mi(sual).com

misual.com front page hi luah khat vek mah sela, a awm lo chuang lovin ka hria. A hunlai a ni tlat. LPS buatsaih Youth Icon 2006 chu Inrinni zan khan final neih a ni a, hming petu mi 997 zingah Lalramchhani, N Vanlalphai chu Youth Icon 2006 atan thlanchhuah a ni a, thilpek leh duhsakna tinrengin a vur a, a umzui bawk.

Thalaite zinga ‘ber’ thlannaah hian hmingpe 997 zingah mi 104 te chu intihsiaknaah hian an tel lova, mi 893 ten intihsiakna hi an nei a. Rimawi leh chhepchher tel miah lovin a hang dik takin an hla duh ber an sa a, chung zingah chuan mi 130 in second round an lut a, hollow guitar nen a thawhhnihnaa tlingte hi an intihsiak leh a, mi 10 thlanchhuah leh a ni a, a tha zual 3 an thlangchhuak leh a, Chutah chuan Esther Lalchhanchhuahi, Chhinga veng; Lalhmingsanga Republic leh Zoramchhani, N Vanlaiphai te an ni.

An intihsiakna ber hi Lalsangzuali Sailo hla ‘Rawlthar Tang Fan Fan’ tih a ni.A tawp lamah hi chuan LPS ten musician an rawih sak tawh a ni. Final zan hi Zarkawt kawnah mipui hmuh theihin tihchhuah a ni a, mipui an pungkhawm tam hle. Final dawn hian zan khat hun khaihlak a awm a, chutah chuan Mizoram hi Youth Icon in a chiah hneh hle a ni, mobile leh phone pangngai-ah pawh chu chu i vote ang u tih a tam hle a, sumdawngtuten duhsakna an inhlansiak emaw tih mai turin thilpek leh suhsakna hlantu lah an tam a, a puan pawh an puang seng lo.

Chanmari VC president Rosiamngheta phei chuan Chanmari khua leh tui nihna a lo pe hmiah mai a, CM Zoramthanga’n 1-na atan Rs 10000, 2-na Rs 7000 leh 3-na Rs 5000 a pe bawk a. An intihsiakna hla neitu Lalsangzuali Sailo pasal J Laldinliana chuan top 3 te chu Rs 1000 theuh a pe a, minister Dr Lalthangliana chuan top 3 te hi Rs 1000 theuh a pek bakah a hla phuahtu Lalsangzuali hriatreng nan Rs 3000 a pe a. Quality Travels chuan Kolkata kalna tur air ticket an pe a, Chief secretary Haukhum Hauzel thianni Vanlaldiki chuan Kolkata a an cham chhung thlenna senso zawng zawng a tum tur thu a lo sawi bawk a.

Icon Zoramchhani hi an khua North Vanlaiphai chuan lirthei zawng zawng nen hmuah an tum a, Sawnpoh kawn-ah ama puala inkhawm an buatsaih bawk ang. Rulchawm tlangval K Lalremmawi hi Chief Minister leh Home Minister te chuan an motor a thlah an tum a, ropui takin an lo hmuak dawn a ni. Sihphir nula Zomuanpuii hi Most Promising Artist hi an VC chuan Sihphir venglai-ah inhmun tha lai ber an pe nghal bawk.

Mobile phone, TV leh thilpek dang an dawn tamzia chu an puan sen loh ang bawkin ziah sen a ni lo. Final zan khan Projector hmangin veng tam takin an veng lun laiah mipui an kokhawm bawk a, North Vanlaiphai-ah chuan a milem lang thei lovin zai leh tawng chiah hriat theihin an lo ngaithla a, lam tlaivar pawh an awm nual.

Similar Posts:

• Youth Icon 2006 Top 3
• Youth Icon-in banna thehlut
• A zai thiam a ni
• Youth Icon Live Concert
• Youth Icon A Hmuhnawm Tulh Tulh

Recent Posts:

• PÂWL LAL HRAWTNA AIZÂWL???
• MIZO HNAM SAKHAW DIK PHOCHHUAHNA- IVby. Rorelliana
• Hriat chian lehzual
• Sunglass man to chhan!
• Tawng tih hausak a pawimawh!

This entry was posted on Sunday, December 10th, 2006 at 7:31 pm and is filed under Music and lyrics, News. You can follow any responses to this entry through the RSS 2.0 feed. You can leave a response, or trackback from your own site.