mi(sual).com

Indo hnua Aijal khawpui leh mihring chêngte nun dan danglamzia thian ten lehkha a min rawn hrilh thinte chu chiang tawk hlein hre mah ila ka mit ngeiin ka han hmuh meuh chuan a lo danglam kher mai – ka rin ai mahin. Kum ruk zet ka hmu ta lo rêng a, thiante pawhin puak leh kaih an lo fâwm ta nuai mai a. Nula leh tlangval mêkte phei chu hriat chawp tur a tam zawk chu an ni a, anni chuan mi hre hlê mahse kei ka tan chuan hmel thar vek an ni mai a, an nun lah nun thar – an thil chin dan leh an inchei dan chenin hman kum lawka ka hriat dante nen kha chuan a dang ngei mai reng e.

Tunhma lama ka la hriat ngai loh, R.H. Music & Dance Party-ah chuan telve ngei turin ka thlen hlim deuh thaw, a tuk tuk leh zan chuan sawmna ka hmu ta mai a. Ka thianpa Dênga chuan,”Nuam ve fe a nia, nula pawh an tam tawk hle ang. I han telve mah nang a, i zawngchhang viau tur a sin” tia min han hrilh chuan ka tha a za mai a. Chutiang lam thil chu a uar leh a hrât mi tak ka nih avangin ka châk kher mai, nula telve tur hmingte a han sawi phei chuan ka rilru a ka lo engemaw deuh thinte pawh an telve nual avangin ka chak leh zual a.

“Khawinge tlemin, zak thei lo tawk chauh turin tarmit dum bun hlek teh ang” ti rilruin ka zet u-zu chu ka han in a. Party a kal tur chuan ka chhuak ta a. Zahpuiawm lo tawka ka inchei avangin ka rilru a hlim hle. Kan in atang chuan a tihna hmun chu mel khat emaw vel tur hi a ni a, mahse kawtthler vek a nih avang leh lo hriat chian hnu a nih avangin hla lo tê anga ngaih a ni.

Kawng chanve velah chuan chumi party-naa kal ve tur nula Sawmi chuan mi lo nghâk a,kan kal dun ta a. Nula naupang tawh lo tak, tûl inti ve thawkhat tawh tur rual hi a ni bawk a, mi han biak vel dan pawh a thiam kher bawk a. Inkawm deuh fo phei ila chu ka chheu thlu mai thei awm e, a khabe a themthiamin a taksa hmeh zawnga taksa inchei thiam mi leh a mit men dan pawh thiam taka thunun thei mi a ni si.

A hminga Doctor ni ve ta chuan mihring hi thisen leh ruh leh tisa inbelhbawm mai a nihzia hrethiam ve viau bawk mah ila, nula taksa mawi leh pian dan duhawm tak mai ka han hmuh hi chuan an îtawmna hmu thiam ve tak mai hi ka ni a, ho mai maiah ka dah thei hauh lo va. Chutiang chuan, chumi tuma Sawmi ka kalpui pawh chu, ka mit na na chu chawm hlein ka inhria a, taksaah na na chuan duhawm leh îtawm ka tih chi a nih kher bawk avangin, zankhuain party-naah kan awmho leh dawn nghal a! Mahse, chutia rilru hlim tak leh engemaw suangtuah chunga kan kal lai chuan ka ni fapa Hminga chuan min rawn ûmphâk a.

“Ka pu Vel, ka nuin ‘rang deuh in lo kal rawh se’ a ti che, kan mikhual a na a, a thi dawn emaw ni…a ni awm e” a rawn ti ta mai a! Kei changin pawi ka ti a ni lo va, ka kalpuinu Sawmi takin pawi a ti e. Hminga hnenah chuan,”Khai a! Hminga, mikhual damlo te mai mai chu kan lo kir leh hunah a en dawn nia. Kalna tur pawimawh tak kan nei si a” a han ti a.

Kan kalna tur chu pawimawh tia kal chu kan ni ngei a. Mahse, a pawimawhna chu thil dang niin, ka ni min rawn kohna chu thil dang a ni bawk a. Tin, ka chhuah hnuah koh ka hlawhna hmasa ber a ni a, min rawn kotu pawh chu ka ni a ni si a. Doctor ka nih avangin tupawhin an mamawhna a min koh chuan keima tulna dangte chu kalsana theihtawp chhuah tur ka ni zawk si.

“Khai a ni lo ve Sawmi, ka ni hian min ngai a, min ko a ni a, manganna thu leh lawmna thu zawng a hrang e. Nangmahin kal ta mai langin, zan dang pawh a la awm zel fo ang chu. Zanin zawng hei, zu khawlh ta si a. Hlim takin va zankhua ang che u. A nih Hminga, kan inah kir rih zet ila, thawmhnaw kan ken lohin a fel hlei nang” tiin Sawmi chu ka thlah ta a. Kan in lam pan chuan hmanhmawh takin kan kal ta a, Hminga chuan a nat dan hriat a hnehin an mikhual neih leh neih loh pawh a lo hre si lo va. Mahse, ka theih anga famkim chuan ka han inring a, hmanhmawh tak chuan ka han inring a, hmanhmawh tak bawkin kan chhuak leh ta a.

Ka tlai lutuk thelh a ni. Ka han luh chuan Nghâki pindan lamah chuan ka nî chuan min han ko va. Nghâki khumah chuan damlo chu an muttir a, puan an lo zar hliah a, ka ni chuan, “Tunah zawng a mu thei a ni awm e, a thawm a reh ta a. Nghaki thiannu a ni awm a lawm maw le, khu lama a thil zirpui a ni awm a, a lo lût hman chauh a, a chau a ni ta mai a, a bungrua pawh Motor-ah a la awm vek a ni awm a sin,” tiin mi han en a. Chutianga a han sawi chuan Nghâkin an thlalak mi rawn thawn, ‘ka thiannu ber’ a tih Liani, a fak viau thin chu ka han hrechhuak a.

?”Liani e lo?” tiin ka ni chu ka han zawt ta a, ka ni chuan “A ni awm alawm mawle ‘Liani ka ni e’ zawng a tih kha” a han tih chuan a mutna puanzar chu ka han keu va, ka han hmuh chuan ka rilru chu ka hre nghal mai. Ka sawi tawh angin mi duh…awm takte hi hrethiam ve tak ka ni si a.

A natna hre tura ka han beih vel chuan,ka mangang ta nghal mai a. Ka ni hnenah chuan rang taka tuivawt leh tuilum mi pe turin ka han hrilh a, Hminga chu kan inah thil tula ka hriatte chu lam turin ka tir bawk a. Chu nula engmah hre lo chu a silhfente ka han hlip a. Damdawi tha bera ka hriat chuan ka han chiu a. Tin, tul nia ka hriat chu ka han eitir bawk a. Ka tlai deuh tawh avangin ka thlaphang viau mai a, ka hmelah pawh alang chhuak a niang. Ka ni chuan mi lo zawt chhen a.

Tha takin han harh mai teh se lang chuan Party-na a ka kal ta lo mai mai te chu ka va han inchhir awm lo em! Engmah hre lova a mu mai hmel han thlir ringawt pawh chu thil lua niin ka hria a, ka ni tui rawn lak chuan ka han bual fai a. Darkar khat chinah chuan ka han chiu leh a,chutah chuan a nunna chuan ngai a rawn awh leh tanin ka hria a, ka lawm ngei mai.

Rei pawh ni lovah chuan a han let thawk a, ka han en phei chuan a han meng a, a sir khum tlangah chuan ka han thu a,”I harh fel em, Liani?” ka han tih chuan a ni chuan fel tak hian “Harh fel e” tiin a han indap chu saruak a ni tih a han inhriat chuan a puan sin chu a han inkhuh tha deuh a. Kei chuan nui chung hian “Ka hlip che a nih kha, a tul tlat si a. I thingrem ka va laktir kha a lo thleng lek lek tawh ang, i inthlak thuai dawn nia. I lu a hai em?” ka han ti leh a. Ani chuan “Hai deuh e, mahse ka harh khawp mai. Engti tiha chutia ka han mualpho mai chu ka ni nge ni le!” tiin a han nui a, kei chuan “I vanduai viau angreng a, mahse i vannei viau bawk e. Ka tlai lutuk emaw ka ti tawh a, a hun tak zawk a nih hi, min hria em?” ka han tih chuan min han en a,nui chung hian “Khai! Rin chu ka neia mahse…” a han ti a, kei chuan “Vela, Nghaki pu nia mi rin chuan i rin dik dawn chu, kei pawh ka hmuh tirh che atangin i nih ka ring mai a, ka ring dik bawk a” tiin ka han nui a. “Inti mikhual tak te hian i lo awm mai ang a, In in ang chiahin ngai la. Tin, Damdawi-in ang chiahin ngai bawk lang, inthiar i duh pawhin in awmna, in zirna Hospital ang maiin engkim a awm ve a nia. Keiin Doctor nih leh Nurse nih ka han kawp bawk ang a!” fiamthuin ka han ti a, ani pawh chu a nuih a za hle.

Ka ni chu Liani chawei tur atana tha tura ka hriat angin siam turin ka han tir a, Liani chuan,”Khai, chuti ang te kher kher zawng a ngai lo tawp ang, tihbuai duh tur a ni lo ve a, a awm ang ang chu a tawk em em ang. Ka tha tawh khawp a lawm…” tiin a han hnial a. Ka ni chuan, “Teh chai che chuan, i inti mikhual te hi a ni rawk ange, kan Doctor Babu thu te i hnial maiin a enkawl tha duh lo ang che a sin” a han ti a,a chhuak ta chan chan a. Liani chuan mi han en a, a nuih chu a za hle. Kei chuan “Mikhualnaah kei chu hetiang te hian awm ta mai ila, mipa leh zakthei lo fe e ti lovin nuam ka ti vak dawn lo tih ka inhre khawp a” ka han tih chuan ka sawi zawh hmain Liani chuan “A ni bawk tak naa mahse, thlen-in te awm dan a thu a ni ang chu. Kei pawh mikhualah pawh khual em em ka ni na chungin, hreawm ka ti mang hlei nem. I mi rindanin hreawm ti hle turah mi ruat a ni vei rawk awm a” tiin mi han nuih a. “Ka bag-ah khan Nghaki’n a nute a thawnna a awm tak a sin” a han ti a. Kei chuan ka han la a, ka ni chu ka han pe a.

Chu nula, nulaah pawh ka hmuh tirh atanga ka rilru ti danglam tak mai chu hmuhnawm ka ti ngei mai, a hmel hmai chu a hmuhnawm ang bawkin a taksa dangte pawh chu kei ka mitah chuan a leh chuang awm lo khawpa mawi niin ka hre bawk a. A nun dan fel zia Nghaki’n min rawn hrilh thinte avanga enmawi hram hram ka ni lo tih pawh k inhria. Mi dang taksa ang bawka tisa, ruh leh thisen inbelhbawm khawm mai mai ni ve bawk mah se, ka tuar thiam thei mang lo a ni ber e!

Ka niin eitur a rawn siamte chu ka han eitir a, tho che rih hauh lo tur a nih avang leh chu chu amah pawhin a tan a tha a ni tih a hriatthiam bawk avangin khumah chuan ka eitir a, a khat tawka hlim hmel pua mi han en leh ringawt thin pawh chu Party-ah khan ka kal ta reu reu ang!

Darkar hnih lai hnuah chuan a that hle zel avangin leh atan hahchawlha muthilh a tul tlat avangin haw ka tum a. Damdawi ei se ka tih chu ka han pe a, a ei leh zel dan te pawh chu ka han hrilh a, Chumi pah chuan ka tuar thei lo chu a ni bawk… tak na a, a mitmei tlem pawh hmua ka inhriat avangin ka kun a, ka han fawp a. Ani pawh chuan mi hnar lo tawpin mi lo fawp ve deuh bawk mahse, “Min ngaidam ang che, ka tih loh tawp tur ka ti a ni” tia nui chunga ka han en chuan…

“Ngaihdam tur i awm chuang hlei nem? Beisei awma ka awm lohin i ti hlei nang” tiin nui chung hian mi han chhang a. “Ka rilru phei hre vek la…” a han ti hman chauh tih chuan ka han fawp nawn leh a. “Ka duh em che a, ka insum zo lo a ni” ka han ti a. Ka ban chu a han vuan a, a han nui a, thu a han sawi dawn lai tak chuan ka ni chu a lo lut a…
“Hei Nghaki’n, ‘Liani hi ka pu Vela tan neih lo tum ngei ngei ang che u, ka pu Vela pawhin midang midang ti lovin lo ngaihven rawh se, ani tluka tha te hi zawng a hmu hlei lovang e. Kan neih theih zawngin kan vannei dawn em’ a rawn tih chu” a han tih chuan, kei chuan…

“I lo lut hma deuh a ni, kan lo sawi dawn mek chauh a sin” ka han tih chuan ka ni chu a chhuak leh ta thuai a. Liani chuan mi han en a,”Nghaki chu mi ti fo reng a ni!” tiin ka kut chu a han hum a, chu chu a bul tanna a ni.

Similar Posts:

• Mahse, Liani…
• In chhungkua in dam tlang em?
• Min bum tawh lovang
• Chanchin duhawm loh
• Tunlai Mizo Nulate leh Scooty (Feminizing the city/town space)

Recent Posts:

• Ti fuh lemlo angreng!!
• India ramah Kakuk tih ngona an zuar
• A Funeral and a Journey by Anup Kutty
• Thaikawi Palai
• India ram hmun hran hrana Petrol man thar tur

This entry was posted on Friday, March 16th, 2012 at 8:00 pm and is filed under Copy Paste, Fiction. You can follow any responses to this entry through the RSS 2.0 feed. You can leave a response, or trackback from your own site.