mi(sual).com

*Kawrthahah Pawngsual Duh Loh Kawng Zawh : Tuikual Vengah Pawh Kum Tling Lo Pawngsual
*Khaw Chhak Lamah Mau A Tam : Sazu Puan Thu Report Dawn A Ni
*MCF-in An Hnathawh Leh Nihna An Sawi
*ZNP-in Thu Mu Hnu Phawrh Loh Duh : Zoramthanga A Huaisen Tawk Lo An Ti
*Independence Day State Thenkhatten : Mipui Tana Hlawk Zawngin An Hmang
*Thirnawi Awmna Chini FCI-ah Kir Tum
*Lawrkhawm

Kawrthahah Pawngsual Duh Loh Kawng Zawh : Tuikual Vengah Pawh Kum Tling Lo Pawngsual :

August, 17 : August ni 14 zana Kawrtethawveng khuaa naupang kum tling lo pawngsual a, thah a nih duh loh lantirin nimin khan Kawrthah joint MHIP chuan Kawrthah khaw chhungah kawng an zawh a, resolution pass-in he thil hi thleng hi an dem a, pawikhawihtu man chhuah a, a phu tawk hremna pek an phut. Hetiang thil hi tun hnuah thleng tawh lo se an duh thu an pass tel. Kawng zawhtute hi mi 400 vel an ni. Nimin piah khan Kawrtethawveng Joint MHIP chuan he pawngsual leh tualthah duh loh lantir nan kawng an lo zawh tawh bawk a, Kawrtethawvenga hmeichhe punkhawm tam ber tum niin an sawi.

Hetih lai hian Mamit district police hotute chuan pawngsualtu hi ngawrhtaka zawn a niin mi pahnih chu hrengin thu an zawhfiah mek an ni an ti. He tleirawl taksa leh thuamhnaw vela thil kaite chu DNA (test) tih tura ruahmanna siam a ni an ti.

August ni 14 zan dar 10:00 vel khan Kawtethawvenga tleirawl kum 15 mi Lalrempuii d/o Pu Robuanga ruang chu an in bul lawkah chhar a ni a, thah a nih hnuah emaw thah nih hmain emaw a thattu hian a pawl nia rin a ni. Police-te chuan Lalrempuii hi a ringruh a tliak niin an sawi. Hemi zan hian Lalrempuii leh a nau Lalhrekima chu inah an awm a, a nu a inkhawm a, a pa ram a riah hlan a ni a. Lalhrekima hian in danga TV en turin zan dar 8:00 velah an in a chhuahsan a, in a lo hawn chuan an in chu a lo hnawk nuai a, thutthlengte a lo let rem rum a, thosilen bante pawh a tlu a. Lalhrekima hian a u chu a pute inah a awm nia ngaiin a zawng a, a hmu lova, a nu inkhawm bang a lo nghak a.

An nu inkhawm bang lo haw chu a ngaih a tha lova, thenawm hnaite zawngin Lelrempuii ruang chu an kawm chhak lawka zawl zim teah an hmu ta a ni. Lalrempuii hian kawr a hak bak chu a thuamhnaw dang engmah a inbel lova, a nghawng vei lam a duk deuh a, a taksa dangah hliam a awm lo niin an sawi. Lalrempuii ruang hi nimin zing khan post mortem nghal a ni a, mihring pawlna hnuhma a awm nia sawi a ni.

August ni 14 zan vek khan Tuikual South, Aizawlah hmeichha naupang kum 8 mi pawngsual thu-ah Suisel (Putartea tia koh), kum 55 mi, Tahan, Myanmar chu man a ni a, police kutah hlan a ni. He hmeichhe naupang hian a serh na a tih atanga hriat chhuah a ni a, Putarte-a hian pawisaa thlemin a in luahah a hruai lut a, hmeichhe naupang hian a serh na a tih pawhin a vau bet nia sawi a ni.

Putartea hi mahnia khawsa, chess khel thiam, Mizoram Chess Open-ah pawh lawmman la tawh. chess khela mite nen pawisa inchawi a, chutianga eizawnga vak kual thin niin sawi a ni.

Khaw Chhak Lamah Mau A Tam : Sazu Puan Thu Report Dawn A Ni:

Kumin leh nakkuma mautam tura ngaiah tunah hian Saitual achin khaw chhak lam, Mizoram khing phel deuhthawah mau a tamin a par a, a rah nasa nia sawi a ni. Hetih lai hian hmun hrang hrangah sazu a puang tan nia sawi a ni bawk a. Agriculture department-a Assistant Plant Protection Officer Pu James Lalsiamliana chuan mau hi khawthlang lamah chuan a la tam nasa lo a, mahse, sazu puan thu chu dawn a ni a ti a. Mizoram hmar chhak Thekpui khuaah chuan sazuin buh kung an seh chhe nasa tih thu dawn ani a ti. Heng khaw hrang hrang sazu puang leh buh kung tihchhiat report dawnnaahte hian District Agriculture Office kaltlangin sazu tur sem chhuah zel a ni a, Agriculture Directorate-a sazu tur kawl sa bak a tul anga lei belh tum mek a ni a ti.

Hetih lai hian Mizoram hmun hrang hrangah tam hruai an tih mai hnahkhawr pangang puang, thangnang leh thangsi kai sawi a awm bawk a. Pu Lalsiamliana chuan hnahkhawr pangang hian buh hnah khawrin buh hnah hrinna a tihchhiat avangin rannung thahna hlo loneitute hnenah sem a ni thin a, thangnang leh thangsi erawh chuan buh leh thlai an tihchhiat thu dawn a ni lo a ti.

MCF-in An Hnathawh Leh Nihna An Sawi:

Mizoram Consultative Forum (MCF) chuan thahnemngai taka Mizoram hmasawnna tur leh hmasawnnain thingtlang khaw kilkhawr bera chengte pawh a thlen ngei theihna tura hma an lak chhoh zelnaah leh thil pawimawh tak tak an thlente ministry dinglai chuan eng emaw chen hma a laksak tawh tih sawiin lawmthu an sawi a, hma lak lohna thenkhatah pawh hma laksak ngei turin an ngen.

MCF chuan press release chhuahin a bikn urban development, disaster management, agriculture lama hma lak dan tur, sports complex puitling buatsaih, thalaite tana hna thawhna kawng zawnsak, Tlungvel quarry leh Saitual quarry helna tur kawng siam, thal laia thlai chinna atana Mat hnar buatsaih, serthlum tam tuarte tana compensation,etc. ngaihtuahsak chungchangte ministry dinglai hnenah an lo thlen tawh niin an sawi.

August ni 7 khan MCF hotute chuan a hun chep tak karah Chief Minister an kawm a, an rawtna thehluh 26 te lo thlirzui ngei a tiam a, Tlungvel leh Saitual quarry helna kawng phei chu bawhzui nghal a duh thu a lo hrilh a ni.

MCF chuan an memberte chu kohhran hrang hrang hruaitute, political party-a inhnamhnawihna nei lo an ni tih sawiin mi fing leh fel ber ber thlankhawm an ni lo a ni an ti a. Mahse, thinlung leh rilru tak taka ram hmangaiha veite an ni tih sawiin Mizoram hmasawnna tur leh sawrkar chak tak, hna thawk tha neih theihna tur chuan huaisen taka hma lak an tum a ni an ti. Eng ministry pawh lo ding se tanpui an tumin thurawn pek zel an tum a, amaherawhchu, thurawn ngai pawimawh lo leh ngaihsak duh lo an awm a nih chuan huaisen taka hma an lak ve tur thu an sawi a, an rawtnate chu lo ngaih pawimawhsak an ngen.

ZNP-in Thu Mu Hnu Phawrh Loh Duh : Zoramthanga A Huaisen Tawk Lo An Ti:

Zoram Nationalist Party (ZNP) chuan Tlungvel Assembly Constituency bye election an chuh dawn. August ni 14-a ZNP Gen.Hqrs. National Executive Committee inkhawm chuan hemi atan hian Campaign Committee din nghal tur leh chak taka hma la turin ruahmanna an siam. ZNP National Executive Committee chuan politics kal vel thlirin ngun takin an ngaihtuah a, political party thenkhatte chu thu mu hnute sawi chhuakin Mizoram politics boruakah inhnialna leh ngaihdan inanlohna tamtak an tuh thatthar leh ta a ni an ti a, pawi an tih thu an sawi. Mizoram politics hetiang zawnga kalpui lova, ram leh hnam hmasawn nan leh politics boruak thianghlim taka kal chhohpui zel hi political party zawng zawngte mawhphurhna leh an tihtur a ni an ti.

Chutih laiin RTB Order chungchangah ram hruaitu lu ber Chief Minister Pu Zoramthanga chu MNF Vice President a nih laia ama Order chhuah ngei pha a, a hming sign a nih lohzia Mizoram mipui hriata a sawi ta mai awm lo an tih thu an sawi a. Hemi chungchangah hian ZNP National Executive committee chuan “MNF leh Zoram mipuiten harsatna namen lo kan tawh lai leh India nena kan indo lai a nih avangin he order hi ka chhuah ta mai a ni” tia mipuite hriatthiamna ngen zawk mai tura Pu Zoramthanga an duh thu an sawi. Pu Zoramthanga chu Mizoram mipui maktaduaikhat dawn hmaah thu dik tan ngam khawpa huaisenna nei tur leh Zoram mipuite dawt leh thu belhchian dawl lo hmanga kaihruai tawh lo tura an duh thu an sawi.

Independence Day State Thenkhatten : Mipui Tana Hlawk Zawngin An Hmang:

Nimin piaha India Independence day vawi 60-na ( a champha 59-na a ni a, independence day chu a vawi 60-na a ni) lawmna chu hnam puanzar pawhpharh, mipui hamthatna ruahman bul tanna, ram independence nana an nunna hlantute chawimawinatea hman a ni a. Punjab khawpui Chandigarh-ah chuan Governor Gen.(retd) S.F. Rodriques chuan march past chibai a chhanglet a, Chief Minister Capt. Amarinder Singh chuan ama pianna khawpui Patiala khawpuiah hnam puanzar a pawtpharh thung. Punjab leh Chandigarh pumpuiah hian independence day lawmnaah sipai hriat leh hriat lohte, ram zalenna atana an nunna hlantute hriatrengna neih a ni.

Gauhati-ah hnam puanzar pawrpharhin Chief Minister Tarun Gogoi chuan hel ULFA-te chu an harsatna kumkhua atana chingfel turin tharum thawhna bansan a, sawrkar nena inbiakna dawhkan kil turin a sawm. Chief Minister hian kumina zirlai tithate lawmman atan Anandaram Barua Award hnuaiah computer 30,000 ruahman a nih thu a puang. Hei bakah hian Rajiv Gandhi Computer Literacy Programme hnuaiah he state-a Higher Secondary School 600-te hnenah computer 10 theuh pek an ni ang. Assam-ah hian independence day lawmna hi a boruak a sang vak lo a, a chhan chu ULFA tiamin hel pawl pangaten independence day lawmna boycott an puang a ni.

Tamil Nadu Chief Minister M.Karunanidhi chuan nimin independence day-ah hian cheng 150 senna tur ruahmanna hnuaiah nakkum Pongal Day-ah mi rethei chhungkuate hnenah gas connection 3 leh gas stove pek an nih tur a puang a, Mahatma Gandhi pianchampha October ni 2 atangin thalaite hnenah unemployment allowance pek a ni dawn a ti.

Kerala Chief Minister V.S. Achuttananthan chuan an state chu hmasawnna tlar hmasaa dah turin ruahmanna hrang hrang a puang a, Information Technology-ah kum nga chhungin sawrkar chuan hna thar nuai hnih a siam dawn a ni a ti. A sawrkar chuan tha thlah hauh lovin corruption, mi sual thil tih, hmeichhe laka nunrawnna, dan lova zu siamna a do zel dawn a ni a ti.

Thirnawi Awmna Chini FCI-ah Kir Tum:

Public Distribution System (retailer) kaltlanga chini sem chhuahah thirnawi a tel thin nia sawi chu Mizoram sawrkar chuan a chhui a, thirnawi awmna chu Food Corporation of India hnena kirleh tuma hma lak mek a ni. Food, Civil Supplies and Consumer Affairs Secretary Pu K.Lalnghinglova chuan chinia thirnawi awmte hi chini siamtuten siamna khawl atanga bag-a an thunnaah an telh a ni tih hmuh chhuah a ni a, FCI hian chini siamtute hnen atangin an fun ang angin an lei mai thin a, chuvang chuan FCI hnena pekletleh turin ruahmanna siam mek a ni a ti. MPCY chuan chinia thirnawi awm chungchang hi chhui turin Kulikawn leh Bawngkawn Police Station-ah FIR an lo thehlut tawh a ni.

Lawrkhawm :

Engineers Khawmpui

Mizoram Engineering service Association (MESA) chuan Indian Engineers Federation inkhawm vawiin atang hian Tourist Lodge, Chaltlangah an thleng dawn a, dar 10:00 a.m.-ah a hawnna inkhawm neih a ni ang. MESA memberte chu kim takin dar 9:30 a.m.-ah kim vek tur an ti a, sawrkarin engineer-te hi special casual leave a pe a, an pisaah dawr theih an ni dawn lo a, mipui hriatthiamna an ngen.

Inbumna Laka Fimkhur BSNL-in Duh

Deputy General Manager, BSNL chuan SMS kaltlangin BSNL chuan ‘free talk time eng emaw anniversary-ah a pe thin’ tih thehdarh an awm thin tih hriat a ni a ti a. Hei hi inbumna a niin cusatomer-te chu fimkhur turin Mizoram BSNL chuan a ngen a ni a ti.

MCP Din Champha Lawmna

Mizoram Congress Party (MCP) chuan vawiin dar 11:00 a.m.-ah Cooperative Conference Hall-ah an din champha hmasa ber lawmna inkhawm an nei dawn a, inkhawm Pu Saikapthianga, MLA Vice President chuan kaihruaiin hunserh Rev.Rualkhuma, Dawrpui bial Pastor chuan a hmang ang. President Pu J.Lalsangzuala leh General Secretary Pu Liansuama, MLA chuan thu an sawi ang a, report leh zaithiam zai ngaihthlak leh resolution pass-na an nei ang. Chawhnu lamah Pu Saikapthianga leh Pu H.C.Zahreliana, MDC ten thu an sawi ang.

Saihaah Zu Tamtak Man

Saiha district-a tlawmngai pawl hrang hrangte chuan ruihhlo do kum puan bawhzuiin nimin khan Saiha leh a chhehvelah ram thenfai operation beihpui an thlak a, zu leh a kaihhnawih thahnem tham tak manin an tichhia. Zu siamna hmunpui pahnih an tichhia a, zu fun 144 leh um 18 an leihbua a, zu siamna hmanraw chi hrang hrang barrel, bel dekchi leh teltin tam tham tak manin dawidim tlang 55 leh ganja gram 200 an man. Heng tlawmngai pawlte hian sawrkar phalna nei lova Tuitlawk rama khaw lo din a, ruih theih thil siama zuar thin in pahnih an thiat a, in 5 an halsak bawk.

Zirlai Pawngsual Thah Pawiti

Mizo Students Union (MSU) chuan an zirlaipui Class VII zirlai Lalrempuii, 15, d/o Pu Robuanga, Kawrtethawveng khuaa August ni 14 zana rawng taka pawngsual leh a nunna laksak pawi an tih leh tawrhpui thu an sawi a, he pawikhawihtu hi a rang thei ang bera sawrkarin zawng chhuak a, a phu tawk anga hremna chelek turin thuneitute an phut a, Lalrempuii chhungte hnena zangnadawmna pe ngei turin sawrkar an ngen. MSU Gen.Hqrs. chuan nimin khan Aizawl khawpuia College Students Union te, NGO te nen West End Resort, Lengpuiah Leadership Training an nei.

Thenzawlah Turf Hockey Field

Sports Authority of India (SAI) chuan Thenzawl hockey Campus-a hockey field chu turf-in a siamsak dawn a, cheng vaibelchhe 3 senna tur a ni. He thu hi Mizoram Women Hockey Association (MWHA) chuan sawiin August ni 7 khan MWHA Vice President Pi Zothankimi leh Sports & Youth Services Director Pu Zoliana Royte chuan New Delhi-ah SAI Director General Pu Ratan P.Watal, IAS leh Executive Director Pu S.K.Sagar an bia a, Pu Watal chuan Thenzawl-a turf hockey field siam a nih tur thu leh chak zawka thawhhona a awm theih nana hma lak a tul thute a hrilh a, a hmun ngeiah Pu S.K.Sagar leh hotu dangte an kal tur thu a sawi bawk. MWHA chuan SAI Director General leh Director, Sports & Youth Services chunga an lawmthu an sawi.

Raising Day Lawm

Agents Association, Life Insurance Corporation of India Aizawl Branch chuan vawiin dar 1:00 p.m.-ah an Office, Zarkawt-ah an Raising Day an lawm dawn.

Interview Ko

NIC Mizoram-in kum khat chhung thawk tur Programmer a lak tur diltute chu vawiin leh naktukah office hun chhungin certificate leh marksheet kenga interview turin a ko.

Similar Posts:

• Zalenna ni ropui takin hmang
• Bairabi leh Sairang inkarah Rel kawng.
• Mizo hnam zingah Gangte telh an ni ve ta
• Kawrte-ah pawngsual rapthlak!
• Mizo Aw News :: Aug 21

Recent Posts:

• IRONY OF THE FACT
• Mizo Society hian lal a hrawt em?
• MPSC hnuaia Mizoram Engineering Service tlingtharte
• Ka tawn vang a ni lo ania
• Mizo Technical Graduate-te (Veterinarians)

This entry was posted on Thursday, August 17th, 2006 at 2:12 pm and is filed under News. You can follow any responses to this entry through the RSS 2.0 feed. You can leave a response, or trackback from your own site.