mi(sual).com

Ni leh thlate a liam a, hunpui a rawn inher chhuak dawn nen mitin te rilru ah Christmass rawn thleng tur chu awmin atu ate pawh an buaiin mahni theih ang tawk tawkin an inhmakhua theuh hlawm a. Kei erawh ka hna lama ka buai em avangin bazar pawh kala kal hman loin ka U fate hnena an duhzawng lei kalo tiam tawh pawh kala kalpui hmanlo in min tur sek hlawm a. Zan khat chu, chaw eikham hnu vel aniang thianpa Lawma’n YMA commitee tura mi rawn sawmin ka insiam lai chu ka room ah min nghakin vawin lama a thiannu a bazarpui chungchang leh hmeichhe bazarpui a ninzia te a sawi luam a. Chutah, hrechhuak thut niawm takin,

Thianpa, vawin chu i ex ka hmu a, a fanu alo bazarpui a.

Ka nui ringawt a, ka changlo

Thingpui dawrah ania, kan titi luam a, an lo inthen ani awm e, “ I thianpa chu a ngaihawm thin ngawt mai a tih kha”.
A sawi pah chuan a nui uar uar a, ka chhan lemlo avangin thil dangah a pakai a. Ka rilru erawh chuan nunhlui a chhuikirin ka study table a, a chhawng chung bera ka dah sailungvara siam vantirhkoh lim lianvaklo chu ka han melh zauh a. Thianpa Lawma’n a hriat ka hlau nen titi chung chuan kan chhuak ta a.

Ani lah taka, Lawma hi ka school kal lai atanga ka kawm niin kan inhrechiang a, unau ang maia inpawh, a chhia a tha inhrilh tawn kan niin a kawm pawh kan inkawm ngeih hle a. Kan tlangval tirh atanga nula lam kan hriat ve atang pawhin, nula rimdun leh in tihpui tawn, engmah zep neilo kanni. Mahse, Sangpuii nena kan inkar erawh atir atanga min hriatpuitu nimahse thil sawi vek a rem lemloh avangin kan inthen dan chanchin phei kha chu ka hrilh loin a hriat pawh a hrechiang heklo. Ani lah taka, han sawi vek ila thiante annihna angin min thinrimpui anga, a chanchin a chhe zawnga an sawi chang a awm dawnin chu ngei chu ka rilru tina lehtu leh min vaw let lehtu ani dawn tih ka hresi.

Nia, kum 5 lai a liam ta, kei pawh tlangval senior tiha chhiar theih tawh leh thlaleh maia nupui nei tur ka niin sangpuii chu ka tan hmanlai ani tawh a, mahse engkim, kan inhmuh tirh atanga a hmel ka hmuh tawp ber nite kha nimin ang maiin ala chiang si. Nia, kan college kan chawlh avanga aizawl lama ka haw lai aniin tihtur dang vak ka neihlo avang leh ka U fanu ina Lammual a Mela an buatsaih a kal ve a chak leh min sawm zin avangin ka kalpui ta ani a. Thil chi hrang hrang kan khelh leh kan en zawh hnu chuan Ka nau hruai, kum 4 mi vel chuan merry-go-round a chuang a ngen ta mai a. Ka hlauh zawng tak aniin tihngaihna a awm silo, tichuan kan chuang ta in ka nau chu pawmin hmeichhe thianho pawh anlo chuan ve a, an zinga pakhat pawh kan bula thuin kan chuang ta a.

Hetianga chuan hi ka hlauh zawng aniin vairama ka awm chhung zawng pawh khan ka chuang miah heklo. Kan vir ta ruai ruai a, ka tiril a khurin ka mawng atang hian ka hit chho muai muai ta mai a. Men pawh ka meng ngam loin ka nau hruai leh ka chuanpuinu erawhin an hlau lo namai loin nuam an tiin an au vel ruai ruai a. Ka hlau hmel chu ka bula nula chuan min nuih nasa in min chhaih zui vak vak a. Tichuan kan hun chu a tawp a tawpah a zoin kan chhuk hnu chuan, min fiam pahin thingpui an in dawn thu sawi pahin tawngkam tha tih hriat takin min sawm ta a. Ka lu ala hai deuh muai avang chuan intihharh pah nan kan zui ta a. A thiante pawh chu tleirawl rual tih takah an tawng bawrh bawrh min han dem fiam nghal ringawt a. Thil ei pah chuan kan titi luam a, a hming tak chu Lalsangpuii niin Ramhluun south a awm anlo ni a. A hmel chu a tha e tih chiam tur nilo mahse a chhe lemlo in chumai bakah a mizia te reuh chuan mi hip ta nghal riau mai a. Ani taka mihring te hian mize milpui awm deuh chu kan hre vat thin reng ani. Tichuan, zahtheihloh chhuahin a number ka dil a, nui saih paha min pein min kalsan ta a.

Ngaihzawng pahnih pathum vel nei tawh mah ila, keima tawka tunlai tawng taka ka rawlthar chhuah hlima ka luck ve thin avangin hmeichhia hi kala ngaizawng hmasa ngai lo a. Sangpuii ngei pawh chu a tira be tamlo mah ila , kan in SMS zing tual tual a, message a tawk ta loin kan in call hnem chho ta tial tial in, ka leng ta hial a. Nula hi kala rim ngailoh avangin ka huphurhin Lawma nen ngei kan leng ta a. Thla hnih lai kan chawl nen ka leng zing tual tualin a tawpah phei chuan, ka duhthu te hrilhin ka ngaizawng ta hial a. Mahse, a mizia leh a chezia ah min huatna langlo mahse, min chhang thei silo. Chuti chung chuan nitin ka message a chhang a, tha deuhin kan inbe nitin si. Vawi tam ka duhthu ka hrilh a, hmeichhia hi “ Ka hmangaih che “ la tilo mah ila, Sangpuii hi chu ka thinlunga ka vei em avangin thla hnih chhung lek pawhin “Ka hmangaih chein ka hria” ka ti thei vat reng ani. Tumkhat, beraw tlanga science center kan tlawh tumin ka duhthu leh ka rilru a amah a tlak natzia ka hrilh chuan,

“ Min hrethiam rawh, keizawng ngaihzawn tlak ka nilo”

“Sangpui, nang aia ngaihzawn tlak hi kala tawng lo asin”

A ngawi ngal a, thlanglam en pah chuan a lehhawi a, a bianga mittui tla chu ka hmuhhmaih silo, chutah hreh tih hriat tak, zawi sapin,

“Ka thianghlim tawhlo”

Chu thu ka han hria chu ka thinlung hi teka den anga awmin a awmin ka bing mup mup a, ka hma a ding ka duh em em chu chutiang ni thei turin ka ngai phal silo. Mahse, phallo mah ila amah berin a sawi miau si. Sawi tur reng kan hre tawhlo, ngawi rengin kan haw a, an in thleng thlahin nidangah chuan leng kawi ziah mahila ka leng kawi loin ka haw tlang nghal a. Ka rilru a buai em em a, tihngaihna ka hre silo in chaw pawh chhuanlam siamin ka eilo. Ka room ah awmin , ka rilru hah chuan guitar perhin ka awm mai mai a. Kan kawmthlangte ina an kohhran thalai hlazir thawm chu reilo te ah rawn awmin, zan 5 lai chu an zir tawh a. Mahse, kalo chik ngai lemlo. An hlasak,

“Ka tlinloh anga nangin min pawmin, minlo duh si” tih chu ka thinlungah rawn lutin, ka ngaihtuahna a hruai thui hle a. Enge ka niha, ka duh leh ka hmangaih nia ka hriat ina a thil tihsual vawi khat ka ngaihdam theihloh ang tih chu ka inzawtin, vawin chhuna hreh tak chunga a sawilai hmel te kha ka mitthla ah a rawn thar lehin ka khawngaih letling hle a. Ka va phone nghalin, rei tak kan inbia a, chumi zana a thu sawi chuan ani tun thlenga ka rilru khawiha ka nun kai danglamtu pakhat chu ni.

Tichuan kan inngaizawng chho tain, thla hnih hma lama ka hriat ngailoh chu rei lote chhungin ka thinlung lalnu ah a chang chho a, a awka leh a SMS te chu ka tan hlimna thlentu aniin kan hlim hle thin. Rei lote ah ka chhuk a hunin, kan hreh dun zia te kha. Ka chhuk hnu pawh chuan hmun hla ah awm mah ila, nikhat pawh inbe loin kan awm ngai silo. Naupang zawk anih angin ka thu a ngaithla a, a zawm a. Upa zawk ka nih angin kaihhruai ka tum si thin. A ni telin kan ingaina a, chu chuan induhna a hringin hmanagihna alo chuak a, kan inhmangaih a, nikhat pawh inbe lo a khawvel hman kan hreh si thin.

Mahse, mihring hi zawng alo hlim reng theihloh ani e. Sangpuii ngei pawh a rilru puitling viau mahse tlinlohna tamtak a nei a, a chang chuan hriatthiam har kati si thin. A thin a rim thut thut a, a chang leh mi ning em em a, tunlai tawng takin a EMO in engemaw hlekah a inngaihtuah vak vak a, a thim zawnga thil thlir a chingin, a taksa a hrisello nen kan inhau hnem chho tial tial si. Inngaizawng nih chuan phutlet kanlo nei ve nen min ngaihsaklo nite hian ka hriain, biak hmasak leh SMS hmasak loh chuan mi biak nachang a hre silo. Kan inhau hnem chho tial tial a, kan inngaihna erawh a bang chuang loin hre thin mah ila, chu ngei pawh chu hun a liam a, hunin kan inngaihna leh hmangaihna chu a liampui tih reng tunhnu hian ka hrechhuak hnuhnawh leh thin si. Ani taka, a tir kumkhat kha chuan inhau thin mah ila ni 2 vel bak kan daih loin kan ingai zual emaw tih mai turin kan awm thin si.

Ni leh thla a liam a, vawi tam kanin then a, kan ni leh a, mahse a tawpah chuan kei aia hmangaih a neih thu min hrilh tak hnu leh mi ka atanga ngeia ka hriat hnu chuan rilru na takin kan inthenin a tawrh pawh ka tuar hl e. Thianten,
“a inla changkang chi ani a, nang i simple ve si. Baka long distance ani nen an rualpui chuan an peih rei tak taklo” anti te chu a dikna chen awmin ka hre ve si. Ani, taka ka “di” ka hmangaih Sangpuii pawh chu minhring ani ve tho si. Ka rilru erawhin kum tam kalta a, Science center kawt thingbuk hnuaia,

“Ka thianghlim tawhlo” atih te ka chhuikirin khami zan a ka va phone atanga inngaizawng kan nih te kha ala theihnghilh lova. A hnu kar khat hnu a, Durtlanga ‘Thlan ropui” antih kan tlawh ni a,

“Ka thianghlim tawhlo ka tih hnu pawha min hmangaih thei leh min pawm hi ka lawm asin. Ka hrilh lo anga che ka tia,mahse ka hrilh ang che. Ka duh vang anilo asin, kum 12 ka nihin min pawngsual a” tih thu mittui tla zawih zawih chunga min hrilh erawh engtikah mah ka theihnghilh dawn silo.

Kha avanga a mizia te kha mak aniin, kha thil khan a rilru ah amahin hrelo mahse piansualna a thlen a, kha avang khan atirah in control mahse hun a liam a, kha avang ngei khan vawi tam kan buai si. Kan inhauhna tam tak pawh a rilru a stable loh vang ani si thin. Midang ka nei atih pawh kha ka rilru chu ana, mahse a tira ka chunga a innghah lutuk leh a nun hlimlohna a khat, zan tam mangchhia avanga mu theilo kha keimah a beiseina lian a neih kha mihring ve tho ka nih avangin a duhkhawp lo a. Hlimna tak tak ka nilo tih a hriain atan chuan a hlimna tur nia a ngaih mipa dang a pan ani mai ani. Mahse, kei anga hmanngaihtu a tawng dawnlo tih ka hriain kha avanga ngaidam fo ka ni. Sangpui ka hmangaih khan chu chu a hrethiam silo in, ka demlo mihring ve tho ani si.

Mipa dang bula a kal kha a hlimna tak tak anilo tih ka hriain ka dawn thiam angin atun an dawm thiam dawnlo tih ka hria a, chu avang chu a hnu thleng pawhin theihnghilh har ka ti a. Ka hnena a rawn let leh erawh ka phal tawh bik silo, mihring ka ni ve miau a, mipa tan chuan ngaihzawng ten mipa dang vanga min kalsan hi a tlawmthlak si. A chanchin erawh ka chhui zui reng a, rin ang ngeiin a ngaihzawng nen an inthen vata, a hnu lawka mipa dang nen an inru in, fa 1 a neih hnuah an inthen ta nge nge a. Khatia, rilru na a ka awm pawh kham min hmangaihna ala reh bikloh avangin a hreawm ati ve tho a, min kalsan phah tak kei aia zei leh tunlai zawk nena an inthen hnu phei kha chuan a inchhir tih a thiante hnen atanga a tawngkam atangin ka hresi. Mahse, ka thei tawh bik lo ani e.

Tunhnua a chanchin hriat nuamlo ka hriat te hian rilru ala na a, hmangaih tawhlo mah ila a hma kala ngai si. A bul erawh mihring sualna avanga pawngsual anih vang kha ani tih ka hriain, kha thil ina a nun leh a rilru a hliam a siam kha hun a rei a, a lang chhuak tial tial si. Kan ram zim te nuai 10 vel mihring awmna ah hian kumtlinglo khawih te hi ava tam em, pawngsual kherlo mipat hmeichhiatna hman hma lutuk te hian pychological effect anei tih thalai ten i hre tharin, chanchinbu a kan hriat a thinrim thu sawi vak vak mailo hian mipa te hian i do lehzualin kan nula te pawh hian nupui pasal neih hman a sex hman pawizia hi i hrethar ang u. Tin, hmeichhe awm tha duhlo chanchin ( hnamdang kawp, ks etc) te hi sel kan awlsamin, hetiang ho hi vanduai vang leh ka sawi tak vang te a nun kal diklo hi a tam zawk anni si. zoram thalai, pheilai vawrin tan ila ang u.

Similar Posts:

• Inti senior te tan
• Ka hmangaih ka fawp
• Kum tam pawh liam se
• Nangmah nge Keimah
• A har asin..

Recent Posts:

• Dumdumtea
• Ka diary manto tak mai chu, Episode – II: (very very Sexy leh a dangte)
• Euro Group Stage Khelh Hnuhnung ber
• Khawpui Zin Thu-II
• Nghei thut nge tha zawi zawia nghei

This entry was posted on Wednesday, June 13th, 2012 at 4:30 pm and is filed under Fiction, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.