mi(sual).com

Hman ni khan, Mi(sual) thiante’n Mizo damdawi  in rawn tarlang tawh a, a tha khawp mai a, mahse, tu kan sel e tihna ni lovin, tamtak kha chu tunlai chhana hmuh zen zen har tak te, hmu pawh ni ila – a ni ngei a ngem ti a, ngaihngam tak a  han dawlh liam a har mai thei.

Thlai thatna hi tamtak chuan kan hre fur awm e. Eden huan atang tawh khan sa lam ai chuan, thlai leh theirah lam hi Pathianin mihringte tan alo ruahman zawk niin a lang. Mi hmasa tamtak te kha chuan, any-terian lam aiin, vegetarian nih anlo thlang tawh thin. Engpawhnise, thil hmuh harsa lem silo, kan taksa tan a tangkai thlai leh thei, damdawia hman ve theihte han sawi ve luam dawn teh ang. Mi(sual) hovin, kan tangkaipui tak hlauhvin:

1. TOMATO: Tomato hi a irh chhuahna hmun chu America ram chhim lamah a ni a. Kum zabi 16-na vel kha chuan, pangpar ang deuh a, khawi mawi atan an hman thin a. Kum 1860 vel atang khan ei thein a ni tih an hmu chhuak chho ta a, chumi hnuah khawvel hmuh hrang hrangah lo darh zauvin, anlo ching uar tan ta a. Tomato hian Vitamin C, Vitamin B Complex, Calcium, Phosphorous leh Iron te a pai a. Chungte chungte chu taksa tan a pawimawh hle a ni. Tomato hi natna tam tak entirnan zun thlum, mit thalo leh zun kawng thalo atan te damdawi tha tak an ni. Tin, Tomato tui hi TB, chuap natna, thin thalo, pum thalo, ek khal leh kawthalo tan a tha a, tin, hmaia hnawihin hmai a ti-ngo in arngeng a ti dam thei bawk a ni.

2. CARROT: Carrot hi khawvel hmun hrang hrangah chinlohna a awm ta meuh lo. A lo irh chhuahna hmun chu India ram, Punjab leh Kashmir nia hriat a ni. Carrot ah hian carotene (Vitamin A insiamna) a awm a, chu chu Vitamin ah a insiam a, taksain Vitamin a mamawhnaah a hman theih a ni. Carrot ah hian mihring taksa mamawh minerals chi hrang hrang a awm a, chungte chuan thisen a tifaiin a ti chak thin. Carrot tui hi naupang leh puitling te tan a tangkai hle, mit a tivarin vun ro leh thap a timam in a timawi thin. Chaw ei kham veleha Carrot ei hi a tha hle a, ka chhunga natna hrik awm te a ti thi thei a, ha a tifai a, hahni leh hafang a ti hrisel bawk. Chu mai bakah pum nuam lo tan a tha hle a ni. Carrot ei dan hi chi hrang hrang awm mahse a hela ei hi taksa tan a tha ber a ni.

3. MULA: Mula hi Asia ramah chin hmasak ber a ni a, chumi atang chuan khawvel hmun hrang hrang ah chin darh a ni. Mula-ah hian Calsium, Phosphorous, Iron, Vitamin C leh Vitamin B Complex te a awm a, taksa mamawh phu-hruk kim tur chuan Mula hi a hela ei ngei tur a ni. Mula tui sawr chhuah hi pile natna, zun kawng thalo, te tan damdawi tha tak a ni a. a hnah tui sawr hi thinlianin a ngeih hle. Mula chi rawtsawma hmai hnawih in, hmai a ti ngovin a tifai thin a. Ringworm natna atan pawh damdawiah a hman theih bawk a ni.

4. FANGHMA: Fanghma hian taksa a vawng daiin taksa a ti harh thin. Fanghma hian, taksa hriselna leh taksa tichaktu tamtak, Potassium, Sodium, Magnisium, Sulphur, Chlorine leh Silicon te a awm a. Chaw pai tawihna kawngah taksa a pui tha a, ek khal/ek tang thinte tan damdawi thatak pakhat a ni. Pum lam thalo, entirnan : Ulser leh Gastric nei te tan fanghmatui sawrchhuah in in pum a tinuam thin. Thisen sang leh kaih tan pawh a tha hle. Fanghma tui hi Carrot tui nena chawhpawlhin ruhseh damdawiah a hman theih a ni. Fanghma mu hi dhai/dahi nena chawhpawlha eiin zun kawng tha lo tan a tha. Arngeng, vunro leh vun chuarin an ngeih hle a, vun leh hmai tih mawi nan pawh fanghma hi an hmang tangkai hle a ni.

5. ZIKHLUM: Zikhlum hi India, Malaysia, Philippines, Africa leh America-ah te chin a ni a, mahse alo irh chhuahna tak chu Europe ramah a ni. Zikhlum hian Vitamin C, Vitamin B Complex ,Calcium, Phosphorous leh Iron te a pai a. Zikhlum hi a hel, a chhum, a kan leh duh dan dana sawngbawlin a ei theih a, mahse mithiamte chuan a hela eiin pai tawih a awlsam ber an ti. Zikhlum hian chaw kawng a vawngfai a, pumpui ulcer nei te tan pawh a tha hle a ni. Vun natna chi hrang hrang, ulcer, pan leh kangah te zikhlum hnaha tuamin a tihdam theih. Mithiamte chuan natna chi hrang hrang laka min venghimtu hi Zikhlumah hian a tam a, taksa a tichak a, mihring a ti tar har a, hmel a timawi thin bawk. Naupang lam tan a tangkai ang bawkin, upa lam tan pawh a tha hle a ni.

6. LIMBU: Limbu hnah hian limonene (tel rimtui) a pai a, a hnah 20gms tui litre 1 ah chhuan so a, nitin no 3 in tur. Chu chu mut tui nan te, pumna atan te, Rulhlut damdawi ah te a a tha. A kawr pawh khawsik, Rulhlut, pum nuamlo leh chaw eitulo tan a tha fu. Tin, Limbu tui hian vitamin B, C, acid , flavonoid te a pai a.

Vitamin C tlakchham vanga scurvy natna te,pumpui chaklo te, taksa a al tam lutuk (sa ei tam hi thisen leh zunah al a tam duh) hian ruhseh te, kal a lungte a siam thei a – Limbu tui sawr in tam a tha. Thisen a ti thiang hlimin, kal natna, ruhseh te a veng thei. Tin, Limbu tui a citrates (citric acid & salt) te hian kal a lungte awm an chiah ral thei tih proof a ni tawh bawk.

Limbu thatna dang: 1)Limbu tui hian vitamin P leh hesperidin te a pai tel a, chu chu thisen zam tan a tha hlebawk.   Ke vung, thahruichat, piles, BP sang tan a tha bawk.

2) Limbu tui hian khuh hip hrik, tonsil a awm te, Khawthalo hrik te a suat vek thei. In chhungkua a khawthalo an awm chuan – Limbu tui intir ang che.

3) Vun, tin, sam a ti chak a, sam te phei chu a ti mawi.

Limbu Zoramah awlsam tak a hmuh theih chi an ni em le? Kuhva leh sikret lam aiin Silchar a tangin Limbu hi chah lut ruih ruih mai ila…kan thatpui zawk awm e.

Similar Posts:

• Thei tangkai te
• Pumpui Cancer
• Valentine’s Gourmet
• Tlasik Huan
• Cancer damdawi

Recent Posts:

• PÂWL LAL HRAWTNA AIZÂWL???
• MIZO HNAM SAKHAW DIK PHOCHHUAHNA- IVby. Rorelliana
• Hriat chian lehzual
• Sunglass man to chhan!
• Tawng tih hausak a pawimawh!

This entry was posted on Thursday, July 8th, 2010 at 11:01 am and is filed under Health, Information. You can follow any responses to this entry through the RSS 2.0 feed. You can leave a response, or trackback from your own site.