Vawiin (20.03.2012) chawhnu dar 2-ah Milennium Centre-a restaurant pakhatah misualdotcommer mi 25 vel chu Pu HVa pualin kan inhmukhawm a, a nuamin kan hlim tlang dar dar viau e. A hmasain member kalte ka hriat ang ang chu ka’n ziak phawt ang e.
As_Khiangte, ChhanaPa, father_sphinx, H. Vangchhia, Jessy, Jinx, Lersia, Maisek, Marvinic, Mate Ainawn, Nastycool, Ralte, Ruata Pachuau, Sheldon, Simply_me, Soberboy, Tete-i, TuaiSialA, VaiVa leh an nick ka hriat loh midang 5 an la awm cheu va, a nuam laih laih khawp mai.
Chawhnu dar hnih kha thlenkim hun atana ruat deuh a ni a, ṭhenkhat phur helhhawlh lutuk (entirna Soberboy) te chu dar 1:30-ah an awm dim diam tawh! Kei chu Sheldon ka sawm a, a hmun kan thlen meuh chuan Maisek, Mate Ainawn, Soberboy, Ruata Pachuau, Ralte, Nastycool, Tete-i, Jinx leh midang ṭhenkhat an lo awm nual tawh a, he’ngho hi alawm a phur fal ka’n tih deuh bik ni.
Tichuan, an lo thleng zel a. A changtupa pawh a rawn thleng a, a tawi zawngin, an lo thleng indawt zut i ti mai teh ang. Boruak a nuam chho laih laih viau mai.
Update : Pics
Fathera leh a ṭhiante kha an va han zahawm em em! Sphinx Clan (an tiin ka hria) father_sphinx leh a ṭhiante midang pathum an lo lut a, suit vek an ha. Necktie an awrh vek. Suit dum, kekawr chuar ve mai mai ngai lo leh smart shoe nen an rawn ni ri zaih a, an entawntlak kan ti dawn nge ni, an hmuhnawm tham khawp mai. An silhfen ringawt pawh vanram kaipuina tham a ni, a chhan chu a zahawm a, a felfai em em bawk a, bâl (sual) a kai lo a ni.
ChhanaPa mawlh kha! Misual.com-a a comment sei tak tak leh un pui pui, ṭha em em site avangin pa un leh upa lam ni turah ka lo ngai a — teuh lo mai! Khawlaia tleirawl hawklak mai mai ni âwm takin ka hmu a, a khan a sang deuh giau mai leh nghal a. A pum phu lovin a nui duh em em zui a, amah ka hmuh apiangin ka nui ziah! Tun aṭang chuan ChhanaFa inti tawh sela a inhmeh ngawt ang. A zak hnuai meng ṭawk ṭawk VaiVa nen an inkawm ngeih phian a, haw dawn aruaiah eitur pawh an lam chawp chuk chuk a nih kha. Hetiang mi hi an hmuingil ngai lo hrim hrim!
Soberboy kha hmeichhe duh chi tak niin ka hmu. Mahse, a ngawichawiin a zakzum mah mah a, a hmaa nula inparh harh harh, Tete-i pawh a be ngam reng reng lo va, a bula ka ṭhuta a biak ngam theih dan tur ang bera ka awm pawhin, ka biak chauhvin a ṭawng ngam ve ṭawk a ni. Chutiang khawpa zakzum a nih vang a ni ang, site lama a comment pawh a tawi theih em em ni. Naupang duhawm tak a ni.
Ruata Pachuau pawh fullstop chauhva comment ṭhin awm reng a ni, a pumrua han en chuan. A pumrua hi a pum ti-a sawi inthlahrunawm khawp a ni a, VaiVa nen a inbei tawk viau maithei. Ka chhuk thlir theih mihring reng reng chu ka’n nau en nghal em em vek ringawt maiah! Ani pawh kei aia upa mah ni se ka chutiang tur chi a ni.
Tete-i pawh hian a pum phu lova lian camera a rawn keng a; a lena a han lenzia chu, camera tih ringawt inthlahrunawm khawpa lian a ni. A hmaah Soberboy leh Ruata Pachuau an ṭhu a, zahzelah (ka ti lo thei lo) dawhkana thil ho mai mai lutuk tak maite kha a’n la mawlh mawlh a, khatih laia a rilru ka hre châk kher asin….haireihai! Pu As_Khiangte bulah a ṭhu a, a lungawi viau ni awm tak a ni! Nuho erawh an inkawmkhawm tel tel a, Sheldon leh Mate Ainawn leh Jinx te ho ṭhukhawm tel telin eng nge an sawi kan va hriatpui ta lo.
Hairehai mawlh kha! Amah Pu Hva chu a rawn lut a. VaiVa khan a glock pistol a’n lam nghal ngawt a, ani lah pek chuan, “Khawnge i lawng?” a’n ti thla ngawt bawk a! Live-a a hairehai an hriat chu a ngaihṭhatthlak veng veng asin aw.. Ani hi kan inhmuhkhawm chhan chu a ni a, a camera thar pawh a rawn hawn a, a State zaih mai! A chanchin kan sawi thui lovang!
Han ti teh duah lo mai ila. Jessy leh Marvinic (a nick thar sawi lo te’ng!) pawh tlai lam deuhvah an lo lut a, anni chu a ei leh in pawh a ni em em lo, thlalak hman loh mawlh an hlau ni berin ka hria. Tichuan, an lunglawm nan thla te kan han la zuai zuai a, lungawiah kan inchhuah a ni chek ang, han inhmuh ṭhe ṭhu zuina a awm lem lo va, a lawmawm takzet. Ralte te, Nastycool te hi a buai pawlah an ṭang a, chuvangin hetah chuan kan sawi lar hluai lovang!
Kan misualdotcommer senior tak tak lo tel theite kha an fakawm takzet. Anni khan he kan inhmuhkhawm hi an tiphuisui a, nalh leh mam takin an rawn induang zaih a, an fakawm, an ngaihsanawm. Mahse, an inthlahrung ta lutuk khan ka lung an tileng ngawih ngawih.
Tichuan, tlai dar thum velah kan ṭin darh thei ta a. Pawna kan chhuah mek laia chhak lam aṭanga misual nula hmelṭha leh duhawm no chik chek, chelsea rawn tlan thla hlawk hlawk khan hringnun a timawi ngawih ngawih. Chibai sem tur ringawtin a rawn kal a ni, ani ve thung chu. (Ka hmuh hmasak ber ngaihtuah chuan a lo lian tawh hle) Ani pawh hi fak tlak a ni.
Vawiin tak hi kan member duhawm tak, dolly dollz chu a eng emaw maw ni an zai ni a lo ni a, he inhmuhkhawm hnuah hian a hman remchang chu New Life lamah kan han kal a, ṭha takin an zai thei niin kan hria a, a lawmawm takzet. Dam zel turin duhsakna kan hlan e.
Similar Posts:
- Nikum MI leh ka Mizoram zin experience
- Mumbai MI ve thung aw! :-)
- Mi{sual} Drama
- Nang i ngawih tlat si chuan…!!
- Lehkhathawn
OT...
April 17th, 2012 at 10:25 am
Ka lung ava han leng tehlul em!
Report this comment