Hun rei tak la nilo mahse, hman han tih tur chu a ni ve tawh mai ang chu. Intihmualpho na leh insawitheihna lam nilovin, nang nen a hun kan lo hman tawh te kha ka’n sawi ve reng reng teh ang. Min la then dawn tih hre reng chung si khan, keimah chauh i tan a awm ni awm takin, “nanglo chu ka Hmangaih che ka la ti miah lo; engtik lai pawh hian ka rilru ah i awm reng thin a sin; ka ngai lutuk thin che” engtin nge min lo tih theih zawk le.
Kei chu ri phawng phawng chi ka nih kha, thil han thup mawi vel hi ka thiam der silo a. Mi huai famta Pu Tluangtea Hnamte thukhawchang takin, ka thil hmuh leh hriat te hi sawi lo in ka awm theilo mai ni lo in ka ziak kher zel leh nghal a. A pawi ngawt a nia kei kher kher min bum hi chu. Ka ngaihsan thin teh reng che nen hetiang mai mai a nun hmang tur hi chu i nilo a sin maw le, hero atangin Zero ah i insiam a ni ringawt alawm, i nun danin engmahlo ah a siam ta che a ni e.
Diktak chuan, induh em em in, inthlahlel viau thin mahila, nang nen meuh han inngaihzawn chu kawng tin rengah mahni insit a na duh in, ka chan palh mai ang che tih ka hlau thin a, hlim leh inthlahlel tak a kan len dun lai te pawh khan, ka thla hi a phang ru viau thin a sin. Min lo thlauhthla ta la engtin nge ka dam khawchhuah theih ang tih te, ka nun hman zel dan tur pawh hi ka suangtuah ngam ngai lo va. Mahse, tihngaihna dang awm der lo a min han then takah chuan engtia han sawi fiah tur nge ka hre thiam chiah lo a, thlahlel viau chung si che a hlauhthawn rukna te leh hahthlak riau te kha zuk bo daih a. A tawi zawngin a thawventhlak a nih ber chu. Kei kher kher min lo tawng hi chu a pawi teh zawng a ni e.
Nangmah hre tu zawng zawngin fel leh tha an ti che a. Chutiang mi in ka tih hmasak pawh nilo a min han duh mai chu ka tan chuan mak tih loh rual a nilo a, kei chang ka lawm a nilo a, ka thiantha te paw’n min lawmpui ve khawp a sin. Khawtlang, Kohhran leh i nun hrim hrim tun an hai silo. Ni e, nangmah vang hian ka chan phakloh tur tam tak ka chang a, thil tha tam tak i hnen atangin ka zir a, ka chan phak loh tur pawh ka chan hial tak kha.
(more…)
hairehai
