(Min fuih a, ka pawrh ta tlat mai! Chhumbung deuha ka tawpsan tak kha, ka rawn chhunzawm e… 
)
Aizawl ka vawikhat zinna, Police Station-ah min ko!
Technical entrance pe turin phak tawkin ka inbuatsaih a. Remchang takin a thlawna kalna tur Congress party conference palai kal tur rualin bus-ah ka inhnawh lut ve a. Lunglei leh Aizawl inkarah chuan Congress party member ka ni ve ta a nih ber chu! Aizawl ka hmu ve ta. Thlalaka ka hmuh thin zirna in ropui tak: Hrangbana College-ah exam ka pe ve ta a nih chu, keima ngaih chuan ropui ve tak ka ni tawh hrim hrim.
Kan exam zawh ni, ka paper ka dah fel chiah tiin, “He room-ah Lalhmingmuana Sailo a awm em?” an ti a. Rang fein, “Aw, keimah hi ka ni e” ka ti a. Chhanna ka dawn chuan min barakhaih hle. “Police station-a kal turin an nghak che, zui phei nghal mai rawh” tih a ni!
Sawi thui lo mai ang. Thil engemaw kal sual palh avangin kan thianpa pakhat admit card bo chungchangah thu min zawtfiah duh hi a lo ni a. ASI hmachhawn ran chunga ka statement kan han siam vel kha, hunrei tak chhung atan zan mut dawna min tiphu zawk zawk tu a ni. Mahse, ka tihsual ni lo na na na chu, chu thubuai chuan min tibuai zui ta lem lo.
Rs. 5000 kan puk…
Pathian zarah BVSc&AH (Veterinary Doctor) zir turin ka tling ve a (Aizawla zir theih awm chhun a ni si a). Chhungkua kan buai ta. Vanneihthla takin, kan chhung te’n Rs. 5000 min puk tir hlauh. Pawisa min puktirtu te hi in kan luah neitu te an ni a, kan laina hnai tam tak ai paw’n kan inchhung hnai tawh zawk.
“Aizawlah vawihnih I zin tawh kha, buaipui I ngai lem lo’ng chu” tiin chhung te’n min thlah fel der. Chutichuan, Abdul Kalam iangin (ani aiin ti hmasa zawk mah ila, ani tal inkhaikhin hian ka bon ve hmel deuh a!) Hostel-a lut turin suitcase pakhat khaiin Leitlangpui ka chhuahsan ta.
Interview turin…!
Interview hmachhawn tura Aizawl ka pan dan hi a chawpchilh ve phian. Ka patea sikul thawhna ah cement building sain kan inhlawhfa a. Tlai dar thum velah, ka patea nupuiin, a hmelhriatte taxi Aizawl pana haw phei tur a awm thu hria in, ka hnathawk lai min ko haw a. “Mahming, Aizawl kal turin insiam rawh”, min ti mai chu(h), mak ka ti ngei mai.
Taxi driver pahnihin an inkhalh chhawk a, a khalh lo zawk apiang a muhil a, a khalhtu zawkin meizial a zu deuh reng thung. Zankhua in min ur hneh khawp mai. Man chawi lova ka kal theih avangin engmah ka sawisel ngam der si lo; khami zan zet kha chuan ka chau ve khawp mai.
Vawktillak leh vawk pul hridanna injection
Vanneithlak takin kan chhungkua aia harsa zawk atanga zir ve tho nen kan inkawm ngeih hlauh a. 2nd year BVSc kan zir atangin vawk pul hridanna – vaccine injection pein Sihphir, Lungdai, Nisapui te hunawl ah kan vakkual thin. 4th year kan nih meuh chuan Surgery practical class-a kan zir tawh kha chu Sihphir leh Lungdai ah kalin ka practice ve mai thin a. A pana pan chilhtu zawng ranvulhtu ten min hlut deuh.
Vawikhat chu, hun remchang dang awm tawh hek lo. Tin, Pawisa mamawh a nat bakah, ranvulhtu te’n min nghak rei tawh si. Pathianni chhun pachang lai ngeiin Nisapui khawlun lai berah vawkchhul kan la chiah mai kha chu, ka zak ve chem chem. Inkhawm bangin min en duh rap.
Tin, Vawk pul hridanna injection pe a kan vahkual na ah, Sihphir nula pakhat, “Ka pi vawk in vulh em?” ka’n ti chiah mai kha chu(h) ka tifuh teh chiam lo. “Nulat laia inpi em em te chu a” a ti fek lehnghal. Za lo deuhin ka nui suk ringawt! Inrinni nileng deuhthawa Sihphir khaw fan chhuah chang kha chuan kan chau ve thin hle. Ka thianpa’n rawlrehna a’n lem haw ngei a (sum thawk chhuak hek i); chauh pawh sawi lem lo vin, nui bawk bawk chungin Hostel kan thleng ve leh mai thin.
“I nu hi a dam rei hmel si lo va…
… nang lah chu hmun hla zawk pan I tum bawk si” ti a thenawm nu thenkhatin min hrilh laia ka rilru insual nasat thinzia kha. Nia, ka nu na tuar, a damchhuah beiseiawm lo tak kalsan kha zawng ka hreh ve em em asin, Mahse, ka seat ka ui ve bawk si.
BVSc & AH ka zir chhung zawnga chawlh hmang ka haw a, ka kal leh dawn apianga mi tihkhawtlai tum ziahtu, ka NU lah chuan; natna-khum atangin, tawngchhuak tha thei lo vin, “Mampui min ngaihtuah reng reng suh, puitling takin i zirna chu zuk chhunzawm rawh” a tih khan min tiphur bawk si. Bangalore ka chhuksan hnu lawkah ka NU chuan min hawsan thung!
Chhungte chawmhlawm!
BVSc & AH ka zirlai kha chuan Mizoram sorkarin stipend min pe a, kartawpa ka inhlawh ve zeuh zeuh nen, chhungte tibuai lem lovin ka khawsa ve thei thin. Rin loh deuhin Post Graduate zir turin Bangalore-ah seat ka hmu a. Delhi-a provisional admission kan tih laiin scholarship a awm tur thu min hrilh zuah zuah a. Bangalore-ah admission kan ti fel te te a, scholarship pek chu sawi loh, concession ka beisei ve zawng zawng pawh an pawm leh si lo! Rilru a va’n hah duh tak em!
Ka rethei, mahse ANI nen ka hausa thung…
Hostel ka awmna thlakhat Mess fee Rs. 1700-1800 a ni tlangpui a. Ka chhung te’n Rs 2000 emaw mamawh a tam deuh changin Rs. 2500 min thawn thin. Rs. 100 kha ka va’n hmang daihzai thin tak! Post graduate zirlaiin scholarship pawh la lovin engtingnge I zir min ti mai thei. Scholarship dil turin kan academic session a tlai bakah, ka chhungte Lunglei ah an awm si a, kawng a vang ang reng phian. Laina hnai te biain Personal loan lak te ka’n tum ren rawn thin, mahse ka la ta lem lo va. Ka PA vana mi hian ka mamawh tawk hi a lo hre khawp mai. Pawisa puk lem lo vin tluang takin ka research leh thesis ka zo thei.
Ka dinhmun ka inhriat avangin thian ka kawm tam lem lo va. Mizo inkhawm erawh ka thulh ngai bik lo, bus fare leh thawhlawm ka neih chuan ka duh tawk viau.
Tuarna phena malsawmna
Rethei taka mi inhnuai kan luah laia pawisa min pe ngawttu te, Pawl sawm ka zirlaia hostel-a a thlawna min awm tir a, kum tawpa scholarship (Rs. 2000 min pe a, mak ka ti khawp mai. Pawl sawmpakhat admission fee leh uniform lei nan ka hmang nghal) min pe hial tu te, a fate zirna a ngaihpawimawh ang hiala min buaipuitu ka nei te, kohhran dang Sikul hostel ni si, a thlawn veka hostel-a ka u chawmtu te, sawi vek sen a ni lo. An theih leh phak bak hiala, ka hrehawm hlau a rim taka thawk ka nu (fam) leh pa, u leh naute u, ka tan in va hlu em!
Heng zawng zawngah hian a bulpui chu PATHIAN ka ti lo thei lo. Malsawmna chhiarsenloh min vur a, a mi te kaltlanga kawng bumboh (a ka ngaih) ka zawhna kawnga min dawmkangtu te hi AMA zara ka neih an ni si!
LALPA ka lawm em em e.
Similar Posts:
- Civil Hospital lakah Sihphir lungawi lo
- India páwna Mizo zirlai 20-te Overseas Scho’ nuai 77 chuang pe
- Whistle Blower Part-18 (Scholarship chungchang)
- Mental Accounting
- Mizoram Development Intan Dan II
Hmangaih...
March 24th, 2012 at 11:37 am
Ti ve tengs..
Report this comment
March 24th, 2012 at 11:52 am
A ngaihnawm mai baka ah mi dangte hnen ah chona duhawm tak a thlen ngei ang, kei pawhin ka hlawkpui der tawh si a..Good Post…’Student Outlook’/ Mizoram Career Magazine vela chhuah a tan a tha ka ti mange…
Report this comment
March 24th, 2012 at 11:58 am
Chhawlhal laia drinks tui tak, thaw la lo leka in khawlh khawlh ang maiin ka chhiar zo rang kher mai. Mi hlawhtlinna thinlung taka in lawmpui hi a awlai loh tehlul nen, i hlawhtlinna hi chu thinlung ril ber atangin ka lawmpui a che. I nu chuan i hlawhtlinna par han tlan ve se a that tehlul nen, mahse, he lei aia hmun nuam zawk, retheìh leh natna awmtawhlohna hmunah a awm tawh bik si a,rilru hahdam takin awm rawh.
Report this comment
March 24th, 2012 at 11:59 am
A tir lamah hian comment ve mai ang aw…
I han sawi tak tak a insum har ka ti hle mai. Pawl XII ka zawh hnua Aizawl ka phei dan kha keipawh ka theihnghilh thei tawh lo. Ka nu leh pa – min hmangaihtute hrilh ngam loh tur khawpa harsatna ka tawh kha hringnun kalsiam min zirtirtu a ni e.
Pathian mizia tamtak hi a takin ka chang fo thin a. Mahse hetiang chanchin ka hriat leh ka harsatna tawhte ka ngaihtuahchhuah apiang hian A Hmangaihna aiin a TLAI lek lek thinna hi keimahah a lian zawk thin. TLAI lek lek ni awm angin lang mah se a tlai ngai LO. A hun takah a che mai thin. Mahse kan Pathian hi chu a hmanhmawh lo thin khawp mai!
I nu awm tawh lo mah se i pa chu lo duat em em ang che u…
Good Post!
Report this comment
March 24th, 2012 at 12:02 pm
A ngaihnawm ka ti kher mai. Thil tam tak ka ngaihtuah chhuak leh tawh.
Report this comment
March 24th, 2012 at 12:07 pm
Ehe.., beisei aia hma in a lo a ni maw. Post hmasa ang tho khan khawngaihin tawnhriat theuh sawi leh ang u hmiang.
Pu PK, ka lawm tak zet e.
Ignatia… Dik chiah. A chang chuan, Pathian hun ruat hi hriatthiam a har fo thin ti raw…
Le, In sawi ve hun…
Report this comment
March 24th, 2012 at 12:10 pm
Report this comment
March 24th, 2012 at 12:15 pm
Report this comment
March 24th, 2012 at 12:19 pm
A ngaihnawmin chona ropui tak a ni e.
Report this comment
March 24th, 2012 at 12:37 pm
A va ngaihnawm dap2 em. I zirlai hian thiam thei viau pawh ni mahla i in zir nasat viau hi ka ring..Success is sweet, but it’s secret is sweat tih hi a la dik fan a ni.
Nuamsa tak in zirla tun a i hlawhtlinna chan ang hi i nei pha kher lo mai thei! Ka like nawn mawlh2 e.
Report this comment
March 24th, 2012 at 1:00 pm
A ngaihnawmin a ropui e
Report this comment
March 24th, 2012 at 1:02 pm
A ngaihnawm hle mai….
Report this comment
March 24th, 2012 at 1:22 pm
Hmingte: tha khups mai, loks.. Kan hunlai kha chuan entrance a ni emaw eng test leh exam pawh nise kan test, exam mai thin kha a nia(h)..tunlai naupang zawng a pek hian in han pe ta kher thin hi.. a dang ta deuh ni hmiang ka ti mai a..enge a awmzia? NOI
Report this comment
March 24th, 2012 at 1:22 pm
A va tha leh pek em! Diktak chuan nuamsa taka lehkha zir lai hun hmangtu te hi an hlawhtling lo chawk ania, a zawng zawng chuan ni lo mahse. I zirna kalkawng a bumboh ve hle mai. Mahse, i tumruhna leh taimakna a ropui. Chhiar a nuam takzet.
Report this comment
March 24th, 2012 at 1:26 pm
a va phur thlak thin em!
@aduh & @sheldon ka type tha viau tawh em…
Report this comment
March 24th, 2012 at 1:44 pm
Kei chu, nangmahni angin ka huaisen ve lova, “Pathian min Hruaina Lamtluang” tih phek 2/1 lek ka ziak avangin Jail ka luh-phah tep a! “Thudik” ka ziak avangin Rs.48000/- ka chawi phah tawh bawk! Hei bakah hian, Patling, rawngbawltu-in, “Ka mualpho tur min khuh hram rawh, min puang suh aw” a tih lawm lawm avangin, ka khuh-sakna lamah Jail-ah ni 36 ka tan phah bawk! Ka Tawn-hriat mak tak tak leh ka Testimony dangte pawh ka sawi-chhuak ngam ve rih lo!
Keimah anga mi ning-nel leh dawihzep hi engzat tak awm ve ang maw?
Report this comment
March 24th, 2012 at 2:04 pm
I nu hi a damrei hmel si lova..tih para hian ka hnuk a ti ulh. Misual.com a post ka chhiar tawhah chuan a la ‘touching’ ber mai.
Hman deuha Dr tih i dah an rawn sawisel laia i tlawm aw atang khan i thanlenna environment a thatzia kha ka mitthla thiam reng a ni, a lo dik reng bawk e.
Report this comment
March 24th, 2012 at 2:06 pm
@lhpa, first class
Report this comment
March 24th, 2012 at 2:17 pm
A ropui thin e,keini harsatnatna tawk tih ve te chu harsatna vawksa a tih theih hial awm e…good post!
Report this comment
March 24th, 2012 at 2:30 pm
#15 lhpa kei chuan ka la pass tir chiah lo che. Sei deuh hlekin han comment la ka lo inngaihtuah ang
Report this comment
March 24th, 2012 at 2:44 pm
Mahminga chu i khirh ve zek maithei ni
(fth) Loose thut pawh hi a har tawh mai ni lovin thisenin a thanhnan tlat tawh ṭhin. Hemi vang tak hian ania “Kan harsatna tawh te chu kan tana a ral tawh chuan, kan tawrhnaa Pathian chet dan kha zir let ve chiahna hun a ni tawh e” ka tih ṭhin 
Tichuan Pathian kan hmu lian anga keimahni chu kan pil vang vang maiang. Mahni sualchhuah vek anga hriatna kan thisena a cham tlat avang hian ania kan khirh duh em em thin (eg Hitler-a leh Abraham Lincoln te tuar hnua chawimawina an khum tir in ang lo te). Mahni inkhawngaihna te pawh hi, mahni chauhin ti a kan in hriat vang a nia. Lang lova Pathian lo che hi kan hmu tham lo thin a, zir tham a tling a ni.
Josefa khan a chanchin ziak dawn se a harsatna tuar zawng zawng kha Pathian tel miah lova tuar ṭang ṭang angin a in sawi ve ṭeuh thei in ka ring. Pharoa mumang a hrilhfiah hma kha chu Pathian hriatpui lova tuar ṭang ṭang ang pawhin a in sawi thei maithei. Anihna takah chuan Pathian dahna vek kha alo nia, a ṭhatna tur leh Aigupta ram roreltu a nihna tur a Pathian tuar tir vek kha alo nia, a tuar te Pathian tel lova han chhuan pui leh hnuhnawh tur kha a nei lo reng reng a ni.
Zawn peih chuan Pathian chetna hi alo tam khawp maia, mahni hi kan te ram ram zel a nia. Chu chu amah ringtute a kaihhruai dan atanga ka thlirna a ni. Pathian a lanna sawi tur vak hre lova mahni a tuar chhuak anga in hriatna nei te hi an tawh khirh duh tlangpui
(Ka rilrua awm hi ka sawi tum hian a phawkchhuak zo zan lo) heh
Report this comment
March 24th, 2012 at 2:47 pm
Aste MIT ah admission ti ila?
Report this comment
March 24th, 2012 at 2:55 pm
@aduh….Sakawrpului ah maw
Report this comment
March 24th, 2012 at 2:58 pm
Hei chu nakin lama comment-ah kan la khek khal rih teh ang!
Report this comment
March 24th, 2012 at 3:03 pm
@aduh….Sakawrpului ah nge i tih khuuut ah
Report this comment
March 24th, 2012 at 4:26 pm
Ngaihnawm leh pek thin mang e aw. Challenging thei hle mai. A ngaihnawm dawn tih kha hriatsa ani bawk a, beisei ang ngei ani
Report this comment
March 24th, 2012 at 6:27 pm
@ Dr John Hamlet, inbuaina kha ka lo hriat tirh chuan mak ka ti deuh a, mahse Saiha lampanga kohhran leh politics a kalkawp tih ka hriat hnu chuan mak ka ti lem lo. A dik chu puanchhuah ala ni tho tho ang, i rawngbawlna ah harsat chang awm thin mahse kalzel turin duhsakna ka hlan a che. I lehkhabu ziak pakhat chu ka chhiar ve tawh ngei e. Mara ho zingah chuan ngaihsanawm tak niin ka lo hria che a chuvangin hlauh tur dik zawk chu i hriat ka ring a. i rawngbawlpuiten thlauhthla che mahsela chhunzawm zel tur in duhsakna ka hlan a che…
Report this comment
March 24th, 2012 at 7:21 pm
A ropui ngei mai. Thil tamtak min ngaihtuahtir.
1. Comment ang khian eng magazine-a emawa chhuah atan ka awt.
2. Ka nupui hian naupang rethei school kalzawm thei lo tur Doctor zir chhuak khawpa chawm a nei ve a, kan chhungkaw laka a lawm dan tur hi thu in sawi thiam lo mah se ka hriatthiam pui ta hle mai.
3. Keima hringnun lamtluang ka thlir let hian harsatna su tlang ngam lo khawpa ka awm chang a awm fo thin hi ka in hua, in siamthat theihna chin la awm ang angah insiam that phah nana hman ka tum e.
Report this comment
March 24th, 2012 at 7:46 pm
Taxi driver meizial zu i sawi khan thil tam tak min ti hrechhuak. Kum 20 chuang a liam ta, Aizawl – Lunglei inkar MST bus-ah ka chuang a, ka bula meizial zu hi sawisel ngam loin conductor hnena sawi ka tum a, conductor pawh chuan a lo pakkhu ve tual tual tho a, “A khai aw” ti a Driver ka va thlek chu a ni pawh a lo fihlim awzawng lo mai a. Khatiang hun hreawm tak kha hmanlai an chang zo ta, Anti-Tobacco Squad te la awm ve hek lo le!! Tun hnuah ka ngaihtuah zui zel a, “Pi Rii hi a lo piang tlai deuh a nih hi aw” kan ti mai dawn a. Lo piang hma deuh ta se, 1st Lady a ni leh kher awm si lova.. ka ti a. A engapawhchu ni se, thiltha reng reng hi kan hotute atanga intihhmuh hi a lo sawt ber ni ta berin ka hria. Comment atan chuan a thui mah mah…
Report this comment
March 24th, 2012 at 9:54 pm
I puitling hle mai
Report this comment
March 24th, 2012 at 10:54 pm
Tha hle mai, nun hi tawnhriatin a chiah tak tak hi chuan kan zawr hnep mai a, han incho phur viau thin mahila thil thlir dan hi a dang daih tawh mai a ni. Posttupa, i hringnun hi malsawm hnar midangte tan lo ni ve thung tawh rawh se.
Report this comment
March 24th, 2012 at 11:17 pm
#27 Covenanter, Million Thanks
Chhuan tur leh chapo-pui tur engmah ka nei ve lo. Ni e ‘The Truth Prevails’ tih thu hi Pathian-in min tih-chak nan a la hmang reng a, a dikna hi mit ngeiin ka hmu zel bawk. Kawng leh lamah chuan, keini tuar ve te hi chu a nep lutuk alawm mawle… Missionary-te, Chanchin Tha avanga lu-chhum, ban-chhum an tawh laia (Orissa Kristian-te tuarna te kha), keini lo tawrh ve te zawng a nep em mai, ‘tuar’ han inti ve ngam chi pawh ka ni lovin ka in-hria. Paula phei chuan ‘hnawm-hne-ah ka ngai,,, ropuina la lang tur nen chuan tehkhin thamah ka ruat lo’ a tih hial nghe nghe kha.
Report this comment
March 25th, 2012 at 12:03 am
Vawiin chu nileng leh zankhuain ka chhuak pek a. Thu benghawlh leh tha in lo sawi chhuak leh ta teuh mai. A va’n lawmawm thin tak…
Asteric™… I thu hian awmzia a nei thin teh e. Nia, mahnia kan tih emaw, ka phu ve reng emawa ngaih chang hi a awm ve fo thin. Pathian, kan engkima engkim hi kan hriatreng a tul tak zet a ni ti raw…
Sofloy… Kan changkanna hian kan nundan leh khawsakdan te hi thlak danglam ve hret hret se ka duh thin khawp mai. Nia, Pi Rii hi chuan a thawhhlawk ve khawp mai…
Report this comment
March 25th, 2012 at 3:03 am
i ngaihsan awm hle mai
Report this comment
March 25th, 2012 at 3:45 am
A ropui hle mai
Han comment chiam ka chak khawp mai, mahse ka insum hrih ange.
Report this comment
March 25th, 2012 at 6:29 am
A ropuiin a ngaihnawm leh pek hle mai! Tun hmaa i chanchin a ngaihnawm ang bawkin tun hnu zelah chanchin ngaihnawm tak(harsatna ni kher lovin)i neih chhoh zel ka duhsak a che.
Report this comment
March 25th, 2012 at 7:17 am
I thuziah tawp a
“Lalpa ka lawm em em e”
Tih té khian min van hneh tak, kan Pathian hi a lo va han ropui tak em!!
Report this comment
March 25th, 2012 at 8:42 pm
supa duper gaisag cEee^^ min tiharh khop mai i post hi,,,me like it
Report this comment
March 25th, 2012 at 10:32 pm
Thian te u, ka lawm e…
Ka post ningnel ve tak kara in tawnhriat ropui tak tak kan hriatte hian rahtha chhuah se ka ti hle mai. A tam zawk in la insum na’ngin… 
Report this comment
March 26th, 2012 at 10:37 am
Hei zet chuan Misual luh min tiphur thar leh hle mai, post ropui tak a ni e.
Report this comment