mi(sual).com

                                        Theihai buk hnuaiah chuan ka chauh em avangin ka thu hahchawl a. Boruak a nuam hle mai a, thlifim thaw heuh heuh leh sava hram te chuan min awi mu lek lek hi a ni ber a; ka thlang kawr a tui luang ri her her te  leh a piaha tlang hring mawi tak tak te chuan lung an ti awi chiang kher mai.

A ramhnuai rim hrim hrim te kha a rimtui em em a, ka thlang lawk a fartuah par leh rawthing hung chhah tak te chuan hah an chhawk kher mai. Ral lehlam panga hmawng rah tlan sava te chu an hram thiam kher mai a, thehlei leh chepa te hram pawh fiah vaklo chuan ka hre pha ve a.

                                    Chutia ka mit leh ka bengin a hriat duhzawng te ngaithla leh thlir renga ka awmlai chuan thawk leh khatah ka awmna atanga hlam nga vel lek ah hian meialh hi a rawn thla ringawt maia. Ka rin phakbak leh ka beisei miahloh thil alo thlen avang chuan ka thuthmun atang chuan ka zuang sawn dawrh a.

Chu meialh chu khawia tanga rawn thla nge a nih pawh chu ka hre lem hlei lova, thelh tumin ka tlan phei ta a; mahse, thelh theih rual lova chakin a sir vel a hnim ro awm te chu a kang kai ta a! Puihna dilin han au ve bawk mah ila chu ram reh tak ah chuan ka aw thangkhawk bak min chhawn tu an awm bawk silo!

Ka mangang chuan ka sira changel kung chu kan chhawk hmawk a, chutih rual rual chuan thisen hi alo chik chhuak tuar maia, ka hmai zawng zawng chu thisen in a bual vek a. A ngaihna ka hrelo hle a, ka iptepui a ka tui pai chu phawrh in ka hmai chu phihfai ka han tum a, mahse ka zotui pai pawh chu alo nu vek a, a rim chhe em em mai a chhuanso hlim ang mai hian alo sa em em a.

Leiah chuan ka paih a, mei chhuahna lam pan chuan ka tlan phei leh ta a, a kangkai tam hma in ka thelh vat a ngai tih chu ka hre reng mai si a. Thingkung a sava leh rannung dang awm reng reng te chu hlau em em hian an phi chung maia, a then an thlawk a, a then mei chuan a kang hlum a, an rak tel tul mai a.

                                    Chutia mangang leh thlabar em em a ka dinlai leh duhthlan tur dang nei lova ka awmlai chuan engkim tithei kan Lalpa hnena a khawngaihna dil tur in lei ah chuan ka thingthi ta a. Ka mangan vang nge chu ka hre lova, ka mit ah hian mittui hi a lo luang zawih zawih a, ka theih tawp a ring in Pathian ka au ta a; mei khu leh boruak lum sa up up te chuan keimah ah awmzia an nei meuh lo.

Ka theihna zawng zawng nen Pathian ka au a, ka zam em em a, ka mangang a, ka khura, ka tap a. Khatiang em em a tihtaka Pathian ka auh kha kala hre ngailo. Ka tawngtai zo ka han ‘AMEN’ chiah  van lam ka han en chho chu khawpui hi alo ri dur dur a, ruahpuivanawn a rawn sur ta le!! Ruahsur chu a nasa kher maia, ka pian hnulama ruah sur ka hmuh tawh ah chuan ala nasa berin ka ring.

Ka thinlung chu lawmna hla sain a zai a, ka harsatna te chuan min kiansan tawh tur ah ka ngai a. Mahse, ka mit ngei a ka hmuh nisi ah chuan ka awih thei tlatlo mai!! Khati khawpa ruah sur nasa khan meipui chu a thelh thei hauh lo mai!! Mei alh chu a nasa tual tual a, tlang leh ruam zawng zawng ah te chuan a kangkai a, sava hram te chu an reh thuap maia, a khu a nasat em avang chuan thawk a harsa em em a, ka sa himna tur zawngin lui kawr ruam lam pan chuan theih tawpa chak in ka tlan thla ta a.

                                    Lui kawr ka zuk thlen chuan tui ah chuan ka in chiah dai a, tui te chu ka in a. Chutia ka awmlai chuan ka hnungah hian ka hming a min ko ri hi ka hria a, rang deuh mai in aw lo chhuahna lampang chu ka en nghal a. Mak deuh mai in Sihal tar tawh tak buang thuk mai hi alo ding reng mai a, ka mit ah chuan thip hmel zet hian min en reng mai a. A mit mengah chuan a lungawilo a ni tih a lang reng mai.

Ka awmdan chu thawnthu a ang ka ti hle a, in ben harh ka tuma mahse awmzia a nei thei silo. Chu sihal pa chuan ka hming bawk chuan mi ko leh a, eih na chang pawh ka hre tawhlo, hlauh tur nge hlauhloh tur tih pawh ka hre thiam tawh lo! Ka buai nuai maia, ka thinphu a rang tual tual a, chu veleh sihal pa chuan, “kei hi kan chi a a dam awm chhun ka ni tawh, ka nupui fanau te chu nikum khan ka chan tawh a, tunah kei chu thih mai hmabakin ka awm leh bawk.

Kan chenna in hala, kan thil tlan leh kan tui tlan te inti bawlhhlawh a, silai leh hriamhrei nen min veh thin a, kan tan chuan dam khawchhuahna a awmlo. Nawm leh zualna in um avangin mi tam tak nun intih hrehawm saka, thing leh mau na tuar aw chhuah ri te hian ka beng an ti kham thin a, kan unau te thisen chhuak zozai te hian ka taksa an ti chaklo zo tawh!

Hmanah chuan mihring te bula awm hi kan thlahlel em em thin a, kan himna leh ka’n aia sa hlauhawm zawk te laka min chhanhim tu ah kan ngai thin. Mahse tunah chuan nangmahni hlat thei ang ber a kan vahbo hi kan himna leh kan damkhawchhuahna tur chu a ni tawh a ni.

Tuna lui tui tui ti taka I in te kha nakin maiah chuan in tlakloh, tui bawlhhlawh ah ala chang thuai dawn a, kan chhaka mual hring mawi tak tak te khi thlaler tui hna awmlohna ah ala chang thuai dawn a ni. In tu leh fa te anlo pian chhuah hunah in hmaiah kawk in anchhia an la lawh ngei ang che u. ” ati a.

                                  Chu thu a sawi zawh chuan thil thlen dan kimchang  leh engmah he mi chungchangah hian thil hriat ka neih ve loh thu sawi tumin alam chu ka pan hnai a,mahse, mak deuh main sihal pa chu boruakah chuan a tham ral ta daih mai a, ka hlau lutuk chu awm ngaihna pawh ka hre lova, ka thinphu a rang tual tual a, ka hmulthi a ding sung sung a.

Chu veleh chuan aw bawk  hi ka hre leh a, “Lalkulhpui, ani em em tawhlo tho vat rawh,” a rawn ti a, ka harh  zawk maia, ka han meng chu chhuatah bedsheet leh blanket sin hlun in ka lo mu reng mai a. Ka muamang hi alo ni a. Khum atanga ka tlak lai pawh chu kalo hrelo ni ngei tur a ni, mang tha tak nilo mahse ka mu tui thawkhat ni ngei tur a ni.

 (Note: Kan rama thing leh mau te, nungcha leh ramsa te hi kan humhalh lo a nih chuan a tuar tur chu keimahni tho kan ni tih hi I hre theuh ang u. Tuna ka mumang pawh hi kan hma hun hrilhlawkna a ni lovang tih a sawi theih loh.

Nungcha te leh thing leh mau te hi keimahni ang bawk a nunna nei ve, na leh hrehawm te hre ve tho an ni a, an mahni tan chauhva nung turin Pathian in a siam an ni bik lo. Keimahni, mihring te min tihlim tur leh kan nun ti famkim tur a a siam te an ni tih hi I hre reng thin ang u.

Sihal pa in a sawi ang khian tuna kan ram ngaw mawi tak tak tehi kan humhalh that loh chuan nakin ah chuan thlaler tuihna awm lohna ah ala chang ang a, kan tu leh fate tan chenna tlakloh ram alo ni mai dawn a ni.

Chuvangin, a bik takin zirlai ten tihtur kan ngah em em a ni, kan pi leh pu zir-thiamna in a tih bengvar ve loh te hrilh hriat leh kan society a nungcha leh thing leh mau humhalh hna thawh hi kan mawhphurhna a ni. )

 “Khawngaihin Lalpa thil siam te hi anmahni duh dana ro in rel turin thu neihna tlem te taI I pe ve ang u, keini aiin an tan tha chu an hre zawk si a.”   -  Michel de Montaigne

 “Kan chenna lei na tuar hi kan ti dam a nih chuan keini pawh kan inti dam ve tih na a ni ang.”  – David Orr

    By : Dustin Lalkulhpuia

Similar Posts:

• ‘An ti’ tih chu huat loh tur
• Min thlah la ka sawi ang
• Pathiana mihringte dinhmun;
• Tuarte Tuarpui – D. Lalpuia
• Politics- Pathian thil nge khawvel thil.

Recent Posts:

• Chaltlang Kham
• I thlang sual e
• Buannel.com an hack a mi?
• Neuva
• Chhura leh Nahaia

This entry was posted on Sunday, September 11th, 2011 at 6:00 pm and is filed under Nature. You can follow any responses to this entry through the RSS 2.0 feed. You can leave a response, or trackback from your own site.