dil a, Forest Dept . te chu a hmunah kal in an enfiah a, a ke hnu thla te an la a, Sakei anih erawh an ringlo thung. “In kah chuan na takin action lak a ni ang,†an ti a, khawtlang erawh chuan an hrethiam lo hle a, mihring nun chhanhim nan chuan kan kap dawn tho a ni, an ti thung.
Sakei hi a nu, sum 5 vel bawr niin a hmu tuten an sawi a, Paithar Pastor leh 407 driver pakhat pawhin an hmu a, Sakei fing tak a nih an rin thu an sawi. Tunah hian Sihtlangpui khawtlang chuan an manganpui hle a, Pu Tawkthanga hian fa 4 neiin, loneimi a ni a, pawn a chhuah ngam loh avangin hna a thawk thei lova, Lawngtlai Dist. MJA te chuan tlawhin Rs 500/- in an tanpui a ni.(Zara)
MZP In Chawngte College Principal Chhuah Tir Ngei An Tum
Kamalanagar (Chawngte) College Principal KP Nath-an College Magazine a Kristian a sawi dan chungchang chu MZP Southern Hqrs. Lunglei chuan nimin piahkhan an Pisa pui-ah an ngaihtuah.
Thu-chhuah siamin, MZP Southern Hqrs. chuan KP Nath-a hian Kristian sakhua sawichhiatna leh, chi leh chi inkara buaina chhuak thei thil/thu a ziah vanga duhlohzia lantir nan Aug. ‘06 ral hma ngeia Mizoram chhuahsan tura hriattir a nih tawh thu leh Chakma ho in hum ruk an tum nia a lan avangin, hemi enfiah tura nimin khan Chawngte an pan dawn thu an tarlang. Chawngte lam pan hian MZP Southern Hqrs. Lunglei atangin first trip in engemawzat an kal a, thawhhnihna (2nd trip) a kal duh, ‘Mizo hnam hum him a, Kristian tawh phawt’ kal duh zawng zawngte chu Sept. 4, 06 ral hmain, MZP Pisapui Venglai, Ph:2322524-ah inhriattir tur a ni thu an tarlang bawk.
First Trip-ah hi Vice Pre. K.Lalrithanga leh GS C.Vanrosanga hovin an kal a. President Joseph Lalremngheta hovin Office thutchilh pawl an awm bawk.
Tarlan tawh angin KP Nath-a hian an College Magazine-ah article 3 vel ziakin, Christian leh Muslim sakhaw bia te tana ngaihhuat theih tur a tarlang nasa hle a. Kristian te Pathian chu a hmangaih mihringte hnena lirnghing leh chhiatna tam tak thlentir thintu-ah a puh a ni.
Rajiv Gandhi Akshay Urja Diwas kharna hun Vana Pa Hall-ah Hmang
Nimin khan Vana Pa Hall-ah Rajiv Gandhi Akshay Urja Diwas kharna hun hman a ni a, LOk Sabha MP Vanlalzawma chu khuallian a ni.
Kharana inkihawm hi Vanengmawia, IAS, Aizawl D.C., Chairman, District Advisory Committee chuan kaihruaiin khuallian chuan Mizoram-ah he programme hian hriat la hlawh lutuk lo mahse India ram chuan Renewable Energy (chakna tih thar zel theih) hi a ngaipawimawh a, Thli, Tui leh Nizung hman tangkaina atan hian sorkar laipui chuan hma ala nasa in Mizoram-ah pawh tan a lo nita chu lawmawm a tih thu a sawi. He ni pual a Essay leh Slogan inziah siak lawmmante a sem nghal a, lawmman dawngtute chu-
Slogan :
1. Lallungmuana Head of Department (Sociology), Pachhunga University College
2. C. Chawngthantluanga Zotlang, Aizawl
3. Wilfred Lalruatfela Tuikhuahtlang, Aizawl
Essay :
1. R. Lalmuanpuii d/o R. Lalfakzuala Dawrpui School of Science & Technology
2. Mark V. Vanlalrema s/o V. Lalzawnga Pachhunga University College
3. C. Malsawmkima s/o C. Thangliana Dawrpui School of Science & Technology
Rajiv Gandhi Akshay Urja Diwas hi Rajiv Gandhi piancham August 20 ah hman tan tura ruahman a ni nain Mizoramah chuan Sunday a nih avangin August 19 khan hman tan a ni.
Sazuk Sarep Zawrh Man
Association for Environmental Preservation (ASEP) chuan Narain Bahadur Thapa, Tinghmun sazuk sarep zawrh an mansak a, Thapa hian Sakawrdai chhehvel Vaitin, Zohmun,etc. atanga an rawn ken fun khat Rs.80-a an lakchhawn thin thu a sawi. ASEP chuan hetianga ram sarep zuar hi tunlaiin an tam riau nia sawiin thuneituten ngawrh zawka hma la tura an duh thu an sawi. Hetih lai hian DFO Pu Lalrinmawia ina vahui lenglut chu lo enkawla a chhuah zalen nia sawi chuan DFO tihawm tak a ti tiin lawmawm leh entawntlak an tih thu an sawi. Mi thenkhatten nungcha dimdawina nei lova Tlawng Lui tura an hrai vak mai tha lo an tih thu an sawi bawk a, mihring tanpawha tha lo thlen thei a nih avangin hetiang thil tha lo thleng tawh lo se an duh thu leh thil tisualtute an dem thu an sawi.
BPL tan puanthui zirna hawng
Nimin khan SJSRY Aizawl Project hnuaia Aizawl West-I Bial chhunga puanthui zirna Community Kendra Tailoring Centre chu hawn a ni ta a, he Centre-ah hian a hmasa ber atan BPL chhungkua atangin puanthui zirlai 20 thlan chhuah an nih bakah puanthui khawl leh hmanrua mamawh chi chi hrang hrang Centre-ah dah a ni bawk. Zirlaite hi thla ruk chhung training pek a nih dawna, thlatin stipend Rs.500/- pek an ni bawk ang.
Kum 2006-2007 chhunga SJSRY hnuaia trade hrang hranga training mek te chu hetiang hi an ni : Tailoring – 684, Computer – 171, Electronic – 93, Textile Designing – 23, Beautician – 219, Video Editing – 9, Painting – 12, Handicrafts – 3, Knitting – 3, Catering – 8, Carpentary – 41, Handloom -32, Driving – 130 leh Haircutting – 49. He Scheme hnuaiah hian kum 1997 atang khan mi 4165 laiin training an lo zo tawh.
MZP Chess & Chinese Checker-ah College Pariat
MZP Gen.Hqrs.-in vawiin leh naktuka Aizawl City College Chess & Chinese Checker Championship a buatsaih tur chu vawiin dar 11:00 hian a hawnna MZP Pisapuiah neih a ni dawn a, Mizoram sawrkar Principal Secretary Pu Vanhela Pachuau chuan a hawng ang. He Championship-ah hian College pariat an tel thei dawn a, chess hi mipa tan bik a ni a, College tin atangin zirlai 2 an tel thei a, Chinese Checker hmeichhe tan bikah pawh College atangin zirlai 2 zel tel theih a ni.
Zirtirtu Awm Tha Duh Lo Awm Leh Tan
Phuldungsei Constituency Mizo Students Union chuan Phuldungsei bial chhunga zirtirtu thenkhat awm tha duh lo leh nungchang thlahdahtak tak, naupangte entawn atana duhawm lo an awmleh tawhtih sawiin chhawr nahawm taka awm turin an phut a, he an phut ngai pawimawh lova awmzuianm awm chuan tumah an dim dawn lo an ti. Hma chhawn ngai an awm a nih pawhin an chungah eng pawh lo thleng se, mawh an phurh dawn loh thu an sawi.
Solo & Beat Competition
Nimin kha MZI Rising Day 26-na a ni a, Mizoram pumah Hqrs. Sub Hqrs. leh Branch tinten an hmang. MHIP chuan November ni 1-3, 2006-ah hmar chhak state zawng zawng huapa Aizawl lammuala Beat and Solo Competition neih tur atan Screening, City Centre, Milllenium Centre-ah neih tur a ni tih sawiin a hun tur la puan a ni ang an ti. Beat & Solo Competition-ah hian lawmman tha tawksiam ani dawn tih sawiin Mizoram state-in hui vek tura zaithiamte lo inpuahchah turin an hriattir.
Serchhip College Freshers Social,etc.
Govt. Serchhip College Students Union chuan nimin piah khan an Hall-ah Freshers Social-cum-SU Election an nei a, Freshers Social hi MZP Gen. Hqrs. hruaituten an hman pui a, an President Pu P.C.Laltlansanga khual zahawm niin Mizoram sawrkarin Baffacos pawisa a hman dik lohdan a sawi.
MZP Lakah MPCY Lawm
MPCY chuan MNF sawrkar chu Mautam avanga Baffacos pawisa sawrkar laipui atanga dawn chu MNF sawrkar chuan dik lo taka party thuneihna leh mahni thiltihtheihna hmanga mi retheite chan ai, mahni leh chhungkhat lainate hnena sem vak mai tiin vanduaithlak an tih thu an sawi a. Mi rethei hmuhsitna leh rahbehnaa an ngaih thu an sawi. MZP-in MNF sawrkar thil tih dandik lo huaitaka an puangchhuak ngam lawmawm an tih thu an sawi.
Lily Mipuiin V/C Nawr Dawn
Chaltlang Lily Veng Aizawl mipuite chuan September thla chhung ngeia Village Council (V/C) hrang an neih loh chuan thaeihtawpa hma lak an tum a, sawrkar duh loh zawnga hma an lak pawhin mipuiin mawh an phur lovang an ti. Nimin piaha veng V/C Demand Joint Action Committee leh NGO hrang hrang kalkhawm chuan veng mipuiin V/C hrang neih an duh avanga kum 2006 V/C thlan boycott an tum, LAD Minister-in April 2006-a V/C hrang pek a tiam avanga V/C thlanna an boycott tak loh chu vawiin thlengin pek an la ni ta lo a ni an ti.
Section Officer Hna Ruak
Staff Selection Commission hnuaiah Section Officer (Commercial Audit) hna a ruak a, B.Com. CA, ICWA lehCS chin tan dil theih a ni a, hrechiang duh tan District Employment Exchange Aizawlah zawhfiah theih a ni. Ni 15.9.2006 thlenga dil theih a ni.
Synod leh Transworld Radio
Transworld Radio (Radio Vishwa Vani), India chuan nimin leh vawiin hian Partners’ Conference, New Delhi-ah an a. Mizoram Synod atangin Rev. Chanchinmawia, Moderator pawh a tel ve. Transworld Radio hian Mizoram Synod nen tangkawpin Radio hmanga Mizotawng a zau zawka chanchin tha puandarh dan kawng an dap mek a, hemi chungchang zir chiang turin thlaleh khian Aizawlah an lo kal ang.
Tulian Tuar tan Vehbur Khawn Dawn
October 31 – November 4, 2006 inkar a neih tur National Integration Camp chu Mizoramin a thleng dawn a. Hemi chungchang a inbuatsaih dan tur nimin khan Mizoram Bharat Scouts & Guides chuan State Chief Commissioner Pu Zoliana Royte pisaah an rel. National Hqrs.-in a ngenna angin tun laia ruahsur avanga tuilian tuar Gujarat leh Maharastra state mipuite chhawmdawlna tur tanpuina pawisa thawn ve ngei ni se tiin a rel a. October thla chhung khian mipuite hnenah vehbur an khawn dawn a; an phal tawk pe theuh turin mipuite an ngen.
(…won’t mention the name here though :D). I think the image caption was something like “…ngaihtuahna a ti kal thui khop mai”
hairehai
