Thuamchaka hi Ft.5 leh inches 7-a sang a ni a, pa pangai tak anga lang ni mahse, a bula awm chuan a mi dip na tak a ni a, thau si lo chawm deuh but a ni. A awm len lam hi inches 42 a ni a, inches 48 thlengin a tilian thei a, inches 33 thlengin a tite thei bawk. Inches 15 inkarah hian a duh duha tihtet leh a tihlen theih avang hian, amah intehpui apiangte chu a tiatpui teh theih deuh vek a tih theih. Michak piang danglam bik angin an ngai thin a, Nakruh hi pakhat chauh a nei niin an sawi thin. Falam Doctor ten an han en chiang a, nakruh pakhat chauh chu a lo nei bik hauh lo. A nakruh leh a vun inkarah hian duar kan tih ang hi mipangai aia tam fe a nei a, a chhah bik hle bawk. Chu chu kuta han dap hian a sakin a tlep purh ringawt mai a, a nakruh a inzawm vek bik emaw an ti thin a ni.
Chu bakah, an han X-ray chuan a awm ruh inzawmna lai(breast bone), thinhnun chung taka ruh no chawr thla hi a taksa phu tawkah mi dangte ai chuan a lo lian zawk daih bawk a, a changin a khawng hle bawk a, chu chuan a thil tihna kawngah a lo tanpui thei hle a lo ni a. Eng vanga danglam bik nge tih erawh hriat a ni chiah lo.
Tunah chuan, Thuamchaka tih hming a putna chhan lo thlur bing dawn ta I la.
1. A ‘ha’ hi a tha hle mai a, kum 75 anih hnuah pawh pakhat mah a la bal lo va. Motor (Jeep) hi a gear free-a dahin a haa sehin a duh chen chen kawng zawlah a kai kal thei. Thirtiang zung riat nei pawh hi, a hmawrah a seh kawh va va thei. Hetia a seh kawh hian a nghawng tha chakna pawh a hmang thiam hle.
2. A ‘Lei’ pawh hi chak tak a ni. Thing pil sak ‘batling’ hring hi, a leiin a liak khawk hlawk hlawk thei zuk nia.
3. A ‘hnar’ ruhno chin hi, khawng deuhvin a tisek thei a, a hnar kuaah te hian chaicheh rawlh lutin a elh kawi zawk zawk thei bawk. Thirtiang zung riat nei ang chi bawk hi, a hnarin a nawr kawi zawk zawk thei bawk.
4. A ‘kutbawr’ hi a chakin a zungtangte hi a khawng em em vek mai a, ‘mai-tai’ hi sang taka vawrhin, a lo tla leh lam chu a kut zungtang pakhat chauhva thil tlangin, a dawng pawp hawk hawk thei a ni.
5. A kut zungpui tha ringawtin perek inches hnih atanga inches ruk hi a kutphah bawrah a hum khawm a, a chung lama lawr chhuak chin zawng chu a mal te tein a han hmet kawi zung zung mai chu, mita hmutute’n hmuhnawm an tihzia an hrilhfak a ni.
6. Tum khat a thianpa Chalkhuma in chung chihnaah a leng a, “Hei in rangva hi a va that hmel ve, a mawih tawh a nih hi,” tih pahin rangva cheh thlak them lian tawk tak mai chu titi pahin a sik thler kawk kawk mai a. Rangva lah chu Tata tha chi ngat mai kha a ni si. A neituten a mawih a nih an han ring thar hnuhnawh a, tubohvin an han chhu nghek nghek a, tih thler an tum ngial pawhin a thler thei awzawng si lo va, mak an ti hle. Mihring taksa phei chu a chhinna nih ngam awm ta se, saihlum chawn anga piai thlak zawh loh lai a neih an ring lo.
7. A ‘ban’ tha chakzia mawlh mai hi a taka hmu ve lo tan chuan awih a harsa zawk hialin an sawi. Thlawhtheihna hma vir kg.50 aia rit tur hi, a kut khing khat chauhvin a char va va zova, a theh virin a then kual chiam zo bawk.
8. Kawng kal lam pawh, Aihniara ang maiin a chak. Vawikhat chu Japan ho thuruk a hria a, chu chu Pherzawl a a chhungte hrilh turin a rukin zing vartianah thovin, a kal ta vang vang mai a. Pherzawl chu ni tlak hma deuhvin a thleng leh hman. Mel 80 zeta hla a ni a, zin pangaiah chuan zan 2 riakin an ban hman tawk a ni a, chak inti deuh pawhin zankhat riakin an ban hman chauh a ni si a.
9. A zuan a zangin, zuan thui lamah pawh a duai lo hle. Buh chhipzawn vum thur mai hi tlangvalho chuan an inzuan kahlen siak nak nak a, an zuan zo hlawm lo va, Thuamchaka chuan a han zuan ve a, a zuan khum zo lutuk chu a zuanna hmun atang chuan ft.18 zeta hlaah a tla riap mai.
10. Kum 17 mi chauh anih laiin, tum khat chu tlangval 8 in an zawn zawh loh thingril pu turin an khaw zirtirtu Tuahthanga’n a sawm a, i-he lovin a pu ta mai a, rit ti awm lo takin a pu thleng der mai.
11. Kum 20 mi vel anih lai pawhin, Lawichal ti tak mai hi a til lak an duh a. Thuamchaka chuan a ki takah a man a, a herhthlu tawp mai a, a kiah chuan a vuan bet tlat mai a, chutih chhung chuan, a til-mu chu an lo chhu keh thei ta a ni.
12. Khaidiat hi banah tawn betin an thlung a. Chu chu, Thuamchaka awmah an vet chhuak vek a, a lehlamah patling tam takin an pawh rawn lai tak hian a han insangphek ta thin a, khaidiat chu a chat thawt thawt mai thin a ni.
13. Khawpuibung khuaah pawh, a nghawngah tlangban thirzai hian an hling a, an han pawt a, thirzai chu hmun hnihah a chat that mai a, fiamthu pahin, “Kha, ka chak vang nge ni a, ka thiam vang zawk?” a han ti zui a. Chu chu remchanga lain, “Amah pawhin ka chak vang a ni, a ti hlei nem,” tiin tanpuitu nei anga sawiin an ngaih phah ta hial reng a ni. Infiam nikhua a inhruipawh leh insuknawr tum te hian, “Tang rawh u le, khai aw, I han tang tak tak teh ang u,” tia a khingpuite a han au te hian, ama tha mai ni lo deuh va ngaiin, tanpuitu a sawm zela ngaiin, ramhuai zawl ang hiala lo puh duh tawk pawh an awm fo thin.
14. Tum khat chu, Tamu khuaa a chakzia entirnaah lung chang lian deuh mai hi tubohva chhut kehtir an tum a. A hmasain Tamu khua mi chak ve tak 2 an han chhuttir a, an chhu keh zo lo va, Thuamchaka chuan a han chhu ve dawn ta a, chhut hmain a han vau hmasa leh rih a, “Lunga, ka chhu keh dawn chiang che alawm, ka lakah hian tang tang duh suh; vawi khatnaah ka chhu keh tho tho dawn che,” a tih zawh chuan, a han chhu ta mai tehreng a, a keh taphawk mai a. “Thil reng reng hi vau zam theih loh a awm lo, heti anga han vau hian keimahni lamah nasa takin tan min laktir a ni,” tiin a sawi zui nghe nghe.
15. Zohmu khua Lawngzauva ina an inkawm khawm laiin leihlawna an hman thin thirhrui hi banah an thlunsak a, “Pu Thuama hian a pawt chat zo an gem le?” an ti a. Thenkhatin, “Thuam sawmsariha pawhin heti angem hi zawng a pawt chat zo bik lo vang,” an ti a. Thuamchaka chuan, “Chutia patling heti zozai in buai chuan, han ti chhin ila, ka hnial lem hlei nem,” a ti a. In ban rinawm berah thirhrui chu an han thlung ta a. A han pawt ta tak tak mai chu, in pum mai chuan a nghing ta luih luih mai a. Rei tawk fang a pawh hnuah chuan, a insuihna lai takah chuan a pawt chat ta hmawk mai a ni. “Kha Thuam sawmsariha a ngai hlei nem. Thuam khata pawhin a pawt chat mai a lawm,” a ti ta sak a.
16. ‘Assam Paliana’ an tih (Assam Regt. Havilder Pensioner, sipai zingah a chak avanga hmingthang) nen hian hreiha tur lakah an inel a, Paliana chuan chem a hum tut mai a, Thuamchaka chuan, chem pawh ruai lovin kut lawng chuan mau bul chu a pawt phawi ta zung zung mai a, Paliana chuan theih tawpin a han bei ve a, bulkhat chu a pawt phawng ve mai a, chutih chhung chuan Thuamchaka chuan mau bul sawmhnih vel a lo pawt phawi hman reng a ni.
17. Vawikhat chu, a khualzin kawnga a kal laiin Manipur-a suamhmang rualin suam tumin an lo khawih ngawt mai a. Thuama thinrim chuan, an zinga pakhat malpui chu a kut zungtang tlum pawk khawpin a han tham sak ta mai a. Chutah le, “Kan mi suam hi mihring a ni lo, rammi a ni,” tiin an inhrilh a, baklengin an tlanchhe ta a ni, an ti.
Sawi tur dang a la tam naa, a sei ta hle mai. Dara Singh-a nen chaw an kil dun thu te(an inbei lo), a chawilung ft.2 a sang, tehkuala ft.9 zeta lian te, Pu F.Laltuaia te Pop group ‘The Great Bear’ an tih ho nena an chetho dan te, Mizoram a fan dante chu sawi tawhlo mai ang. Jeep tlan tur a pawh din tlat dan te, Thir hlingnei chunga saruaka a mut dan te, a ngala thingfak bung hmawk hmawka an vuak dan te chu sawi tawh lo mai ang aw. A awma hruihrual nghet taka an suih hnuah bottle 3 ala zeh theih tho dan te pawh.
Mi tam takin, a chakna thuruk hi, Ramhuai vanga an puh laiin, ani chuan, Pathian malsawmna a dawn liau liau leh a tum ruh em vang anih thu a sawi thin. Thangtharte hnena a thuchahte zinga pakhat chu, “Miin tumruhna nena thil a tih tak tak chuan, hming chher thei khawpa hlawhtlinna a dawng nge nge thin. Kan mizo thalaite zingah pawh hian, hmingthang tham khawpa inzir thei tur an tam mai. Inzirna hian mihring hi a siam danglam thei em em a ni, tih hi thangtharte hian nghet takin vawng tlat sela; nasa takin an changkanpui ngei ang tih hi ka ring tlat a ni. Tin, ei leh inah fimkhur hle turin ka chah duh bawk a ni,” tiin.
Thu lakna: K.C.Vanlalruata lehkhabu, ‘Mizo Mi Chakte’ tih ami kaih tawi a ni.
Similar Posts:
- Thuamchaka
- A ni thei mai ang em?
- Mizoram University hungna bang chhutchhiat a ni
- Airtel balance in cut tih tawp dan
- WordPress thar ber ah kan upgrade ta!
October 18th, 2012 at 1:30 am
chhiar ila
Report this comment
October 18th, 2012 at 2:56 am
A va ngaihnawm em…
Mi danglam tak chu ani.. A awm len zawng inches 9 lai a a ti tê thei khi a mak ka ti hle bawk 
)
Hnarkua a chaicheh rawlh luh han elh kawi zawk zawk mai chu’h
(tih têt ve ka tum chhin a, inches 1 pawh in zu han ti tê theilo a
Report this comment
October 18th, 2012 at 5:37 am
Thuamchaka hi ka hmu ve tawh, an sawi hi awih loh a awl khawp mai, mahse a tak tak ani si,
Tihdaih ila, Pu PK Thingsai lam khi i hre ang reng a, thingsai khawchhuak i ni em? i sawi hreh loh chuan.
Report this comment
October 18th, 2012 at 6:13 am
A ngaihnawmin a bengvarthlak khawp mai. Hre ve nuala ka inhriat laiin hriatloh ka lo la ngah zia ka hrechhuak
Chuan, amah hi Mizo pangngai emaw ka lo ti char char a, Zohnahthlak kan tih te ho zinga mi a lo ni reng sia.
Report this comment
October 18th, 2012 at 6:51 am
Zoelife, Hnahthial a piang leh seilian ka nia. Hnahthial district hauh chin, abikin Fanai tlang dung hi chu ka hre ang reng viau. Ka thiannu hi, Thingsai khawchhuak ani ve reng reng a, Mizorama chhuah chang pawhin, tlawh chu a ngai ziah mai.hairehai.
Report this comment
October 18th, 2012 at 7:07 am
nih tak chu, hnahthial khawi veng nge in awm? in nu hming sawi thei em? hreh loh chuan. kei pawh thingsai khi ka hre ve nual a, kan thil hriat hi a in hnaivai ang reng ka ti thin a, (drosen002@gmail.com) ah pawh email in i sawi thei tho i duh chuan.
thian te u kan lo inbe ru a nih hi, in beng lo hup ru
Report this comment
October 18th, 2012 at 7:40 am
Zoelife, kan nu hming, Lalchhuanawmi Khiangte (Bawihi) hi, ka roh viau mai a, hetiang ang public forum ah chuan ka zèp tlat zel rih dawn
Report this comment
October 18th, 2012 at 7:45 am
zeppui tlat ang che :). a pa hming lo chuan ka hre lo an naupang deuh bawk si a, kan inzawt dilchhut tawh e!! lol
pemveng a ni em? kei pawh thingsai khua hnaih deuh ka ni ve a,
Report this comment
October 18th, 2012 at 7:50 am
High school zirtirtu Pu Thanghuta i hria em?
Report this comment
October 18th, 2012 at 8:03 am
ka ring dik chiah anih chu, a tet laiin kan awm/baby sit thin, a u mapuii nen khan kan inkawm thin a.
khawnge mission hna in thawh?
hnahthial khawi vengah nge in awm?
Report this comment
October 18th, 2012 at 8:11 am
Thuamchaka kha Zapan sipai ten an zirtir niin sawi a ni thin.
Report this comment
October 18th, 2012 at 8:29 am
@pkfanai
ka kal a ngai tlat tawh mai, in nu chu lo hrilh la, thingsaia an inpiah, piah leha awm thin Chhungi nu kha ka u ti la, a hre thei mai thei, in nu hi a chhungten an koh dan ka theihnghilh a, a hming pangngaiin an ko lo, naupang hmel tha tak a ni thin.
Report this comment
October 18th, 2012 at 8:30 am
Report this comment
October 18th, 2012 at 9:22 am
‘Awihawm loh deuh deuh a awm’ tih mai theih a ni a. A chanchin a ngaihnawm, chutih ruala mi inngaitlawm leh tumruh a nihna khi a ngaihsanawm…
Hritlan laia hnarkaw pan kheuh khawh pah na ka tih laia, hnarkuaa chaicheh kuai ngawk khawp a hnarkaw chak an nei mai chu(h), sawi zawng pawh hahchhiau a chhuak..
Report this comment
October 18th, 2012 at 9:24 am
Tha leh pek e
Report this comment
October 18th, 2012 at 10:21 am
Thuamchaka hi ramhuai hnathawh ti te’n an sawi thin a, mahse a thawhchhuah a nihzia a chiang a fakawm ka ti…
“Mizo mi chakte” K.C Vanlalruata ziakah khan a chiang khawp mai..
@PKfanai & Zoelife, Thingsaiah chuan Rova(Roluahpuia), Pem veng in hria em??
Report this comment
October 18th, 2012 at 12:43 pm
Evergreen, Rova te chu hre teh reng mai(Former minister Vanlalnghaka nau kha a nih chuan?). Mizoram chuan chhuah chang a, Pu te khua tlawh changin, Pu Vanchhuma Sailo, Lalsangzuali Sailo Pa nen khan, min lo kawmhlimtu ber an ni thin a lawm. Pu Chhuma boral ta kha kan lo sùn ve viau a sin.
Report this comment
October 18th, 2012 at 1:17 pm
@Pkfanai, aw ni e..Ka putea duh tak a nih kha..nupui te pawh a neih ve tawh kha! hehe
Report this comment
October 18th, 2012 at 5:18 pm
@evergreen
tlai deuhah ka lo kal, Rova chu hre teh reng mai, i putea (blood relationship) em ni? a va ngaihawm ve aw!!. Thingsai hi chu khaw ngaihawm tak a ni ve e, a hretute tan chuan
Report this comment
October 18th, 2012 at 5:25 pm
Thingsai in sawi takah chuan.. Chawngkhum dan tlang huat loh..
Ngharchhipa ka hmelhriatin a sawi ka hriat
Thingsai khua atang hian zoram huapa milar chhuak an tam bawk a, a khaw mite pawh hi an inla deuh hlek thin a ni awm e. Aizawla/Lunglei zin tur reng pawh hi, khawnge i kal dawn ti ila, Shillong emaw Delhi-ah ka kal dawn an ti deuh kher zel a ti.
A dik pawh ka ring lo va, mi sawi ka hriat mai a ni e..
Sorry for OT-ing..
Report this comment
October 18th, 2012 at 5:34 pm
@zoelife,
aw ni e…. Ka nu-te unau zinga naupang ber a ni e… Fb-a chat te pawh kan ang tep lawm le..haha
@mahming, ngharchhipah hmel hriat te i lo nei hman leh zel tawh ni maw..
Thingsai atang chuan Foreign lang ruih mai a sin Mahming!
Report this comment
October 18th, 2012 at 5:54 pm
@evergreen
a nih tak chu aw!! i nute ho chu ngaihawm hlawm hle mai, i pa sanga (fam) kha ka u thianpa duh tak ani, a va lunglen thlak em aw!
Dr. Mahminga, Thingsai hi chanchin nuihzatthlak leh hlimpui awm deuh deuh a awm a, a mi chengte pawh an friendly ang reng a, mikhual pawh hian nuam an ti phian zel, a chhengchhiat ai hian, mahse i thu rawn sawi khi chu ka hriat ngai loh tak ani, mahse thingtlang khua ni ve mai siah chuan mi hmingthangte thenkhat te lo chhuahna a nih mai bak ah zirna lam leh nundan phungah hian tlem chuan an induh ve theih deuhna a awm bawk chuan ka hria. A khuaa cheng te hian chuan ‘Chhimtlang tual nuam Saitlangpui kan vangkhua’ tih hla te an siam, nuam chu an ti ve hle niin ka hria
Report this comment
October 18th, 2012 at 5:58 pm
@ evergreen & Zoelife… In titi a inman em a, ka rawn sawilang ve mai mai a nih khi. Khaw thenawm val chuan a lo er ru ve deuh pawh a ni mai thei…
Englekhawle, thingsai khua khi sawilan ang khan zoram huapa mi hmingtha an chhuak hnem, khaw chhuanawm tak a ni…
Report this comment
October 18th, 2012 at 9:44 pm
Thuamchaka nen hian chem kan tat dun teh ngawt a, a vawikhat tah ah khan chem a tat rek ngawt zel.
Report this comment
October 19th, 2012 at 2:12 am
Thuamchaka hi ka naupanlai in Kolasib Hmar Veng field ah a show ka en ve chiang mai 1976/77 bawr vel khan A hnat a thir tihkawihte thing ah thirtiang an khengluta a hnar hmangin a sut kawihte.thingphelah perek an kilh lut fur a pakhat an phaha tah chuan an mut tir a chutiang bawk chuan an khuh a buhfai bag a a chungah leng tawk an dah a chumi chungah chuan tlangval a leng tawk an lawn leh eng tin mah ataksa a awm lo tlem in a hnungzang chu a pawr deuh fut vun chhia pilh trep chauh a ni.
Kan thenawmah a thleng a thu kan zawt a .”Ka pu i chak zia an sawi hi tak tak a nih hi mawle kan hria 1 kan zawt ang che tak 2 a ni em? I sazu kawh lai in Rifle hi i khaikan zo an ti a tak tak a ni em ? tiin a nuih a za hre .
Chak ve in duh em ? tiin min zawt a aw kan ti a >In duh chuan zanah hian stool ah in lu nghat ulang in ke kha stool dan ah khang kai ulang ti chuan zan tin mu thin u lang taksa ti khawng lah in in lo puitlin ve hunah meuh chuan i chak hle ang a ti a mut kan tum a har teh a sin.
Report this comment
October 19th, 2012 at 9:39 am
Thuampachak’a thlan chu Zohmun, Khampat leh Kanan thlen hma khua, Burma’a thena awm ta ah a awm, ka mit ngei in ka hmu.
Chutah a hming tak ain ziak.
A pianna khua chu ka hre lo.
Thuampachak tih chu kan tet laia a hming kan hriat ve dan ani e.
Nia, Zo hnahthlak zinga Kuki/Thahdo thlah a ni e.
Chin, Kuki/Thahdo te, Lai, Lusei, Paihte, etc. te hi Zo hnahthlak vek kan nia.. I in hmusit lovin in pumkhat tawh zawk ang u khai.
Report this comment
October 19th, 2012 at 11:50 am
A ngaihnawm hle mai! Hman deuh lawk pawh khan a tupa kha Aizawlah a in-show vein ka hria. La naupang tak, chak tak, inngaitlawm tak a nia, a pu tih theih ang kha tih theih ve vek a tum a. A pu a chhun a, a chak ve khawp mai.
Report this comment
October 19th, 2012 at 3:44 pm
Ka naupan laiin a thilthiam showah ka kal ve a (@Moreh, Manipur). A hnar in thirtiang a elhkawi ka hmu chiang lutuk.Chair 2 an dah a, lehlamah a nghawng, leh lamah a ke a khanga, a herkual vel. atla miah lo. adang pawh a a awm a, ka hrechhuak zo tawh lo.A thlanah pawh ka kal tawh.
Report this comment
October 19th, 2012 at 4:23 pm
Comment tawp lam a ngaihnawm hlawm khawp mai. Keipawh Thuamchaka hi kan naupanlaiin ka hmu ve tawh. Kan khuaah Show a rawn nei a, a tar tawh khawp mai a, Announcer khan, “Tunah chuan, a lo tar uaithla ve ta a, ‘Thuamchaktawhlova’ a ni e” a ti a, a banbul vun chuar tawh kha a han beng then vel phawt a, chumi hnuah a han intisek mai chu, Thirtum ang tlat a ni. Chutah chuan, thir tlawn an han vaw kawi ta ngawk ngawk mai thin a. Bruce Lee emaw Tony Jaa emaw te ka tehkhin ber.
Report this comment