mi(sual).com

Hun engemawchen atang khan Misual. com hi ka lo hmelhriat ve tawhin, inthlahrung tak chungin misual- ho aw leh ka te hi ka lo bel bul ve tawh thin a. Misual. com chhunga Misual awmkhawm te pawh hi an SUAL tha hlawm hle in  ka hre thin. He Misual bawma MISUAL ho hian zofate chenna khawvel hi chu a fan chhuah vek pawh ka ring a.

In thu leh hla thiam hlawm dan em em te leh, in thil hriat dan zozai te ka ngaihtuah thin a, tin, mizoram in vei zia leh a chhunga cheng zofate hmasawnna tur a kawng tinreng a rilru leh ngaihtuahna in sen thin zia te ka ngaihtuah hian a ropui ka ti in min hneh em em thin. Chutiang chuan ngawi rengin in thu leh hla te hian min lo awitlei ve thin a ni.

 Amaherawhchu,  keini chu Tuipui chhung daiha khawsa kan nih avangin,  mihring- ah pawh “Misual ho” zingah hian hmun lailum emaw, hmun thuk tak emaw chang ve turah ka in ngai ngailo a.

Tin, tui hnuaia khawsa thin kan nih avangin in thil hmuh leh hriat ang zawng zawng hi ka hre ve dawn lo tih pawh ka inhre bawk a, chuvang chuan in zinga tel ve hi ka tum ngailo a, in rilru sawrchhuahna ka lo chhiar chang te hian ngawi rengin ka kalsan veleh mai thin a ni.

Zankhat chu tui hnuai puk chhungril takah mahni chauhva ngawi renga ka hahchawlh diai diai laiin ka ngaihtuahna-ah Misual fuankhawm ho chung chang hi alo awm a. Tui hnuaia awm ka nih avanga inthlahrung taka ka awm  reng hi  ka tidik chiah dawn em ni aw tih te ka rilru ah alo awm a.

Hringmi khawvela misual ho thil hmuh leh hriat ang zawng zawngte hi hre velo mahila,Tui hnuai atanga hringmi khawvel ka hmuh dan leh ka hriat dan te hi ka sawi chhuah veloh chuan heng misual ho hian min rawn hmuhsak ve thiam bawk silova tiin, in zinga chen ve theih in beisei in khawmual-ah ka rawn zuang chhuak ve ta hlawl mai a ni. Ka boruak khawl khawmsa a zawh hun ah Tui hnuaiah ka lut leh zawk thin ang a, tichuan misual ho hi kan kawm ve tak tak tawh teh ang ti in rilru ka siam ta a ni.

Chenna hmun in anglo na na na chuan kan thil hmuh leh hriat pawh a in anglo hle dawn a.Tun tuma Misual ho zinga ka sawi duh chu Tui hnuaia khawsa ho min tihduhdah zia leh, chung zingah chuan nangni “MISUAL” ho hi a bultumtu te zingah in tel ve ka rin tlat thu leh, sual ka lo tin thin zia che u thu hi ka han sawi ve duh a ni.

Ka hming chu “Nghatun” a ni a, mizoram sangha zinga a tui ber pawl ka ni thin. Tunlai thangthar ho zingah hi chuan ka hming “ Nghatun “ ai hian in vulh chawp Common Carp, Roghu, Silver Carp etc te hi a lar tawh zawk fe ka ring. Hei hi a chhan chu nangni misual ho hian min dimdawina nei miahlo va Bomb, Tur leh Current hmangte a min  sawisak thin vang a ni.

Thingtlang khua hmun kilkhawr tak anih lai kha chuan kan chenna tuipui pawh hi a ralmuang in hahdam takin keini sangha te pawh kan cheng thin kha a ni a. Amaherawhchu, in tunlai tawnga “Development” in uar hnu leh, kawngpui tha in neih tan atang khan, nangni “MISUAL” Officer rual leh, sum leh pai ngahho khan nuam chen nan  min rawn hmang tan ta a nih kha.

Khawpui atangin Pisa chawlh in neih apiang khan in lirthei hmangin thianza ho nen in rawn kal a, in hmanraw neih ang ang hmangin mi dimdawihna nei miah lovin min rawn sawisa thin kha a ni a. Ka nu leh pa leh, ka u leh nau te, kan fate naupang te te chen in vawi leh khatah kan thi mang puk puk ta mai thin a ni !

Mihring khawvel a in neih ang “Calendar” te hi lo nei ve thin in, in Pisa chawlh hun tur te hi lo hrelawk thin ni ila chuan, hlate khuaah, luipui lian zawk lam panin kan lo tlanchhe ve thin tur kha a nia le

Ka nu leh pa tangnema ka awmlai atang tawh khan  ral hlauhawm laka inven dan tur te hi nasa takin min lo zirtir tawh thin a. Nghakuai leh Thang (Len) chi hrang hrang laka him dan te, nangni ang ho misual rualin  kan awmna tui in rawn dai veleh a tlanchhiatna hmun tur leh, ei leh ei loh chi thlengin min lo zirtir tawh thin a.

Khatiang hmanraw hmang khan kum tam tak chhung chu helai tuipui ah hian hlim takin kan lo khawsaho a,chhungkaw hung tak pawh kan ni hman tawh reng a ni. Engemaw changa kan unaute mihring ho nghakuai leh Len-a an awh changa kan sa tui an tih thin zia an sawi kan lo hriat te hian kan hmulthi a ding uai uai thin a ni.

Amaherawhchu, tunlaia in thiamna leh in hmanraw neih hi chu kan nu leh pa te pawn an la hmelhriat ngailoh a nih avangin , ral hlauhawm laka inven dan tur min hrilh te kha  a hman tlak ta lo a. Tunah chuan tui chhung puk ril ber berah te pawh awm mahila min rawn khawrh chhuak zel ta mai si a, kan tan himna hmun reng reng a awm ta lo a ni.

Ka nu leh pa te bakah,ka u leh nau zawng zawng te chu min tih hlum sak zo vek tawh a, kei hi vanneih thlak takin in suah sual zia puang chhuak tur hian engtin tin emaw ka lo la dam hram hram a nih hi. “ Ka la dam hram hram “ ka tihna chhan chu kei pawh hian Bomb leh Current lakah hliam na tak tak vawi engmawzat ka tuar tawh a, mahse ka la dam hram hram a ni ber e.

Ka hmalam hun tur ka ngaihtuah erawh chuan ka rilru hi a buai tak zet thin a ni. Tunah hian chi thlah pui tur pakhat mah ka nei tawh lo va, kei hi ka lo upat a ka tar thih hma ngei hian chi thlah ve hram hram chu ka duh hle mai a. Mahse, Misual ho nawmsip bawlna mai mai tur atan a han in thlah pun leh pawh chu ka ngai ngam bawk si lo.

“Ka chenna tuipui hi chhuahsan in Tuifinriat lam pan daih teh mai ang” te ka ti thin a, mahse, kei tal hian Mizoram lui hi ka chenchilh hram hram loh chuan keimah ang midang tumah an awm tawh bawk si lo. Ka rilru a hah in a buai hle a ni.Heti hian awm reng ila, in hmanraw neih hlauhawm tak tak hmanga min rawn ti hlum leh a nih loh chuan, nakinah Tuifinriat atangin ka chi thlah pui tur hi chu an rawn kal leh mai chu ka ring a ni.

Nangni Misual rualho  hian min humhalh ve tawh teh u. Tuna min humhalh in tum dan hi chuan a kawng a bo tlat ! Mipui hmaah humhalh kan tul zia in sawi vak vak a, nangmahni ngei hian in thusawi in bawhchhe leh si thin a ! Min humhalh duh tak tak anih chuan nangmahni ho ngei hian bul tan ula, tichuan midang chuan an zawm ve mai a rinawm.

Tuipui chhung atanga kan thil tawn leh nangni khawmuala chengte thil tawn in millo thin lutuk avang hian kan inkawmngeih theih tak tak dawn em ni aw tih te ka ngaihtuah thin.

Engpawhnise,  ka boruak khawlkhawm sa a zo va, tui hnuaiah ka pil leh phawt mai ang e. Mangtha vek ule.

Similar Posts:

• Thalaite u…
• Nu hmangaihna. A va mak em!!
• Hriat nawn leh atan
• Chanchintha Darthlalang II
• Ka fak a che

Recent Posts:

• Thlarau Mak Tak
• Hostel Rules
• Kolasib ah Photographic Workshop
• A kin ta – Part 1 (Good Friday Pual)
• Krista Thihna leh a hlutna.(Good Friday pual)

This entry was posted on Thursday, August 18th, 2011 at 9:30 am and is filed under Mizoram, Nature. You can follow any responses to this entry through the RSS 2.0 feed. You can leave a response, or trackback from your own site.