mi(sual).com

Group Mail velah ka post tawh tho nain duhthawh thil thuah he lamah hian ka han post nawn leh teh reng ang. Ka huan thlai pet thil a nih bawk avangin ka inthiam lo em em lo. Mahse, thu a sei deuh dawn avang leh post ka vawi khat ziahna a nih avang erawh chuan ka inthlahrung hle thung a, thiam ang angin ka han nawk nawk ang e.

Buddhist puithiam, Kristiana inlet nia insawi T. Peter/S.Gum Aung hi tunah hian Aizawlah a cham mek a. A cham chilh leh a thusawi leh amah tuipuitute chuan a tun hma nun a sawi hi a dik leh dik loh kan hre lo. Tuna amah hi kan hriat chhun chu a ni mai.

Kei pawh hian a chanchin an sawi ka lo hriat thinte chu amah ka hmuh hma pawhin thu hrila ka vah vel na hmuntinah ka lo zep tel ve leh zauh thin a. Mahse, thu kan zûk a ngai dawn a ang ta hle a ni.

A insawi dan

A insawi dan chuan 1967 kum khan kum 7 mi  ’Thu Rain Thun‘ tia a nu leh pa ten hming an pek chu a farnu neih chhun, leh a nu leh a pa te nen ,  car in an zin chhuak a. Kawng lakah Silai keng tute emaw hian lo lam bunin a nu an pawgsual a; a pa an that a. A nu pawh an thah fel hnuin an ruang chu an Car chawp chuan an hal a. Anni unau chu an him hlauh a!

Chutichuan, anni unau chu kalna bik tur hre lovin an sapa vah tawp a. Karen nupa thlâm hi an hmu a. Chu Karen Nupa chuan châwm an inhuam a; a farnu chu School an kaitir thei anga; ani erawh chu a theih ang ang thawka inhlawh a ngai dawn tiin an lo hrilh a. Ani chuan lehkha ka thiam a ngai a ni tih hriain chutianga a farnu chauh School kaia, hnathawka hun hman chu a duh loh avangin mahnia into delh a, a theih ang anga lehkhathiam nih tumin kawng dang  an zawng ta a ni awm e- naupang kum sarih mi chuan!

A tawi zawnga kan sawi chuan mi in hnuai luahin inhlawhna a hmuh ang ang thawkin School a kai a, Class X chu Distintion 4 hmuin  a pass a; engeneer School ‘Rangoon Institute of Technology’ ah kai chhun zawmin kum 1982 khan a zo a. A farnu chu MBBS a ni a. Zirna lam a zawh hnu chuan a nu leh pa phuba lak tumin a inpuah chah a. Pagu khuaa Buddhist Monk chuan lo thlemin sakhaw lama inhmang turin a inpe a. Buddhist puithiam zirlai thiam thei tak rawn ni chhovin Degree pakua a hmu pha ta hial a!

Kum 1988, Burma ram tual chhung buai a reh hnu 1989 kumah Gen. Saw Mawngan tir chhuakin Mombai, India ah M.A. Buddhism a zir chhunzawm a, 1993 kuma Burma a haw leh chuan Sri Lanka atangin Ph.D hmuin Myanmar Buddhist Monk zinga kum naupang ber, thleng sang ber nihna te leh talent tha bik avangin Chawimawina sang bik hlan a ni bawk a!

Gen. Saw Mawnga kalna apianga hruai ni vein Chin Hills-ah Kenedy tlanga Paguda pakhat Nihliap khumtir an tumna lamah Kristian Bethel an thiat a; chumi hnu chuan vanduaithlak takin Lung Cancer a vei zui ta tlat mai. Ram changkang panin hmun dang dangah enkawl ni mahse, tihngaihna a awm loh avangin thih ni a nghak ta a.

Chutia thih ni nghaka a awm lai chuan Radio atanga Kristian Sermon a hriat fuh chuan a rilru a khawih ta riau va. Isua chu Pathian Nung leh Tak a nih leh nih loh fiah nan a cho ta a. A hnu deuh ah chuan a pindan chu eng mak tak mai hian a lo khat a, “Nang, thawkrim leh phurrit phur, ka hnenah lo kal la, keiman ka chawlh tir ang che; hnamtin tan ka ruat tawh si che a.” tih aw a hre ta nghal a! Chuta tang chuan a puithiam nihna hlipin Kristianah a inlet a. Thil mak ang reng tak mai pakhat leh chu Buddha khan Isua Krista lo pian tur thu leh a thiha, a thawh leh tur thu te, Nula thianghlim Mari hrin a nih tur te hi a lo puang lawk diam tawh a. Chu chu be turin amah zuitute chu a chah a. Chu Buddha thupuan bu, phek 120 vela chhah, an sakhaw tawng hman bik Pali an tiha inziak chu chhar chhuakin minute 57 chhung lekin a chhiar chhuak thei bawk. Chu lehkhabu chu tun hma lamin a hmu ngai lo. An Buddhist puithiam Lehkhabu chhuara intiang Lehkhabu zawng zawng chu a by-heart vek tawh avangin chhiar tur dang a dap chhin mai mai a, chu lehkhabu, hmuh chhuah hlau taka an lo thuhruk tlat chu hai chhuakin a chhiar fuh ta hlauh bawk a ni awm e!

Pha aan lama Seng Tawng Baptist Church chu va belin an Pastor, Rev. Solomona chuan fa ah a lo pawm a; Rev. Solomona fa a nih tak  avangin a hming thlak nan S. Gum Aung tih a lo ni ta a. Pha aan chu lunghlu lai chhuahna hmun a nih angin a engeneer degree chuan hna thawk chhunzawmin lung a lai hlawhtling a; car nalh tak pawh a lei a. Chung hnuah chuan rawngbawla feh chhuakin a chunga Pathian thil tih mak chu a puang a, a nupui Doctor chuan in lam ngaihtuahna tur lakah a tihahdam hle a ni.

A rawngbawl hnu hian a pa thattu zinga mi pakhat chu a tawk a; mahse, Isua Krista avangin a haw lo mai pawh ni lovin a hmangaihin a ngaidam hneh em em a ni. Hetia rawng a han bawl takah chuan Buddhist Puithiam a nih laia amah lo zuitute thinur chuan chhuanlam neuh neuh siamin an man thin a; lung in pawh tum 7, zet a tang tawh. ..

Khing khi a insawi dan tlangpui chu a ni.

Thailand ramah va kalin Myanmar Christian Assembly-a an sinior pastor Rev. Zaw Min chuan a hun a lo kian a. Chuta tang chuan buaina chu a intoh tan ta a ni.

Hetiang hian an rawn sawi zui a

1. A nu leh a pa te hi Mandalay Division, Tasi township, Yin Ma khuaa awm an ni a, a pa chu a thi tawh a, a nu erawh tunah a la dam a ni. A hre chiang duh tan Ph. 095302014 (Pegu khua) ah phone in a zawh fiah theih reng a ni.

2. Farnu pakhat chauh nei angin a insawi a, a nihna takah chuan unau pariat an ni.

3. Begu khua B.E.H.S (no.6) atangin unau nuhmun-pahmun distinction 4 leh 6 a high school exam pass an la awm miah lo.

4. S. Gun Aunga hi Pegu khua Buddhist school ah thla tlem te chauh a kai. Eng exam mah a pass ngai lo.

5. A va kaina Buddhist temple/school hi Tar Ta Nay Man Deng Chawng Taih a ni a( min lo hrethiam ula, ka thiam ang anga ziak ka ni), kum 55 a ding tawh a, RIT (engineering degree) nei tumah an la kai ngai lo hrim hrim. Ph. no. 09-5302014 leh 09 1651018 ah zawh fiah theih reng a ni.

6. 1986 kumah kan ram hruaitu U Saw Mawng in India ram Naladna University atanga MA leh Columbo(Sri Lanka) atanga Ph.D zir turin a tir a ti a, mahse 1986 kuma kan ram hruaitu chu U Nay Win a ni a, Saw Mawng chu 1988 ah chuah ram hruai tu a ni ta chauh a ni.

7. 1993 Jan 4  Independent Day ah ‘A Shin Tumanalinkarah‘ (Gun Aunga Buddhist Monk hming) kha chawimawina degree sang tak ‘WaDanTaKa MahaPanih Tah’ pe angin a insawi a. He tiang degree hming awm pawh a awm lo. WaDantaka degree erawh a awm a; Yangon,Mandalay, Myin Chhan, leh Mong Yua a Buddhist school atanga kumtin a zawna pakhatna la thei te chuah an pe a ni. S. Gun Aunga hian thil a hre chiang lo hle a ni.

8.1993 ah Ton Zang khua, Tedim township ah pagoda pakhat nihliap khumtir turin helicopter in ka kal a ti a, dawt a ni. kha mi tuma kal te chu Rangoon atangin monk pahnih, Chin state chief of forest department U Tun Aung, leh Yangon Anawa Buddhist mission board atangin U Tan Aung te an ni. Helicopter in an kal lova, motor in a ni an kal ni. A hrechiang duh tan 073 50035 leh 073 21130/096472054 ah te hian phone in a zawh theih reng a ni.

9. Buddhist sakhua ah degree 9 nei angin a insawi a, a degree sawi te hi eng Buddhist school mahin an pe ngai lo, awm pawh a awm lo.

A chanchin hi kawlram Buddhism lama mi turu leh mi ril tak takin a chhui chiang a ni.

Chutianga a chanchin chu finfiahna fel fai tak te, data kim chang nena an han chhui zui takah chuan MCA Thailand chuan Youtube link-a a Inpuanna Video an post tawh chu, an post atanga a ni 5,na ah an remove leh nghal a. He pa chungchang avang hian Myanmar  rama Kristian leh Kristian pawh an in hnial a, Buddhist lam chuan an Sakhaw Tawng (Pali tawng) tibawrh bangah puhin an thinur bawk a ni. Sakhaw inpuh chhiatnaah an ngai a. Hetianga sakhuana kawra hmanga mi thau sawk zawnga kal hi tam tak an awm tawh avangin tul lova buaina a chhuah lohna turin a thu sawi dik lohna chu fimkhur takin an pho lang chuai chuai a ni.

Similar Posts:

• Mizoram University 7th Convocation
• Kan Reverend/Doctor te bihchianna
• MSU Hruaitu man a ni
• Rahpuah Bomb
• .. Ngaihdam dil a ngai emni?

Recent Posts:

• Ka mihring ngaihsan, a zia ang Mizoram mamawh chu!
• I fate’n internet an hman dikloh chuan..
• MIZO HNAM SAKHAW DIK PHOCHHUAHNA ~ I
• U Elli
• Tum loh deuhin…

This entry was posted on Monday, June 18th, 2012 at 8:00 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.