Thuhma
April ni 7, 2012 khan Isua Krista thawhlehna hmaruaitu a nihna champhaphak hun lawmawm tak nghakin rei tak ka meng a. Thil tih lai ka neih bawk avangin a tuk (8th April) zing dar 4 thleng ka meng ta a. Easter chibai bukna message ka dawng pheuh pheuh a. Dar 4:12 am ah chuan message danglam tak ka dawng hlauh mai. Chuta inziak chu ‘ Rev Dr HS Luaia chuan min peih loh san ta’ tih hi a ni mauh mai.
Helai hmuna ka awm lai hian ka pu ka sun tawh a, Pu Luaia thih thu min lo hrilh leh ka pu thih thu min lo hrilh laia ka rilru nat dan hi a in ang rengin ka hre hial a ni. A lei kohhran enkawlna a thawhhlawk em em leh Mizo society kan hmasawn theih nana mi rawntlak – lehkhabu kal thei miin an rawn luai luai thin Pu Luaia hriat reng nan hian he thuziak hi ka lo dah ve leh hram e. Ka buai lai deuh a nih avangin duh angin ka hawlzauhman lova, ka thuziak tamtak hi Kristakhiangte.blogspot.com, BCM Pastors’ Bio-data, phone leh keima mimal tawn atanga ka lakte a ni.
Kum 21 mi a nihin Kohhran Upa a ni
Date 5.11.1908 khan Tawipui-ah a piang a. Amah hi Hrahsel Saza hnam a ni. Kum 11 mi a nihin Pastor Haudala’n Lungranga-ah baptisma a chantir. Kum 1920-ah khan Serkawnah primary a pass a, 1923-ah Upper Primary a pass leh a, 1925-ah Sêrkâwn-ah Middle English a pass leh a. Kum 1928 chho khan Darzo lamah zirtirtu hna a thawk leh a. Darzo-a a awm lai hian Thlarau Thianghlim harhna a chang ta a , kum 1929-ah a tlangvâl laiin Kohhran Upa-ah thlan a lo ni ta a ni.
Van lam kohna a chhang
Zirtirtu hna chu taima tak leh rintlak takin kum 9 chhung Khuanghlumah leh Darzo-ah a thawk hman a. Fa 2 neih hnu kum 1936 khan chunglam kohna duhawm tak a hre ta a. Serkawn lamah Pu Buanga phalna a la a. Mission chawmin Cherra Theological College lamah Pathian thu a zu zir ta a. Kum1938 khan diploma chu first division-ah a pass a. A kum vek-ah tirhkoh-in a thawk a. Kum 1939-ah Pastor Challiana’n minister atan a nemnghet ta a ni.
Hruaitu nih thiam Thlarau mi bawk si
India ramin zalenna hmu dawn hnai anga thuthangte a awm tak chiam hnu-in Baptist Missionary Society, London chuan Baptist Church of Mizoram inrelbawlna chu a rammite kuta hlan tha-in an hria a. Chumi avang chuan hotu lu ber Church Secretary post (tuna General Secretary ang hi) an siam ta a. Kum 1946-a Haulawng Presbytery-ah lungrual takin Pastor Luaia chu Church Secretary atan thlan a ni ta a ni. Chuan church Secretary chu kum 25 (1946-1971) chhung a ni a. A zawnin hotu lu ber nihna hi vawi nga atan an thlang nawn hial a ni.
Pastor dang ang lo takin Office-ah leh rorel ni khua-ah thluk fim tak a hmang thiam em em a. Pastor leh kohhran enkawlte kha tihdan a thiam thin em em thin. Chutih lai mek chuan mittui tla pur chunga nung taka Pathian thusawi lam a ti thei leh em em thung si thin a ni. He thil hi rawngbawltu leh pastor tamtakte tih theih ngai loh a ni.
Tin, ZBM Secretary a ni leh bawk a. Hemi mai bakah Pastor bial enkawlte, Hospital Chaplain nih thlengin a chelh chho vek a ni. A hun lai hian Kohhran inlak hran duhna te, politics tuinu te leh Prebyterian kohhran lam nena inhraithiamloh te kha a hun lai vekin a thleng a. Mahse thiam takin thu lai a sa a, a mawhphurna a hlen vek zel a ni.
A hun laiin harsatna a tawk nasa
Sawi tawh angin Church Secretary a nih tan kum hi Indopui tawp hun lam leh India ramin zalenna a hmuh tan tirh lai vel a ni a. Social leh economic lamah harsatna chi hrang hrang kohhran leh khawtlang lamin an tawk nasa hle. Chu a chhapah rambuai a lo ni leh a harsatna tamtak chinfel tur a nei. Kohhranin Peace Accord leh Citizen Committe a din a, chutah chuan Chairman a ni. Remna leh Muanna zawn chungchangah khan BCM leh Presbyteriante kha an thawk ho a. Christian Peace Committee-ah khan Rev Zairema leh Rev. Lalngurauva Ralte te nen khan a pawimawh leh phusa pawlah an tang a nih kha.
Rambuai hun laia an hnathawh avang hian mihring nun tamtak chan tur kha kan chan loh phah a ni. A hlutzia hrethiam tan chuan lawmthu sawi mawlh mawlh na tur a ni. He an hnathawhna avang hian nekchep leh sawichhiat pawh an tuar nasa hle. Hruaitu lar leh ziaktu ni bawk- A. Thanglura phei chuan ‘Sazu mitdel pathum‘ tiin an hming a phuah sak hial a ni.
Kraws thu uar takin a sawi thin
A thusawi hi vawi tamtak ka ngaithla ve tawh a. Kraws chungchang hi sawi nuam a ti hle thin. Thupui dang deuh hlek hmanga thu a sawi chang pawh hian Kraws ang zawng hian a kual leh nge nge thin. Tum khat pawh – kum 2001 khan Biakkunga Murray vuinaa a thlamuanna thuchah sawi hi ka ngaithla pek a. Kha tah pawh khan Marthi tawngkam “Lalpa, heta awm ni la chu ka nuta a thi lo tur” tih ngei mai kha a chang thlan a. A sawi chho zel a. Kraws thiltihtheihna avanga thawhlehna hmahruaitu Isua kan neih thu lam a pe na leh ta ber a nih kha.
Tunhma chuan Baptist kohhran hian hlimsang leh hlimruite kha kan pawm thiam lo hle thin a. Hotute phei chuan an haw em em thin. Mahse ani hian a pawng ataka khatia han duhloh ngawt kha dik niin a hre lova. Church Secretary a nih hnu-in Baptist lam hian ama zarah an pawm thiam ve thei ta a. Harhna a thleng zing ve ta deuh a ni.
Mi tangkai a nihna hi mawle
Kohhran mai bakah social work lamah kuthnu a ngah hle a. Kum 2000 February ni 12 khan Senate of Serampore chuan Doctor of Divinity (D.D) a hlan a. Kum 2002 khan India Sorkar atang-in Padma Shri chawimawina a dawng a. Heng bakah hian pawl hrang hrangin chawimawina engemawzat an pe bawk a ni.
Thuziak lamah pawh a thawhhlawk hle a. Lekhabu 10 chuang leh article 100 chuang a ziak hial a ni. A boral hma kum 104 a nih lai mek pawh khan lehkhabu ziah lai a nei! Bible Society Lunglei Branch President hna hi kum 11 zet a thawk a, Bible lehlin hna kum 11 bawk a thawk tawh a ni. Mizo Upa Pawl president te a ni bawk a. Tin, Mizo Academy of Letters ah PATRON a ni a. Lok Adalat Member a ni bawk a, mi inkarah remna a awm theih nan a thawk nasa hle bawk.
Sawi tur a tam ka ui bang thei lo a ni e!
Faina lam hi a ngaipawimawh em em a. Serkawn khawlaia a kal mai mai emaw kan tih lai pawh hian a tiang hawl lai hian bawlhlawh a lo chhar leh nghek zel. Keima nghei pawh hian vawi tamtak ka hmu a ni.
A ngaihsanawm ka tih leh em em na chhan chu a pension tirh hian in leh lo nghet a nei miah lo. Pathian ram lama thawhlawm pek a uar lutuk avanga he thil hi thleng a ni. An chhungkua an rual em em a. Tu leh fa pawh a nei nual bawk. In leh lo nei lo, sum lama harsa tak chung khan Aizawl lamah Bible letling turin kum 11 chuang tirh a ni a. A hriselna pawn a tuar viau a ni. Amah tawngkam ngeia a sawi danin hetih lai hun vel hi a rilru hah zual lai niin a sawi thin. Upat lam a ni bawk a awm ka ti em em thin. Mahse “Pe rawh u tichuan pekin in awm ang” tih chu mihring ngaiha tlai hmel takah Pathian mite kaltlangin a dawng ta a. Pathian chungah a lawm em em a ni.
Duhtawk mai ang aw
A vuinaah thusawina hun min pe ve ta se sawi tur ka ngah ngawt ang le. He laia ka sawi lan loh a chhungte, serkawn mipui leh Baptist kohhran memberte hnena sawi tur ka va ngah tak em! Mahse ka duhtawk mai ang, a sei lutuk palh ang e. Kohhran chungchang chauh ni lo – mizo society hmasawn theih nana mi rawntlak tak Rev Dr HS Luaia hi a uihawm tak tak a ni. Helai pawha kan sawi fo, kan inhnial luai luai thinna Zu chungchang pawh hi tun kum June thla velah a ngaihdan leh kohhran hmasate’n an lo khap tan dawn ka zawt ang ka tia. Mahse hei ka hawn hun chuan a lo awm tawh dawn ta huah lo mai. Tawih thei hian tawihtheihlohna sin turin rihsang min lo kaisan ta sia le!
Mi diktak ni bawk, hrezau bawk, thluak tha leh rorel thiam, taima si Pathian tih em em tu hi hun tha ka nei tan ve dawn chauha a lo liam mai ta hi ka ui em em a ni. Ka lo piangtlai deuh hlek hi a pawi a nih hi mawle! Tunlai huna kohhran leh khawtlang hi amah bawk hian kaihruai leh se ka tih chang a tam thin!
A chhungte leh Serkawn khawtlang ka tuarpui em em e!
Muang takin Pa hnenah chawl mawlh rawh se!
Similar Posts:
- Happy 103rd Birthday to Rev HS Luaia
- Gay Pastor avangin Church of Scotland a buai hle
- Leithum pastor bial thar awmze neilo
- Mahni hming bula ‘Reverend’ dah hi
- Mizorama kohhran hrang hrangte
April 24th, 2012 at 4:39 pm
Pastor HS Luaia hi chu “Reverend” hming hi pu tlak ngawih ngawih a niin ka hre ve. Amah ang Pastor hi Zofate zingah piang leh tak ang maw? A uihawm ngawt mai. A kal lo thei si lo,
Report this comment
April 24th, 2012 at 5:02 pm
Posttupa hian a post har ka ti reng a ni….. News category lamah rawn post lo mah la, chanchin kimchang leh ngaihnawm takin i rawn post a chhiar pawh a manhla hle mai… Good post
Report this comment
April 24th, 2012 at 5:03 pm
Zofa lopiang tawh zinga hnuhma ngah leh ropui berte zinga pakhat chuan mual min liam san ta ruai ruai mai chu ania, a uîhawm mang tak e.
Report this comment
April 24th, 2012 at 5:25 pm
Hmanah Pu Vanlalliana’n kan sikul min rawn tlawh tumin Pu Luaia hian a rawn tawiawm a, tanna hunserh leh tawngtaina a hmang a, chuta a thusawiah chuan “Tawngtainaa bul tan loh programme-ah ka tel ngai lo” a tih ka la hre reng……….. nun a kaihruai thui hle in ka hria.
Report this comment
April 24th, 2012 at 5:35 pm
Ignatia chu i va rawn che har tak ve
i post tha hle mai 
Report this comment
April 24th, 2012 at 5:38 pm
A va ngaihnawmin a va khamawmloh vele. Mizo zinga ka mi ngaihsan berte zinga mi a ni a, tlai khawhnuah a chanchin kan hre hnuhnawh ve chauh a ni si a le. Mahse a pawilo e. A sulhnu tamtak a awm a, a mimal chanchin aia pawimawh entawntur leh zirtur min hnuhchhiah alawm.
A khualzinna ram he Leiah mihringten chawimawina sang ber bera kan neih a dawnga, a In tak a thlen hun chuan engtia nasa tak dawng ang maw! Mi awhawm ber a va ni tehlul em.. Ka thik lutuk kei misual hian. A thusawi ka lawm em em mai chu Bible an lehlin laia Rev Zairema leh pastor pakhat inhau a thlelh nasat theih zia a sawi kha a ni. Mite hian harsatna hi an lo va paltlang nasa bik tak em. Kraws thu hi chu a tuipui hle nitur a ni, a sermon hnuhnung lamah pawh khan kraws thu bawk ka sawi e a ti.
Report this comment
April 24th, 2012 at 5:53 pm
Ka beisei ang ngeiin a ngaihnawm. Save hmak tur a nih hi. Pasor Luaia ang hi chu khawvel hmun dangah pawh an tam a rinawm loh. A uiawm tak meuh meuh a ni.
Mahse helai hi tlemin han chul mam deuh la chuan chhiar a nuam deuh zawk tur ka lo ti ve mai mai a..
“Pastor dang ang lo takin Office-ah leh rorel ni khua-ah thluk fim tak a hmang thiam em em a….”
Report this comment
April 24th, 2012 at 6:13 pm
Chhiar anuam hle mai.
Ignatia (33-115 AD) kan inbiak zan khan awm vela ka ti kher asin… kan kimlo lutuk a
Report this comment
April 24th, 2012 at 6:22 pm
A ngaihnawm kher mai. A ziaktu tur diktakin a ziak a ni. Post tupa i reh vawng vawng khawp mai.
Report this comment
April 24th, 2012 at 6:27 pm
A va ngaihnawm ve oo.Pu Luaia hi keipawn ka ui khawp mai.I ti tha e
Report this comment
April 24th, 2012 at 7:29 pm
Chhim mi hrang hi ka hre chiang ve lo na a a thih thu hi a hre hmapawl niin ka hria a. A tupa Taia khan Fb a a dah kha Easter Sunrise inkhawma ka kal turin in fb ka keu dek dek na ah ka hmu a, ka ui hle mai….
Report this comment
April 24th, 2012 at 7:36 pm
Rev HS Luaia zofate zingah athawh hlawk zia hria te hian an ui tawp thei lo ang. Ignatia chu post tha khawp mai hetiang thu chhiar te hian chona min pe thin.
Serkawn a akal mai mai te hi bawlhlawh alo chhar leh teuh thin tih hi keingei pawn ka hmu thin.
Report this comment
April 24th, 2012 at 7:38 pm
Hrahsel Saza Luaia tihna a lo ni maw! A chanchin hi kan hre ve lem luam a, Ignatia hian a rawn thawh tha khawp mai. Mi ropui tak chu ani ve ani.
Report this comment
April 24th, 2012 at 8:01 pm
A lo chhuak ta maw… He article ziah hi ka chak ngai lem love!
Ka hmanhmawh deuh hleka chul mam tur a awm nual a nih tak khi mawle. Pu Buhduh-a sawi pawh khi a dik khawp mai… ka tarlan tum tak zawk chu – Baptist angah chuan Pastor B Thangchina, Pastor H Lengluta angte hi an Pathian thusawi dan hmang leh an mizia a danglam bik hle a. Mahse kohhran hruaitu atan chuan an tha vak lem lo. Ani pawh hi Pastor CHina leh Pastor Lengluta te angin mittui tla purin – rilru khawih takin Pulpitah thu a sawi thei a, chutih lai mek chuan administration lamah a hlawhtling leh em em thung si. Hei hi Baptist pastor dangte pawhin an duh em em chhan pakhat a ni tlat. Pastor dangte an tha love ka tihna lam a ni miah lo a nia. A talent dawn hlu tak pakhat ka lo tarlang chauh zawk a ni.
Pu HV, i lo hmu hman a ni maw. I vannei hle mai. Kei chuan ka hmu leh tawh dawn lo a nih hi. A chhenna veng ngeia ka awm laite khan duh aiin ka hlut thiam lo a, pawi ka ti hnuhnawh a nih hi mawle! Mizo tan heritage tha tak a ni asin le amah hrim hrim hi…
Pu Lrp, HS Luaia tih hi Hrahsel Sawiluaia tihna a ni. Zosapte khan hming sei tak neih kha an duh vak ngai lem lova, an kaihtawi tlangpui. Entirnan: Rev Dr CL Rema, Rev Dr C L Hminga, Rev Dr KT Chungnunga, ldt., Tin, a hming tak chu ZAITAWNA a ni a. Mahse an koh fiamna SAWILUAIA tih hi a hmang hlen ta zawk a ni.
Report this comment
April 24th, 2012 at 9:23 pm
Ignatia chu rawn chulmam tha lutuk e
Rawn chulmam kher lo mahla han helh tur a awm em em chuang lo ang. ‘Minister Zodintluanga hi minister dangte anglo takin hma a la chak em em a’ ti ila minister dangte hian an helh em em lovang. Thudik a ni a, a lawmawm leh tha lam a ni bawk a kan pawmtlang vekin a rinawm.
Chulmam tih takah chuan keipawh ka comment #6 1st para khi chulmam ve deuh ka duh. Ka sawi awmzia khi Pu Luaia chanchin a pawimawh lo ka tihna lam nilovin, mimal takin Pu Luaia hi hrepha/hman lo mahila, amah leh Pathian pawhin an ngaihpawimawh zawk, a rawngbawlna rah hi Mizote hian kan la hlawkpui dawn chauh va, hei hi a ropui lai ber chu a ni ka tihna lam a ni e. Ka short-cut lutuka, ka sawichhuah dan khi ka duhdan a ni lo reng reng.
TV leh internet vela Pu Luaia-te In ka hmuh ringawt pawh hian ka chhunglam hi a chedawt zel. Materialism hi chuan a tibuai ve miah lo a ni tih hi ka ngaihdan nghet tak a ni. ‘A In thlalak atang ngawta chutia judgement han siam’ min ti mahse ka hmuhdan a ni ve tlat. Sawhsawn mai mai dawn lo.
Report this comment
April 25th, 2012 at 1:06 am
A chanchin i han ziah takah chuan, a lo ropui ngei mai. Kum 104 mi ni chungah lehkhabu ziah lai a nei leh, kum 21 mi a nih laia Kohhran Upa a ni thei hi a ni. A ropuiin a ngaihsanawm thlawt e.
Report this comment
April 25th, 2012 at 1:30 am
Ignatia sawi point pakhat khi ka han pui lawk ang e. Ka Pa hian a sawi ka hre thin a. Pu Luaia chu bial a fan chuan nu leh pa mawl ber ber te tan pawha nelawm em em leh an levelin a intihniam thin a, a oéice ah erawh chuan BCM Post sang ber Church secretary office a vawng zahawm em em thin a, sawrkar hruaitu liante pawhin an zah em em thin ani” tih a sawi ka hre tlat a ni. Rev.Dr.K.Thanzauva hi hetiang ang quality nei vea sawi ani bawk.
Report this comment
April 25th, 2012 at 1:35 am
Comment-ah ka telh ang ka tia, ka theihnghilh daih. ‘uihawm’ ni lovin, ‘uiawm’ tih tur…
Report this comment
April 25th, 2012 at 9:01 am
Good post. Kan Pastor chhuanawm tak hi ka ui khawp mai. Mahse natna leh hrehawmna awm tawh lohna hmunah min kalsan ta si a
Report this comment
April 25th, 2012 at 10:59 am
Rev Dr HS Luai hi mi ropui, mimal taka ka hriat leh mimal taka min hretu awmchhun tlemte zinga mi a ni a, a hmel hmuh leh hmaa min lo chawlhsan ta mai chu ka va ui em!
Kum hmasa mai khan amah ngei kawmin amah ngei hian ka lu chunga kut nghatin min tawngtaisak nghe nghe a, ka nihlawhin kha a tawngtaina kha ka tan a va hlu em! A hlu tawlh tawlh dawn pawh niin a lang!
Khawvela rinawm taka a rawng a bawl thin LALPA chuan khawvelah pawh nasa takin a chawimawi ve a, Mizo zingah na na na chuan mi ropui a tlingin ka hria. Tunah Vanramah ropui leh zuala lawm luh turin min kalsan ta hi a uiawm rualin a lawmpuiawm bawkin ka hria. Vanramah pawh a han mikhual lo hle ang tih ka ring bawk.
Ka pu, hlim taka kan inhmuh leh hma chu mangtha tiin ka thlah liam mai ang che!
Report this comment
April 25th, 2012 at 11:22 am
Ka hnuk a ulh thar leh dawn deuh tlat… a vuina ah lah ka tel ve hman bawk si lo
Report this comment
April 25th, 2012 at 12:24 pm
Pu John-ate ka lo chhang lo che u a ni maw… Nia, hei tunlai chu ka buai deuh hlek. June thla ka reh leh deuh ang a. A bakah chuan ka lo lang ve leh pheuh pheuh ang.
TS: Mizotawng lamah hi chuan ka GURU i ni chiang mawle. Ka lo hre reng tawh ang.
Awmtea: Bial zaipawl nen va tleh phei tur alawm le…
Pu Keimah: I ui viau ang le. Ka hriatthiam pui che. Ka hriatchian hnu che hian in in close dan tur ka suangtuah thiam ruai ruai mai.
Pu Donald: I comment khi a bul atanga tawp thlengin ka duh e. A tawp lam khi ka pawm em em bawk a ni.
Tukin khan Pastor pakhat hian minlo message a, ka misual nick engtin nge a hriat pawh ka hre lo. ” Misual.com lama i thuziak hi a tha a, mahse Thlarau mi i teh dan hi a fuk tawk lo deuhin ka hria. Keini Theological Institution lama awm hi min hmu Thlarau mi dawn lo a ang” tiin a lo thawn deuh teuh mai a. Kan nibiak tak vak kha.
He thu ka ziak lai hian ka rilru hi a UNIDIRECTIONAL lutuk a, ka awmdan tur chu i hriatthiam ka ring. Tun hnu hian Committee-te hi a RAU lai ber nia ka hre ta daih thung a chang chuan. Tunhma anga Pathian thu mittui tla zawih zawih chunga sawi theih hi RAU ber nihna anga ka lo pawm thin kha a bo deuh ta tial tial. A awm tho mai hmanlai hun ngaihtuah kha chuan… CHuvang chuan Pu Donlad te, Pu Art-a te leh Pu Vakula te kha RAU ka tih chi in ve lutuk a nia. Tlemin ka thuziak ka lo chhep sual a nih hi mawle.
A chanchin ngaihnawm tak tak sawi tur a tam khawp mai a. Pu PK-a hian a thlawp tha lutuk e. Pathian thu a sawi ve chang hian Bible lehlin thar hi a hmang ngei thin a. A hman chhan a sawi deuh ngei thin. Amah avang hian Bible lehlin thar ka hman ve phah a. Hostel lamah hun ka chan ve tawh chuan an hawi hai viau thin. Mahse tunah chuan a hluiah bawk ka kir leh ta rih.
A dikna mawlh hi fakawm ka ti thin. A pension hnu pawh hian Kohhran hi a ti tau em em a. Diklo na lai nei nia a hriatah chuan han tawng chhuah chang pawh a nei thin.
Serkawn khawchhung hian tunah hian ramngaw puitling tak khawlaiah an nei a. Hei pawh hi ama thawhhah vang a ni ka ti lo thei lo. Pu Sawiluaia’n, “Kha laia thing sat kha tunge?” tia Saptui RIZAP chhungah a rik thak tawh chuan tik ti ngam an awm ngai lo. Hotu lu ber ni mah se thil hote pawh a ngaipawimawh a, mi ngaiha a telna awm lo deuh deuhah pawh hian a inrawlh ngam vek thin.
Naupang enkawl chungchangah pawh hian Upa VL Ngena nen hian an thawhhlawk thin khawp mai. Naupang nungchang hi an zir ngat ngat peih nia mawle. Lalthangliana Murray IFS( a haw em lovang chu maw ka sawi chhuak a…)hi kan hriat theuh ka ring a. Tum khat pawh Pu Thangliana Murray leh a thiante hian Pathianni-ah Ar an phil a lawm le. Baptisma mawngah an puah a, puar taka an ei hnuah Upa VL Ngena hian an hawn kawngah a lo rek chiang viau ni tur asin. Chuan le… Pastor Sawiluaia’n an lu chunga kut nghatin a tih takzetin a tawngtai sak ta a ni awm e. An nuih a za lo viau ni awm a sin. Kha ta tang khan an sim hlen thu amah Pu Thangliana hian a ziak hial a ni.
Report this comment