mi(sual).com

- Afaka

Kum tam chu la liam lo mah se, a rei ve thawkhat hle ta mai, rei viauin a lang nain ka tan chuan nimin ral ta ang chauh kha a ni reng dawn a nih hi. Kei zawng ka thinlaiah a hlui mawlh lo a, hlui tir ka tum tak ngial paw’n a thar leh zawk si thin. Chuti ang ni-ah chuan khang hun laite kha chiang takin ka hriatnaah hian an la cham a, ka hriatna that bik vang pawh a ni lo, ka hriat that em vang zawk niin ka hria.

Tihian ka ngiahtuah fo thin “Val dang tawnah khiang awiin tu leh fate nen tar kun thleng paw’n dam mahla, khang hun laite kha nghilh bik hian i mawi lo”, tih vel mai mai hi amah a ka beisei san ber chu a nih tak hi, chu mai a ni lo khawilo kal nikhua a tihluih pawh ni lo tihpalh tak meuh meuha kan intawh chang nite hian, hriat chhuah tur hi kan ngah hman bik thin khawp a, eng tak hre chhuak ve ang maw, Sailova hla “Lam kawiah dar ang intawn chang ni hian thinlai a tho leh thin”, tih vel mai mai ka hrechhuak lo, rawn thar thin a chu ka hming pawh lam phal lo a, a aw nem leh no nalh tak mai in “Bawihte ka duh lutuk che asin ” tia biahthu min hlan laite ka hre nawn awn awn a, zawi sapa sawi kha nimahse a lo ring hle mai.

Ka rilru chuan “I la hre ve reng em” tiin ka zawt mawlh mawlh thin. Chu chu ka zawh rin ngam dan ber a ni mai, mahse kei chuan ka hrechhuak leh thin mai ni loin a bu ang thlap ka ni, kha zan thiang tak mai leh vawt raihah khan thingbuk hnuaiah thuin kan inkuah rial a, “In then tawh miah lo ang aw” tih thu ringawt pawh vawi li lai min hrilh kha! hriat reng ka duh loh thil hi ka hre reng tlat thin, hriat reng ka duh em em hre reng thei mang si lo hian, “Bawihte vawiin thleng hian ka la duh reng che asin” tia sawmna han siam mai hi ka chak rum rum fo, mahse ka tan chuan duh reng leh ngai em em chung sia lehlam hawi hmak hmak a ngai tlat bawk si, a va han khawlh tak em, ka tlin lo thelh thin zawng a ni.

Zanriah hnuhnung kan kil dun lai a, “Phaiah lehkha ka zir dawn, ka nu leh paten an ti tlat a, kar lehah khian ka kal tawh ang, chuvang ania chaw ei tura ka sawm che“ an ti mai kha chu a hmain min hrilh lawk si lo, ka hrilh hai lutuk kha ka khaw hmuhte a fiah lo zo vekin ka hria, Tih vak ngaihna awm hek lo tui lo zetin, “a tha alawm” chu kan ti ve hram a, zan ka mute pawh chu ka mutui thei lo, duh loh rai an sawi ang maiin ka mu tum bar ringawt mai a, theih chang se chelh din kha ka nuam hle a, hla phuahtuten nunrawng hmeltha an lo tih teivet hi nang ngei hi i lo nih hi ka ti rilru mawlh mawlh reng a, min tuarpui ni tak maw, kei leh ka vela thil awm te pawh chu an ngui ruai ni ber hian ka hria, zing ka han thote chu tih lang chi si loh lungawilohna chuan min la man tlat a, rawngbawltu vung tak phei chuan min hmu se ka kawchhungah ramhuai a lut ta emaw an ti mahna!

A kal dawn ta tak tak lengpui lam pana kan han inkhalh thlate chu tihlan ka tum loh vei nen “I lungawi chiah na nge, i hmel a va nur ve” chu min ti hram a, ka thinrim lutuk chuan vin deuh taka Lungawi nang han tih kawngtluan mai hi ka chak khawp mai a. Mahse, a nu leh pate kha an awm ve si a, inneih hma Politics khelh urhsun hunlai tak a ni bawk si, chutia han tih chi ziazang a ni si lo, lungawilohna tur a awm hlei nem te chu kan ti ve a lungawi hlek si lo chuan.

Lengpui Airport atanga a han thlawk chhuak ta daih phei kha chu, kha thlawhna khan ka rilru a thlawh chhuahpui daih a ni ber mai, ka kim lo tlat zuk nia! An thlawk chhuak chiah nain ka ngai em em a, ka mittui pawh ka chan hial a ni, tumah chu awm lo ni se chuan uar tak a han tah hawm hawm mai kha ka chak hle mai, mahse thu hnuhnung min hnut chhiah tam tak zinga pakhat khan min tilungawi a, ka ngaih a titha em em reng thin, tiang hian a sawi a “I tan ka rinawm tlat thin a, ka rinawm reng bawk ang” min ti kha a nia, a hun lai kha chuan Bible thu aiin ka ring zawk awm mang e, ka ngaihtuah chhuah apiangin tu hriat si loh hian ka nui vel a, khawlaia ka kal mai maite pawh hian “Engmah lah hi inhre ve der si lo a”, han tih chiam maite hi ka chak rum rum thin.

Chuti ang hlimna chuan min tuam vel chuk reng a, awmkhawhar lunglen in a zui bawk a, ni tin mai chuan lunglen chawk tho tawk velin phone-in kan inbe reng a, kan thiam leh theih ang tawkin rinawmna thu kan tiam dun reng bawk a, a awihawm leh zual nan, “ka hmangaih che” tiin kan inthlah dun thin. Kan inhmangaihnaah chuan ngaihthat lohna leh inrinhlelhna in hmun a chang lo, chuti ang chu ni mah se, an awm bo takah chuan lunglenna hian ka ta tak emaw min ti a, ka chhingmita a thla ka la neih chhunte mai chu sam kual velin runlum hnuthaite kan chan tir vel a, a chang leh ka hmaah chuan kan thlek no tir thul abak tih vak ngaihna awm hek lo, engtik lai mai pawh hian ka ngaihtuah a ni ber mai, ka inkhawm lahin thil dang ka ngaihtuah thei lo thuhriltu in thu a sawi laite pawh chuan pulpitah pawh a rawn la hawi no thei nasa mai thin a, thusawi engmah ka hre ngai lo.

Chuti ang reng reng chuan ka men chhung deuh thaw hi ka hmang ral thin a ni, chu mai a la ni lo mumang ram thlengin min kiansan chuang lo, mahse ka tan chuan nuam bawk si, hrehawm bawk si a ni ve tlat. Kan pahnih chuan “ka ngai lutuk che” tih chu a thunawn berah kan hmang a, nikhua a lo rei deuh hnu pawh chuan kan inhmangaihna chuan zual lam chu a la pan zel a, kan induhna leh kan inhmangaihna chu a pung deuh deuh ni hian ka hria.

Kan kar lam chu hla viau mah se, kan thinlung erawh hmun khat a ni a, kei pawhin ka intiam ang ngei chuan atan chauh tiin leng dang te chu sirah ka lo hnawl ve mek zel a, a ruk taka ka lo huat lem lohte pawh kan thuthlung chu a zahawm em avang chuan rinawmna chu ka vawng thei thin a ni. Chuti ang chu a nih mek lai chuan ka thian hnai tak hnen atangin thu lawmawm loh tak mai ka dawng ta, chu thu an College-ah bialpa a nei tih kan hria chu All India-ah hian kei aia thinrim kha an awm theih ka ring lo a hun lai kher kha chuan, mahse ka awih phal hlawl lo, dawt nise “Ka biak bum che a” min ti leh se hi kan ti khawp a mahse, ka thianpa lah khan a inti hre chiang em em mai leh ta nghal a, dawt em min hrilh ka ring si lo a chhan chu kha leh chen kha kan inkawm ve tawh a, dawt a sawi leh sawi loh chu ka hre chiang tlat, dawt min hrilh lo tih chu ka chiang a ni.

Chuveleh mahni inkhawngaihna chuan siai tak e ti niawm fahranin inthlahrung hlek lo hian a rawn inrawlh ve thuai a, thu lawmawm loh tak ka hriat tak avang chuan lungawi lo zet hian ka zawt ta a. Mahse, ani chuan min lo thinrim khum let zawk zawmah a “Min ringhlel a mi? Mite chuan duh tawkin lo sawi mah se, i tan ka rinawm tlat ang ka tih kha” a ti ve miau bawk si, kei lah tapek chu ka duh lutuk vang nge ka lungawi ve leh nghal mai bawk a, chuti anga ka rinhlelh vang chuan ngaihdam te ka dil let hial zawk a ni.

Tichuan, tlangkarah tur ni vawi tam tak a lo liam ta a, kum hnih lai lo haw tawh lo mah se, phone atang chuan kan inbe reng tho a, kan pahniha kan thunawn pawh a la ngai reng a ni, a tawpah chuan “Sual chu zep theih a ni lo” tih ang deuh hian a rukin bialpa a lo nei reng tih chu ka hre chhuak ta ni mai loin, hai rual lohin ka chiang ta a ni. Phone chuan ka zu be nghal a, ka thil hriat zawng zawng chu lungawi lo tak hian ka sawi ta mial mial a. Mahse, ka aw phawiah chuan ka thinrim hle tih chu lantir ka duh hauh lo, phat ngial an tum a, ka chian em avang chuan a pha thei ta lo a ni. Ngaihdam chu min dil viau nain ka hawi kir lo’ng a ni tawp mai, “Ka ngai che ka tih zawng zawngte, ka hmangaih che ka tih zawng zawng pawh kha ka tider hauh lo ka thinlung leh tihtakzetin ka sawi a ka hlan che a ni” a rawn ti leh hram a, kei chuan “Kei paw’n ka ti der hauh lo, mahse tun a i thil tih hi chu ka theihnghilh thei tawh ngai dawn lo, ngaidam che pawh ni ila ka hre reng tawh dawn a.

Chuvang chuan mangtha pawt mai le” tiin ka thlah ta a nih kha, tun tum pawh hi ka pa leh thei thlawt lo, ka tap nasa lutuk kha ka hritlang hial asin, a ngaihdam dilna thu message-a rawn thawn te, a phone call-te chu ka phone-ah chuan vawi duai lo rawn ri chel chul mah se, kam khat mahin ka chhang lo a tirah chuan hrehawm ka ti hle mai.

Mahse, nikhua a lo rei a, tlem chuan ziaawm lam chu ka pan thei ta a, a chanchin chu ka ngaihven ru reng tho, a hnu kum khat velah chuan a zirlai chu zoin a rawn ho ve ta a, a thiante bulah a inchhir thu te, hrehawm a tih thu te a lo sawi chamchi a, a thiante pawh chuan min hrilh fo mai, amah ngei paw’n message-in ka chhan pawh beisei tawh chuang lo chuan min ngaih thu te, min hmangaih reng thu te, khati ang thil ka chunga a tih atang khan bialpa a neih tawh ngai loh thute leh a thiltiha hlawhtlinna a hmuh changte hian min la rawn thawn ziah thin a ni, chhang let chak viau thin mah ila ka la lungawi thei tlat lo, ka chhang let ngai lo a ni.

Khawilo kal nikhua a kan han intawh chang ni te hian ka biak chak thin zia hi aw! Ka insum zo lo thelh thin mah se, ka lungawi lohna chuan kian zai reng a rel si loh avangin ka hriat loh kal pel hmiah hmiah mai zel a ni. Chuti chung pawh chuan “I duh duh danin min tithei alawm, min rulh zawh hun ka lo nghak ang e” tiin message bawk chuan min rawn la hrilh hram thin a, “Eng tin nge ka tih tak ang le, ka duhin ka hmangaih si a, ka ngai em em mai bawk si, a lam ka hawi leh mai dawn em ni? ka inthupna zozaite hi ka inpuang vek mai dawn em ni le?”, tia ka inngaihtuah apiang hian, ka thil duh loh ber leh theihnghilh ka duh em em ka theihnghilh theih hauh loh ka chunga a thiltih kha ka hre chhuak leh thin a, ka lungawi thei thlawt lo a ni.

Similar Posts:

• Mihausa chu!
• CHHÂM
• Autumn In My Heart – II
• A Zu Zi tan der a ni lo maw?
• Thu fahrah pali

Recent Posts:

• Ka chantawkah ka lungawi em?
• Scientist te an tawngtai ngai em?
• Solar Eclipse 2012: The ‘Ring of Fire’
• Post HOT deuh
• Ka nu dawt sawi te

This entry was posted on Tuesday, June 22nd, 2010 at 9:28 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.