Post hmasa lamah zu chungchang zawr hnep khawpa kan birh hnuah, mizo thalaite kan chep leh cheploh thu kan han khel leh bauh bauh a. Hui pawp pawp chung pawn inhneh chu a har narawh e. Khawnge a ruhlang rawtin ka ngaihdan ka han sawi ve lem luam teh ang. Tumloh puiin sawi chhuah a ngai ve ta miau mai si a le.
In ngaihdan chu a ni vek lo mai thei e. Kei erawh chuan side hrang hrang atang ka han thlek kual a, diklo leh remlo lai ka kham ngil a, a nghetlo leh rinawmloh lai te ka chhu nghet sauh sauh ta maw tih ve leh ka rawn phar ta mai a nih hi.
Heng thu hla ka veina hi a rei tawh mai. Zan khat chu ka thianpa hian ruih a duh thu leh a ruih chuan sual a ni em tih mi zawt ta thut mai. Dik tak chuan engvang nge chutiang te min zawh, i thu thu alawm tih mai kha ka duh . Mahse amah chauh chuan kha zu a in avang khan inthiamlohna depression tam tak a nei ngei dawn ani tih ka hai lo. Chuta chin atang chuan hetiang thil hi ka ngaihtuahna ah a lo lian telh telh a.
Phai ka awm atang min zawttu an pung tual tual. Party-na ah ka kal dawn a, chumi khami chu kan ti dawn a, a pawi em? Sual a ni em? tih hi tun thlenga zawhna ka la dawn fo chu a ni.
Ni e, hetiang zawhna hi engvang nge a lo pian fo ni ka ti thin. Kei chuan zu ka in emaw, party-na ah lo kal emaw pawh ni ila sual ka ti ah ka inngai hauh lo a, sual a nihna pawh ka hre chuang lo. Mahse hetah mah hetiang khawp a zawhna ho leh thu tak khuk pui tlakloh zawhna ka tawng tam a nih chuan Mizoram ah hian ava tam leh zual dawn em tih hi ka ngaihtuah leh ta pek a. Hetiang a nih chuan thalai nun hi a lang chuan chep hauhlo e, mahse inthlahrunna leh titna, hlauhna leh khurna hian an rilru a hruai kawi hnehin a hnawh ngawih ngawih a, a awmzia ah chuan thluak suk vel an ni ber hian ka hria!
Ka thian pakhat chuan ,”thalaite hi kan chep tiraw Mizoramah hian” a ti leh fo thin. Eng nge an chepna lai tih ka zawh chuan sawi tur erawh a hre chuang em em silo a. Mahse sawi theih siloh chep rukna hi an nei tlat tih erawh alang mai a lawm. Kut a hling lut hmuh theih siloh ang vel hi a ni. A na an ti em em a, kam rulh rulhin an inhria a, mahse a kamna lai an hmu bawk silo. Dik tak chuan an rilru chau leh ruak tak hi an lainat awmin an khawngaihthlak tak zet zet a ni.
Hei hi engvang nge tih ngaihtuah a ngai khawp a sin. Sawrkarin duh thalin a chhai vel a, a bum thlu a. An rilru na a dam nan engemaw stadium sak a inhuam a, engemaw hall a siam sak a. Mahse chu pawh tihhlawh tlin a hnekin an deal an uire san mai thin. Thalaite leh sawrkar hi chu inhal rem rem tak a ni. Ui leh ar ang hlauh, sawrkar seh chu ka chhuh sak ang ti khawp a inhal an ni ti tawl mai ang aw!
Chutikhawp a dawt hmanga chhai dertu sawrkar a rilrem tak lohah chuan kohhran lamin hma an han la leh a le. Chu zawng ahma aiin a pun a na, a thak a zual hlauh; sawrkar aiin derna an-ka alo thiam zawk na rawh. Piangthar da an tam, an tlu a, an dem a. Kohhranin a lo vuak strict luat avangin an chhuahsan hnu thleng mai chu kohhran chuan umzuiin an thil tih engkim mai chu sual ah a puh thlu ta a nih chu. Rilru khing bai leh himdam lo, a rukin natna an tuar a. An bianga mittui tla erawh hmuh theih silo, hmutu tan tawrh pui ngamloh khawp a pun ni tawh si. Kalsan mai dawn a an mawh ni bik der silo tam tak hi an awm a sin.
Khawnge maw sawisel pawh huamin Mizo Kristian/kohhran hi ka han chai lawk teh ang! A chhan chu maw, kan hnam zia leh nunphung hi kohhran hian a khai ding vek a, a luahlan chu a nih ber vang zawk a ni. Dik tak chuan Kristian-na vuak vet nat luat vang leh ramri strict lutuk hi thalai ten an chhiat pui a ni mai lo maw?? Kristianna dan hi thalaite hian an zolo ni ber hian ka hria!
Ruhlang rawta sawi chuan kan kristian chhan pawh hi sap ngaihsan luat van vek a nih hmel zawk e (ka sawi sual chuan ngaidam ka dil e LALPA bulah)! Hnam mize nghet kan nihloh vang a ni ang tih pawn ala puh theih cheu. Kan pipu tena sap an ngaihsan luat tuka Kristian lo ni ve ta hi kan ang; an thu chhuak tawh phawt chu Luka ziak tlukin an pawm a nih deuh thaw kha maw. Tuikuk ho khan chanchintha hi lo hril ve sela chuan ring duh hi kan awm ngut emaw chu le, mahse hnam mize nghetlo leh sap ngaihsanna avangin “Isua lo ring ve tawh ru” tih mai mai ah pawh a khawnawtin an awi mai zel a nih kha!
Zosap te khan Kristianna mai hi rawn ken luh an nei hlei nem dik tak chuan; KHAP BUR SAKHUANA kha an rawn ken tel chu a ni. Chu Kristianna chuan an dan thar, sap ramah pawh anla hman ngailoh ngei mai khap bur sakhuana chu Mizo hnamah an han birh ta a le, a kai a na khawp mai. Khumlaizawla nupa nun dan tur thlengin kohhran chuan a duang ta, tlanglam pawh a khap ta zel a.
Zu ngei pawh chu sual ah chan tirin a khap ta. Chu sakhuana chu alo inmung chhoh zel a, dik tak chuan pawnlang taka inngaihzawnna chu khap alo nih tak avang khan kohhran chhungah hmangaih ram/inngaihna ram an tih pawh hi a lo pian tak ni. Sakhuana kawra hmanga diklo taka uire na. Chu mai la ni nang, corruption pawh hi kohhran hian a vulh lian ti ila ala pawmawm zel tho mai.
Sap culture ngaihsanna pawh tun thleng hian ala bo lo a nih zel hi maw. Sapho tih dan hi kristian ta riau a ngaihna te, sap tihdan anglo chu a ni theilo ti ta mai a, kan culture ngeia Pathian fak hnualsuat tu kan pung zel chu a nih hi maw. Zosap te khan minlo va brain wash nasa tak em a phenah hian. Harh chu a hun ngawih ngawih lo maw. Khawthlang tihdan ang lo chu copy kan nei lo. Vai leh khawchhak film kan diriam a, sap film erawh ha-hip in kan sawi thung si.
Kan mi hmasate kha an mi ngaihsan te hmangin Zoram hi an hruai a ni ti ila a sual lo ang. An titi tlang lawn ka hriat reng thin chu sap pui nun zir turin an ti kher thin. A chhan chu sap ngaihsanna leh mi pangngai chunga len duhna a ni zel fan a. Thiam zir turin tih hi chu alo dik fumfe hi kei zawng ka ring hauh lo mai!
A tawp khar ang aw, he Kristianna education dik fumfe lo tak avang hian Mizoramah sual a tam; atam tih pawh hian object lam niloin subject list zawk hi a ni. Sual tiha kan chhal/nih tir tam lutuk hi lehkhabuah ziak dawn ila a khat tun lo maw aw ka ti thin. Family education atang kohhran hian min kaihruai em em a, society lah chuti bawk. He Kristianna dik fumfe lo tak mai ker avang hian thalai ten an tuar telh telh ang a, kan buai telh telh ang.
Zu lah a intu aiin zu kan hua a. Hei hi chu der nun a ni. A intu huat ngamlohna hi der nun zia, dawizepna mai mai a ni. Khawlaia lo chetla lah pipu te hun atang tawh en pangngai mahse pro-pastor inrim an ti, a fel famkim lo tan chuan sawn thlak leh lo chet fal chu a har lem lo e. Sawi tur atam, sawi vek sen pawh a nilo! Kohhran vang vek zel a nih hi maw!
Kristianna education hian develope a hnekin a tuar nasa telh telh ang a. Sual hi a phenah a inphum ru nasa hle bawk a. Kohhran hmaikawra hmanga thalai nun suattu lah an tam ang. Ala awm zel ang a. Future hian ala tuar telh telh zawk ang!
Mihring rilru hi khapbeh theih a ni lo. Khap beh tum poh lek a punlun nasa tih history atang kan hria. Mifing leh hria thalaite zingah alo tam ang a, Rennaisssance alo thlen vaih chuan Atheist leh Agnostic an tam ngawt ang ka ring. Mahni ngaihdana nung ngamlo, mi mitmei ven avanga mite tih ang ti, mahni duh vote pawh thlak ngamlo thalaite hi kohhran vang vek mawle. Inenfiah hi chu kan ngai a ni, revolution lo thleng mawlh rawh se! Thalaite hian education dik leh fel, rinngamna nun hi an mamawh tak zet a ni.
Similar Posts:
- Sakramen leh Zu………..
- Thalai ten tan kan lak a ngai
- Filler Part-III (Moral policing leh thalaite)
- Mizo Thalaite an sakhawmi lo
- Zu hi…Part II
March 19th, 2012 at 9:40 am
Comment …….
March 19th, 2012 at 9:57 am
Mizoram a Mizote culture pakhat chu thalaite hi sakhaw mi bur, inkhawm tlut tlut annih loh vek chuan rui buai reng turah zuk ngai hlawm a! Mi pangai, inkhawm leh committee hlira hun hmang si lo, zu hmun a kal ngai lem si lo a awm theih tih hi an hre lo hial a ang.
Thalate tan chuan Aizawl te ang khawpui hi a boring , an tih hi ka hre fo mai. Entertainment han siam dawn ila, YMA in an khap ngei ngei dawn si a. Inkhawm leh KTP a tui lem lo tan chuan zu in mai loh chu tih tur avang phian an ti.
March 19th, 2012 at 10:07 am
Kei chu Aizawl ka awm chuan zingah antam/pangpar tui ka pe a. Chhunah games ka khelh loh leh tv ka en a, tlaiah ka inkhel a, zanah kan unau in kan inah kan inkawm a, kan infiam a, an lehkha zir ka pui a. Kan chep vakna ka lo hre hleinem. In ah awm tam ila a nuam ber. Intihhlim, huau huau, ruih etc kha hlimna a ni ber lo.
March 19th, 2012 at 10:09 am
Mizo khawtlang nun i vei hle mai, siamthatu te zinga tel ngei turin ka beisei bawk che.. (Y)
Kan Kristianna hi chu dem theih tho mah se, Kristianna avanga malsawmna kan dawn erawh chhiarsen a ni lo tih hi hre nawn fo ila. Heti khawpa Kohhran leh tlawmngai pawl hrang hrangin min phuarkhawm chung pawha sualna punlun erawh, khawvel ti khawveltu an ni zawk.
Zu in leh party sual i tih lem loh chuan i chungchangah sawi tur ka nei lo, nangmah leh Pathian inkar a ni e.
Kan unau zinga upa ber hi kartawpa zu in zauh a ching thin a. Zu a in hian, sual chu sawi loh, kawm a nuam zawk thin. Mahse, ka U a nih angin kan khawtlang nun leh chhungkua a enkawl zelna tur kawnga tha lo va ka hriat avangin, in lo thei a nih chu inlo turin ka fuih thung. Chaw ei tur chuan ka zilh/fuih a ngai hran lo, a taksain a mamawh tlat a. (Ka OT em aw..??)
March 19th, 2012 at 10:33 am
Dik tak chuan, kan kristian culture thar hian lemchang leh rùi sual min siam tam. Chuan, mahni tih theih tâwk hna thawh tur zawng huai huai ila, hisap nei takin thawk sauh sauh ila thalaite chu kan thawl mai ang. Hun awl ngah dawn hek lo î. Thawh chhuah a tam chuan sum pawh a tam ang a, tichuan kan lawm zawng chu duh aia tam a la awm mai ang.
March 19th, 2012 at 11:11 am
#2Sony sawi ang khian inkhawm tluk tluk leh committee zawng zawng a tel lem lo, mahse sual chuang lem lo hi a awm theih tlat. Marawhchu kohhran leh khawtlanga inhman loh chuan fello, rual pawllo nihna mai a ni si. Aw rul thlahte u!
Good post, sawi tha piap piap lutuk.
March 19th, 2012 at 11:18 am
(Y) Gud post ti leh phawt mai, lta ziak a nih hrim chuan, Thalai nge nge. Ka Connection hi Mate Ainawn sawi dan takah, “B… Shit Net Line” a lo ni a ni awm a!? Ni2/3 te ka chhe thul! A rawn that ve pawn…ka Comment leh Post te hi a lut nge lut lo pawh ka hre tawh thin lo…Ka comment pawh hi lut tak maw lut lo tak maw? “A Chhandamtu tawng maw…tawng lo tak maw?” tih ang vel kha niin ka hria.
March 19th, 2012 at 11:18 am
(Y) a va han tha kher ve le he post zet chu
March 19th, 2012 at 11:35 am
Comment no.3 & 4 khi ka ei deuh ber. (Y)
March 19th, 2012 at 11:47 am
muangchangin chhiar ang 😀
March 19th, 2012 at 12:03 pm
Sawi tam tur ka hre vak lo. Mahse, Kristianna leh Kristian Culture hnawk ti viau hi chu an tha lem lo anih kan ring ngawt a. Mizoramah leh Zofate zingah hian awih harsa khawpa nun thianghlim leh rinawm te hi an lo tam mai a, awih harsa khawpa nun bawlhhlawh leh tenawm pawh an tam tho bawk ang. Nakinah Lalpan buhlem leh buh tak chu a la thliar fel dawn a lawm le. Isua Kristan i tana a tuarna hi i nunah i senglut ve tawh em? i nunpui ve tawh em? Thlarau Thianghlim control leh hruaiin i awm em? tih hi a pawimawh chu a ni.
March 19th, 2012 at 12:06 pm
paws ka ei thlawt. I paws tawh zawng zawngah ka duh ber. thalai tha za tam berte tan hian zuin mai loh chu tih tur awm hek lo!
March 19th, 2012 at 12:22 pm
# 12… (N)
roseparvul… Nula ka’n hnial te’ng. Zu in mai loh hi tih tur dang a tam lutuk. An ti duh lo mai niin ka ngai. Zu in te chu, pawisa nei leh thawkchhuak tam, sum hmanna tur dang hre vaklo tan, chu pawh a in duh tan ka ti mai asin… 😉 Mahse, insum hi a har a niang e, tumah ka dem chuang lo. Vawksa thau ei paha hmarcha tai rawt sen hler hlawr insum har ka ti ve tho, kan duh leh duh loh, tui kan tih leh tuilo kan tih hi a dang thei si a… 😀
Min hrethiam a niang chu, zu/zu-in-mi ka deuhsawh/huatna ni lo vin, tih tur/hna thawh tur nei lo awm awl chhuanlama zu in han sawi mawi lai te khi ka la na deuh a ni e… 🙂
March 19th, 2012 at 12:56 pm
Post tha khawp mai (Y) Ka ngaihdan nen a in zul khawp mai. Mihring that leh that loh ‘tehfung’ atan a Kristiana ‘Tarmit’ kan hmang hi kan chhiatpui ber ani reng ani. Kristianna kan sawisel tihna ani lo!
Sap sawi takah chuan ka ti rilru mai mai thin a..hmusitna ni loin kohhran a in hmang, zaipawl leh comitte, inkhawm taima leh kohhran a a kul a tai te hi ka awmna angah te hian rawn awm ta se..khang a thil tihte hmang khan an judge dawn der si lo a! A hna ah a efficient em tih kha ani mai! Tha niawm tak a langte hi a tha lo nen an in ang reng!
March 19th, 2012 at 1:40 pm
Kristiante min fuihtu lo ni mawlh teh se. . .’marawhchu kan ram chhiatna ni a kan sawi thin te leh Kristian nun kan sawisel hma in eng thil tha nge kan tih ngaihtuah a tul awm e. Sual hi list tham fe a awm ang. Zuk leh hmuam sual a nilo ti an awm laiin sual ani ti a tan khwh tlat an awm bawk. International sin pawh kan hre tlang in k ring, . .
March 19th, 2012 at 2:07 pm
Dr Mahminga Sailo- Zu hi sual a ni hauhlo mai keichuan ka ti. Nangpawn dualism i rin chuan zu hi a sualloh dan a awm tih chu a rin theih.
Zu inhlek te hi sual a maw kan tia, inkhawmlohte, nula tlangval ngaih deuh thut te hi sual emaw kan tia- emaw ti a min kuaihertu hi zo kristianna a ni. Sual hi a thur hnem em em a.
Setana hian kan tluk ngawt chauh hi a duh hlei nem, tluk hlen vawng vawng hi a lawm sual dik tak, setana tum chu. Chu chu hrethiam loin daipelh deuha kan rin te kan hmu sual a, kan hmuh sual em avangin an sual hlen ta vawng vawng thin.
Korinth ziak ah chuan ” thil engkim tih ka tan a thiang a, thil engkim tih ka tan a tha vek kher lo” a ti a, a dik thei ngang lo, zawm fihlim thei an awm dawnloh avangin Paula philosophical thought chuan ” thil engkim tih ka tan a thiang a, eng bawiah mah ka inphallo” a rawn ti leh ta!
Hei hi man thiam a ngai. Sual kan siam a, kan vulh lian hi a ni ber e. Kan siam chawp a nih chu a awmzia zawk takah chuan.
March 19th, 2012 at 2:21 pm
ril rem chiah lo ka nei deuh nachungin, ban phar tur chu ni se.. I lamah ka phar ang. Someone? and his pupets hovin an rawn hnial ngei che ka ring.
March 19th, 2012 at 2:28 pm
Mitthi, thlana awm tawh khin hi thil awlsam ber a ni fo. Engmah a rawn sawi thei tawh lo a. Nitin a Kraws pua zui tura min duhtu, Sum leh Pathian rawng in bawl kawp thei lovang min titu, sum pawh amah aia kan thlan chuan suala ngaitu hian, zu hmanga mahni intihnawm tum hi engtin nge a ngaih ve ang aw?????
Pawlchhuak thlirna atang chuan an pawl chhuahna chu er ber tur chu a ni bawk reng a ni.
March 19th, 2012 at 2:38 pm
I ngaihdan ka tawmpui che, Post-tupa.
Ama’rawhchu, Tirhkoh Paula i sawi ta sa sa, ani vek khan engtingnge min zilh kha. Kan sa ei emaw, zu kan in emaw vanga ringtu (kan rawngbawlpui te) an tluk phah ai chuan insum turin min hrilh zawk a nih kha. Zu kan sawia, kan sawi lang ta bik mai a, thil dang mipat-hmeichhiatna, zialzuk, mirel. adt. Tumah tha famkim kan awm thei lo, chutih rualin kan nun erawh kan fimkhur tluk a awm dawn em ni?
March 19th, 2012 at 2:48 pm
19, Dr Mahminga Sailo.. (Y) (Y)
March 19th, 2012 at 2:55 pm
Zu hi sual chu kati law..maherawh chu keimah ah chuan sualna chu min thlen chiang khawp mai ah 😀 chuvang chuan sual alo nita ni 😀
March 19th, 2012 at 2:57 pm
#21 Badboy hian a hrechiang tak ang. Um tereuhte ka hawnsak pawhin a office a tlanbo tep anih tak kha. 😀
March 19th, 2012 at 3:00 pm
#22 te pawh hian an in tho a…anmahni ansual loh chuan “Zu hi sual ani kati” anti lem hlei law 😀
March 19th, 2012 at 3:04 pm
I ziak tha khawp mai (Y) Party na a kal kha sual a ni lova, chutih laiin zu nen anih chuan sual a hringchhuak thei ka ti ve tlat.
March 19th, 2012 at 3:20 pm
GOOD POST (Y)
March 19th, 2012 at 3:25 pm
Dr Mahminga Sailo- Kan insum theihloh thil hi chu tihloh a tha ber mai. A tul lemlo bawk. (Y)
March 19th, 2012 at 3:31 pm
badboy – Zu hi amahin awm se sual a ni lo. Tumah a tina lo a, a ngawi reng a, a zaidam zia hi sawiin a siak lo. Kan table te pawh an ngawi reng a, engmah an tilo. Table hi mikhuma kan dah emaw, mi den nana kan hman chuan a “thalo” tihna.
Mahse chu pawh chu ala dik theilo. Table hi a suallo a, zu pawh a suallo. Khawihtu awmlo se a sual lo.
Sual taka chu “Zu-in tu”, “thinchhe pa” table mi den nana hmangtu kha a ni.
Heti hian zu te pawh hi ngai ila. Zu aiin zu-in thin a hi ngainep ila, rui sual, rui thin pawh an tlem ngawt ang. (I)
March 19th, 2012 at 3:36 pm
#27: a zu intu va ngaihnep ngawt ai chuan zuruih vang a buaina siam sual nan a hmang thinte kha natak in va dem zawk ila, te ka tia 😀
March 19th, 2012 at 3:40 pm
^—– (Y) adik zawk mah mai a, ka ziah tum dan chiahin ilo sawi, ka ziak sual deuh chu a nih khi maw 🙂
March 19th, 2012 at 3:51 pm
Hei tak hi a lawm ka sawi chu. A in thiamlo ho avang hian a nia kan ngaihsual em em, insual lah a awl bawk si a. Thingpui no 5 in hian rui ta bual bual mai ila, thingpui in pawh kan do mai ang. Zu a sual lo kan ti a dik, mahse hmansual theih a nih avangin insum theih tluk a awm lo ve… ka la ti fan a ni e… 🙂
March 19th, 2012 at 4:45 pm
Post tha hle mai (Y)
tlangval 1 chu inrinni zanah a lo nam ve deuh a, an thenawm dawrah thil a lei a ni. An veng tlangval nula leh tlangval inkhawm bang dawra thu kawi an awm nual a, ‘ va rimrui thar2 ve a’ antia an nui deuh ham2 a, a tan chuan a tuk cawlhni zinga khatiangho hmuh laia inkhawm tura fai leh fresh ve deuh a kal chu inthlahrunna/insitna a awm ka ring a, chu2 ‘chepna’ chikhat a ni thoin ka hria. Chu inthlahrunna/insitna avanga biakin a hlat phah tulh2 chuan inla fel taka zu rim a nam vanga lo nuihtute chan chu a chau ve thoin ka ring. (tlak ve duah 😀 )
Mahni kan chep lo anih paw’n midang chepna lai va hmuhthiamsak hi a mawi ka ti ve mai2. NOI Ka lawm e 🙂
March 19th, 2012 at 5:32 pm
Vanlalsetana hian a rawngbawl nana Kohhran hman hi nuam a ti ve ngawt in ka ring. .
March 19th, 2012 at 5:40 pm
#31, A dik ka ti (Y)
Ka ngaihdan chiah ani
March 19th, 2012 at 7:47 pm
gud post… (Y) # 31 (Y)
March 19th, 2012 at 9:22 pm
Kan ngaihdan chu engpawh nise, post belhchian leh ngaihtuah zui tlak tak ani e.
Kohhran hi Pathian din a ni tih chu tuman kan hai lova, amaherawh chu he kohhran ah vek, a mipui te kal phung leh thil kal her danah hian Setana hi a inrawlh thei khawp hian ka ring thin. Pathian duh dan hi kan rilru chhungril ah kan chian theuh ka ring.
Tin, Sap ngaihsan chungchang tlem, hman ni deuh Billy Graham a tupa rawngbawlna angah te pawh khan,(mi pakhat thusawi), a tlar hma hma ah khan kan Officer lian te leh University professor te an thu khup mai a, khami ni a Office hna chawlh lailawk tur avanga a nghawng (mi thenkhat) ten an tawrh dan tur te leh Zirlai te an zirtirtu te an awm loh class a an free avanga an zirlaiin a tawrh tur thu leh sual a lo pian theihna dan tur te a a ngaihdan a sawi chiam mai a. Ngaihtuah tham tak chu a niin ka hria.
Tin, kei ngei pawh hi Lecturer/HOD.. etc Kohhran Upa leh KTP hruaitu kan neih thin avanga Syllabus leh zirnaah pawh an subject bikah Vai lecturer ho subject aia kan hnufum thin bikzia te kha min ngaihtuah let tir thin.
Kan Lecturer thin vai pakhat chuan “ka profession ah kum 25 ka thawh chhungin vawikhat mah ka la tlai ngai lo” a ti. Rokhawlhna leh dammawh hritlan avanga kan pelhsawlh chu pumpelh thei ani lo mai thei. Mahse, hetiang ang rilru put hmang nei hi kan tam lo khawpin ka hria.
OT ta vak mai le….
March 19th, 2012 at 10:07 pm
100% (Y)
March 19th, 2012 at 10:45 pm
Khaia…………..I hmu ve maw? a mental process kal sual thui tawh zia hi kan khawngaih thlak a sin. A then chuan kan fuhlo tih pawh hi kan in hre tawh miahlo.
Mahse British colony ah ho reng2 hian tiang hi a awm deuh vek emaw ni chu tih theih tur a ni. Chanchintha an rawn thlen hi chu a hlu lo tihloh chi rual a ni lo mahse mahni duh thlanna leh Pathian hriatna ni lovin, dominant zawk leh hnam fing hmasa zawk an lo nihna khan duhtlanna ni lovin force a ang tlat thin. force tih hian physical lam nilovin. (Y) (Y)
Mizo te rilru a nghet lo tih hi chu hemi nghawng vek hi a nih ka ring ve mai2 thin kan pi leh pu te kha hetiang ang hi a nih a rinawm loh.
March 19th, 2012 at 10:55 pm
# 35.. Kan Lecturer thin vai pakhat chuan “ka profession ah kum 25 ka thawh chhungin vawikhat mah ka la tlai ngai lo” a ti. .. (Y)
March 19th, 2012 at 11:25 pm
Inva sawi tha hlawm ve. Inngaihdan ka collect hian mentally distort kan nih hi inpawm tlang vekin ka hria. Engpawh nise sawi mai loin thawhchhuah pui ang u aw.
March 20th, 2012 at 12:22 am
Lta: Nia,ngaituahna hi chu sen tlan a tha khop mai tawh a na. entirna pakhat chiang deuh mai chu, EPL kan en luih2 te hi mak deuh a sin, la liga te serie A te adt adt quality footbal khel zawk pawh a lar theih mang der loh hi thil mak tak chu ni ve ni. 😀 😀 .
March 20th, 2012 at 12:49 am
Ti suh tih hi a lo hnawk em a ni!
Nu in a fa hnen ah mei zu suh, leng suh, Lehkha zir rawh.. a ti a, mahse heng bawh chhiat hi nuam chu kan ti zawk tlat bawk si, a tha lo tih hre reng chung hian. Smoking is injurious to health tih sikret kawra a in chhut kuau chung leh cancer a thlen thei tih hre reng chung pawn Mizoram hi zuk leh hmuam ti nasa ram kan la ni tho, a that lohna kan hriat loh vang pawh a ni lo, kan chang kan loh vang pawh a ni hek lo. Zu that lohna hi Sap kan tihte hian a that lohna an hre khawp ang, zu vang hian thihna an tawh ve thin pawh kan hria a. An khap ve lemlo va. Zuk leh hmuam ualau taka zawrh ang hian zu hi zalen ta se kan in thiam sawt phah ka ring lem lo bawk, zuk leh hmuam ang tho hi a ni ang. Zu a nih vanga ngaih enge maw bik viau hi tul ka ti lem lo ve, hman ah chuan tha lo tih hre rengin ka lo in ve tawh thin. Ka zu in vanga Kohhran hnar lo ka nilo va, Kohhran hnar lo zu in pakhat ka ni mai. 🙁
March 20th, 2012 at 1:07 am
critic: Zu vanga thi thawnthu ah emaw, mi sawi chhawn ah emaw kan pi leh pute hunlai a mi i hre mial em? kei ka la hre miah lova. Zu kha chu an nei teuh mai tih kha chu ka hria a.
March 20th, 2012 at 1:15 am
Hre lo, tuisik lem sual vanga thi tak ngial pawh ka hre lo. Ka hriatna a zau vak lo a niang a…. 🙂
March 20th, 2012 at 1:26 am
The Hindu Monday march 19 2012. Page no-2 ah chuan heti hian a inziak a.
Jagdish was an alcoholic for 30 years. Five years ago, his life, he says, changed for the better after reading the Bible and attending prayer meetings. “For the past three years, I have been completely clean. I have not touched alcohol, cigarettes or gutka.”
Saphoin “zu hi sual a ni e” tiin an fuih vang a ni ve tho angem aw????
March 20th, 2012 at 2:10 am
#44 zu hi sual a ni e a tih vangin a nghei tih chu a inziak chiah lo anih khi.. 🙂
March 20th, 2012 at 2:16 am
#45, chhiar chiang deuh teh.. alcoholic for 30 years.. 5 years ago changed for the better…a chiang thawkhat khawp mai.. 😀
March 20th, 2012 at 2:27 am
Zu an lo ti leh ta
March 20th, 2012 at 3:11 am
A piangthar a ‘kei ka tan chuan a thiang tawh lo e’ a ti a ni mai lo’m ni? ‘Sual an nih vangin ka nghei e’ tih lai chu a khawi sentence khi nge ni ta ber? 😀
Pathian hmingin zial nghei ta ila zial hi sual a ni ka tih ka ring chuang law, midang zial zu ka va hmuh ‘sual’ pawh ka ring law, chutiang deuhah chuan ka ngai mai asin..hihi
March 20th, 2012 at 3:22 am
A pianthar hnua thiang tawh lo a tih chu a sual a tih i ring em? Sual a tih loh chuan a fel a ti ang. NO gap in between. Pre-conception kha paihbo phawt la, uluk deuhin chhiar la, i zia mai ang. 😀
March 20th, 2012 at 9:34 am
Critic#43: kan hriat zau dan a in chen reng nih chu mawle, Zu in leh tuisik in a thi tumah kan hrelo ve2…….. 😀 😀 .
March 20th, 2012 at 11:00 am
Zu hi in mah ila ka sualna ka hre hauh lo. Khel thamah pawh ka ngai em em lo. Beer te hi mut hma hian lem sak ila mut a tui duh a nia.
March 20th, 2012 at 11:30 am
Keima tan liau liau…
Pathian zarah Zu in kher lo hian chaw ka ei tui em em a, ka zai tui em em bawk. Zu rui zingah te hlei hlei hian tihdanglam kher ngai lo vin ka hot em em tho si a. Zu tello hian ka la hlim ve thei viau. Tin, vanneithlak takin, Doctor-in, ‘chumi zu chu in la, i natna a chhawk ang tih tur natna ka la nei bawk lo va, Zu hi ka la in rih lo…
Midang tan erawh sawi theih ka nei lo…
March 20th, 2012 at 11:41 am
Lt: I fing fal thin khawp mai a. I huaisen em em bawk. Ka rilrua awm reng thin mahse Upa leh Pastorte bul baka ka sawi ngam loh tam tak i lo sawi piap piap mai zel a, tha thin khawp mai. Kei, hetiang hi hmaichhanah lo chuan tu bulah mah ka sawi ngam vak ne’m.
I thil vei hi vei awm tak a ni. Mahse ka hlauh ber chu tlangval fel tak ni hian mite hi an hmusual viau thei a. Helai hi inven a ngai khawp mai.
Malsta27 bawk hian a lo thur chhuak leh nalh mai a- Bristish colony zawng zawng deuh thaw-ah hian harsatna ho deuh nia lang mahse buaipui tham deuh mai keimahni culture-ah hian kan nei deuh vek. A chhan nia an ngaih tak ber chu kristianna mi rama an thehdarh khan INDIGENOUS CONTEXTUALIZATION(ram mite mila rawngbawlna) lam pang an awn lo em a ni. Anmahni kha hnampui leh hnamtha anga in ngaiin anmahni tihdan ang zela rawngbawl leh Pathian chibai buk tir kha an tum ta thin a. Hei hian harsatna thuk tak- buaipui tham tak keimahniah a thlen ni awmin a lang. Tun kum zabi liamta khan an tihsual zia hi an hre ve nasa a ni awm e, British ho hian. Chutih lohvah chuan Chanchintha lo thlentute kha han selna vak chhan tur ka hre lo.
I post tha hle mai.
March 21st, 2012 at 2:54 pm
A tha hle mai..
March 21st, 2012 at 2:58 pm
A tha khawp mai….ka chhiar pahin ka lo tang ve em em ringawt…
March 21st, 2012 at 2:59 pm
A tha khawp mai….ka chhiar rualin ka lo tang ve em em ringawt…