mi(sual).com

Wai Wai Cup khel turten Aizawl an lut mek zel: AR Ground kan chang lo, Vaivakawnah
Naktuk maia tan tur Wai Wai Cup 2006 atana inbuatsaihna a kal mek a, a buatsaihtu MFA lam pawh an inpeih thawkhat tawh e. Nimin khan referee clinic buatsaih a ni a, an ni aia ham thiam lo fe turten kan sawisel ve ngial thin thil thleng tam tak leh demna awm fo pumpelhna tur atan buatsaih a ni chungin dik leh tha famkim a awm theih lo vang erawh chuan ngaihdan siam kawngah a tawk kan hriat a pawimawh ang. Managers meeting pawh zanin dar 7:00 hian Aizawl Pres Club-ah neih a ni dawn a, tel tum constituency 33 zette an phur tak zet tawh a, Aizawl khawpui chhunga hmun 2-ah he tournament lian hi kan en dawn kan tih tawh kha.

Vaivakawnah zawk aw..
Beisei dan leh ruahman dan chuan Pool A match, 1st round hi Sipai Lamualah khelh tura ruahman a ni a, mahse Vaivakawn lamah zawk a nih tak chu. Sipai hnen atangin Lammual hman phalna MFA-ten an hmu thei pek lo. Theihtawp chhuahin MFA hian Lammualah ngei he Wai Wai Cup hi khelh a nih theih nan hma lain AR thuneitute pawh an dawr a, mahse AR hian thlakhata mipui tana Lammual hman theih hun bithliah an siam vek a vangin an bithliah bak pelh an remti lo niin a lang. Hei vang hian Pool A te, Lammuala 1st round match khel tura ruahmanna an siam lai pawhin ngaihngam leh kutkuangkuahin an awm mai lo va, theih loh thut a awm pawha buai lova an chet theih nan Vaivakawn Field chu an buatsaih bawk a, an tisual lo ta reng a ni.
Aizawl West lam tan malsawmna a ni thung dawn a, a vawikhat nan Wai Wai Cup Tournament 1st round chu Vaivakawn Field-ah a en theih dawn ta a nih chu. Tichuan Pool B ten Ramhlun Sports Complex-ah 1rd match an khel bawk ang a, in thik tur awm chuang lovin Lammual lo ve veah Pool A leh B ten 1st round an khel dawn ta a ni mai.

En man a awm dawn lo
AR Ground-ah chuan khel se en man a awm dawn a, ticket Rs.10/- man zel siam tum a ni. Mahse Vaivakawn leh RSC-ah a free-in Wai Wai Cup kan en thei dawn ta. A free a nih hrim hrim chuan hmarcha pawh nise ei teuh thei zel tan chuan thu lawmawm tak a ni a, hmarcha ei lo; a thak lam chi reng reng ei lo leh Vawksa ei lo thlengin thu lawmawm a ni tho tho. Aizawl mipui, Zoram mipui hian football kan tuipui tak tak em tih a hriat dawn a, chu chu Vaivakawn leh Ramhlun Sports Complex-ah a chiang dawn a ni. Tualchhung(domestic) football kan chawisana kan tuipui tak tak hunah lo chuan Zoram hian football-ah rahbi thar kan rap lo ang tih leh Tuipuiral game mitthla chunga kan dinhmun sawisel mekte hian hmasawnna lam aiin min hnungtawlh tira, mahni inhmuhsitna hian ram ropui min thlen loh thu leh inrintawkna atanga kan dinhmun chawikang tur kan ni tih thu pawh kan sawi ngun ta khawp mai. Chuvangin mipuiin kan tih tur kan hlen a pawimawh a, a khel tur player-te chuan khel mualah theihtawp an chhuah dawn a, mipuiten a en lam hna theihtawp kan chhuah ve a ngai. Mahni veng bila chhuak ni lo mahse kan aiawh tho an ni a, chuvangin tawiawm hi kan bat a ni.

Inkhel tur an rawn thleng zel
Aizawl rawn thleng an awm nual tawh a, an thlenna tura ruahmanah thleng zelin khaw hla deuhte phei chu nimin khan an rawn thleng fel vek tawh a. Rawn thleng tawh zingah Lawngtlai, Vanva leh Mizoram chhimlam team-te chu tunah hian phur takin an practice thauh thauh tawh a ni. Aizawl khawpuiin mikhual duhawm a thlenbelh zel dawn a, heng mite hi Zopa inthlenin kan inthleng dawn a ni. Team thenkhat erawh mahni rawng inbawl chawpin hmun khatah an thlengkhawm thung a, an cham hun chhung tawiteah that chhuah kan ba tih kha theihnghilh lo ang aw..

Europe-a khelh duh Carlos Tevez, Man.United-in an beisei mek :Owen Hargreaves chungchang a la buai zel : Smith a dam hnai
Player tha apiang lak tuma kut phar thin Man.United chuan tunah hian Europe lama khelh tum mek Argentinian striker Carlos Tevez chu Brazil club Corinthians atangin lak an tum mek niin Daily Mirror chuan a tarlang
Dailly Mirror-in a tarlan zel danin amah Tevez hian chhuah a duh thu a sawi a. “tun hi Corinthians tana ka game hnuhnung ber leh Corinthians kawr ka hak hnuhnung ber a ni mai thei. Corinthians-ah hian awm zel ka duh a, mahse kan tan enge tha bera kan chhungkaw tan enge tha ber tih hi ka ngaihtuah zawk chu a ni” tiin a agent Adrian Ruocco paw’n “Tevez hian Europe-a khelh a duh a ni” tiin a tlip bawk.
£17m zeta Hargreaves an beisei mek lai hian Carlos Tevez man pawh a tam hmel elh elh khawp mai. Report dan chuan £25 million vel a nih rin a ni a, hetiang zat hian Man.United hian an lei ngam ang em? tih erawh zawhna awm mek a ni thung.
Hetihlai hian Bayern Munich chuan an duhlai Owen Hargreaves chu a rim mektu Man.United theihnghilh daih turin an ti a, engtikawng zawng pawha hralh an remtih loh thu sawiin kum 25-a upa Hargreaves hi chhuahtir an tum loh thu Bayern club general manager Uli Hoeness chuan a sawileh ta.
Kan tarlan tawh angin Owen hargreaves hi tun Pathianni kaltaah Munich ten Bochum 2-1 a an hneh tum khan squad-ah telh a ni lova, nizana Barca nen Friendly match an khelah pawh squad-ah telh a ni lo bawk. Hei vang hian English media-te chuan Hargreaves chung chang hi an sawi vungleh hle a ni. United Boss Ferguson chuan Hargreaves manah hian £17m (25 million euros, $32.15 million) zet a phal thu kan tarlang tawh a, heti chung hian Bayern chuan a partner Michael Ballacka’n a chhuahsan tawh avangin a ni lehzel chan an rem tih loh thu an sawi chamchi ta mai a ni.
Canada-a piang Hargreaves hian kum 16 lek a nih lai 1997 khan Bundesliga club lian hi zawmin 2001 khan Bayern hi Ucl a champion pui a, Bundesliga titles vawi 4 lai a lakpui tawh bawk a, 2010 thleng Bayern-ah hian contract a nei.
Smith a dam hnai tawh
Man.United utility player striker ni bawk midfielder ni bawk kum 25-a upa Alan Smith chu Premiership huangah a kirleh hnai tawh hle. Smith hian man.United ten Reserve team match-a Preston 7-2-a an sawp tuma khelin goal a thun lo na a,a hliamin dam lam a pan mek tih erawh a chiang hle thung.
Smith hian february thla a\ang khan United tan a khel ta lova, khami tum khan Anfield-ah minute 66-ah Liverpool defender John Arne Riise chuan petperin a ngal leh kheimit ruh a tina a nih kha. A hliam kha rin ai takin a lo na phian mai a, tunah hian ngai a la awh chiah lo naa September ni 9-a United ten Tottenham an khelh hma ngeia a dam hman beisei a ni.

SAF Games-ah Lalremkimi
Lalremkimi (SAI) chu 10th. SAF Games, Colomboa-a neih mekah taekwando-a India aiawh tura thlan a nih hnuah thla hnih Aurangabad-a coaching a kal hnuin nizan khan Mumbai atangin Clombo a pan ang. Lalremkimi hi nikuma Asian Taekwando Championship, Kazakhstan-a India tana bronze medal latu kha a ni a, Mamit khaw chhuak, Aizawl Ramhlun Venglai, SAI, SAG Hostel-a awm lai a ni.
Hetih lai hian Senior National Taekwando Championship Sept. ni 15-17 chhunga Chennaia awm tur atan Mizoram Amateur Taekwando Association chuan Mizoram team tur a thlang fel tawh a, SAI, Mission Vengthlangah coaching an nei mek.

India La Chetha Zel
SAF Games Colombo-ah chuan niminah chhun thleng khan India aiawhte chuan gold medal 4 an la leh a, mipa leh hmeichhe team badminton-ah a thlengtu ram Sri Lanka 3-0-a hnehin gold medal la, hmeichhe table tennis doubles leh mixed doubles gold medal an la bawk a, heng doubles leh mizex doubles-ah hian India aiawhte chuan silver medal an la bawk.

Similar Posts:

• Mizo Aw Sports :: 25 Aug
• Manchester Premier Cup 2008 ah Mizoram che tha zel
• India vs Qatar 2nd leg
• Zaninah UAE vs India. India tan Jeje Lalpekhlua a start dawn.
• National Kick-boxing Championship-ah Mizoram aiawha kalte an che tha

Recent Posts:

• ‘Silai’ by Rian B. Anderson
• Zaidawh tak a zalenna dil!
• Ngaihtuahna ṭawng (Mind language)
• Nun Tihlimtu – Naupangte -II
• Mizote leh Sex (A ruh langin)

This entry was posted on Wednesday, August 23rd, 2006 at 12:05 pm and is filed under Sports & Games. You can follow any responses to this entry through the RSS 2.0 feed. You can leave a response, or trackback from your own site.