Euro 2012: Group C aṭanga team hrang hrangte tlang theih dan chipchiar

June 18th, 2012 10:00 pm by bbney

Champion lai awmna group a ni a, football ram ropui Italy an awm bawk a, Euro 2012 Group C hi boruak nei lian lo chi a ni lo. Anni pahnih bakah team ṭha pangngai tak Croatia an awm a, a chhe bera ngaih Ireland pawhin fans an nei ṭha lehzel a, match tinah football hmuhnawm tak min entir thei zel a tih theih awm e.

Vawihnih ṭheuh an inkhelh kual hnuah quarter final lût chiang an la awm lo a, Ireland hi an tla chiang tawh thung. Point 4 hmu tawh Spain leh Croatia te hi dinhmun ṭha viau angin lang mahse an pahnih hi last match ah an intum dawn a, point 2 hmu tawh Italy in tla tawh Ireland an tum dawn bawk avangin tuna hmahruaitute hi an him bik lo a ni.

Group stage a match hnuhnung ber hi a ruala khelh zel a nih avangin inkhel a ṭang bik tih chu kan hmuh tawh kha.

Group C result leh fixture:

June 10, 2012
Spain 1 – 1 Italy
Croatia 3 – 1 Ireland

June 14, 2012
Italy 1 – 1 Croatia
Spain 4 – 0 Ireland

June 18, 2012 (12:15 am)
Spain vs Croatia (Neo Prime)
Italy vs Ireland (Neo Sports)

TABLE:

Team	P	W	D	L	GF	GA	Pts
Spain	2	1	1	0	5	1	4
Croatia	2	1	1	0	4	2	4
Italy	2	0	2	0	2	2	2
Ireland	2	0	0	2	1	7	0

(Point inang hmu pahnih an awm chuan goal difference ni lovin head to head zawk an en dawn a ni. An indraw chuan a indawtin goal difference, pet goal zat, UEFA Co-efficient ranking system a an position leh group match a an fair play conduct an en leh ang a, a la inan cheu chuan ṭhumvawr a ni ang. Team pahnih aia tam point inang hmu an awm head to head a en theih dawn loh a, an pathum inkhelh kual hnua goal difference aṭangin an en ṭan dawn a ni).

SPAIN:

Spain chu Spain nge nge an lo ni e. An match hmasa berah Italy hneh zo lo mahse vawihnihna-ah Ireland an sawp avangin an dinhmun a ṭha viau a, Group C a poin hmusâng ber (Croatia nen), goal thun hnem ber leh goal chhuah tlem ber nihna an hauh vek a ni. Group stage-a match tâwp berah hian an chak a nih hrim hrim chuan quarter final an lût chiang dawn a, an indraw emaw, an chak lo emaw a nih chuan tla thei dinhmunah an ding thung ang.

Win: Quarter final an lut chiang
Draw: Croatia nen an indraw chuan point 5 an hmu ang. Thil thleng thei te:

i) Spain leh Croatia an indraw a, Italy in Ireland an hneh bawk chuan Spain, Italy leh Croatia ten point 5 ṭheuh an hmu dawn a, an pathum inkhelh kualna-ah an goal difference hi 0 vek a nih dawn avangin tlang tur teh nan a hman theih dawn loh a, an pathum inkhelh kualna-a a pet goal tam pahnih an tlang dawn a ni. Tuna an pet goal zat chu:

Spain: 1 (Spain 1-1 Italy)
Italy: 2 (Italy 1-1 Spain; Italy 1-1 Croatia)
Croatia : 1 (Croatia 1-1 Italy)

Spain leh Croatia 0-0 a an indraw chuan Spain leh Italy an tlang ang a, 1-1 a an indraw chuan group pumpuia goal difference nei ṭha pahnih an tlang ang. 2-2 leh a aia tama an indraw chuan Spain leh Croatia an tlang dawn a ni.

ii) Italy in Ireland an hneh zawh loh chuan Spain leh Croatia te hian quarter final an lût ang.

Lost: Spain an chak loh a, Italy an chak chuan Italy leh Croatia an tlang ang a, Italy in Ireland an hneh zawh loh chuan Spain leh Croatia te hian quarter final an lût ang.

CROATIA:

Anni hi Ireland an hneh hnuah Italy an draw leh thei a, point 4 hmu tawhin an dinhmun pawh a ṭha thawkhat viau a, mahse an tum leh tur hi Spain an nih avangin an tlâk theihna chance a la sâng viau lawi si. Quarter final an luhchhoh theih dan leh an tlak theih dan chu Spain nen hian a inang a ni.

ITALY:

Spain laka point 1 hlu tak an hlawhchhuah hnuah Croatia lakah point 2 an hloh thung a. Vawihnih khel tawhin point 2 chauh an la hmu a, quarter final lût tur chuan Ireland an hneh ngei ngei a ngai dawn. An chak zo lo a nih chuan inkhel dangah eng pawh thleng se beisei tur an nei tawh lo ang.

i) Italy in Ireland an hneh a, Spain leh Croatia inkhelah chak zawk an awm bawk chuan a chak zawk zawk leh Italy te hi quarter final ah an lût ang.

ii) Spain leh Croatia an indraw a, Italy an chak bawk chuan an pathumin point 5 ṭheuh an hmu ang a, an tlang theih dan tur chu Spain draw, point i) a kan ziahna ami ang khi a ni ang.

IRELAND:

An tlachiang tawh a, beisei tur a awm tawh lo. midangin quarter final an luhna kawng an la tibuai thei tih chauh a ni.