Archive for July, 2012

Rual Duh Kan Hlimna Sawmfang

Tuesday, July 31st, 2012

Nunhlui ngaia suihlunglen
Vairam khawpui, mihring tam em emna hmunah nitin mahni hna avangin buai thin mah ila; nunhlui ngaih suihlunglen erawh ban ni a awm hlei thei lo. A ni, fur ruahtui bawhawk thleng mai tur vangin; ralkhat tlang bawhin ruahkung lo paw chi chiai mah se, sawmfang pan phurna erawh min pawlhdalsak lem lo. Fur kawng nal leh vangvat te’n kan enghelh an tihnual miah bawk lova. Thiante nena hlim taka vaimim tharlam tak han rawh puah pawp pawp te, fanghma bawl han ei ham ham te khan min tiphur zawk a. Fanghma vel hmaa, a chhip/mawng zailep, tu thlawh nge thui thui tia kan han inel leh tur te nghalhlein, phur takin kan kal sawk sawk thin.

Kan phur, tha a tho…
Darkar chanve dawn feh kawng zawha, lentupui kan paltlang meuh chuan; sawmfang hring dup mai chuan itawmna tinreng nen min lo hmuak ut mai hian kan hria a. Kan rak/khek chul thin. Patek nal leh kang mang kan pawisa lova; thlan tlain uite rim pawh nam mah ila kan inkiltawih lem lo, lovah kan feh tlat alawm.

Tichuan le, thlam kan han lut a. Thosi leh vaihmite lah chuan khual thar hmu ngai lo ni awm a mawiin mi lawmin an lo phar kawi ve reng bawk a. Mahse, min lawm dan erawh a lawmawm lutuk loh avangin mei kan han chhem khu a. Kal bo r’u tih ngai lovin, thosi leh vaihmite chuan min kiansan mai thin.

Sawmfang hring nghel
Thlam namthlakah kan han thu veng vawng a. Fur ruah tuiin a chawm hneh tih takah mit tlin tawk (ka ti mai) buh kung duah leh hrisel tha tak chuan a khuh hring nghulh a. Ngai teh! An sawi zo-thilfim rawn thaw heuh heuh chuan, buh kung a’n chhem chhawkawlh dual dual mawizia te kha, mipa naupang lungmawl paw’n kan hrethiam ve tho asin.

Thlam huala chuailo leh zamzo lo par vul te chuan tawn loh D tleitiri sakhmel duhawmna min hriatchhuah tir a. Fur ruahtui dawng tha tih takah vau lui tui luang ri hum hum kara, ralkhat hauhuk rual phur taka lo huk leh tliar tliar thin te chuan khawhar min hnem thin.
(more…)

Vawiin India Power Blackout chungchang

Tuesday, July 31st, 2012

Kan special correspondent atang thu kan dawn dan chuan (ti ve ringawt i la :P ) vawiin tlai dar 7:30 vel hian current chu a rawn awm tha leh ang.

Kan hriatloh takin vawiin hian India ram state 20 – Haryana, Punjab, Rajasthan, J&K, Bihar, Odisha, Jharkhand, West Bengal, UP, Himachal Pradesh, Uttarakhand, Delhi, Assam, Manipur, Nagaland, Tripura, Arunachal Pradesh, Meghalaya leh Mizoram ah current a awmlo a ni. Hei hian mi maktaduai 700 dawn lai a ti buai a ni. Delhi metro te chu an ti tawp hmiah a, chuan rel 400 chuang pawh an tawp bawk. West Bengal ah chuan miner za chuang an tang a, chuan hospital tamtak te pawn generator an hman a ngai phah ta a. Nichin lawk khan North East lam chu 50% vel chuan current an nei leh tawh angin an sawi.

He blackout hi hmun thenkhat (North India) ah te chuan a zawn in ni hnih na a ni tawh a ni. Vawiin blackout rawn awmna chhan chu sector thenkhat (a hming an sawi duh lo) te chuan current Mw an demand aia tam an overdraw avangin Northern Grid chu a down phawta (hei hi a ni em loadshedding kan tih chu?), chumi zawh Northern grid chuan grid dang – Eastern grid leh North-Eastern grid atangin load a pawh luh veleh an ni pawh an zawh loh avangin an down veleh nghal bawk a ni.

Kan Power Minister, Pu Sushilkumar Shinde, chuan heng grid collapse hi a pawi hle a tih thu a sawi a, chuan a chhan tak an chhui mek a ni. Technical terms a tam avangin heng source ah hian chhiar u la, in chiang zawk ka ring :-)

[The Hindu] [NDTV News] [Yahoo News]

Ps. Chutih lai chuan Mumbai lamah hian current a awm tha khawp mai :-P Mahse ruah a sur nasa hle ve thung :-(

Facebook a thu post vangin FIR lut

Tuesday, July 31st, 2012

July 23 zanlai dar 12 vela Facebook a Group pakhat Special Report atanga thu post vangin FIR thehlut. July 23 zan khan facebook a Special Report group ah chuan Puitea Tuallawt inti chuan ‘Warning’ tih thupui hmangin thu a post a, he a thu post ah hian mimal Ab-a Etlar Gemeni tih hming sawiin Ab-a Etlar Gemeni hian facebook atangin a thiannu pakhat chu video chat a neih pui a, chu nula chu a thawmhnaw te phelha a taksa thenkhat titlang turin a ngen thu a sawi lang a. Puitea Tuallawt inti hian facebook-a a thu post ah hian Ab-a Etlar Gemeni chu lo ti nawn leh tawh lo turin a vau nghal a. Heng bakah hian Puitea Tuallawt chuan Ab-a Etlar Gemeni chu Gospel Singer ai mah a Setanic Singer anga a ngaih zawk hial thu a sawi a ni, mi rawngbawlnaah te pawh sawm lova mahni insawiluta zai thin a nih thu te a post a ni.

Puitea Tuallawt thu post hi Ab-a Etlar Gemeni (Abraham-a) chuan July 31 hian Aizawl Police Station ah FIR (First Information Report) a thehlut a, heta FIR ah hian Abraham chuan Facebook atanga Puitea Tuallawt in ama wall ah leh Special Report Group ah te member zawng zawng hmuh theih turin a mimal nun chungchang a mualpho thei ang bera a chanchin dik emaw diklo emaw a rawn post hi amah tih mualpho a tum vang leh ama eizawnna leh a hmalam nunkhua (Future) thleng pawh tih chhiat vek a duh vanga hetiang thil tiah a ngai a. Hemi avanga a lungawi theih loh avang leh Police te chu hma laksak turin a ngen ta a ni.

via Buannel.com

Kan khaw Wall Cup

Monday, July 30th, 2012

THE FINAL MATCH

Hun chu a tlem tawh si a, kan inkhel lah chu kan inhneh tawk em em mai bawk a. Lehlam si-nghak kan han en a, Penalty-ah chuan kan dinhmun a chhe zawk tlat! Tan patawp kan chhuah pawhin Vawi thum ‘gawnar’ Penalty kan tichung pawhin pet goal-na hun hlu reng reng lehlam chuan min pe duh bik tlat si lo.

Fans lam an phur a, thawm a thain boruak pawh a sang ngei mai. Fans kan han tih hian nu leh pa ramchhuah hlana nau lo awm pi tar putar te an ni ber a, an tang ve thin khawp mai!

Chhuah lam leh tlak lama kan rin rawl, kan bat (Striker/forward kan tih te) te lah chuan leh lam ‘full back’ te an paltlang zo bawk si lo!

Chhei le! Kan lama out chu kan ‘full back’ chuan a rawn thlawh haw ta nal nal mai a. Kan thlir thap a, a leng phei nul nul a, lehlam si-nghak chuan a ban pha lo mawi lutuk. A goal e!! Kan au nghal dar dar a.
(more…)

Purse bo thu

Monday, July 30th, 2012

Hnathawh peihloh manah hmanni a ka purse tihbo chungchang hi thairang mai mai teh ang.

Hmeichhe tamtak ang a bawkin bag-a thil tinreng ak mi hi ka ni ve a. Niminpiah Inrinni, July 28 2012 pawh khan ka ak tlem lo leh khawp mai a. Purse, nihliap, rawmawl, pen, note bu te, tui bottle, purse dang chahbi leh pendrive vel ka dahna, heti zawng hi ka hriatchhuah theih chin chu a ni.

Tichuan Big Bazar ah ka kal ta a, scarf hi ka lei a ni. A man kha pek nghal a ngaih avang khan ka purse chu ka phawrh a, a man chu ka pe a. A man dawngtunu kha a rilru a buai nge ka hre lo min kir dik lo a, receipt nen kan han entawn leh he haw a, kan inkir dik leh ta. Ka purse chu ka la keng ngei tih ka hria chutih lai chuan. Mahse ka bag ah khan ka thun leh em, ka bag kha ka zip em tih kha ka hre chiang tawh hauhlo.

Bag zip lova teihawi hrat tak mai hi ka ni a, ka vanneih a siamin engmah hi ka la tibo tak tak lo va. Ka phone leh wallet tihbo tawh te chu ka kalsan an ni chawk a. Hemi ni pawh hian ka bag inhawng chu engvakah mah ka ngai lo.

Chuan, Big Bazar hi lian ve tak mai a nia, floor 4 (?) lai an luah a. Ka tei ka tei a, eng engemaw ka en kual a, lei tur te chu ka hmu zel a. Ka inkhai bawr ta fe tihah chuan a man pek tumin cash counter lam ka pan a, ka thlen hmain ka bag chhung ka zuk dap chu ka purse reng a awm lo. Thil dangin an hliah aniang, ka tia, ka han hai chiam, ka phawrh ruak vek, a awm chuang lo. Ehe, a bo ngei a nih hi, ka ti a. Ka rilru a rawn awm hmasa ber chu hah taka ka lo vahna kha a thlawn mai a ni tih hi.
(more…)

Mi rethei Vanglaini chhiar!

Monday, July 30th, 2012

Tideuh nghal tawp I la. Thingtlang Sikul upa ve tawh tak, than mawh bawk zeta a ba nena Pawl sawm (Kan nu leh pa ten matrix an tih kher thin) kan pasi ve tak hnu khan “I fail chuan I bang ang a, hna I thawk ang!” ti a ka pa hna thawk chau in min rumthaihnate chu mual leh lama bung thar kai san turin  Aizawl khawpui lam ka pan san ta a.

Awmpui han nih takah chuan chhungte thawh khalh chu kan ziak loh dan, zawm loh thiang loh a ni ta si a, phur fahran lo hian mitek thian nuah nuah chung hian Ek In lamah Vanglaini chu ka luh pui tuktin ta thin a. Ke lamin mut a lo la kham lo nasa thin chu niin, ke mu chur chur chung hian Vanglaini chu kan chhiar zo leh nge nge thin.

Chutia a tuktin kan bih ve takah chuan eng kha nge ka tan hlawk thlak ber ni ta thin!

A hnung lama Tetea’n mawi hnai taka Ronaldo pet goal vel dan leh tunge infiammi man to tihte thlenga a ziah kur dupte chuan ka thlaurau nun chu sawi loh ka zirna tak pawh kha a pui lo em em a. CH3COONa NaOH tih vel chhun lama kan thai tial leh tak thin avangin kha phek kha chuan rual pawlna kawngah min hnuk lut a, kan thil chhiar kan hriat poh leh lehkha kan zir tlem tihna a ni ta mai si. Khatiang sawi ho nikhua a a hre tlem tlemte kha alawm tuna Facebook vela pawh “engtik nge I lo haw dawn? In awmna chu a lum bawk em?” ti a kan biak leh tak thin te chu!
(more…)

Zo Nun Mawi Hlutna- III

Monday, July 30th, 2012

By- Laldinthara
Thingsulthliah

An biak lai sa leh khua an zah em em mai khan ‘ Zo nun’ tha leh mawi leh dik an lo neih phah a, mimal hmuh chhuah leh zirtirna atanga lo chawr chhuak a ni lo a, an nunphung, an nitin khawsakphung khan HNAM an lo dina, ‘MIZO HNAM’ tih tur kan lo neih phah ta a, chu sakhua chuanmidangte Mizo hnama luhtir te, midang va sawi chhiat te a ti lo a, mi tupawhin a zâr an zo theihna tura thil tha chi hrang hrang a tihhi a ni. Chu chu an ‘Zo nun mawi,’ khawvela nun mawi ber chu a ni.

Khawvel hnam tinah ram leh hnam leh sakhua humhalh duhnaleh hmangaihna(nati onalism) a lopiang chhuak zel a, kum zabi17-na atang vela rawn tanin French Revolution phei chu 1789 lai khan a intan tawh a. Asian rama hnam hrang hrang zingah te, America ramah te, leh Africa khawmualpuiah a lo darh ta zel ani. Heng hnam hrang hrangte hi an nationalism chu a hrang hret hret a, English ho leh French-ho chuan sum leh pai hmasawnna leh ram zauh belh zelna’n an ti a. German leh Italy-ah chuan a tir chuan hnam hmun hrang hrangaawm te thui khawm a, sawrkar pakha hnuaia dah a ni. Chumi an tihhlawhtlin hnu chuan English leh French ho anga hmasawnna leh ram zauh zel a, hnam dangte an thuhnuaia dah chu an thupui a ni leh a ni.

(more…)

Ka fâwp ning lo

Monday, July 30th, 2012

Thu duli te te ka’n vawm bei ve ang e. A saisa nuai(h) mai thei. Uisa mah kan ei alawm le, saisa te chu a vân vân nen. :-D

Kan Lalpa kum sanghnih leh pasarih chu ka tân kum chhinchhiah tlâk tak a ni. A chhan chu mawm, duh taka ka fawh vawng vawng tûr ka tawnna kum a ni tlats!

Kum sanghnih leh pasarih kâwl a lo ên a, class kan tan leh meuh chuan engdang mah enghelh leh vei êm êm nei lovin kan ri huah huah thin. Class kal ka châk chhan pakhat erawh amah vang liau liau a ni. Mahse, a bulah duh angin ka awm tam theih tlat lo. Break lai chauhin ka la hmu thei zui. A hmêl ka hmuh tawh hi chuan lapua ang lek hian ka zâng hui mai nia. Ka zei lo ka ti dâwn nge min bual â ka ti zâwk dâwn le.

Midangte thatna a zâra mi chaw bar ruala bar ve thei leh, mite hmai phih ruala phih ve thei hrâm hrâm tân chuan vâna rah ang chu ni êm lo mah se, a teuh khawp ang! Keini ang vaihlenhlo thenawm mai tân zawng a tina han tin chi niin a lang lo. Mahse vâl hi a zûnah chhâwl ang mai ni lovin pipu angin ka uai a, ka’n inthen tak tak chu(h) vân tukverhah ka dak zuau zuau nia! Vâl zei lo leh to lo tih takah bêlchianga han hnaih tûr chuan ka kaiza thain min chelh ding zo lo va, kawl bun ang hlauh ka ni. Break lai erawh chuan ka thiante nên a bulah kan kal ve thin.

(more…)

Zo Nun Mawi Hlutna – II

Monday, July 30th, 2012

By- Laldinthara
Thingsulthliah

Thian chhan thih an ngam a, an sakhua an ram leh an hnam tana an nun hlan chu an hreh lo mai pawh ni loin, engtin nge ram tân, hnam tân ka thih ang ti niawm zawk takin mi tân an nun an ui loa ni. Chu nun chuan Tlawmngaihna a rawn hring chhuak reng mai a, tlawmngai hnam kan lo ni ta a nih chu.

Amaherawhchu an khawhawi kha a lo zim a, ram pum huap khaan ngaihtuah thlen phak loh chang a am thin kha a tâwpa an tlûkchhiatna a ni reng a. Khua leh khua indo kha an Politics sang ber a ni a, râllaka an khaw venhim kha an tum ber leh an râl do hnai ber a lo ni ta a ni. Râl thatthei Pasal ha ngahte chu an thla amuang em em a ni. Tin, an râl thah sawngbawl dânah te khan ran tâna rinawm an zirchhuak leha, thingserh bulah chuan chepui an dah a, pu K. Zawla ziaha a lan dan chuan, ‘thingserh’ satte chu kei ka ni inti deuh te an ni a, chung mite chuan thingserh kha an pan nal nal a, chempui chuan an kik kerh a, a bula thu khan nopuiin zu a lo pe thin a ni. ‘Râlahhian a tul hle loah chuan ka tlan ngai lo ang a, kan khua rawn rûntu phei chu ka chhuah lo ang. Ka khua leh unau hum tur chuan ka hnung tawlh lo ang a, hneh loh ai chuan thih hi ka thlang zawk a ni. Chuvangin, Lal khua lehtui chhan nan nun pêk hi ka phal tih lo hre ve rawh u.’ tihna tluk a ni. Chu chuan hnam tana rinawm a lo zirtir leh reng peka, hnam rinawm tiin kan lo hre leh ta a ni.

Ziaktu tam berte chuan tun hunah chuan Mizote hi ramhuai bia in an sawi a, Kristian Missionary-te pawhin thingbul lungbul bia angin an sawi hial thin. Mahse, ngun tak leh chîk zawka han ngaihtuah chuan kan pi pute khan sakhua an lo nei ngei a. Khawvel sakhaw hrang hrang- Hindu, Kristian, Muslim, Buddist, Confucianism leh a dangte pawh hian an zirtirna zawm tuten thih hnua awm dan turte an kawh hmuh bakah, an damlai ngeia thil tha tih a keng telvek tih theih a ni. Chu chuan mihring dam chhung nun a vawng a, chênna tlak leh engthawl taka khawsak hona hmun nuamah khawvel hi a siam ti ila a sual awm lo e.
(more…)

Entawn tlak

Sunday, July 29th, 2012

Tunkum Olympic (Summer Olympic) á¹­an ani ta a, mittlai tak a thlir tur a tam leh ta hle mai. Hetih hun hi khawvel ram hrang hrang te indo lo leh innghirngho lova an kal-khawm theih hun a ni a a hlu viau. Ram hrang hrang hruaitu te kum 2 dan a SAFEX a an kalkhawm, an ralthuam inlei sak a, a leitu te’n a lei sak a te kahna tur pawh a ni thei ang kha a ni ve hauhlo.In-tihlumna lam tel lova ram leh ram inelna hun a ni á¹­hin.

Olympic alo thlen hian mi tam takin a hma lam a theiberte thil tih chu khum tumin khum pawh an tam á¹­hin viau. Chutih hunah chuan tuarchhel, zelthel lo, thiam bikte chu an chungchuang á¹­hin a, chawimawina tangkapui an dawn bakah khawvel ngaihsan an hlawhin hriat reng an ni tawh á¹­hin.

Olympic ah hian Michael Phelps (maikal felps) ang a tangkapui (medal) dawng hnem an la awm ngailo. Tuichen lam a inelna a a tel tawh reng rengin, kum 15 anih a á¹­ang tawh khan tangkapui dawng lovin ala haw ngailova, rangkachak tangkapui 14 bakah dar tangkapui 2 a hawn tawh a ni. Kum 2008, Beijing Olympic-ah phei kha chuan a hmingá¹­ha lehzual em em a, khami á¹­um khan tangkapui 8 teh meuh a hui anih kha. Michael Phelps hian world record 5 a siam tawh bakah, á¹­angrual-in (team) a dang 2 an siam tawh bawk.

Michael Phelps hian record a siamna pakhat chu meter 400 IM (individual medley) ah a ni a, chumi á¹­um (2008) chuan a mah hnaihber tu, Ryan Lochte (Rai-an Lawkte) chu sekhawn 1 pawh tling lovin a hneh nghe nghe.
(more…)