*PÂWL LAL HRAWTNA AIZÂWL???*
ZR. Thahmingliana. Keifang
Hmanlai chuan Zawlbuk tlangval ho kha khawtlang thlamuantu an ni thin a, Vantlâng inrelbawlna pawh Lal leh upa te kut a ni. Kawngpui sial, Meilam sah, Tuikhur hiah, Se dâi thêu, Rethei te chhawmdawl, Hmeithai leh Pahmei te enkawl thleng mai khân vântlâng kutah a awm. Phaw khai ruâl takin khawtlang an nung hova, in elna leh in erna in hmun a chang pha meuh lo.
1954 a lo inher chhuak a, mi ram Lal dîla an tawngtai mup mup laiin, Lal bân duhin kawng kan zawh a, Lalna leh lansarhna chu inchuh theih in kan phalrai a, Lalna te, thuneihna te, thiltihtheihna te inchuh reng rengin kan hmanhlel ta. Lal châkin CYMA, CKTP, MHIP, TKP, SYNOD leh pawl dang dangah tepawh phungthlu lêk lova Campaign pâwl an awm ta a ni lawm ni?
YMA inawpna in Zawlbuk zirtirna a luahlan a, Aizawlah chuan Branch ah inthenin, Section ah kan darh leh a. Kohhran tihdan; hêng Biakin neih that leh Property neih thata inelna rapthlak tak tak entawnin Section lam tepawh in Property neih thatah kan intihsiak ta!!! Khawtlang tana tha sen, khawtlang hmasawn nana hmalakna sawi tur a vang tial tial a, Budget uchuak tak bakah Project insiam belhin sum kan tuaka, Pawl thianghlim hmingin rethei zawkte kan rawk a, thawh lawm kan khawn a, thil te zuarin, pâwl thil tum te puang zarin, tanrual a tul thu nen lei loh zahthlak khawpin kan inbirh a. Deh loh sakei huai angin Pâwl hmingin kan vawk lal lên ta thiak thiak mai a nih hi. Zawlbuk tlangval intel khawm te kha kan thlamuan pui vei thin nen, YMA, KTP, TKP leh Kohhran te chu kan hlauh tlawn a tul ta zawk!!! Aizawl a tih dan hi thingtlang lamin kan la entawn leh dawn a, Aizawl mite kal fimkhur mawlh teh u.
Pâwl ah Pawisa pawimawhna in hmun a luah telh telh a, ropuina chu sum ngah leh Property neih that ah kan teh zo a. Hnatlang kan ko a, thawkchhuak tam aiin thawh chhuah tam lamah kan in el a, awlsam zawka sum dehchhuah dan kan in dap siak a, kut tling lo kan pawisa lova, kan thawh chhuah hmanralna te lah Vantlang tan ni lovin “hei hi ka hunlaia kan neih, hei hi ka ho a kan thawh chuah”, ti a sawi tur thil lei nan leh YMA hming pu a thian ho chaw ei khawm leh Picnic nan te a lo ni zawk ta!!!
Sum kan Pathian miau avangin thahnemngaihna leh tlawmngaihna ina a cho chhuah ni lo, mahni lansarh nan a thathawh natur Activities insiamchawp a pung tual tual a. Inthlan zân ah pawh mitha aiin mi hman deuh tur kan melh ruai ruai a tul ta. Thawh chhuah nei lo, nupuite chawmhlawm ten pâwl an kaihruaia, an va hman kher em. Chutih rual in, mi nawlpui tan a Active reng theih si loh. Active member, thianza ho emaw, mi hman zual tlemte intelkhawm (Groupism) ten pâwl an chhawm nung a; inhmang hman lo te an tlângtla lo tawlh tawlh a, ngaihdan thawh a rem ve tawh lo. Han sawisel nikhua in *”Active member pawh ni si lo”* tiin tehfung an khai a. YMA hminga hnatlang koh kal theih kan nei tlem telh telh a, member tam viau siin YMA chuan a ropuina a hloh mek zel a nih hi.
Sorkar in SYNOD leh CYMA a hlau tih kan hriat avangin Sorkar hnathawk, Aizawl pawna sawn chhuah hlau tak tak ten mahni vengchhung ah Kohhran Upa, YMA President leh OB nih chu veng chhunga awm ngheh na atan zung kaihna hmanraw tha ber a ni tih hria in hunremchang bawh pelh an tum lova, Politics khelh takin an khel a, Kohhran upa ni turin inkhawm tam tluk zetin Pâwla inhman tam a tul a, tlawm ngaihna vang nilovin thangthat lak tumna avangin mitthiin bathlar a thalai ho titi pui tur tala tlaivar a tul ta, Lumen zan ah YMA OB pâwn lâwm deuh deuh an piang ta teuh a nih hi. Hetiang teh nuaih a nih avang hian inchhung uap hman lovin Pâ-ber a awm a tul a, fate riah bo na chin pawh hrelo hruaitu kan va ngah tawh tak em. Hruaitu fasual tak tak nei pawh sawi tur an tam ta mai. Chhungkua enkawl zo lovin vengchhung kan vei a, Pathian in Ro a pek te aia Ram vei zawk an awm ta. Kan Kristianna a ti hmel zo vek a ni. Tunhma a Kohhran leh Pâwl hruaitu kan zah thin vei nen khan, engkhâwkhâ ah mah kan ngai ta lo. Heng ho in pâwl an kaihhruai chuan ‘Tlawmngai pâwl mah ni se’ tunge zah teh lul ang ni? Kan Upa ho lah lamtang an mamawh em avangin, mipui leh NGO member zawng zawng an biak that a ngai a, Veng chhung Ruling Party memberte nen chanvo inpe tawnin hruaitute an in tlawn tawn a, thil tha duh avanga midangte pawh kamkhat ngam tawh lovin an kimki a, an tha duam a, kam thlum tak nen an tawng nem duai ringawt a, Kohhran Upa huaisen kan nei ta mang lo. Hotu pâk pâwl leh member tlawn pâwl te inlâwm tawn nakar ah lamtang siam tum reng reng in kan phi ta ruai a nih hi.
Pisa leh hnathawhna lama hna hnuaihnung zawk chelh entirnan; Peon, MR, Contract a thawk te leh midang dang ten Rotekawla sepa rilru pu in, NGO leh Kohhran a ninna neih chu an zahawm ve natur chherna pûm ah ngai in mahni lal ram din an tum a Pâwl leh Kohhran an bêl a, a kul a tai ah an in hmang âwl lo. *”Pathianin mifing te ai chuan mi inhmang te a duh zawk”* tih changchawiin Pâwl ropuina tura mi inpe, mihman tak tak te an in chawisang tawn a. Eizawnna kawnga hlawhtling viau lo te chu kan khawtlang kaihruaitu leh kan Kohhran inrelbawlna fawng chelh tu te an ni ta!!! An dinhmun chelh chu zahawm mahsela an mahniin zah an phur tawh si lo!!! Tiang a Zoram kan kal reng chuan kum 20 a lo liam leh meuh chuan tunge Kohhran chu ngaisang reng anga? Tu in nge NGO chu hlut reng ta ang? An zingah pawh tunge tel peih tawh ang ni? Nu leh pa ten an fate zuan luh nan CYMA, CKTP, MSU, MZP etc… te hi an la ît reng em? Heng pawl lian te lah hi Political Platform a dinhmun tha chuankai na kailawn ah kan ngai tan ta hial mai a, a van pawi em!!! Heng pâwl te hian an ropuina an hloh mek i ti ve em? Rilru dik lo pu a Pâwl a inhmang ho chuan he thu hi an helh viau in ka ring.
A rapthlak a sin, hmanni a hna zawn na ah khan *”YMA, KTP leh PÂWL A INHMANG LO”* an duh thu an puang ta phiarh phiarh mai. Thalai intodelh tum te tan Pâwl a zuan luh a rem ve ta lo em ni dawn? *”KTP / YMA a inhmang ho chu hnathawk ah an chhawr tlak loh”* tih thâwm te hian kan NGO hruaitute beng thleng phak sela, insiamthat nan hmang sela a van duhawm em. Nge *”Pâwl a inhmang tam lo apiangin an sawisel peih kan ti leh hram dawn?”*
A chunga kan sawi tak te khi a negative side vek a ni. A chhiar a hahthlakin min van titawt teh lul em. Pâwl zawng zawng kal dan a diklo a ni lova, a dik lo a lansarh zawk em avangin kan thang tlâwm fo mai a ni. “Kei ni chu kan OB te tiang an ni lo” ti thei Branch tam tak kan la awm ang, Heng pawl ropui tak tak ah te hian mi rinawm tak tak, tlawmngai leh taima an la inphum ru teuh a ni, heng mite huai taka an tawng chhuah hunah pâwl ropuina tak tak chuan pâr a la chhuang leh zual sauh dawn a ni. Kan ram pâwl kal phung hi mi pakhat siam that chi a ni lova, nang leh kei hian *”Khawnge, puan ven ka’n sawi chhing teh ang”* kan tih a tul ta. Râl chhaih chi a ni lova, zuan luh chilh ngai a ni. Kan la chhe lailet der love. A siam tha turin i zuang lut ang aw. Thalai te pawh hian titi phungleng ah tiang lam hawi hi uar leh zawkin sawi i la, Politics hmanga NGO kaihruai chingte hi i thlauh thla ngam ang u. Chuti lo zawng kan pawl ropui tak tak te kan vui liam mai dawn e.
*Zo nun, aw nun mawi*
*Tap tapin ka au ding zo si lo*
*Zonu aw nun mawi*
*Liam lovin la cham rih hram rawh aw.*
?????????
hairehai
