mi(sual).com

Kut Hnathawkte Leh Loneitu Pawl Thar Din : Chief Minister Hnenah Lehkha An Thehlut Nghal
Aizawl, August 23 : Kut hnathawktute leh loneitute pawl tangrual pawl hrang hrang intelkhawmna pawl thar July ni 7-a din “Mizoram Cultivators and Labours Union (MICLUN)” chuan tun hnaiah Mizoram Chief Minister hnenah lehkha thehlutin Mizorama hna hmu loten hna an hmuh theihna tur renmchang ber chu lo neih lam leh kur hnathawh inzirtir uar a ni tiin chak zawka inzirtirna nei tura ruahmanna siam ni se an ti. Kut hnathawktute leh loneitute chu beidawnna ruama awm ta nia sawiin an inkhaichhuah ve theih nan loan hrang hrang a puk theih apiang kut hnathawktute leh loneituten bank atanga an dilte a hlawhtlin ngeina tura nawrpui turin an ngen a. Sapthei chuingtuten a dahkhawlna tur in, Chhingchhip sapthei herna hmuna din turin an ngen bawk. Hei hi MP Fund pawhin rang taka ngaihtuahpui turin an ngen. tun laia sapthei tiak sem mek chu hnah nei mang loa ro tawhte an ni tiin a tiak 500 dawng turin 180 chauh dawngte an awm an an ti a, khawtina sap thei chingtute chu an khuaa sapthei tiak sem dan report turin an ko bawk
MICLUN chuan lehkhathiam hna nei lote sawrkar hna chauha an innghah lohna tur leh hna tam zawk a awm theih nan hydel project tihpuitlin thuai thuai leh Mizorama mau lungrual mai tur ven nan paper industry din hnuai ni se an ti a. Kut hnathawktute leh loneitute phai lamah leh ram pawnah training a tul chang atan Aizawl atanga Kolkata thleng kut hnathawktute leh loneitute tan a bika special air ticket siamsak thin ni se an ti.
Kut hnathawk leh loneitute chuan thlai chite phai lama lei tawh lova Mizoram thar chhuah ngei lei tawh ni se, an tan chawlhna tur in district tinah din ni se, an tan training hmunpui din ni se an ti a. Kut hnathawk leh loneitute beidawng lutuk chhanchhuah an nih vat loh chuan rah tha lo tak hmachhawn theih a nih avangin tam tuar tanpuina tur Baffacos hnuaia kal mek sem chungchangah sawrkar kal fimkhur turin an ti. PMRY loan hmu tura thlan tawh, bank-in harsatna an siam thin chu loan hmu tura thlan zingah kut hnathawktu tam tak an tel ve thin avangin chak zawka bank hruaitute hnena hma lakpui turin Chief Minister chu an ngen bawk.
He pawl thar President Chairman K.C.Lalliana a ni a, Vice Chairman Dr.Lalnilawma, Ph.D. General Secretary Zohmachhuana Khawlhring, Assistant Secretary Vanlalnghaki, Buangpui, Financial Secretyary L.Z. Sailo, Adviser Prof.Dr. Lianzela, Ph.D.; Legal Adviser J.T.Vanlalngheta, MA, LLB an ni a, Information Officxe, KCIT Office, Zarkawtah neiin Phone No. 2343380 a ni.

ZORO-in An Thleng Thui Tial Tial
July ni 29 atanga August ni 5 thlenga Geneva-a United Nations Permanent Forum inkhawm vawi 24-naah chuan ZORO General Secretary Pu Keihawla Sailo a tel ve a, ni hnih hnuah ZORO Vice President Pu Rozathanga leh Tv.Thangtea ten an zawm veleh a, Switzerland-a awm Tv. Puia Sailo chuan a tawiawm.
ZORO Gen.Hqrs. press release sawi danin Pu Keikawla, Cultural Day-ah ‘German ral lian….’ tih hla puan veng leh diar khima sa chunga a han lam vel leh seki a han khawng ri kang kang mai chuan mite mit a la hle a, Pu Rozathanga pawhin Pawi hla a sa bawk. Cultural Day-a ZORO dawr chu a lun khawp a, dawr chhunga seki nena an han zai vel chu hmuhnawm ti takin miten an thlir a ni.
UN Permanent Forum inkhawmna Hall-ah Pu K.Hawla chuan Zofate insuihkhawmna atana tanpuina ngenin “UNO hian engtia rei nge beng a chhutngawn dawn?” tia a han sawi zawh chuan inkhawm Chairman chuan “Tuna thusawitu thusawia a zawhna kha Saami Council-in a chhanna lo ngaihtuah rawh se” a ti a. He Council hi Norway, Sweden, Finland, Poland, Netherlands, etc. an ni a, hnam tenau tantute an ni. Inkhawm zawh hnu hian Pu K.Hawla chu Londonah kalin hetah hian CNN chuan Mizoram chanchin sawi turin an sawm niin ZORO press release chuan a sawi a,mahse pawisa lam indaih lohna avangin a tihlawhtling ta lo a, remchang hmasaah kal leh a tum a ti.
ZORO press release chuan Zofate thendarh zawnga hma lakna leh ram leilung chan zawnga development-a hma lakna awm bawk thin mah se Zo inzawmkhawm nana hma lakna chu khawvelin a hre ve tial tial a ni a ti a. ZORO Chairman Pu R.Thangmawia chu May 2006-a New York-a UN Permanent Forum inkhawmah a lo tel tawh a ni.

HIV/AIDS chungchang zirna hawng
Nimin khan State Guest House ah R. Tlanghmingthanga, Minister chuan C.B.O. hruaitute tana HIV/AIDS lam zirna a hawng.
Hawnna a thusawiin Tlanghmingthanga chuan natna hlauhawm ber AIDS hi a damdawi a vangin enkawlna a to em em a. Vantlang mipui ten hetiang natna veite khawngaih a, theihtawpa tan lak a tul a. Sorkar ni lo pawl – Community Based Organisation (CBO) ten nasa taka tanlak a tul a ni. He natna lak ata chhanchhuahna hnathawh hi Mizo ze tha chhunzawm chungin hlawk takin kan thawk thei ang a, kristian ten mihringte hmangaih avanga kan thawh tur dik tak a ni a ti.
Dr. K. Ropari, Project Director, MSACS pawhin, India ram chu khawvela AIDS vei tam berna anih thu leh, AIDS vei mi maktaduai 52.2 lai an awm thu te, Mizoramah pawh a vei an pun sawtzia te sawiin, mipuiten AIDS veite endawng lova, hmangaihna nena kan ngaihsak chauhin hlawhtlinna a awm theih a rinthu te, tunah NGO 28 nen thawk hoin, kohhran leh tlawmngai pawlte nen theih tawp an chhuah thute a sawi a. HIV/AIDS veite awmdan dik tak hria a khawngaih chunga thawh a ngai a; tunah hian CBO te nen a thawh hona hi nasa lehzuala chhunzawmin tanpuina sum pawh pek uar zel a ni dawn tih a sawi bawk.
Dr. Rohmingthanga Ralte, D.D. (STD) pawhin kum 2005 chhung a AIDS vei thar mi maktaduai 4.9 lai India ramah an awm thu sawiin, state 6 te chu AIDS hluar zualna bika puan a nih thu a sawiin, AIDS vei thar zingah puitling bakah naupang nuai tel an tel thu a sawi bawk.

Public information Campaign tan a ni
Nimin khan ninga awh tur, sorkar hmalakna leh ruahmanna inzirtirna leh inhriattirna atana beihpui thlakna (Public Information Campaign), Press Information Bureau (PIB) huaihawta buatsaih chu Dr. R. Lalthangliana, Minister, I&PR, Forest and School Education chuanSihphir Twin Market ah a hawng.
He beihpui thlakna a khuallian Dr. Thangtea chuan hawnna inkhawma kalkhawmte hnenah Dr. R. Lalthangliana chuan sorkar hmalakna chi hrang hrang leh hmalak dante mipuiin an hriat a pawimawh thu leh chumi avanga sorkar leh a hnathawkten uluk leh fimkhur zawka hmasawnna hna an thawh theih na tur atan he beihpui hi thlak a nih thu sawiin, thingtlang lamahpawh he campaign nei tura ruahmanna siam turin PIB hotute chu a ngen.
Mizoram chu state dangte aia enhniam a nih theih loh chhan pathum sawiin Dr. Thangtea chuan ‘100% Christian awmna awmchhun kan nih vangte, state ralmuang bera chhiar zinga mi nih vanga development chak tak a kalpui state nih vangte leh, ziak leh chhiar lamah India rama sang ber pahnihna kan nih vangte hian khawvel ram dang mite hian min enhniam ngai lo’ a ti.
Robert Hrangdawla, State Chief Information Commissioner chu he hun-ah hian khualzahawm niin mipui kalkhawmte hnenah Mizoram ah Right to Information Commission a lo ding ta a. Mipuiin sorkar hnathawhte dik tak leh fiah taka kan hriat theih nan, dan leh dun te zirbelh ang u tiin sorkar hna kal diklo awm hriate chuan RTI Commission leh department hrang hranga Public Information Officer te kaltlanga thu an thlen dan tur te a sawifiah bawk.

Information Commission Tangkaina Lang Tan: Surveyor Leh Bank Officer Sawiselna An Umzui
Land Revenue & Settlement department-a Surveyor-te in hmun an teh dawna an office atanga hruai ngai thin leh chutiang hmun teh tura dilna an tehsak har lutuk thin sawiselna State Information Commission hnena thlen chu Commission chuan ngai pawimawhin he department hnenah hian Surveyor-te chu office atanga hruai ngai tawh lo tur leh ni 30 chhung ngeia tehsak tura remruatna siam turin thu rawn a pe. He thu hi nimina Sihphir-a sawrkar laipui scheme lian pui pui chungchanga mipui tihbengvarna beihpui thlak Public Information Campaign-a thu a sawinaah State Chief Information Commissioner Pu Robert Hrangdawla chuan Vanglaini chanchinbua State Bank Officer pakhat, a pisa kal tlai thin avanga mipuiin harsatna an tawh thin pawh State Bank of India thuneitu sang hnenah ziaka thlen a ni a, SBI thuneitu sang chuan an lehkha chu a rawn chhang tawh a, rei lo teah transfer emaw a chungah action lak emaw a ni ang a ti. Pu Hrangdawla chuan State Information Commission chu khua leh tui tu pawhin sawrkar leh a behbawm department atanga hriat duh an neihte an hriat theih nana tanpuitu tur a ni a ti a. Dan zawm leh dan anga mitin awm a pawimawh thu sawiin dan ang hian awm vek ila chuan tumahin buaina an tawk lovang a ti.
Nimina thu sawitu dang State Information Commissioner Pu K. Tlanthanga leh I&PR Commissioner Pu T.B.C.Rozara chuan Right To Information Act chu phuba lakna atana hmang lo tur leh khawtlang leh mimal tana thatna leh tangkai tur atana hman ni se an duh thu an sawi a. Ram leh khawtlang tana tha tur sawrkar atanga zawh chhuah nana hmang turin mipuite an ngen.

New Lamka Biak Ina Inkhawm Sipaiin An Kap : MCP-in Sipaite Hrem Leh Tuartute Zangnadawm Phut
Mizoram Congress Party (MCP) chuan Pathianni August ni 20 zana Churachandpur New Lamkaa Evangelical Fellowship Biak Ina Lalpa zanriah kilho lai sipaiin luhchilha, ‘pawisawi lo nunau an kap chiam mai kha’ sakhaw zalenna rama thil thlengah awm lo an tih leh dem takzet thu an sawi.
Nimin khan press release chhuahin he intawngkahnaah hian Pu Thangkhawlien s/o Rev.Ginjam, Chairman, Evangelical Youth Fellowship a thih bakah mi dang panga na taka hliam na an tih thu an sawi a, an chunga thil thleng hi an chunga thleng angah an ngaih thu MCP chuan an sawi.
Heng thihna leh hliam Biak In chhunga thlentute chungah danin a phal anga na takan hremna lek an duh thu leh tuartute hnena zangnadawmna sawrkar laipuiin a pek an phut a. He thil thleng hi sakhaw inzahlohna leh India danpui bawhchhiatna nasa tak a ni an ti a, tuartute Pathian hnena tawngtaipui turin mi zawng zawng an ngen.

‘Sorkar laipuiin NREGS ah Lawngtlai leh Saiha a thlang’ : Aichhinga, RD Minister
Nimin khan Public Information Campaign 2nd session ah khuallian Aichhinga, Minister chuan NREGS chungchang sawiin he programme hi central sorkarin tunhnai khan hman turin a ruahman a. India ram district hnufual 200 thlangchhuakin Mizoramah Lawngtlai leh Saiha district te an rawn thlang ve a. Hemi atan hian central sorkar atangin sum tam tak hmuh a ni a ti a. He NERGS kalpuina tur hian Mizoram sorkarin Rules te buatsaihin central sorkar kaihhruaina dung zuiin state, district leh khua level ah council te dinin tunah hian hmalak tan mek a ni a ti.
Aichhinga chuan he programme ah hian Zokhaw lam kut hnathawk tute kum khatah ni 100 tal an inhlawhna tur ruahman sakna a tel a. Chumi tihlawhtling tur chuan Job Card mimal tin tan siamin, uluk takin an inhlawhna tur ruahman sak a ni a. Hnathawh tur pawh vantlang tana chhawrtlak rotling siamna lam hawi bakah, mimal tuikawng siamna, huan kawng sialna leh tul dangte ruahman theih a nih thu a tarlang bawk.
Rural Development Minister Aichhinga chuan thingtlang mirethei leh chhumchhia te tana central sorkar duhsakna scheme hrang hrangte tarlangin huamzau takin Rural development Department in hma chak takin a la mek a ti a. Hetih lai hian tunhma atanga kalphung diklo, chhungkhat leh party induhsakna lamhawia hman thin chu tunah hian dik thei ang ber a kalpui mek zel a ni a. Chuti chung chuan hmun thenkhatah tih fuhloh leh tih sual palh a awm zauh zauh thin a, hei hi a pawi tak meuh a ni tiin thawktute leh mipuite pawh dik tak leh rinawm taka heng tanpuina sum te hi hmang tangkai turin a sawm a. Central sorkar atanga NREGS kan dawng hi malsawmna lawmawm taka ni tiin a dawngtu zawng zawngten dik tak leh rinawm taka hmang tangkai turin a chah bawk.
He hun ah hian Principal Secretary RD Deptt. Vanhela Pachuau leh PWD, RD Department bakah Thanglianmang Guite Advocate ten thu an sawi a mipui atanga zawhna leh chhanna hun hman a ni bawk.

UBI Branch thar lawmna nei
Nimin piah a hawn thar, UBI Branch 1319 na, Aizawl Branch chuan thawhtan zan khan a lawmna zanriah Tourist Lodge, Chaltlangah an kilho a, Mizoram Legislative Assembly Opposition Leader Pu Lal Thanhawlan a hmanpui.
He lawmna inkhawmah hian Lal Thanhawla chuan India ram state hrang hrang leh India hmarchhak state ten United Bank of India tangkai taka an hman theih thu leh, Mizoram mihring tlemte leh sum veivir tlemna a Branch min hawn sak ve chu lawmawm a tih thu a sawi a. Kuthnathawktute, sumdawngte, zirlai leh thalai lehkhathiam ho tan a tangkai thei ang bera an hman a duhsak thu sawiin, Mizoram District khawpui hrang hrangah pawh Branch dang a rang lama hawng ve turin UBI hotute hi a ngen nghal bawk.

Madras/Chennai Kum 368-na Lawm
Madras ni thin tuna Chennai tih tak chu nimin khan kum 368 a ni a, pawl hrang hrang leh he khawpui khua leh tui pawl (citizens forum) chuan he khawpui din tanna champha lawmna hrang hrang an buatsaih. Archeological Survey of India, Chennai chuan Fort St. George-ah Exhibition an buatsaih a, he khawpui lo din chhuah chhoh dante entir a ni. Economic lama thanna, pawisa (coins) leh pawisa note kum tam tak kal taa tihchhuah te, lehkhabu hlui te, map te, building rawng hnawih tuna awm tawh lote pho lan a ni. Kum 1639 nimin angah khan East India Company chuan Madrasipattanam hmunah sangha manna khua (fishing village) dinin awm tan a ni. Tual chhung ram neitu hnen atanga ram hi an hawh (lease) a ni. Sapho chuan Fort St.George an sa tan a, hei hi tunah chuan State Secretariat atan an hmang mek a ni. Tichuan Fort hmunah hian George Town a lo thang chho ta a, tichuan kum 1668 khan India rama Municipal upa ber a lo ni ta a ni.
Kum zabi 18 leh 19-naah khan British leh French sipaite chu Madras khawpui inchuhin an indo a, French sipaite chuan eng emaw chen chu an awp a, a hnuah Pondicherry-ah an chhuahsan a, British-te chuan Madras khaw pum chu an control ta a ni. Madras chu kum 1996 khan Chennai tih a lo ni ta a ni.

Vande Mataram Hla-in Parliament Inkhawm A Tibuai
Nimina Lok Sabha leh Rajya Sabha inkhawm chu hnam hla Vande Mataram sak chungchanga sawrkar laipuiin state sawrkar hnena lehkha a thawn chungchang inhnialna avangin vawi eng emaw zat chawlhtir a ni a.Union Human Resource Development Minister Arjun Singh chuan sawrkar laipuiin state sawrkarte hnena thlaleh ni 7-a Vande Mataram lawmna vawrtawp laia Vande Mataram hla sak chungchanga a lehkha chu a hnukdawk emaw a tidanglam emaw lo a ti. Pu Arjun Singh chuan he hla sak hi ngei ngei tur a ni em tia chanchinmiten an zawh chuan a chhanna chu he Vande Mataram lawmnaa miin a tel ve duh leh duh loh a thu a ni mai tiin a chhang a ni a ti a. State sawrkar hnena thupek (directive) chungchangah Pu Arjun Singh chuan Prime Minister chair-na hnuaia National Committee chuan he hnam hla kum 100 tlin lawmnaah Sept. ni 7-ah chuan school, college leh zirna in dangahte a ruala sak chu thil remchang takah a ngai a, chuvangin state sawrkar hnenah lehkha thawn a ni a ti. BJP leh member thenkhat dangte chu Minister sawifiahnaah hian an lawm zo lo a, au hla neiin an au ta a ni. hetianga eptu memberte an au bengchhen lai hian Wildlife Protection (Amendment) Bill pass a ni a, chumi hnuah tlai dar 3:00 thlengin inkhawm chawlhtir a ni ta a ni.
Tlai dar 3:00-a inkhawm leh a nih chuan bengchhen ngai bawkin eptu memberte an la bengchheng a, chuvang chuan dar 3:30 p.m. thlengin chawlhtir leh a ni.

MCS Officer-te An Training
MCS Officer-te tana buatsaih “Office administration and procedure” training chu nimin piah atang khan Administrative Training Institute (ATI)-ah tan a ni a, Mizoram hmun hrang hrang atanga MCS Officer-te an tel. He training hi ATI Director Pu K.Riachho chuan hawngin dan leh hrai hriatchian a tulzia leh dan chhunga hnathawh him dan te a sawi a, training-te chu thahnemngai taka dan huang chhunga inpumpekna thinlung nen hna thawk thin turin a fuih. He trainingah hian sawrkar dan chi hrang hrang, Pay Rules, Conduct Rules, Office Procedures, General Financial Rules, GPF, Central Treasury Rules, Right To Information Act, Human Rights,etc. an zir ang. He training hian August ni 25 thleng a awh ang.

Anthurium Vailiam
Tukin dar 8:00-ah Dir. of Horticulture atangin Home minister Pu Tawnluia chuan anthurium ram pawn atanga thawn chhuah tur a vai liam a, Horticulture department chuan he anthurium vai liam hi hmar chhak atanga ram pawna thawn chhuah hmasak ber tur niin a sawi.

Bangalore Exhibition-ah Tel Theih
Confederation of Indian Industries (CII) buatsaihin nakkum January ni 17-19-ah Bangalore-ah handloom and handicrafts

Similar Posts:

• India Today State Survey – East Zone ah Mizoram Pakhatna
• Sorkar hnathawkin budget sum ei tam
• Health leh Agriculture a hmasawn Mizoram.
• Mizoram sorkar leiba – “Vaibelchhe 3,611″
• Minister leh Parliamentary Secretary-te motor enkawlna senso nuai 19 chuang

Recent Posts:

• ‘Silai’ by Rian B. Anderson
• Zaidawh tak a zalenna dil!
• Ngaihtuahna ṭawng (Mind language)
• Nun Tihlimtu – Naupangte -II
• Mizote leh Sex (A ruh langin)

This entry was posted on Wednesday, August 23rd, 2006 at 11:52 am and is filed under News. You can follow any responses to this entry through the RSS 2.0 feed. You can leave a response, or trackback from your own site.