Tu nge Mizo chu…

September 2nd, 2010 12:01 pm by alchemist

Thuhma…

Vawi tam tak sawi a ni tawh a, mi ziah chhiar tur lah a tam tawh. Inhnialna leh in hauhna a thlen a, thu ziak hmanga indona pawh a chawkchhuak zing ta hle mai! Mahse, sawi sawi hnuah pawh a then te hi chu kan fiah duh loh lui niin a lang. Engpawh ni se, he thu ziak hian a chhiar tute ah “Mizo” a chianna tak tak min neih tir se ka ti hle a ni.

Khiangte hnam ka ni a, Mizo ka ni. Kan chhungkua in kan hriatphak chin kan thlahtute chhuan tam fe ata tawh Mizoram a piang leh seilian, Mizoram chhul chhuak kan ni a. A lui ruam thuk tak tak leh tlang sang tak tak te hi mahni ta anga lo chei bawl a, thing leh mau leh nungchate pawh duat taka enkawl a, a ramin a pekchhuah eitur chi hrang hrang hmanga lo inhnangfak thin kan ni.

Pipute ata tawh Mizo nisa a piang ka nih avangin ka Mizo nihna hi thlanah ka la liampui dawn a. Ka duh emaw duh lo emaw, Mizo ka ni a, ka thisen zungzam a bet tel tlat tawh anih avangin ka thlak danglam thei tawh lo. Chuvang chuan Mizo ka nihna hi lawm takin ka pawm a, ka pawm sathliah mai a ni lo, ka chhuang in, ka chapo pui em em zawk a ni. American hoin American an nih an inchhuan tluk zet a nasa in Mizo ka ni hi ka inchhuang a, ka zahpui ngai hek lo.

Mahse….

Kum zabi 20-na chhunga MAL in Mizo pa lar bera an thlan (ka tihdik loh chuan min lo ngaidam ula) Rev Liangkhaia lehkhabu ziah “Mizo Chanchin” kha in chhiar chuan Mizo hnam hrang hrang leh Mizo hnahthlak hnam hrang hrang zingah Khiangte hnam hi a lo telh ve hauh lo mai a. “Hnamdang” tih hnuaiah Khiangte chu a dah a ni. Ka chhiar tirh chuan ka thin a rim hle mai a, khati tak khan ka lo chapo pui ve thin a, fa tak pawh ni lovin, a lem mai maw kan lo nih?

Tih emah chuan Mizo pasaltha Taitesena pawh Khiangte hnam asin a nih le! Khatih hun lai khan rawlthar mai chauh ka la ni a, khawi hmunah pawh awmin, Europe a ni emaw, America a ni emaw, Africa ram pilril ah emaw pawh awm mah ila, Mizo hnam phatsan ngai lo tura enkawl seilen ka nih avangin ka la na hle mai. Mahse, a ziaktu pa ber Pu Liangkhaia pawh Khiangte ve tho a ni tihte ka hriat belh leh hnuhnawh a.

Midang thuziah te pawh ka chhiar belh zel a, a then chuan Khiangte chu Pawih/Lai hnam peng pakhat a ni an ti a. Hmar ho lah in “Khiangte chu Hmar hnam peng alawm” an lo ti ve bawk a. HPC te kal vung tak tak laia an commander pakhat pawh kha Khiangte a lo ni ve awm e. Shillong-ah College kal tura ka chhukthlak hlim pawh in Hmar Students’ Association (HSA) hruatute’n an member a inziak lut turin min rawn sawm ve nghe nghe a ni.

Hmanni lawka Mizo History a research ti mek, kan thianpa pakhat in min hrilh dan chuan Myanmar-ah phei chuan Khiangte chu ‘tribe’ anga recognize an ni a, tawng hrang neiin, khaw bik te pawh an nei a ni a tih leh zel a. Thu a sai sa ta nuaih mai.

Kei aia Mizo an lo awm chuang lo…

Khiangte chu eng hnam peng pawh ni in, tawng hrangte pawh lo nei mah ila, a pawi lo. Unau, hnam hrang hrang min khaikhawm tu Mizo a awm a, chuta lungawi taka ka beh mai chuan kei aia Mizo hi an lo awm chuang lo. A inti nei tu tu, anihna leh awmzia a chiang apiangte hi Mizo dik tak chu kan lo ni mai. Mizo an ni tih inhre miah lo hnam peng eng emaw zah pawh an la awm ngei ang. Chungte pawh chu Mizo dik tak an ni tho. Mizo tih chuan zohnahthlak hnam peng hrang hrang, tawng hrang hrang nei te pawh a huam vek a, kan leng vek a ni tih hrechiang apiang te hi Mizo ah hian kan lungawi zual zel mai dawn niin a lang.

Tawng hi…

Pi leh pute atanga kan lo hman ngheh tawh, kan hmuhtheih Pathian, nu leh pate nen a kan inbiak pawhna, kan tawng thiam hmasak ber, kan lungngaih lai ber leh kan hlim lai bera kan au chhuah pui thin ‘kan tawng’ hi a lo hlu em em mai a. He mi chungchang ah hian a tu a te pawh hian rilru zau tak kan put thiam a ngai a ni. Mizo tih a lungawi lo tam tak paw’n hei hi kan chhuanlam ber a niin ka hria a. Zohnahthlak hnam peng hrang hrang te hi Mizo vek kan ni a, chuvang chuan kan hnam peng tawngte theuh hi Mizo tawng chu a ni ngei mai.

Mahse, chung hnam peng hrang hrangte min thui khawm tu tur leh kan zavai atana hman nuam tak tur tawng pakhat “Mizo tawng” Pathianin min pe hi a lawmawm ka ti. Hetah hian Mizo hnam peng hrang hrangte pawh kan lungawi thiam a tha hle in ka hria. Ka thianpa, MA (Mizo), chhiar zau tak leh upa kawm hnem tak pakhatin min hrilh dan chuan tuna kan tawng hman hi Duhlian tawng pangngai kha a ni tawh lo a, Duhlian tawng chu thluk deuh duai duai chi a ni, Ralte tawng nen a inchawhpawlh nasa khawp mai a, hnam peng hrang hrang tawng a tel zauh zauh bawk a ti a. Anih duh hmel viau in ka hria a ni.

Khiangte tawng ka thiam loh avangin Khiangte ka nihna kha a dal phah lova, ka hming bul tan nan kei phei chuan ka hmang nghe nghe. Chutih laiin, heng tawng hrang hrangte hi Mizo hnam ti hausa tu a ni tih hria in a ral mai loh nan humhalh thung ila. Mizo kan nihna min tih dal saktu atan emaw kan in unauna tibo tu atan emaw kan hmang anih erawh chuan thil tha a ni lovang.

Ka pa lama ka pi hi Pawih a ni a, ka nu lama ka pi hi Ralte a ni thung a, ka nu te hi Hmar an ni a, kan makpa hi Ralte Kawlni a ni in, keini Khiangte kan ni a. Ka thian tha em em, unau ang mai a ka en, kan chhungkaw member ang hial a kan in a tal thin te chu Rokhum, Chawngthu, Chhakchhuak leh Renthlei hnam te an ni a. Kan thenawm hnai ah Paite leh Mara an la awm zui. Hei lo liama Zoram khawvel insuihkhawmna ropui, Zoram Global Network ka vuah thin. Chaw kan han ei khawm a, Mizo hnam hrang hrang leh tawng hrang nei thiau in Mizo tawng a Pathian kan han be tlang thei leh ingngeih tak maia kan titi ho thei hi a hlut zia ka man thiam tulh tulh ta mai.

Mizo intiduh lo te ve thung hi…

Mizo inti duh lo hnam peng hrang hrang an tam ta hle mai, Manipur ah phei chuan heng hnam peng thenkhat te hi “Mizo i ni” tih chuan kut tawrh phah na hial a thleng thin a ni tih Manipur a seilian Mizo ngeiin min hrilh a ni. Mizo an inti duh lo anih paw’n Mizo chu an ni reng tho. Mahse, kan duhthlanna hi a pawimawh em em a, Pathian pawh in kan duhthlanna hi a dah sang in, mi a nawr lui ngai loh a nih hi. Keini pawh in midangte duhthlanna hi chu kan zahsak ve turah ka ngai a, Mizo nih an duh lo anih chuan Mizo in ni kan tih luih reng a tulin ka hre lo. Kei chuan Mizo nih ka thlang a, Mizo ka ni mai. Lusei pawh ni rawh se, Mizo nih a duh loh chuan Mizo a ni lo. Tunlai khawvelah chuan hetiang hian ngaihdan fum fe tak kan kalpui hi a tul in ka hria a ni.

Tanpui an ngaih laia inti Mizo…

Harsatna an tawk a, kan tanpui an mamawh laia inti Mizo, hna an duh avang leh Mizoram quota hmanga zirna in tha a an luh duh avanga Mizo nia inchhal, mahse hmundangah leh kan tanpui an mamawh loh lai a Mizo inti duh leh si lo te hi Mizo ah hian i chhiar lo ngam ang u. Hetiang mi hi mi tam tak ka hmu ta. Zirlai chu sawi lo, University a thawk leh hnasang thawk zingah hian hetiang a ‘bak’ rilru pu hi an tam khawp mai. Dinhmun chhe bera a din lai pawh a Mizo chu hlimna vawr tawp a tawn lai pawh in a Mizo tho tur a ni.

Tin, thenkhat chuan North East leh India ram hmun dangah ralthuam leh ruihhlo an zuar a, hmun danga Mizo inti duh lo kha man chhuah an nih a, Police kuta an awm in Mizo an inti leh a. Hetiang anih avang hian India ram khawpui hmun thenkhatah phei chuan Mizo te tan inluah tur pawh hmuh a harsat phah ta fo mai a nih hi. Tin, mi thenkhat Mizoram sum leh pai hmanga in lak vur duh avanga inti Mizo, thinlung taka Mizo leh miah si lo pawh an tam hle a ni.

Hetiang hi anih avangin kan cultural identity leh political identity hi kan thliar thiam a tul ta mai em ni aw tiin a ngaihtuah theih. Zohnahthlak te hi unau vek chu kan ni ngei mai, mahse political boundary in min daidang a, kan rilru puthmang leh khawsak dan te pawh a dang chho zel a ni. Chuvang chuan, unau kan ni tih ah hian lungawi ila, political boundary pel a inpumkhat tum erawh hi chuan rah tha a chhuah lo in, Mizoram chhunga chengte tan hian thil pawi tak a thlen phah thei zawk mai lo maw?

Engpawh ni se…

Chhimbal hian rawng pakhat chauh nei ta se mawina a nei tlem viau in ka ring. Rawng chi hrang hrang hmun khata awm khawm chuan a mawina hi a ti zual a ni. Zohnahthlak hnam hrang hrangte pawh hi min khaikhawm tu “Mizo” ah hian lungawi tlang ila, chutah chuan mawi takin kan par chhuak thei ang tih ka ring a ni. Kan harsatna theuh inhriatthiam sak ila, hmangaihna leh thatna, in unauna leh chhungril taka in zawmna chuan ro rel zawk sela. Keini hnam tlem te, Zohnahthlak te, he khawvel hriata kan inpho chhuah theihna awmchhun “Mizo” tih ah hian lungawi thiam i zir ang u.

44 Responses to “Tu nge Mizo chu…”

1
Fonz Says:
September 2nd, 2010 at 12:10 pm
a in ang ka ti hihi
Report this comment
2
Mr. TSA Says:
September 2nd, 2010 at 12:13 pm
Keimah ang hi Mizo chu a ni mai.
Report this comment
3
tuithil Says:
September 2nd, 2010 at 12:18 pm
Kan ngaihdan a in ang hle mai.”Kei aia Mizo an lo awm chuang lo…” hemi para hi ka duh zua. khimi para ah khian innghat tawp la MIZO i ni mai, tuman an sawisel lovang che…..
Report this comment
4
tuithil Says:
September 2nd, 2010 at 12:24 pm
@ Mr. TSA minlo khalh leh hman ka ti.
Nang chu i dazat, ‘fapa mal ka PI’ :lol: :lol:
Report this comment
5
melody Says:
September 2nd, 2010 at 12:27 pm
Rui lungpuam ang mai ka ni, ka lung zuk tichhe tlat a..!!!
Report this comment
6
chikus Says:
September 2nd, 2010 at 12:28 pm
Thui bawka ziak tha khawp mai…
Keipawh mizo dik tak ka ni….
Report this comment
7
khamrang Says:
September 2nd, 2010 at 12:30 pm
Kei chu Mizo ka ni tlat mai, tlat mai a.
Report this comment
8
chikus Says:
September 2nd, 2010 at 12:33 pm
Foreign boundary amite thleng2 a kan han buaipui fo thin hi chu a chang hi chuan tul lo ka lo ti ve thin khop mai..
Buaina a awm apianga hming langsar tam ber chu khang mite kha an ni leh bawk sia….
Report this comment
9
badboy Says:
September 2nd, 2010 at 12:37 pm
khamranga hi chu mizo a nilo lushei :lol:
Report this comment
10
SeynMizo Says:
September 2nd, 2010 at 12:53 pm
Mizo ka ni a, Vanramah pawh ka chhawm zel ang. Lal Isua pawh Mizo Tawng ngeiin ka bia ang.
Report this comment
11
Kitty Says:
September 2nd, 2010 at 1:15 pm
Tha hle mai, Mizo nih hi nuam e,mizo kan ni kan hmel a tha, kan tum a sang bawk si tih hla ka hre chhuak zawk mai.
Report this comment
12
awmawmpuia Says:
September 2nd, 2010 at 1:31 pm
ka chhiarchhuak vek a, ka pawmzawng tak ani. Pawih/ Lai ka nihna ai hian Mizo ka nihna hi ka dah chungnung zawk.
Report this comment
13
alchemist Says:
September 2nd, 2010 at 2:01 pm
He post hi “Mizo hnahthlak kan ni lo” by Sangliana chhan letna a ni e. Inhnial pawh ka cho.
Report this comment
14
ruata Says:
September 2nd, 2010 at 2:02 pm
Mizo-ah chuan Lusei hi kan dominant ber a, kan mawhphurna pawh a sang, mi thenkhat lusei chuah mizo emaw ti tlat, thliarkar rilru pu kan lo awm leh thin hi a pawi a ni, hengho bawk hi Aizawl hi mizoram emaw ti tlat pawl nen hnam hmelma an nih na a dang chuang lo. Mara leh Lai te tluk lohna tam tak kan nei, anni chuan an hnambil tawng leh ziarang bakah hnam(clan) dang an zah thiam em em. Lusei te pawh hian an tawng va thiam sak velo mah ila inzah sak na chang hria ang u. Mara ngat phei chu sub-clan ah chuan culture vawng nung ber an ni hial ang, kan zia rang tin reng te hi i inzah sak tawn theuh ang u.
Report this comment
15
Olias_sailO Says:
September 2nd, 2010 at 2:10 pm
kan pi leh pu te mawhpuh mai g u…Mizo ber poh kan inhre ciang toh lo nih hi..keini sailo poh paihte sawn kan nih cun…lusei ho bak hi mizo an awm poh k ring nek lo e…poi lo k nu Pachuau ni tho…mizo k la ne ve trok2 e..
Report this comment
16
hlatekhua Says:
September 2nd, 2010 at 2:16 pm
Ka print a, ka chhiar chhuak dap. A tha hle mai.

Sawi ve duh ka neih chu Mizo inti duh ve lo chungchangah khian ‘Lusei pawh ni rawh se, Mizo nih a duh loh chuan Mizo a ni lo’ tih khi. Mizo chu Mizo nih a duh loh pawhin Mizo a ni tho ka ti. Mizo-a chhiar tlak erawh a ni kher lo thei ang. Mihring hian ‘mihring nih ka duh lo, vawk ka ni’ ti ta se mihring a la ni tho ang hian. Mahse vawk angin khawsa ta se mihringa chhiar tlak chu a ni kher lo ang.
Report this comment
17
alchemist Says:
September 2nd, 2010 at 2:19 pm
@ ruata.. i ti dik khawp mai. Inhriatthiam tawn hi kan mamawh chu a ni.

Tun hnaiah Zohnahthlak insuihkhawmna tur hming Chin, etc te an rawn ti a. Mizo an ti dawn lo anih chuan engtikah mah kei chu ka tel ve dawn lo. Mizo in ka nung ang a, Mizo vek in ka thi dawn.

Manipur lama “kan unau te” hi rambuai a awm annih vang pawh a ni ang, an phakar khawp mai a, Tanpui an ngaih laia inti Mizo.. tih pawh khi anmahni tihchhan a ka telh a ni.

Hman kum lawka MPSC in exam a buatsaih pakhat a pakhatna(?) pawh kha Manipur lam mi a ni awm a (ka thiante ka atanga ka hriat a ni), engtin nge Mizoram khua leh tui nihna a neih theih? Khawi khua VC emaw in a lo pe a ni mai thei.

Hna hmuh a harsa em em tawh a, Mizoram chhung ami te ngei paw’n hna tha kan hmuh mumal theih loh laiin, a chang changa inti Mizo ten kan chanvo tur min rawn chhuhsak hi ka pawmzawng a ni lo. Keini aiin an fit zawk a, thil taktak ah chuan keini hi chu kan la no deuh. Anni tan chuan thi leh thau pawlha tran lak a ngaih tawh avangin an tough em em a ni.
Report this comment
18
lushai_er Says:
September 2nd, 2010 at 2:25 pm
Hmanlai kristian hma chuan hnam hian pawimawhna a nei a, sakhua nen a inzawm vang ani. Tun hnu kristian kan nih tawh hnu hian kan inthawi thinte kan ban san ta a, hnam hian pawimawhna a nei tawh lovah ka ngai.

Ti leh thin teh ang, “Van Lal nau ang a tahna Kalvari-ah, an dang chuang love!”

Tumah hi i in thliar lo hram hram hram ang u. 1947-a The great partition kha tawk rawh se, keini thangthar ho hi chuan kan huikhawm lo anih pawn a ti darhtuah chuan tang lo hram hram ang u.
Report this comment
19
MamiPa Says:
September 2nd, 2010 at 2:27 pm
Hmar Varte kani a Mizo kani.Tripura ah khuan mizo hnahthlak engemaw zat an awm.anmahni chuan Baraw Halam (halam hnam 12) an in ti.chung zing a thenkhat chu Mizo ah an hmin,mahse athen chu inti mizo duh miah lo an awm.North East state hrang hrang a kal vel hian Mizo chu min en chung deuh em aw kati.tun ah pawh Nagaland ramri hrulah ka awm,nagaho phei chuan min en hniam miah lo.Mizo zaithiam te hi an hrekhawp mai.Mizo nih hi ava nuam em.Post thra khermai…
Report this comment
20
somte Says:
September 2nd, 2010 at 2:27 pm
Ngaihnawm vawng2!mizo leh zo lo ah hian kan buai reng mai dawn a nih hi:(.Kei chu ka ngaih dan chuan tawngkam deng khawng leh hmusit tak2 a in tih hi kar siam tu ni berin ka hria. Mizoram a piang a seilian theuh tan phei hi chuan nangni mizo in ni lo hmar,pawi,mara etc in nia tih te hi enge a sawt na.
Mi tu maw in “nang mizo i ni lo pawi i nih kha in ram ah hawng roh” mi ti ta se,,court ah cast ka file nghal ang..(kha daih kha ni mai dawn a sin).
Report this comment
21
MamiPa Says:
September 2nd, 2010 at 2:33 pm
vanram ah pawh mizotawng hlir kan hmang dawn pastor pakhat chuan ati
Report this comment
22
alchemist Says:
September 2nd, 2010 at 2:39 pm
@ hlatekhua.. a lawmawm e. I sawi takah chuan ngun taka ka ngaihtuah hnuah i rawn tranna khi a dik viau mai. Khilai khi siam that a ngai a nih khi. Mihring chu vawk a ni thei lovang, vawk angin awm mahse a nihna kha mihring tho a la ni tlat. A dik a ni.

@ Pu Shai-a.. Inthliar loh tluk chu a awm lo, mahse keini Mizo a lungawi te ai chuan a lungawi lo te hian in thliar hi an duh zawk amaw ni chu aw ka ti. Vawi tam tak hawikhawm tu te zingah tan ka lo tum ve tawh a, mahse a lo buaithlak em a ni. Rilru zau tak hi kan pu reng bik dawn em ni?
Report this comment
23
valtea_j Says:
September 2nd, 2010 at 2:46 pm
political boundary pel a inpumkhat tum erawh hi chuan rah tha a chhuah lo in, Mizoram chhunga chengte tan hian thil pawi tak a thlen phah thei zawk mai lo maw? hei h a dik hmel..
Report this comment
24
alchemist Says:
September 2nd, 2010 at 2:48 pm
@ MamiPa.. Kan rilru a in ang e.. Burma ramah chuan Khiangte hi Ngawn an ti a, College kan kal laiin Burma atanga rawn kal Mizo nula pakhat, Khiangte ve tho a lo awm a. Ngawn (Khiangte) khua a kan kal chuan mahni hnam tawng pawh thiam lo min lo tia, min lo nuihsawh nasa mai, a ti a. Kan nui liam ta mai mai a.

Ka thianpa hi Paite a ni a, PG kan zirlai in Paite ve tho, mahse inti Mizo lo in Paite tawng a thiam loh avangin a lo nuih a, “Kan khua ah chuan rawn kal la Phung an ti ang che, Phung, phung phung” a’n lo ti pek a. “Phung ka ni lo, Mizo ka ni” tih pah in an thram a nih kha.

Naga mai bakah Arunachali te, Khasi te, Tripuri te hian min lo dahsang deuh. Kan thiannu pakhat, Arunachali phei chuan Dictionary kan nei te hi mak an ti nasa khawp a, in va advance ve min ti nghe nghe. Mizo tawng hi a hlu a, Mizo nih hi a nuam a ni.

@ somte, a ropui e… AMEN!!!
Report this comment
25
somte Says:
September 2nd, 2010 at 3:10 pm
@almemist..;)!!
Ka thiannu 1 hmar hnam pawh voi khat a thiante hmar hnam tho manipur lam chhuak te inah a leng a.A thiannu nu’n hmar tawngin a lo bia a.Ka thiannu’n a lo thiam si lo,a thiannu nu chuan alo hauzek a sin le:P.
Thinrim takin ka thiannu chuan a hnu ah a sawi leh a,”ka pa te chhungkua tumah hmar tawng a tawng ka hre ngai lo,an thiam tih pawh ka hre lo” a ti nuah2 ringawt.:).Miin a leng fuh lo no 1..ni hialawm e.Lolzz
Report this comment
26
DXBFreak Says:
September 2nd, 2010 at 3:26 pm
vai ho poh hi vai kan tia an sawi sel chuang silo a, ngatinge a tlem zawk mizo te hi, mizo nih kan duh that vak loh le, Kei chu mizo intih hi nuam ka ti, miramah ngat phei chuan, min min hriat vak loh vang hian, kan chan chin hi hriat nuam an ti in, kan tawng hi ngaihthlak nuam an tisin, mizo ni duh lo ho zawng zawng kha in hming tawh ah non -mizo dah zel tawh rawh u, let see how it goes
Report this comment
27
Viking Says:
September 2nd, 2010 at 3:28 pm
Hetiang TOPIC ka hne zia hi awwwwww…Van-lal-alchemist,MIZO nihnah i chiang lo em anih kha hetiang ang rilru te i la putt,…

Ka lawm e

–LVK
Report this comment
28
alchemist Says:
September 2nd, 2010 at 3:35 pm
@somte ka thianpa thil tawn pawh chu kan nuih pui nasa mai a, phung-a kan tih phah a, kan hlim tlang ta viau..

@ DXBFreak Says: “mizo ni duh lo ho zawng zawng kha in hming tawp ah non -mizo dah zel tawh rawh u”

Haha…

@ Van-lal-(Vai)king….

Lo ning lo hram rawh. “Mizo hnahthlak kan ni lo” tih chhan letna ka tih khi. Khatiang kha chhanlet loha a awm ka phal hlei nem!!!!
Report this comment
29
bbney Says:
September 2nd, 2010 at 3:40 pm
Nikum hmasa khan inkhelin mi college ah kan kal a, an team ah khan Mizo an lo awm ve a. Mizo in ni em kan han tih chuan “Ni lo, Hmar kan nia” an ti keuh. “Keipawh Hmar ve tho ka nia, chu Mizo in nih reng chu” te kha ka tia, an thengthawngah a kal lem hlei lo a. Khatiang ho kha chu Mizo pawh ka ti duh lo. Manilomaha intih Mizo ve nak alaiin, Hmar theuh theuh kan lo inang lo ngei mai..
Report this comment
30
alchemist Says:
September 2nd, 2010 at 4:02 pm
@ bbney.. nang pawh chu Phung i nih chu..

Hetah hian Pu Sangliana’n hetiang hian a post a

https://misual.life/2010/08/.....kan-ni-lo/

Inhnial ka cho viau asin maw le… Darkar 3 ka nghak ta, ka nghak chhuak zo lo, a hman hun leh ka hman hun a inang lo anih dawn hi. Ka’n chhuahsan mai ang e.

Mizo ka ni ka lawm e, kan hmel a tha, kan tum a sang bawk si!!!
Report this comment
31
bucko Says:
September 2nd, 2010 at 4:05 pm
Post a thra in comment pawh chhiar a nuam hle mai….
Nia pawih ho zingah pawh mizo a in baptis hlei thei lo kan la awm nawk mai.. mahse pawi lo ti suh u… dik tak chuan helai ah chauh hian a ni an mizo duh loh mai ni. Silchar han thleng chian sel “ KEINI MIZO CHU……, an ti tho tho. Chuvangin post hmasa ang te kha chu men ah thlak chi. Mizo nih a nuam a, kan hmel a thra a, kan tum erawh tunah chuan sang lo tak tak a tam tawh in ka ring.. he he he
Report this comment
32
tuithil Says:
September 2nd, 2010 at 4:31 pm
#29 hahaha :lol: :lol:

Keipawh hmar mahni tawng thiamlo ka nia , Mizo dik tak kan hnam chu hmar a ni mai. Delhi kan thiante ka tlawh tum in an then awm te kha hmar tawng an hmang a hmar an nih hi an ti, an ni pawh an hmar awm ve hmiah, ka’n zawt chiang chu chhakchhuak anlo ni daih. Keimahni ni a kan in ngaihdan hi ni mai.
Report this comment
33
H.Vangchhia Says:
September 2nd, 2010 at 4:31 pm
Khiangte Mizo a a ziak tello chu dangdai hle mai (kala chhiar lo a ziak hi). Mizo chanchin ziakna tam takah hian Mizo te chu Ramhuai hlauh vangin tih lawmnan an inthawi thin tih a ni tawp. Kan chi (kan hnam) thlahtu te kha Miuam tih an ni thin a, an ni kha ramhuai hlaua inthawi ve ngailo an ni tlat. Sechhun kha an thlahual ve na ang, inthawina lam an neih ve chu a ni mai, inthawi ala nilo zui. Mizo ah chuan Sailo hi hnam naupang ber an niawm e
I thianpa, MA (Mizo) chuan Duhlian tawng hmang/ a tawng a lo hria aniang chu maw! Mizo hnam hrang hrang leh tawng hrang nei thiau in Mizo tawng a Pathian kan han be tlang thei leh ingngeih tak maia kan titi ho thei hi a hlut zia ka man thiam tulh tulh ta mai. hetiang tur reng hi a ni.

Chhimbal hian rawng pakhat chauh nei ta se mawina a nei tlem viau in ka ring. Rawng chi hrang hrang hmun khata awm khawm chuan a mawina hi a ti zual a ni. a dik a ni.
Report this comment
34
Universaldonor Says:
September 2nd, 2010 at 5:46 pm
Ziak tha khawp mai. Nihnaah hi chuan duh a thlan theih loh a, kan duhloh pawn kan ni tho tho. Asian ka nihnate, mipa ka nihnate, mizo ka nihnate hi ka duh leh duhloh vanga ka nihnate nilovin, ka nihna a nih avangin duhlo engang mah ila ka ni tho tho.

Ni e, Zo hnahthlak zawng zawngte kan in unauna kongah chuan general tak chuan kan pawmtlang a, mahse kan inpumkhatna daltu bera ka ngaih chu kan tawngte kan inhmuhsitsak thinna hi a ni. Hnamte zawkte kan khawpui ah an tawng hmang ngam manglo khawpin, an tawng kan hmuhsit sak a, hei hian intih mikhualna a thlen. mahni tawng inthlahrung taka hman a ngaihna hmumah inunauna tha a awm theilo.

Hmun tamtakah hian mahni tawng ngei hmangin kan inbe lawng lawng a tumahin min hmusit ngailo, an tawng thiam lo taka kan hman ve pawhin, i va pai ve, i tawng a awn, tih vel a mi tih an ching ve lo. Aizawl khawpui ah hian Hmar, pawih, mara etc te hian zalen takin an tawng an hmang ngam miah lo nia. Inhmuhsit loh nachang kan hriat veleh inpumkhatna/ changkanna rahbi kan rap ve chauh ang. ka hmuh ve dan mai a ni e..
Report this comment
35
Zephenath Says:
September 2nd, 2010 at 5:56 pm
Tha hle mai.
Mahse, chung hnam peng hrang hrangte min thui khawm tu tur leh kan zavai atana hman nuam tak tur tawng pakhat “Mizo tawng” Pathianin min pe hi a lawmawm ka ti. Hetah hian Mizo hnam peng hrang hrangte pawh kan lungawi thiam a tha hle in ka hria. HETIANG TUR HI A NI.

Mizo nih an duh lo anih chuan Mizo in ni kan tih luih reng a tulin ka hre lo. Kei chuan Mizo nih ka thlang a, Mizo ka ni mai. Lusei pawh ni rawh se, Mizo nih a duh loh chuan Mizo a ni lo. Tunlai khawvelah chuan hetiang hian ngaihdan fum fe tak kan kalpui hi a tul in ka hria a ni. HE HI KA NGAIHDAN CHIAH A NI. THA PAWH KA TI.

Political boundary pela inlungrual theihna ber chu TAWNG KHAT hman tlan chiah hi a ni thei ang. Khawiah pawh awm ila, he MIZO tawng kan tih ber hi hmang lo/hmang duhlo te nen chuan inlungrual chu a har deuh ang. (Thisen lamah Mizo nih mah ila) Chuvangin hnam bil tawng te hi a thiam tan chuan a tha e, a hlu. Mahse chumi hrulah Mizo inti tena kan hman tlan tur kan inlungrualna awm tur ‘MIZO TAWNG’ a awm a, hei hi hmang theh ila..kan inlungrual tlang zel a ni mai.
Report this comment
36
VaiVa Says:
September 2nd, 2010 at 5:58 pm
@alchemist: Rawn ziak tha hle mai. Tunah hian ka bulah Kuki tlangval a awm a. Mizotawng pawh a thiam khawp mai. Mahse, Mizo a sawi dawn hian, ‘nangni Mizo ho’ hi a ti deuh ziah a, ka hau hrep zel! Buaithlak thei mang e.
Report this comment
37
Tetea Says:
September 2nd, 2010 at 6:10 pm
@a post tupa, Mizo tih leh Lusei tih hi i hriatpawlh a ni lo maw?
Report this comment
38
somte Says:
September 2nd, 2010 at 6:31 pm
@34,i va han ti dik tak em!:)ni chiah tawng kan in hmuh sit sak thin na te hian kar a siam a lawm.An aw phawi lo danglam deuh hlek pawh nise.Mizo tawng anih phawt chuan in nuihzat kher a tul hleinem.An mizo tawng hman an ti awn lui tral te anih loh chuan.Kan lo kal chhuahna hriat nan pawh a tha riau mai.:).
Tih a chuan,kan ram ngaisan american sap tawng hmang ho pawh an accent a in ang vek chuang hleinem,dik lo ltk a thil kan lam a nih lem lo chuan han in nuih zat a in hmusit phah nan hmante hi chu rah tha a chhuah lo chiang ang.
Ka lawm e,:)
Report this comment
39
sparta Says:
September 2nd, 2010 at 7:35 pm
Ka comment chak toh lutuk a comment na zawng zawng chu ka chhiar chhuak peih ta lo mai. Aw le a hmasa ber in a ziak tu hian kei Paite pa la naupang ve tak(zirlai) kan collage a inti mizo em em hi ka rilru a hneh lutuk a min vel lo chauh a ni tih lo hria se ka duh a, theih phei se chuan kut suih a chibai tak ka nap a ni. Eng pawh ni se kutsuih loh chibai tho tho o..hehehe.
Comment 15 na a Olias a khan Paite sawn a nih avang in a Mizo nih na kha a dal deuh ah a ngai emaw ni ka ti deuh mahse a nu Pachuau a ni tho lom, lo ni lo poh nimahse Mizo a ni a Paite sawn i nih avang ringawt khan Mizo i ni lo chuang lo tih i hriat ka duh.
He tiang thu thra hi rawn ziak zel teh u. Nakin lok a Mizoram a hruaitu la ni tur ten an rawn chhiar a, Hnam a an chian zel zawk nan.
Report this comment
40
Msi Says:
September 2nd, 2010 at 8:56 pm
Eng hnam pawh chu lo ni sek sek se..a tlawmngaiha..aia upa a zah a..khawhar in ah kal nachang a hriat a..Mizo nunin a ken tel tih tur a hriat chuan MIZO ka ti mai..Nu leh Pa te thawh chhuah leh siamsa tlai tawk a phun chunga ei leh thu zawmlo ho leh Mizo nun nupuilo ho hi..Mizo ah pawm har ka ti..
Report this comment
41
V-a_USA Says:
September 3rd, 2010 at 12:36 am
Alchemist, Khiangte Mizo a Pu Liangkhaia’n a chhiar tel lo chu lo chu kei pawhin mak ka ti. A ziakhmaih ve mai mai niah ka ngai.

Irrawdy (Burma lui) kam vel leh Arakan leh Chitagong a tun thlenga la cheng, Mizo hnam chikhat “Khiang/Asho emaw inti, mahni tawng pawh la hmang reng hnam an awm ngei mai. Mizo Underground Army a heng ram lo fang tawh unau pian pui thil chik tak tak mi ka nei a, heng ram lo tlawhtawh ten an sawi dan chuan Mizoah an inchhiar vek. Chung te nen chuan Mizoram a Khiangte inti te hi in in ngaihpawlh mai mai zawk a ni lo maw? an ni’n Khiang an inti a, Nangni’n Khiangte. Nge chhungkhat laina in lo ni ru reng zawk le? A engpawh chu ni se Mizo in ni.

Hmar hovin chhungkhatah dah an duh che u anih pawhin Hmar chu Mizo hnam an la ni ta tho a, in luck bik mange ka ti mai “Kan chhungkua ah lo tel rawh u” ti a mi te’n kaihpen tuma an auh luaih luaih hnam Khiangte nih chu a vanneihthlak zawkah ngai rawh u khai. Khiangte chu Mizo hnam dik tak an ni.

Census of India a Mizoram List of Scheduled Tribes and Non-Mizo ziakna ah Khiangte chu Mizo hnam diktak list ah ziah tel in ni. Chuta “Mizo” an tih zinga mi chu kan ziak chhuak ang e. An ziahhmaih tam tak an awm ang tih erawh chu hriat nghal a tha. Chuvangin etc. an belh mai anih hi. Enrawh le:

1. Lusei: Including, Sailo, Palian, Zadeng, Thangluah, Rivung, Chenkual, Rokhum, chawnglul, Pachuau, Hauhnar, Chhangte, Hrahsel, Chhakchhuak, Tochhawng, Vanchhawng, Chawngte, Hnamte etc.

2. Ralte: Including Khelte, Siakeng, Kawlni, Lehchhun etc.

3. Hmar (ST): Including Hrangchal/Lawitlang, Zote, Khawbung, Ngur, Thiak, Leiri, Lungtan, Pakhuang, Darngawn, Biate, Hmar Lusei inti etc.

4. Khawlhring
5. Khiangte
6. Chawngthu
7. Chawhte
8. Ngente
9. Renthlei
10. Tlau
11. Pautu
12. Rawite
13. Zawngte
14. Punte
15. Vangchhia
16. Thahdo/Thado Kuki inti (ST): Including, Sithloh, Khuangsai, Haukip, Changsan, Kipgen, Singson, Doungel, etc.

17. Pawi/Lai (ST): Including, Hringlum, Sunthla, Fanai etc.
18. Paihte/Paite (ST): Including, Dapzar, Vuite, Sukte etc.
19. Darlawn
20. Hrangkhol
21. Lakher/Mara
22. Zo/Zou
23. Sakechep
24. Kom/Kawm
25. Vaiphei
26. Chimte/Siamte
27. Mualthuam
28. Kaihpeng
29. Langrawng/Ranglawng
30. Chiru
31. Aimol
32. Anal
33. Purum
34. Chawrai
35. Bung
36. Pang/Pangkhua
37. Tlanglau
38. Bawmzo/Bom
39. Dawn
40. Rengte
41. Vanchiau
42. Asho/Khiang
43. Khawl
44. Tikhup
45. Tarua
46. Chho
47. Khumi/Miria/Miu

Non-Mizo
1. Garo (ST)
2. Dimasa/Kachari (ST)
3. Hajong (ST)
4. Chakma (ST)
5. Khasi & Jaintia (ST)
6. Naga (ST)
7. Mikir/Karbi (ST)
8. Man (ST)
[Source: "Mizo Darthlalang - Mizo chu tute nge?" by Rev. Lalramliana]
Report this comment
42
V-a_USA Says:
September 3rd, 2010 at 12:45 am
Rev. Ramliana sawi danin hnam thenkhat chuan Mizo atangin min pemsan nual tawh. Dai, Aimol, Chiru, Kom, Purum, Anal/Anan, Chawhte, heng hnam te hian an ram awmna a zirin Mizo ah inchhiar lo an tam tawh a, mahse Mizoramah hian engemaw zat an la awm niin Rev. Ramliana’n a sawi.

Assam Regiment Center-Shillong a ka awm laiin Anal hnam Naga inti tlat an tam mai. Manipur, Naga ram hnaihah an awm avangin.

Hnam zawng zawngah Sapho hnena hnam hming sawi hreh ber chu Anal hnam hi an ni
Report this comment
43
virthli Says:
September 3rd, 2010 at 4:06 am
Mizo ka nih avanga ka chhuan tak em em ka hre hran lo. A tlangpuiin kan hmel chhe si, kan kawngpui te hi a chep bawk si. Corruption leh ruih theih thil chi hrang hrang ilo kan la uar ve leh zek bawk si. Hnam dang aia han inchhuan falna bik turah phei chuan ka ngai lo.

Mizo ka nihnaah erawh chuan ka lungawi tawk viau lawi si. A hnam a zawng chuan han awh bik leh ni zawk ta ila tih chu ka nei leh hauh silo. Ka hmel chhiat vang emaw, kan hnam vang emaw ti a ngaihruat theih tura hnam dangin min hnualsuat ni a ka hriat vaih erawh chuan ka ngaithei thrak bawk si lo. Hetiang rilru pu ni awma ka hriat hi chu, a tu a pawh niraw sek sek, a let 20 velin ka hmusit let ve leh zek si.

Inchhuang silo, ZOLUNGAWIA ka ni deuh ber awm asin.
Report this comment
44
Rempuia Ch Ralte Says:
June 10th, 2011 at 8:19 pm
Rev Liangkhaia khian Khiangte hi MIZO ni ve lo angin a ziak lo. A ziahdan tlangpui kan tarlang ang e:

MIZO HNAM HRANGTE:
1. LUSEI (Lusei chi peng hrang2 a ziak tel)
2. RALTE (Ralte chi peng hrang2 a ziak tel)
3. HNAM DANGTE (Hemi hnuaia Mizo hnam a ziah te chu)
(a) KHAWLHRING
KHIANGTE
CHAWNGTHU
CHAWHTE
NGENTE
RENTHLEI
TLAU
(h) PAUTU
RAWITE
(j) ZAWNGTE
VANGCHHIA
PUNTE
(m) HMAR
PAWIHO
PAIHTE
number 3 hmingah “hnam dangte” tih a hman avang khian threnkhatin an ngai kawi palh mai2 a niang. A thupui ber, number a pekna chhan hi MIZO HNAM HRANGTE tih a nih khi, chhiar hmaih chi a ni lo. A chunga tarlan te zong2 khi REV LIANGKHAI lehkhabua MIZO te chu an ni.

Ziahbelh ang:
HMAR (hengte hi Pu Liangkhaia chuan HMAR hnam pengah a dah)
1. LAWITLANG – HRANGCHAL
2. ZOTE
3. KHAWBUNG
4. NGURTE
5. THIAK
6. LUNGTAN
7. LEIRI
8. BANZANG
9. PAKHUANG
10.DARNGAWN
11.BIATE
12.HRANGKHAWL
13.HMAR LUSEI
14.THAHDO
PAWI leh PAIHTE pawh an hnam peng a la ziak duah tho.

Chhiar chiang ila (a dah dan a dik leh dik loh chu thudang ni se), MIZO hnahthlakte kan kim viau lo’ng maw?
Report this comment