mi(sual).com

1. Introduction…
Plastic Surgery tih hi Greek “plastikē” (tekhnē), or “plastikos” tih ațanga lak a ni a, “siam țha or siam danglam” (to mould/modelling) tihna a ni. Hemi atang hian “Aesthetic Surgery” (Cosmetic Surgery) pawh a lo chhuak a ni. Plastic Surgey hi India-ah B.C. 800 khan Sushruta (the Father of Surgery) chuan a lo hmang daih tawh tih hriat chhuah a ni. India ațang hian Europe, Italy, British leh Khawthlang (Western world) ram zawng zawngah a lo lâr a.  Joseph Constantine Carpue chuan kum 20 chhung zet Indiaa hetiang lam hi a zir hnu-in kum 1815 khan a takin a hmang chhuak. Egyptians, Romans, Greeks te pawhin B.C. 1-na velah khan an lo hmang ve tawh bawk.

Kum zabi 20-na a lo inherchhuah khan, a pawimawhzia a lang-chiang tulh tulh a. World War I khan New Zealand Otolaryngologist Harold Gillies leh a thawhpuite chu indonaa hliam tuarte enkawl turin US chuan a ruai nghe nghe a, World War II thleng pawh khan an la țangkai hle a ni. Kum 1946 khan, Dr. Gillies hian hmeichhe ‘thil’ chu mipa ‘thil’-ah a thlak sak theih tak thu (carried out the first female-to-male sex re-assignment) a puang a! Hemi hnu phei hi chuan khawvelin Plastic Surgery-ah beiseina sang tak a nei a, ngaihven a hlawh ta em em a ni.

2. Plastic Surgery Tum Ber Chu…
Plastic Surgery hi chi hrang hrang a awm a. Taksa emaw fuke emaw fuh lo leh mawi lo lai siam danglam leh thup-bo hi a hnathawh pawimawh em em chu a ni. Anihna takah chuan, Plastic Surgery lo chhuahna chhan hi chu, pianpui emaw, chetsual vang emaw-a taksa khawi emaw lai ber a nih tur ang ni ta lo (any disfigured part of the body or any physical disfigurement, whether from birth or acquired later), rilru leh taksa-ah ser leh landan hmuh hrehawm em em te a siam avanga tih-danglam leh khuh-bo țula hriatna ațanga lo piang leh hman-chhuah tak a ni ber.

3. Hmel leh Pian Duhtawk-lohna Chu…
“I hmel mawina itsik vangin” tih hla ang deuhvin, kum 40 liam ta vel ațang khan, Plastic Surgery hi țangkai lehzualin, Siamtu Pathian (Creator) ngaihdan pel rawk khawpin khawvel hian a tuipui ta niin alang. Hetiang lam hna hi, Plastic Surgery pawh an ti satliah lova, “Aesthetic Surgery” (Cosmetic Surgery tia hriat lar a ni mah zawk) tiin an vuah ta hial a ni.  He Cosmetic Surgery hi chuan a țha pangngai, Pathian thilsiam țha pangngai (natural beauty) kha, tih-țhat belh tumin, a aia țha zawk leh mawi zawka siam danglam tumin an bei ta a ni (it dare to give finishing touches to God’s most beautiful creation-the human body). An taksa emaw, taksa peng emaw-a an duhzawng ni lo apiang chu an tidanglam ta zel mai a nih chu!

4. Cosmetic Surgery Chu Duhthusam A Ni Em?
Duthusam chu ni teuh nang aw, “a teuh loh mai, a teuh loh mai” tih hla ang kha a ni. Plastic Surgery ti tawh reng reng hian, in-enkawl zuina an mamawh a, special cream te, hun leh lum leh vawt leh engkim mai-ah an fimkhur a ngai bik a. A buaithlak zualna lai ber chu, an inven fimkhur a ngai ta em em a, mi pangngaite (plastic surgery ti ve lo te) angin tui te an hmang ve ngawt ngawt ngam lova, lum leh vawt-ah te pawh duh duh-in an awm ve mai mai thei tawh bawk lo hi a ni!

Cosmetic Surgery hi chu, Plastic Surgery pangngai, pianpui avang emaw, tawhsual tawh avang emaw-a damchhunga hmuh theih (leh hmuh-theih loh pawh telin) lama ser awm tihbo leh thup-mawi lam kha ni tawh lovin, Siamtu kut-chhuak kha a mawi lohna awm em em chuang si lovin, mawi an ti tawk lova, thiamna hmanga tih-mawi leh-zual an duh ta a ni. A tlangpuiin, an hmai, hnar, hmui, mit, biang, nghawng, hnute, etc. te chu Cosmetic Surgery hmangin an duh danin an siam danglam ta țhin a ni. Mawi lehzual duh avanga Cosmetic Surgery ti te hi tam tak chuan an mawi-puiin, ti-fuh tak tak an awm laiin, ti-fuh lo, damchhunga ser lian tak in-siam ta te pawh an awm ve bawk.

5. Ka Inchhir Ngawih Ngawih A Ni…
French mi, actress hmelțha tak Emmanuelle Béart chu kum eng emaw zat chhung chu mi tam tak-te ngaihsan rawn leh entawn a ni. Mahse, France-a 36th Deauville Film Festival Opening Ceremony, September 3, 2010-ah chuan Cosmetic Surgery a tih avanga a nun khawngaihthlak zia leh a inchhir zia a rawn sawi chhuak ta! A inchhir thu a sawi hi a lainatawm tak zet zet, “Profoundly affected by having plastic surgery and would not consider it again… It is a grave act in which you don’t necessarily foresee all the consequences” a ti hial nia!

Ms. Emmanuelle Béart hian ama tawn-hriat ațang ngeiin, Cosmetic Surgery țhat-lohzia sawiin a campaign kual nasa hle a. Tunah hian UN Ambassador niin, South East Asia-a  Child Exploitation and Hunger tan a campaign mek bawk.

Hollywood film star zingah pawh Leslie Ash, Saffron Burrows, Britt Ekland, Melanie Griffiths, Pamela Anderson, Angelina Jolie leh Meg Ryan, etc. ten an ti ve ngei tih an puang bawk! Nikum 2011-ah khan Britain leh US-a etc., hmeichhe țhenkhat  chuan an Amul-bawm (breast) an siam danglam tirna-ah Company lam ten a țha lo deuh zawk (cheaper industrial-grade silicon rather than the medical-grade silicon) an lo thun sak a ni awm e! An thil thun (silicon) hian Cancer (breast cancer) te a siam theih dawn avangin an buai nasa a nih kha! Bollywood film star zingah pawh Cosmetic Surgery hi an uar ve em em tho a ni (e.g. Katrina Kaif, Preity Zinta, Shilpa Shetty, Priyanka Chopra, Sridevi, Shruti Hassan, Juhi Chawla, Hema Malini, Aishwarya Rai, Madhuri Dixit, etc.).

6. Mizote Tan Hian Engtin Nge?
Mizo-te hi kan neih-in a tlin chuan, hnamdang tihdan hi kan la zung zung a. Kan chhiat pui hial pawh a awm niin a lang. Hmel țhat te, zei te, nalh te hi duhlo kan awm lo. Hnaivai deuhva a awm hunah chuan, mizote hian kan ti leh sup sup dawnin a lang. Kan sum neih-in a tlin ve tan tawh a. Keinin “engnge ka ei ang a, engnge ka in ang?” kan tih laiin, Mizoram-a mihausa țhenkhat chuan Ui vulh tur pawh Foreign ațanga chah thla-in, Rs.1.5 Lakh chuang man pawh an nei leh nual tawh ni awm a ni. Keini ang mirethei thil neih zawng zawng (assets) belhkhawm ai chuan heng mihausa-te Ui man pawh a to zawk tihna a nih chu! Hengte hi chuan an duh chuan Cosmetic Surgery chu an ti thei chiang sa tihna a ni a?

Chuvangin, Siamtu min siam dan mawi leh nalh tak (natural beauty) duhtawk lova Cosmetic Surgery kan tih ve hi Mizote tan hian a țha ang em? Bible zirtirna nen a inkalh-in kan hria em? Kan hlawkpui ang em? Hnamdang leh ramdangah kan hming than phah ang em? Kan nula, tlangvalte hian hnam changkang leh nei-nungte nupui/pasal an hmuh tam phah ang em? Cosmetic Surgery kan hman avangin ramdanga kan rawngbawlna ten hma an sawn zawkin kan ring em? tih te hi in zawt chungin, Plastic Surgery (Cosmetic Surgery bik)-in Zofate min luh-chilh tak tak hma hian i lo khel lawk teh ang u.

PICS: Emmanuelle Béart, Cosmetic Surgery a Tih hma leh a Tih hnu Thlalak-te.

https://i1164.photobucket.com/albums/q572/drjohnhlychho/1Emm.jpg

https://i1164.photobucket.com/albums/q572/drjohnhlychho/2emm.jpg

https://i1164.photobucket.com/albums/q572/drjohnhlychho/2emma.jpg

https://i1164.photobucket.com/albums/q572/drjohnhlychho/emma1.jpg

https://i1164.photobucket.com/albums/q572/drjohnhlychho/Emma4.jpg

Similar Posts:

• Uisa Noddle !
• Mizoram Emblem pic
• Plastic Surgery Free in
• MSA Chapchar Kut models
• Transgender-te tân Miss Universe a tel theih dâwn

Recent Posts:

• TUKTIN PAR
• Zabula Champhai Ramhuai hmuh dan
• Thianpa Sawmtea Hriatrengnan
• Mother’s Day duhlo!
• Neuva hun hnuhnung

This entry was posted on Friday, April 20th, 2012 at 4:30 pm and is filed under Advice, Information, Lifestyle, Mizo Society & Culture, Opinion. You can follow any responses to this entry through the RSS 2.0 feed. You can leave a response, or trackback from your own site.