mi(sual).com

Hun hnuhnung a nih tawh vang ni maw heti tak mai a sakawlh chungchang Zoramin kan buaipui ta mai hi !? Tun ang hian Mizote hian hun hnuhnunga lo lang tur ‘sakawlh’ hi kan la buaipui ngai lo. A lawmawm viau rualin lehlamah chuan a buaipui loh tur zawk hi kan buaipui vak ang tih erawh a hlauhawm deuh chuan ka hria.

Fimkhur hi a tha a, fimkhur tur pawhin Lal Isua paw’n min chah rêng a, amaherawhchu kan fimkhur dan ah hian fimkhur a ngai a ni. Mahni ngaihdan leh hriat dana fimkhur turin Pathian thu hian min zirtir lo a, Amah Krista leh a thu hriat hi kan fimkhur dan tur chu a ni zawk. Chuvang chuan mi tu tu emaw thusawi leh zirtirnaa innghat lovin, ngun takin A thu min pek Bible hi zirchiangin bih ngun ila thutak kan hria anga, hlauh tur diktak hria in hlauh loh tur hlauvin kan buai lo vang.

Tunlaiin India sawrkarin a khua leh tui te chhinchhiahna turin census a kalpui mek a, Unique Identification (UID) a hmang dawn a ni. Identity card a ni ve mai a, hlauh tur a nih loh teh lul nen, thenkhat chuan kan fimkhur lutuk vang nge ni a Bible zirtirna dik atanga kan pen bo nasat lutuk vang tih pawh hriat loh in kan lo hlau ve em em ringawt a, a pawi hle a ni. Sakawlh hian mite bumin a nambar hmangin a chhinchhiah dawn ngei mai, amaherawhchu chhinchhiahna nazawng kan hmuh sakawlh zel mai chuan a buaithlak khawp ang.

Pathian kan ringa, Bible thu hi kan pawm tak tak a nih chuan UID hi sakawlh chhinchhiahna a nilova, hlauh tur a nilo tih hi sawi vak ngailo in a chiang reng a ni. Thupuan 13:16 ah chuan ti hian kan hmu a, “Tin, mi zawng zawng alian atein, ahausa aretheiin bawih leh bawih lo pawh, an kut ding lamah emaw an chalah emaw chhinchhiahna a neihtir hlawm a”. UID hi kutah emaw chalah emaw hman tur a nilo. Chang 17, 18 ah ti hian kan hmu leh a, “chhinchhiahna — Sakawlh hming emaw a hming nambar emaw — neite chauh lo chuan tuman engmah an lei leh an hralh theih loh nan. Hetah hian fin a tulzia a lang. Chhut thiam chuan Sakawlh nambar chu chhut rawh se; mihring nambar a ni si a; a zat chu 666 a ni ”. Sakawlh hming emaw a nambar a tih hi ngaihtuah la, UID leh nambar 666 hian inkungkaihna engmah a neilo a, India tih hming leh sakawlh paw’n an nei lo. India hi sakawlh ah i ngai emni zawk?

Sakawlh chu tunge ni ta: Kan hriat tur pawimawh tak mai chu Thupuan bua hrilhlawkna tam tak hi Thuthlung Hlui hrilhlawkna atanga lakchhuah emaw inzawm leh inkungkaih tlat anni tih hi a ni. Abik takin Daniela bun nen hian an inlaichin hnai em em a, Thupuan bu hrilhfiah tur hian Daniela hi a tangkai em em a, chutiang bawkin Daniela hrilhfiah turin Thupuan. Tichuan ‘sakawlh’ tih tawngkam pawh hi Thupuan hian sawi mahse enge/tunge a nih chiah hi a sawifiah tlat lova, tifiah tur chuan Daniela bu lamah kan kir a ngai tlat a ni.

Daniela bung 7 ah Daniela chuan mumang angin inlarna a hmu a, chutah chuan ‘sa ropui tak tak pali’ a hmu a. Heta ‘sa’ tia lehlin hi ‘beast’ tih a ni a, Thupuan bu a ‘sakawlh’ tia dah kha a ni. Lehlin thar ah chuan ‘sakawlh’ tia dah a lo ni ta, a lawmawm hle a ni. Tichuan Dan 7:17 ah vantirhkohin inlarna chu a hrilhfiah a, ‘Hêng sa(kawlh) ropui tak tak palite hi, lal pali lei ata lo chhuak tûrte chu an ni a” tiin. Heng lalram pali te hi history atangin Babulon, Media-Persia, Greece leh Rome lalram te anni tih kan hre thei a.

Tichuan Pathian thuin sakawlh a tih chu lalram (kingdom) a ni tih kan hre thei ta . Leia sakawlh (lalram) hnuhnung ber tur chu Rome lalram (Europe leh a pengte) a nih tlat avangin India hi chu a nilo hrim hrim tih hi a a chiang a ni. 476 AD khan Rome sawrkar chu a kehdarh a, sawrkar pakhat ang chuan ding tawh lo mahse Nebuchadnezzara mumang ang khan a then hlum, a then thir ang maiin ram hrang hrang ah a in thendarh ta a ni. Chungte chu tunlaia Europe ram hrang hrang te khu an ni ta a, USA ngei pawh hi Rome chhul chhuak tho a ni. Europe ram atanga pem thla ten ram an zu din a ni miau a.Tin, sakawlh chhinchhiahna hi neih ringawt theih a nilo, chibai buktu nih a ngai. “Tin, vantirhkoh dang a pathumna chuan aw ring takin, “Tupawhin Sakawlh leh a lem chibai bukin an chalah emaw an kutah emaw chhinchhiahna an neih chuan, chu mite ngei chuan Pathian thinurna uain, a thinurna nova engmah pawlh lova siam chu an in ang a, vantirhkoh thianghlimte mithmuh leh Beram No mithmuhah chuan mei leh kata nghaisakin an awm bawk ang” tih ziak a ni. A awmzia chu Lal Isua chibai buktu diktak ten sakawlh chhinchhiahna hi an duh lo chung emaw, an hriat loh in emaw an pu dawn lo tihna a ni.

Sakawlh nambar (666) chu enge: Bible tam zawk hian Thupuan 13:18 in sakawlh nambar a sawi hi 666 tiin an dah a, amaherawhchu kutziak (manuscript) hmasa thenkhat ah chuan 616 tih a ni tlat. Hei hi Kohhran hruaitu hmasa Irenaeus-a te leh midang chuan copy sual palh a nih an ring a, mahse scholar thenkhat chuan atira Johana ziak dan a nih an ring thung.

Entirnan Thupuan bu ziakna kutziak(manuscript) rintlak bera ngaih Codex Alexandrinus leh Codex Ephraemi Rescriptus ah te chuan 616 tih a ni a; kum 2005 khan Oxford University scholar ten Thupuan bu kutziak an hriat theih chin a upa ber Papyrus 115 an tih, tunhma lama an chhiar theih ngai loh kha tunlai thiamna hmangin an chhiar thei ta a, chutah pawh chuan 616 tiin a inziak bawk. Hetih lai hian Thuthlung Thar bu kutziak akim thlapa kan hmuh theih awmchhun leh Thupuan ziakna rintlak ber dawttua ngaih Codex Sinaiticus leh kutziak tam zawkah chuan 666 tih a ni thung.

Engpawh nise, 666 a ni emaw 616 a ni emaw, he nambar hi enge a pawimawhna tih chu zawhna pawimawh chu a ni. Zirtu tam berte ngaihdan chuan he nambar hi Rome emperor Nero-a sawina a nih an ring. Hei hi a chhan chu Grik tawnga Nero Kaisara tih kha Hebrai tawnga dah in a hawrap mal te te tlukpui nambar belh khawm kha 666 chiah a nih vang a ni. Mak angreng tak maiin Rome tawng Latin-a Nero Kaisara tih pawh hi Hebrai tawnga dah chuan a thumal belh khawm hi 616 a ni chiah bawk ! Thenkhat chuan Rome emperor tho Domitian-a kha niin an ngai ve bawk. Ani pawh hi a Latin title kha engtin tin emaw chhut khan 666 a nih vang a ni.

Chhinchhiah tlak deuh mai thil pakhat awm leh chu Rome lalram sawina ‘Latin kingdom’ tih hi Grik tawnga dah in 666 a chhuak a, ‘Italian kingdom’ ti pawh belh khawm in a nambar pakhat zawk 616 hi a chhuak chiah bawk. Kohhran siamthat a nih hnu khan reformer tam tak te khan Pope hi niin an ring bawk a. Hei hi a chhan chu Pope title-a an puh Vicarius Filii Dei (Vicar of The Son of God) tih hi belhkhawm in 666 chiah a ni bawk.

Tu hming emaw belh khawm hian 666 emaw 616 chu a chhuak ve thei zeuh zeuh, amaherawhchu sakawlh emaw Rome lalram nena inlaichinna nei tel kher hi chu an tam lo khawp mai. Thil chiang tak mai chu sakawlh nambar hi chhut chhut chuan khawvel history atang pawh hian Rome lalram nen inkungkaihna an nei tlat tih hi a ni. India chhiarpui nen erawh inzawmna a neilo a, India ram leh a mipuite him zawk na tur leh that tlanna tur zawk a ni a, hlauh tur engmah a awm lo. Chuvang chuan hlauh loh tur hlau a lo buai em em hi zirtirna diklo kan ngaihthlak nasat vang leh mahni a Bible kan zirchian peihlo vang a ni fo tih hria in mahni phak tawkin Bible zir ila, Isua Krista ah rinna nghat tlat in, a thuawih in Amah ah awm reng ila, chutah chuan sakawlh mai nilo a boss satana lak atang pawhin himna a awm a ni.

Similar Posts:

• Sakawlh 666
• Sakawlh leh tunlai khawvel
• Nambar chhiar dan thar
• Motor ke!
• Engtin nge ni dawn le?

Recent Posts:

• PÂWL LAL HRAWTNA AIZÂWL???
• MIZO HNAM SAKHAW DIK PHOCHHUAHNA- IVby. Rorelliana
• Hriat chian lehzual
• Sunglass man to chhan!
• Tawng tih hausak a pawimawh!

This entry was posted on Saturday, May 22nd, 2010 at 9:57 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.