Mizo thalaite tan Medical Transcription

June 20th, 2009 8:27 pm by hmangaiha

- B. Hmangaihkima, b_hmangaiha@yahoo.com

Mizoramah thalai lehkhathiam hna hmulo kan pung tam tawlh tawlh a, thalai tamtakin hnatha zawk leh pawisa tam zawk hlawh beiseiin phairam min pansan a. Chutih mek laiin thalai tamzawk chuan kal ngaihna hrelo leh sum leh pai harsatna avangin mahni inlum atangin hnavantla kan chang mek bawk a. Thalai tam zawkte hna hmulo leh zawng mekte tan medical transcription lam ilo thlir teh ang.

Tunlai khawvela hmasawnna thlentu pawimawh pakhat chu Information Technology (IT) hi a ni. Khawvela eizawnna lam hawiah chuan a thang chak ber a ni a. Khawvela hna tau ti tet lian ber an ni bawk a ni. IT-a hmasawnna vangin khawvel lehlam daiha awmte nen pawh hmunkhata khawsa ho ang maiin hna kan thawkho thei ta a. Call Center-tia kan hriat lar fo, computer lama thiamna thuk tak neih ngai miahlote pawhin thlakhatah Cheng Sing chuang an hlawh theihna hi IT Sector kan sawi mek lamin a hrin vek a ni. Chutiang bawkin information technology behchhana eizawnna chi hrang tamtak zinga pakhat chu medical transcription hi a ni a. Khawthlang lam ram, a bikin America-ramahte chuan damlote record hi fel taka vawn fel thlap a ngai thin a, hei hi a chhan chu an healthcare system-khu insurance veka tih anih avang leh court-a case chinfel a ngaihchangin damlote record kimchang tak hi phawrh a ngaih thin vang a ni.

Doctor, mahni hnaa buaive tak mai chuan voice recorder hmangin a damlo enkawl chanchin chu a record a, he tape/audio files ziaka dah chhuah leh hna lo thawktute chu medical transcriptionist kan tih hi a ni. An hna ber chu doctor-in a damlote chanchin a lo record tawh chu ngaithlain ziakin a lo dah chhawng leh ta thin a ni. Hemi atan hian English thiamtak bakah medical terminology hriat a pawimawh em em a ni. Chuvangin, he hna hian uluk tak leh felfai taka hlen a mamawh a, damlote information diklo leh felhlel a awm palh hlauh chuan a pawi thui em em a ni.

Khawthlang lam ramah chuan hlawhfa rawihna man a sangin, hire-na a to hle mai a. Chu hna chu tlawm zawk leh hun tam tak paihlo a thawh alo nih theih nan khawvel hmun dang, Saptawng thiam tamna, mi chhawr man tlawm bawk si, leh hun inthlauhna avanga remchanna lei chungin Hospital leh Company ten Asia ram lam an rawn hawi ta a. Chutah chuan India hi chanvo nei hlawk tak a ni a. A chhan pui ber pakhatah chuan timezone difference ti mai ila, America sana leh keini India sana hi darkar 12 laia a inthlauh avang a ni a. Chumi awmzia chu an nileng hnathawh kha an rawn thawn ta a, chu chu keini chhun a lo ni a, chuan an zan mutbo chhung khan an hna chu tih felin a lo awm thei ta a ni. Chu hna chu Doctor-te leh Hospital-ten sum tam thei ber lak luh leh senso tlem thei ang ber an tum theuh avangin senso tlem theihna hmun ram rethei zawkah an rawn outsource ta thin a ni.

Health Care Industries hi pung mek zel a ni a. India ramah pawh Insurance thlengin kan privatized mek zel a ni a. Chuvang tak chuan medical record hi keini pawh hian kan la mamawh dawn chauh tihna a ni. Tunah America hian kumtin US dollar tluklehdingawn 40 vel hna hi khawvel ram dangah a thawn chhuak ta thin a. Hemi zinga vaibelchhe 200 vel hi India hian kan chang ve a. Chumi awmzia chu 2% vel kan chang pha awrh tihna a ni. Heti chung pawh hian hna tam tak a siam chhuak mek a, a pung mek zel bawk a. Kum 2010 ah phei chuan US dollar vaibelchhe 647 vel chang phak tura ngaih kan ni. Chuvangin, he industry-hian hna tam tak ala siam chhuak dawn chauh a ni.

Mizo thalai tam takin he IT industry-a thawh ve tumin medical transcription mai nilo call centre-lamte kan belin phai lamah hna zawngin kan liam mek zel a. Chu chu hriain, “Engtiangin nge mizoramah phailam pan buai ngailovin kan thawhve theih ang a, thalai tam zawkte engtingnge eizawnna kan siamsak ve theih ang,” tiin ngaihtuahna ka hmang ta a. Kum 2008 kum tir atang khan bul ka han tan ve ta a. A tirah chuan harsatna tam tak ka tawk thin a. Ka generator lei hian ka computer zawng zawng a chawm zo tawh bawk silo. UPS-lian tha tak hi mi office-a ka lente hian ka mitla bertute an ni a. Chilthli tlalo chauh hian ka en thin a. Amaherawhchu, hei kumkhat lai mai hlawhtling taka thawkin, thalai engemawzah chuan eizawn nan kan hmang ta der mai. Heti anih chuan phailama hnazawn buai em em ngai tawh loin, kan kawtchhuah ah ngei mai hna tau kan ti tet ve thei dawn ta tihna a ni. Tunah hian Training Institute changtlung taka hawn tumin ka theihtawkin hma kan la ve a. Mahse, thil tih hi a hare m em mai a. Kan sawrkar hian information technology lama thalaite tuihalna leh thalai tam takte tana eizawnna siam chhuahna a ni tih hriain hma min lakpui deuh tur hian ka duh em em a ni. Heti anih chuan India rama sum heti zozai rawn lut hi Mizoram chhungah ngei kan lo hai then ve thei dawn ta tihna a lo ni.

India ram dangte aia kan tana hamthatna awm leh chu, Mizo A, AW, B hi English Alphabet atanga lakchhawn alo ni ve leh zel bawk nen. Chuvangin, Saptawngah hnam dangte aiin kan nep bikna tur hi ka hre biklo a ni. Mahse, kan work culture hi tlema kan sawi danglam deuh chu a ngai dawn a ni. Office-a hming sign zawha inneihna kal daih leh khawimaw laia lo inkawm khawm tel tel kha a theih ve dawnloh avangin.

A tawp ber atan thil pakhat chu ti tha peihlo leh tui tak takna nei lem lo, miten a tha an tih vanga thawhve tum ringawt chi a nilova, quality sang leh deadline pressure natak hnuaia thawh a tul thin a, tuina neilo leh taima tan lo chuan inchhirawm tak a ni. A tawp tak takna atan chuan, he industry-a tuina nei leh ka mizo thalaipui ram danga hna tha tak tak thawkte leh mithiam tak takte thurawn min rawn pek duh chuan ka in hawng reng a nia.

8 Responses to “Mizo thalaite tan Medical Transcription”

1
XaiA Says:
June 20th, 2009 at 9:09 pm
A tha hle mai,han ti tang tang teh u,taimakna leh tum ruh na a pawimawh hle ang.Tichuan ka misual puite helam a expi nei tawh te khan han thawh belh zel ula, kei lah ka Nil ang reng si a,heti lamah hi chuan :!: Investment tha tak a ni si a.
Report this comment
2
mzvision Says:
June 20th, 2009 at 9:11 pm
USA ho hi insurance an ti nasa hle a, insurance Co te leh an policy latu te inkhinna hi a tam hle ni tur ani. hei vang hian Dr te’n an patient a enkawl dan kimchang hi toite a ziak ni mai lovin, detail takin ziak chhuah a ngaia. chu chu Dr ten an hman si lo. Voice recorder pen ang chi (dictophone) ah hian an latient te an enkawl dan an sawi char char zel a. Chu chu voice mail in transcribe turin an thawn ta trhin a.

Hei hian hna tamtak a generate. mahse training ve fe a ngai medical terminology hriat kim a trul hle bakah damdawi hming hrang hrang te poh.

heng transcribe tute hian voice mail kha ear-phone in an ngaithla a, chu chu text ah an chantir, psge setup customise sa vekah an chhu char char mai. lina khat hi 10 cent te an charge a phek khatah line 46 zel awm se phek khat transcribe ah USD 4.60 company tan a titu khan a thawkchhuak tihna a ni ang. Mi pangai tan phek 100 8 hours shift ah transcribe a har miah lo chu chu USD 46 = Rs 2300 a thawk chhuak a, thlakhat ah ni 25 thawk sela Rs 57500 company tan a thawkchhuak tihna. Expert deuh chuan heng let hi an chhuah ngei ang.

Rs 50000 chuang Company te pompuia thawkchhuak thei tur chuan typing leh transcribe-ah hian accuracy level 98% aia hniam lo an demand ngei anga. chung a type chhuh ho chu 3-tier Quality check an lo nei ngei in a rinawm. heng quality lo check leh theitu nih hi kaisanna promotion a nih bakah hloh poh a sang zawkin a rinawm.

Co tana Rs 50,000 thok chhuak hi a ruaitute’n Rs 10,000 chauh an pek chuan a fair lo deuh lo maw te lo ti ve vel ila.
KIan risk kual vel anih hi kei misual hian. ka lawm e
Report this comment
3
VaiVa Says:
June 21st, 2009 at 12:07 am
Medical Transcription… Global Reccession leh economic slow down pawh in a khawih loh ber a ni awm e a. Dam lo te, an dam lo reng a, H1N1 natna leh zel nen! India ram aiin America lamah an tuar nasa zawk leh nghal a.

Han ti tang tang u la, mahni in chawmna ni bawk, midang te tana hna siamtu ni bawk… hetiang hi a ni Zoram hmangaih ka lo tih ve ni!
Report this comment
4
hmingtea Says:
June 21st, 2009 at 12:57 am
zu zawngtu khan ahmu dik ngei ang le!!Kei poh in zu hi ka vei ve hle mai a 2001 kum vel khan ani ta in ka hria zan ah taxi a service thin lai poh khan ka mi phurh te a zir in zawhna te ka zawt fo thin a vawikhat chu pastor ka phurh chu ka zawt a .Postor hei kan ram ah hian zu hi kan buaipui emem mai a zu kan khap bur hi hlawhtling i ti em ? Kan that phah in i hria em kan thalai ten zu an in tho a zu tha an hmuh phah loh zawk bawk nen hei ai chuan sorkhar hian zu hi zuarin leh control zawk se kan that phah lawng maw ti in ka zawt a .A ni chuan nia kan khap bur a arem chuang lova an zuar tho a an in tho bawk a i sawi ang chuan ti seng chuan kan fihlim zawk in kei ma mimal ngaih dan pawh anih na a rei tawh ti in min chhang a .Chuti si engah nge kohhran ang a khap burna dan an nawr hian in sawi ve lohm ka tia pastor ka ni a kan kohhran thu te kan hnial ngam hlei hnem ti in min chhang a.
Nia zu kan khap bur avang a kan sen ral tam lam hi sorkhar hian han en chiang ta seng eg mltp act a vang a tang chaw ei ral te,excise hlawh leh thuamna zawng zawng te .Chu lo lam zu hi khap bur lo seng tax 60%vel la seng eng zat nge kumkhat ah kan hlep ang aw.Assam ah khuan 45%vel an la a ti chuan mc dowel rum hi um khat 120 in kan lei thei a mizoram ah black a alo luh hian Rs 400 vel in kan zawn hmuh fuh chuan kan lei thei hram a.60%tax la ta ilang mc dowels um khat chu Rs 140 vel in kan lei thei a rina awm bawk a ti chuan sorkhar in sum a rut hngeng ang a vai ho pawisa kan pe tawh lo bawk ang a tih chi phian tawh dawn anih chu .Tin zu ruih chung chang chu thu hran in tih buai in sual kut in thlak thu ah chuan Israel ram ah chuan ti hian dan an nei a kut in thlak hrim hrim chu a thlak hmasatu kha rei tak an tan tir zel a nupui kut thlak avang a tang poh an awmnual reng bawk a .an rui emaw rui lo emaw an in ang vek chu mai ani lova mi kut thlak tu kha an khua ah pawh awm leh sorkhar in a phal lo hial thei a an hmu leh anih chuan an man leh mai a rei tak an tang leh mai dawn ani .chu vang in in hnial nikhua poh hian an kut hi hnuai lam ah an dah a hnuai lam ah an phar vak vak zel mai maw le mihausa mi lian an dang chuang lo a kut thlak hmasatu kha rei tak jail ah khung an ni mai zel.
Tin zu chung chang ah bawk khan sorkhar in tunhma a azawrh ang ni lo khan ti tawh se stokist or agent an awm ang a chumi atang chuan a zuar duh apiang in an la mai anga ciggrattes dawr tin a an zuar an hian rate erawh agent ten an tih ang zel in an ti ang a to bik awm lovin tin a khua a zir te poh in an ti thei ang chu .Tin bar erawh chu sorkhar in permit pe in a hawn hun te an siam ang chu tah chuan a duh in an in ve mai bawk ang a chu tih hun ah chuan zu avang a kan buai leh hun leh sum tam tak kan sen hi kan save tawh anga kan thalai ten zu tha an in tawh ang a car ck tak atang in an rawn chhuk a kan nula tlang val te dai tam ah hlau chung chung in peh teh ang han pet tet han hmun hi chuan amah pu Rokungan lengdang mi chu lal lai, partlan in min ngai lo ten an leng han tih loh rual ani hlei hnem maw le.Eorope leh Americas continent ah hrim hrim chuan zu hi ka sawi ang chi khian an zuar thin dawr bik a awm lo kawtlai vel ah te kan in mai thin a nuam dang dai tak ani.Zu nam or in beer thleng in chung a motor khalh man an nih chuan licence cancel bawk chawi bawk chulam ah chuan strick tak vek an ni thung chu vang chuan computer age ah kan awm tawh a thalai tin in mobile phone te poh kan nei toh ani lom ni?heng te hi khap chi zawk lo maw
Report this comment
5
hmingtea Says:
June 21st, 2009 at 1:09 am
oh in ti tha hlawm e kei pohn IT lam ah chuan minus ka ni a thawh ve tur ka nei lo maerawh chu thalai mai milo mizo zz tan hnathawh tur awm lo kan ti fo hi engnge hna chu sorkhar hna kan tih kher hi emni? sorkhar hna leh hna lo hi in tluk tlang in hlawh leh facilities te siam rem ve theih se atha ngawt ang maw lekan sorkharhna thawk te an nuam sa der der em mai a lom tin kan mi hausa ten private sector la hi uar deuh se mimal in an theih loh poh in 2/3 tang rual ten chung ang hnuai ah chuan a lom ram ck 90%ho hian hna an thawh hlawm
Report this comment
6
Lily_parmawia Says:
June 21st, 2009 at 1:14 am
Ka hma ami sawi loh zong deuh hi kan soi ange NOI

Pu Hmangaiha hi ka ngaisang thlawt, atan hlawk na pawh lo ni teh reng se midang tan malsawmna anih zia hi ka hrethiam phak ve ruai ruai in ka hria
Kan sawrkar hian IT hmasawnna chu e kha eee ti duah hlup lo hian practical in han chhunzom ve se, Thalai te hian Stadium ringot lo deuh pawh kan beisei ve phak tawh ang chu.!!!
Saptawng kan ngaisang, kan ngaihsan-a hi hmanthiam kan tum leh thin silo.
Tun level (Generation) ah chuan Certificate-a mark hmuh hian awmzia teh lua a nei toh lo.. Skills hma chhuan lo chuan eizawn ahar telh telh dawn.. Outsourcing ah chuan hna an rawn offer che a, I thiam zia iva show ve phot angai chhawrzui tlak i nih leh nih loh… certificate tih lam ani toh lo. Developing country kan nia, outsourcing ah hian kan la in nghat telh telh in a rinawm.. Hawh uu Thailai te i harh ang uu…
Report this comment
7
Lily_parmawia Says:
June 21st, 2009 at 1:16 am
Ka hma ami.. means hma leh chiah
Report this comment
8
maisawk Says:
June 23rd, 2009 at 10:43 pm
Pu Hmangaiha chu fakawm hle mai, zoram thalai lehkhathiam hna hmulo tam tak kan awm tawh laia, hetianga outsource tha tak mai i han phawrh chhuak hi, “zoram tana rahbi pawimawh tak” ka ti lo theilo.
Report this comment